फीलीप्पी 3 - पश्चिम तामाङदेमेन्की धार्मीक्ता 1 ज्युरी बीस्वासी र्होमा, एङ्यीमा तङो, तलेपङ्सम् प्रभु एङ्यीमातेङ् मुब। एङ्यीमात ब्रीज्यीन्बे तम् देबेएनो दोःज्यीम् ब्रीबरी ङ नर्सु अल, चुचे एङ्यीमाकी बीस्वास्त जोगइतीब। 2 नीकीमा र्हङ्बे म्हीमा ग्यम्से होसीयार् तज्यीम् टीउ। हुजुमामी दुस्ट लक् स्य्हेङ्बे म्हीमा ओसेम् खतना स्य्हेङ्पुङ्बे म्हीमा य्हीन्ब। 3 तलेपङ्सम् पर्मेस्वर्त थेङ्की पबीत्र आत्मा ग्यम्से तेन्बे, ओसेम् येसु ख्रीस्ट्चे ङ्य्हङ्माकी लागीरी स्य्हेङ्जेत्पे लक्की लागीरी गर्ब स्य्हेङ्बे, ओसेम् ल्हीःरी भर् अस्य्हेङ्बे देमेन्की खतना ङ्य्हङ्मानो य्हीन्ब। 4 ङतमी र्हङ्की लक्रीनो भर् थेन्बे कारन् मुब। खल्चे पङ्लेनो र्हङ्की लक्री भर् लबे कारन् मुब पङ्ज्यी पङ्सम्, ङतेङ्मी झेन् य्हक्को कारन् मुब। 5 तलेपङ्सम् ङ न्हज्यीम् ब्रेत्रेत्री ङत खतना स्य्हेङ्पीन्ब मुबल। ङ बेन्यामीन खलक्की इस्राएली य्हीन्ब। ङ देमेन्की हीब्रु य्हीन्ब। मोसाचे ब्रीबे नीयम् ङ्येन्बरीमी ङ फरीसी मुबल। 6 ङ य्हक्को जोस् लज्यीम् मन्डलीत दुख पीन्बे म्ही मुबल। धार्मीक्ताकी तम् पङ्थोसम् मोसाचे ब्रीबे नीयम् ङ्येन्बरीमी ङ दोस् अरेबे म्ही मुबल। 7 तर होदे बेलोरी ङचे ङइ लागीरी लक् तबल म्हेन्बे तम्मा ङचे ख्रीस्ट्री बीस्वास् स्य्हेङ्ब बीसेम् लक् अतबल यङ्ज्यी। 8 होदेकीनो अय्हीन्, येसु ख्रीस्ट्त र्हङ्की प्रभु पङ्ज्यीम् स्येःम्यङ्बे ङ्य्हच्छ्यङ् ज्ञान्तेङ् व्हबतेङ्मी ल्होःल्हो जम्मनो तम्मा लक् अतबल यङ्ब। थेङ्की लागीरी ङचे जम्मनो स्हेःमात ख्लाज्यी, ओसेम् थेङ्त यङ्बे लागीरी चु जम्मनो तम्मात ख्रीदी र्हङ्ब म्हेन्बल मुब। 9 ओसेम् ङ थेङ्तेङ् गीः तबल मुब। मोसाचे ब्रीबे नीयम् ङ्येन्ज्यीम् ङ परमेस्वरकी ङोन्ग्यम् धर्मी तअखम्, तर देरेम् ङइ धार्मीक्ता ख्रीष्ट्री बीस्वास् स्य्हेङ्बल तज्यीम् तब। ओसेम् पर्मेस्वर् ग्यम्से खबे धार्मीक्तामी बीस्वास्री भर् तब। 10 ङचे ख्रीस्ट्तेङ् थेङ्की पुनरुत्थानकी सक्तीता स्येःब खम्खइ ओसेम् थेङ्ल र्हङ्बे दु:ख ङचेएनो नाज्यीम् थेङ्की स्यीबरी ङएनो थेङ् र्हङ्बनो तबे सेम् लब। 