फीलीप्पी 1 - पश्चिम तामाङ1 येसु ख्रीस्ट्की योक्पो ङ पावल, ओसेम् ङतेङ् मुबे तीमोथी ग्यम्से येसु ख्रीस्ट्री मुबे फीलीप्पीइ पर्मेस्वर्की म्हीमातेङ् बीसप्मा ओसेम् डीकन्मात: 2 ङ्य्हङ्की पर्मेस्वर् अप ओसेम् प्रभु येसु ख्रीस्ट्चे एङ्यीमा जम्मतनो अनुग्रहतेङ् सान्ती न्हङ्खइ। पावलकी प्रार्थना 3 एङ्यीमात व्हल् लबे बेलोरी ङ खेम पङ्लेनो पर्मेस्वर्त व्होर्छ्ये पीन्ब। 4 एङ्यीमा जम्मइ लागीरी प्रार्थना स्य्हेङ्बे बेलोरी ङ खेम पङ्लेनो तङ्तङ्ज्यीम् प्रार्थाना स्य्हेङ्ब। 5 तलेपङ्सम् ज्यबे सम्तर् स्येत्पे लक्की लागीरी एङ्यीमाचे ङोन्ग्यम्की दीन् य्हङ्से देरेसम्मनो ङत र्हो लटीबल मुब। 6 ङत चु तम्री बीस्वास् मुब की पर्मेस्वर्चे एङ्यीमारी तीप्जेत्पे ज्यबे लक् येसु ख्रीस्ट् दोःज्यीम् ब्योन्अयुगदे पर्मेस्वर्चेनो टोप् लजेत्स्ये मुब। 7 एङ्यीमात ङचे खेम पङ्लेनो ङइ सेम्री थेन्बल मुब। एङ्यीमाकी बारेरी चोतेब म्हेन्ब ङचे ज्यब म्हेन्ज्यी, तलेपङ्सम् देरे ङ जेल्री मुलेएनो ओसेम् जेल्री अरेलेएनो, एङ्यीमा ङतेङ् बक्च्य ज्यबे सम्तर् स्येत्परी ओसेम् जोगाइतीबरी परमेस्वरचे न्हङ्जेत्पे अनुग्रहरी ङतेङ् बक्च्य मुब। 8 एङ्यीमात खतु लबे सेम् ङल य्हक्को मुब, तलेपङ्सम् एङ्यीमात ङचेएनो येसु ख्रीस्ट्चे म्होइब र्हङ्ले म्होइब। ङचे चु तम् देमेन् पङ्टीब बी पर्मेस्वर्नो साक्षी मुब। 9 ङइ प्रार्थना मुब की एङ्यीमाकी चु म्होइब ज्ञान्तेङ बुद्दीरी य्हक्को तबोर्स्यीनो टीखइ। 10 चोले तसम्कीनो एङ्यीमाचे जम्म न्हङ्की ज्यबे स्हेःत दम्ब खम्स्ये मुब, ओसेम् ख्रीस्ट् ब्योन्युबे बेलोरी एङ्यीमा सुद्दतेङ् दोस् अरेबल तस्ये मुब। 11 पर्मेस्वर्की महीमातेङ् तोप्पइ लागीरी येसु ख्रीस्ट्की सक्ती ग्यम्से एङ्यीमाचे धार्मीक्ताइ लक्मा स्य्हेङो। सोब ख्रीस्ट् य्हीन्ब 12 बीस्वासी र्होमा, ङइ जोरी खबे तम्माचे ज्यबे सम्तर् ठम्बरी र्हो स्य्हेङ्बल मुब पङ्बे तम् एङ्यीमाचे स्येःखइ बी ङचे म्हेन्ब। 13 ङचे ख्रीस्ट्की प्रचार् स्य्हेङ्बल तज्यीम् ङत जेल्री च्युप्पल बी दर्बार्की जम्मनो स्यीपाइमातेङ् चुरी मुबे ल्हो-ल्हो म्हीमाचेएनो स्येःबल मुब। 14 ङ जेल्री दोःबल तज्यीम् य्हक्को र्हङ्ब बीस्वासीमा प्रभुरी बङ्ज्येन् तबल मुब। ओसेम् थेङ्यीमाचे अलोङ्नले ज्यबे सम्तर् स्येत्परी झेन् आर् यङ्बल मुब। 15 य्हीन्बरीम् गदे म्हीमाचेम् ल्होल्होचे बीम र्हङ्चे य्हक्को ज्यबे लक् स्य्हेङ्ज्यी पङ्ज्यीम् ङोन्बरी ङतेङ् स्हेर्ज्यीम् ख्रीस्ट्की बारेरी प्रचार् स्य्हेङ्ब, तर गदेचेम् ज्यबे सेम् थोःज्यीम् ख्रीस्ट्की बारेरी प्रचार् स्य्हेङ्ब। 