प्रकास 10 - पश्चिम तामाङस्वार्गदुत्तेङ् डीइ ज्यीद छ्येः 1 हुजुलीप्चे ङचे ल्हो-ल्हो सक्तीसाली स्वर्गदुत् गी स्वर्ग ग्यम्से फप्युटीबल म्रङ्ज्यी। थेइ ल्हीःत मुक्पचे तुन्बल, ओसेम् थेइ क्ररी लर्क्युङ् मुबल। थेइ लीः दीनी र्हङ्ब ओसेम् कङ्मामी मेइ थाम् र्हङ्ब मुबल। 2 थेइ यारी फेथेन्बे डीइ ज्यीद छ्येः गीः मुबल। थेचे र्हङ्की केत् कङ् समुन्द्ररी ओसेम् ल्होम् कङ् सरी थेन्ज्यी। 3 ओसेम् थेचे ताः ङ्हर्ब र्हङ्ले ङ्हच्छ्यङ् केत् तेत्ज्यीम् क्रीङ्ज्यी। थेचे क्रीङ्ब साच्चेनो मु गुरुङ्बे केत् ङ्यीस् थ्येःज्यी। 4 हुजु मु गुरुङ्बे केत् ङ्यीस् थ्येब साच्चेनो ङचे ब्रीब म्हइबल मुबल, तर ङचे स्वर्ग ग्यम्से चोले पङ्बे केत् थ्येःज्यी, “मु गुरुङ्बे केत् ङ्यीस्चे पङ्बे तम् थब्रीउ बरु सेम्न्हङ् छुम्ज्यीम् थेनो।” 5 हुजुलीप्चे ङचे म्रङ्बे समुन्द्रतेङ् सरी रप्टीबे स्वर्गदुत्चे थेइ केत् या स्वर्गतोर् कोत्ज्यी। 6 ओसेम् हुजु स्वार्गदुत्चे खेमपङ्लेनो सोम्बो तजेत्बे, स्वर्गतेङ् जम्बुलीङ् ओसेम् समुन्द्रतेङ् हुजुमारी मुबे जम्मनो स्हेःमात स्य्हेङ्जेत्पे पर्मेस्वर्की छेन्री सपथ चज्यीम् चोले पङ्ज्यी, “देरेम् गेःस्ये अरे। 7 तर सातौ स्वर्गदुत्चे थेइ तुरही र्हप्प छ्येःबे बेलोरी पर्मेस्वर्चे थेङ्की योक्पो अगम्बक्तमा ग्यम्से सुङ्जेत्पे रहस्यइ तम् टोप् तस्ये मुब।” 8 ओसेम् देबेएनो ङोन्ग्यम् मु ग्यम्से थ्येःबे केत्चे चोले पङ्ज्यी, “ङ्यीउ, समुन्द्रतेङ् सरी रप्टीबे स्वर्गदुत्की यारी मुबे फेथेन्बे डीइ ज्यीद छ्येः बोउ।” 9 ओसेम् ङ हुजु स्वर्गदुत्ज ङ्यीज्यीम् हुजु डीइ ज्यीद छ्येः र्हीत्ज्यी। ओसेम् थेचे ङत पङ्ज्यी, “न कीनो, ओसेम् चउ! ओसेम् चु एइ फोरी क्युङ्स्ये मुब तर सुङ्रीमी खुदु र्हङ्ले ङम्स्ये मुब।” 10 ङचे डीइ ज्यीद छ्येः स्वर्गदुत्की या ग्यम्से कीन्ज्यीम् चज्यी। हुजु ङइ सुङ्री खुदु र्हङ्ले ङम्ज्यी तर चज्यीन्ब बीसेम् ङइ फोरी क्युङ्ज्यी। 11 हुजुलीप्चे ङत चोले पङ्ज्यी, “एचे देबेएनो य्हक्को म्हीमा, य्हक्को जातीमा, ओसेम् य्हक्को ग्योत्मातेङ् ग्यल्बोमाकी बारेरी पर्मेस्वर्की फ्रोइ स्येत्थोस्ये मुब।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.