11 तखम्सम् स्यीबलमा ग्यम्से ङ पुनरुत्थान तखइ। बक्सीस् डानले छ्योङो 12 ङचे जम्मनो यङ्ज्यीन्बल मुब ओसेम् सीद्द तज्यीन्बल मुब बी, ङ अपङ्। ङचे चु बक्सीस् यङ्बरी बङ् लटीब मुब, हुजुइ लागीरी येसु ख्रीस्ट्चे ङत ङोन्ग्यम्नो र्हङ्ल स्य्हेङ्जेत्पल मुब। 13 बीस्वासी र्होमा, ङचे चु जम्मनो यङ्ज्यीन्बल मुब बी ङचे अम्हेन्, तर ङ लक् गीः स्य्हेङ्ब, हुजु लक्मी लीक्यम्की तम्मात म्लेत्ज्यीम् ङोन्ग्यम् तबे तम्मा यङ्बरी ङ कोसीस् लब। 14 होत्तज्यीम् ङ स्वर्गइ बक्सीस् डाबे सेम् लज्यीम् छयोङ्टीब मुब। पर्मेस्वर्चे ङत चुइ लागीरी ख्रीस्ट् येसु ग्यम्से खेमेएनो अबेबे जीवन् यङ्बरी ङ्होत्जेत्ज्यी। 15 ङ्य्हङ्मा आत्मारी च्यीप्पलमा जम्मचेनो चोलेनो म्हेन्थोब। एङ्यीमान्हङ्री डेत्डेत्ल ल्होःल्हो सेम् मुसम् पर्मेस्वर्चेनो एङ्यीमात खजु तम् ठीक् मुब हुजु गोनलजेत्स्ये मुब। 16 पर्मेस्वर्चे ङ्य्हङ्मात ङोन्नो ङोन्ज्यीन्बे तम्त कोङ्नले चुङ्ज्यीम् ब्रथोब। 17 ङइ बीस्वासी र्होमा, ङचे स्य्हेङ्ब र्हङ्ले एङ्यीमाचेएनो स्य्हेङो, ङ्यीमा एङ्यीमाकी लागीरी नमुना तबल मुब। होत्तज्यीम् एङ्यीमाचे चु नमुना अनुसार ब्रबलमा ग्यम्से लोप्थोब। 18 ङचे एङ्यीमात य्हक्को ख्यप् पङ्ज्यीन्बे तम् ङ देबेएनो मीःनङ्ले मीख्ली लज्यीम् पङ्ब की य्हक्को म्हीमा ख्रीस्ट्की क्रुस्की सत्तुर्नो तज्यीम् ब्रब। 19 थेङ्यीमाकी नास् नर्करीनो तस्ये मुब। तलेपङ्सम् थेङ्यीमाकी ल्हीःत तोबे तम्माकीनो यङ्बे सेम् लबनो थेङ्यीमाकी ख्ल य्हीन्ब। पेत्थोबे तम्मारी थेङ्यीमा झेन् घमन्ड स्य्हेङ्ब। थेङ्यीमाकी सेम् चु जम्बुलीङ्की तम्मारीकीनो पीत्प। 20 तर ङ्य्हङ्माकी नागरीक्ता स्वर्गरी मुब। मुक्ती न्हङ्बे ङ्य्हङ्की प्रभु येसु ख्रीस्ट् स्वर्ग ग्यम्से ब्यन्युजेत्स्ये मुब बी ङ्य्हङ्मा ब्रेन्ज्यीम् टीब। 21 थेङ्तेङ् जम्मा स्हेःमा र्हङ्की अधीन्री बबे सक्ती मुब। थेङ्की चु सक्तीचेनो ङ्य्हङ्की चु कम्जोर् ल्हीःमात थेङ्ल र्हङ्बे महीमीत् ल्हीः स्य्हेङ्जेत्स्ये मुब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.