16 पर्मेस्वर्चे ङत ज्यबे सम्तर्त जोगइतीज्यीम् थेन्बे लागीरी ङत चु जेल्री थेन्बल मुब पङ्बे तम् स्येःबलमाचे चु लक् म्होइज्यीम् स्य्हेङ्ब। 17 ङत स्हेर्बलमाचेमी ज्यबे सेम् थोःज्यीम् अय्हीन् तर र्हङ्तकीनो ज्यब तखइ ओसेम् ङचे जेल्री झेन् य्हक्को दु:ख यङ्खइ पङ्बे सेम् लज्यीम् ख्रीस्ट्की प्रचार् स्य्हेङ्ब। 18 ता तलेनो, मुल् तम्मी चु य्हीन्ब: देमेन्लेनो स्य्हेङ्लेनो, स्य्हेङ्ब र्हङ्लेकीनो स्य्हेङ्लेनो, खले लज्यीम् पङ्लेनो ख्रीस्ट्की प्रचार तखइ, चु तम्रीनो ङ तङ्ब। ओसेम् ङ तङ्स्यीनो टीस्ये मुब, 19 तलेपङ्सम् ङचे स्येःब की एङ्यीमाकी प्रार्थनातेङ येसु ख्रीस्ट्की आत्माचे न्हङ्बे र्हो ग्यम्से लज्यीम् ङ चु दुख ग्यम्से फेःस्ये मुब। 20 ङइ ङ्य्हच्छ्यङ् सेम्तेङ आस् चु य्हीन्ब, की ङ र्हङ्की लक्री ल्होल्होमातेङ् पेत्अथोःखइ। तर खजु बेलोरी पङ्लेनो, खास लज्यीम् देरे, ङ आर् लज्यीम स्यीलेनो सोलेनो ङ ग्यम्से ख्रीस्ट्की स्य्हेस तखइ। 21 तलेपङ्सम् ङइ लागीरी सोबमी ख्रीस्ट् य्हीन्ब, ओसेम् स्यीबमी फाइद य्हीन्ब। 22 होत्तज्यीम् ङ ल्हीःरी सोटीसम् ङ ख्रीस्ट्की लागीरी लक् स्य्हेङ्स्यीनो टीस्ये मुब। तर स्यीब वुइ सोब खजु दम्थोब ङचे अस्ये। 23 ङ थोम्बल मुब। चु जम्बुलीङ् पीत्थेन्ज्यीम् ख्रीस्ट्तेङ् बक्च्य तबे सेम् य्हक्को मुब, चुमी य्हक्को ज्यबे तम् य्हीन्ब। 24 तर एङ्यीमाकी लागीरीमी ङ सोटीबनो ज्यब य्हीन्ब। 25 चु तम्री ङ ढुक्क मुब की एङ्यीमात बीस्वास्री कोङ्न लबरीतेङ् तङ्न लबरी ङ एङ्यीमातेङ् बक्च्य टीस्ये मुब। 26 ङ एङ्यीमाज देबेएनो दोज्यीम् खबतेङ् ङचे लज्यीम एङ्यीमाचे येसु ख्रीस्ट्त झेन् य्हक्को तोप्प खम्स्ये मुब। 27 ङ्हच्छ्यङ् तम् चुनो य्हीन्ब की एङ्यीमाकी जीवन्की चालचलन ख्रीस्ट्की ज्यबे सम्तर्त जेःबल तखइ। होत्तज्यीम् ङचे एङ्यीमात खदु तलेनो, अतलेनो एङ्यीमाचे उदेस्ये गी:कीनो कीन्ज्यीम् सेम् गीः तज्यीम् ज्यबे सम्तर् ग्यम्से बीस्वास्की लागीरी लक् स्य्हेङ्टीब बी ङचे थ्ये:म्यङ्खइ। 28 एङ्यीमा र्हङ्की सत्तुर्मा ग्यम्से थलोङो। एङ्यीमाचे खेम पङ्लेनो आर् लउ, चु ग्यम्सेनो एङ्यीमाकी बीरोधीमा ब्रेःस्ये मुब, ओसेम् एङ्यीमा थर्स्ये मुब पङ्ज्यीम् ङोन्ब। पर्मेस्वर्चेनो चु जम्मनो तनलजेत्स्ये मुब। 29 एङ्यीमाचे ख्रीस्ट्री बीस्वास् स्य्हेङ्बकीनो अय्हीन्, तर थेङ्की लागीरी दु:ख नाज्यीम् थेङ्की स्य्हप्तो स्य्हेङ्बरी पर्मेस्वर्चे अनुग्रहएनो न्हङ्जेत्पल मुब। 30 य्हर्बे दीन्मारी ङचे नाबे दुखमा एङ्यीमाचे म्रङ्बल मुबल, ओसेम् हुजु दुखमा ङचे देरेएनो नाटीब मुब पङ्बे तम् एङ्यीमाचे थ्येःबल मुब। देरेम् एङ्यीमाचेएनो हुजु दुख नाटीब मुब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.