फीलेमोन 1 - पश्चिम तामाङ1 येसु ख्रीस्ट्की बारेरी प्रचार् स्य्हेङ्बल तज्यीम् जेल्री मुबे ङ पावलतेङ् अले तीमोथी ग्यम्से ङ्य्हङ्मातेङ् बक्च्य लक् स्य्हेङ्बे म्होइबे र्हो फीलेमोन, 2 ओसेम् ङ्य्हङ्माकी अङ अप्फीया ओसेम् ङ्यीमातेङ् बक्च्य लक् स्य्हेङ्बे अर्खीप्पस ओसेम् एइ दीम्री र्हुब् तबे मन्डलीइ म्हीमातएनो लस्सो मुब। 3 पर्मेस्वर् ङ्य्हङ्माकी अप ओसेम् प्रभु येसु ख्रीस्ट्चे एङ्यीमात अनुग्रहतेङ् सान्ती न्हङ्जेत्खइ। फीलेमोनकी म्होइबतेङ् बीस्वास् 4 अले फीलेमोन्, ङचे एइ लागीरी प्रार्थना स्य्हेङ्बे बेलोरी ङचे पर्मेस्वर्त व्होर्छ्ये पीन्ब। 5 तलेपङ्सम् प्रभु येसुत एचे स्य्हेङ्बे बीस्वास्तेङ् पर्मेस्वर्की जम्मनो म्हीमात म्होइबे तम् ङचे थ्येःबल मुब। 6 एचे बीस्वासीमातेङ् सङ्गतीमा य्हक्को स्य्हेङ्खइ ओसेम् पर्मेस्वर्चे ङ्य्हङ्मात न्हङ्जेत्पे जम्मनो ज्यबे तम्मा एङ्यीमाचे ज्यनले गोब खम्बे सक्ती यङ्खइ बी ङचे प्रार्थना स्य्हेङ्ब, तलेपङ्सम् ङ्य्हङ्माचे ख्रीस्ट्री बीस्वास् स्य्हेङ्ब। 7 म्होइबे अले, एचे ल्हो-ल्होमात म्होइबल तज्यीम् ङचे य्हक्को तङ्बतेङ् य्हक्को आर् यङ्बल मुब। तलेपङ्सम् एचे पर्मेस्वर्की म्हीमाकी सेम् तङ्नलबल मुब। पावल्चे ओनेसीमसकी लागीरी फ्या लबल 8 होत्तज्यीम् ख्रीस्ट्चे ङत न्हङ्जेत्पे अधीकार् ग्यम्से एचे ता स्य्हेङ्थोब हुजु स्य्हेङो पङ्ज्यीम् कुल्ब खम्स्येल, 9 तर ङचे एत म्होइबल तज्यीम् ङ एत फ्या लज्यीम् पङ्ब। ङ पावल खेक्प म्ही, ओसेम् देरे येसु ख्रीस्ट्की लागीरी जेल्री मुब। 10 प्रभुरी ङइ ज र्हङ्बे ओनेसीमसकी लागीरी ङ एत फ्या लब। चुरी जेल्री च्युप्पे बेलोरी ङ थेइ अप तबल मुब। 11 ङोन्ग्यम् थे एइ लागीरी लक् अतबल मुबल, तर देरेम् थे ङ्य्हङ् ङ्य्हीकी लागीरीनो लक् तबल मुब। 12 ङ थेत दोःज्यीम् एजानो पीत्खटीब मुब। थेत ङचे सेम् य्हङ्सेनो य्हक्को म्होइब। 13 ज्यबे सम्तर् स्येत्पल तज्यीम् ङ जेल्री च्युप्पे चु बेलोरी, एइ ग्लारी थे ङत र्हो लबरी चुरीनो टीसम् तस्येल पङ्बे सेम् ङल मुब। 14 तर एत अङ्योत्नले चोले स्य्हेङ्ब ज्यब अतल म्हेन्ज्यी। एचे र्हङ्की सेम्चेनो ङत र्हो लबे सेम् मुसम् तब, तर कर्ले अय्हीन्। 15 दोःज्यीम् खेम पङ्लेनो एतेङ्नो बक्च्य टीखइ बी य्हम्की लागीरी ओनेसीमस ए ग्यम्से फेःबल य्हीन्स्यीन। 16 देरेम् थे बानाकीनो अय्हीन्, तर बाना बीमएनो य्हक्को म्होइबे बीस्वासी अले य्हीन्ब। ङचेम् थेत य्हक्कोनो म्होइब। ओसेम् एइ लागीरीम् थे बानइ रुप्रीतेङ् प्रभुरी अलेइ रुप्री झेन् गत्ते य्हक्को म्होइबल तल। 17 होत्तज्यीम् एचे ङत एतेङ् बक्च्य लक् स्य्हेङ्बे र्हो म्हेन्सम् थेतेएनो ङत र्हङ्ले स्वागत स्य्हेङो। 18 थेचे एत ताए अज्यब स्य्हेङ्बल मुसम् वुइ एत ताए फाथोस्ये मुसम् ङइ मीन्री ब्रीज्यीम् थेनो। 19 ङ पावल, र्हङ्की याचेनो चु तम् ब्रीज्यीम् पङ्ब, हुजु छ्य ङचेनो फास्ये मुब। एचे ख्रीस्ट्री यङ्बे छार् जीवनएनो ङ ग्यम्सेनो यङ्बल पङ्बे तम् ङचे एत पङ्टी अथो। 20 होत्तज्यीम् म्होइबे अले, प्रभुरी ङइ लागीरीएनो चु लक् स्य्हेङ्पीनो, चोले ख्रीस्ट्री ङइ सेम्एनो तङ्बचे प्लीङ्खइ। 21 ब्रीन ब्रीननो ङ पुरा ढुक्क मुब, ङचे कुल्बल एचे स्य्हेङ्पीन्स्ये मुब ओसेम् हुजु बीम य्हक्कोएनो स्य्हेङ्पीन्स्ये मुब। 22 ल्होल्होएनो तम् गीः मुब, ङइ लागीरीएनो टीबे ग्ला गीः टोप्ले थेनो, तलेपङ्सम् एइ प्रार्थनाचे ङएनो ए मुबे ग्लारी खम्यङ्ल पङ्बे आस् लबल मुब। 23 येसु ख्रीस्ट्की लागीरी ङतेङ् जेल्री मुबे इपाफ्रासचेएनो एङ्यीमात लस्सो पीत्खटीब मुब। 24 ङतेङ् बक्च्य लक् स्य्हेङ्बे मर्कुस ओसेम् अरीस्तार्खस्, डेमास ओसेम् लुकाचेएनो लस्सो पीत्खटीब मुब। 25 प्रभु येसु ख्रीस्ट्की अनुग्रह एङ्यीमा जम्मतेङ्नो तखइ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.