मर्कुस् 5 - पश्चिम तामाङयेसुचे म्हङ् स्यप्पे म्हीत फेन्न लजेत्पल ( मत्ती ८:२८-३४ ; लुका ८:२६-३९ ) 1 येसुतेङ् थेङ्की डबमा गालील ग्येइ क्योम्सङ् गेरासेनस् पङ्बे ग्लारी दोखजेत्ज्यी। 2 येसु दोङ्गचे डोङ्जेत्प साच्चेनो म्हङ् स्यप्पे म्ही गीः दुर्स ग्यम्से थेङ्त खदुलबरी खज्यी। 3 हुजु म्ही दुर्समारी टीब मुबल। थेत खल्चेएनो फइकी च्यल्दचेएनो खीज्यीम् थेन्ब अखम्ब मुबल। 4 थेत य्हक्को ख्यप्नो फइकी च्यल्दचे या कङ् खीज्यीम् थेन्मेएनो थेचे हुजु च्यल्दमा ब्रक्ब्रेक् छ्योइलाब मुबल। थेत खल्चेएनो तहरी थेन्ब अखम्ब मुबल। 5 हुजु म्ही दीन् म्हुन्नो दुर्समातेङ् गङ्मारी क्रीङ्ज्यीम् र्हङ्चे र्हङ्तनो युङ्बमाचे डज्यीम् ब्रब मुबल। 6 थेचे येसुत थारीङ्क्योर म्रङ्ज्यी। ओसेम् छ्योङ्खज्यीम् थेङ्की ङोन्री पब्लु लज्यी। 7 ओसेम् थेचे बङ्ले क्रीङ्ज्यीम् पङ्ज्यी, “गोदोब्न्हङ्री जोइ पर्मेस्वर्की ज येसु, थेङ्चे ङतेङ् त म्हइजेत्पल? ङ थेङ्त पर्मेस्वर्की छेन्री फ्या स्य्हु लब, ङत दुख थन्हङो!” 8 हुजु म्हीचे चोले पङ्ज्यी, तलेपङ्सम् येसुचे हुजुत, “म्हङ्, चु म्ही ग्यम्चे डोङो!” बी सुङ्बल मुबल। 9 ओसेम् येसुचे हुजुत, “एइ मीन् त?” बी ङ्योत्जेत्ज्यी। थेचे, “ङइ मीन् फौज य्हीन्ब, तलेपङ्सम् ङ्यीमा य्हक्को मुब” बी पङ्ज्यी। 10 ओसेम् हुजु म्हङ्चे, “ङ्यीमात चु ग्ला ग्यम्चे थल्हबो” पङ्ज्यीम् फ्या स्य्हु लज्यी। 11 हुजुरी गङ्क्योर् य्हक्को तीलीमा छटीबल मुबल। 12 ओसेम् म्हङ्माचे येसुत, “ङ्यीमात क्युजु तीलीमाज ङ्यीबुङो, ओसेम् हुजुमान्हङ् वङ्पुङो” बी पङ्ज्यीम् फ्या स्य्हु लज्यी। 13 येसुचे थेङ्यीमात ङ्यीबुङ्जेत्ज्यी, ओसेम् म्हङ्मा म्हीइ ल्हीः ग्यम्से डोङ्ज्यीम् तीलीमा न्हङ् वङ्ज्यी। ओसेम् हजार ङ्ही तीलीमा गङ्से क्रसु-क्रसु छ्योङ्ज्यीम् ग्ये न्हङ् दीम्ज्यीम् स्यीज्यी। 14 हुजु तीलीमा छबे गोर्तेन्माचे छ्योङ्य्हर्ज्यीम् सहर्तेङ् नम्स-नम्सरी ङ्यीज्यीम् हुजु तम् स्येत्ज्यी। ओसेम् हुजुरी त तज्यी बी च्याबरी म्हीमा खज्यी। 15 ओसेम् म्हीमा येसु मुबे ग्लारी दोखज्यी। थेङ्यीमाचे हुजु म्हङ्मा स्यप्पे म्ही येन् येन्ज्यीम् फेन्ज्यीम् हुजुरी टीटीबल म्रङ्ज्यी। ओसेम् थेङ्यीमा लोङ्ज्यी। 16 हुजुरी खबे म्हीमात म्हङ् स्यप्पे म्हीतेङ् तीलीमात तात तज्यी बी म्रङ्बलमाचे स्येत्पीन्ज्यी। 17 हुजु लीप्चे म्हीमाचे येसुत “चु ग्ला ग्यम्चे थारीङ् स्येगो” बी फ्या स्य्हु लज्यी। 18 येसु दोङ्गरी क्रेत्प छ्येमम् हुजु म्हङ् स्यप्पे म्हीचे थेतएनो येसुतेङ् बक्च्य ङ्यीबुङो बी फ्या स्य्हु लज्यी। 19 तर येसुचे थेत खअबुङ्नले सुङ्ज्यी, “दीम्री ङ्यीज्यीम् र्हङ्की म्हीमात परमप्रभुचे एत स्य्हेङ्जेत्पे दयतेङ् जम्म तम्मा स्येत्परी ङ्यीउ।” 20 ओसेम् हुजु म्ही य्हर्ज्यीम् येसुचे थेइ लागीरी स्य्हेङ्जेत्पे जम्मा लक्मा डेकापोलीस पङ्बे सहर च्यीइ ग्लामारी प्रचार स्य्हेङ्ब तीप्ज्यी। ओसेम् जम्म म्हीमा तेङेन् तज्यी। याइरसकी जमेतेङ् नबे अमकोल ( मत्ती ९:१८-२६ ; लुका ८:४०-५६ ) 21 येसु देबेएनो दोङ्गरी क्रेत्ज्यीम् ग्येइ क्योम्सङ् स्येजेत्ज्यी। ओसेम् य्हक्को म्हीमा थेङ् मुबे ग्लारी र्हुब् तज्यी। थेङ्मी ग्येइ यरी मुबल। 22 यहुदीमा र्हुब् तबे दीम्की सासक्मा न्हङ्री याइरस पङ्बे म्ही गीः थेङ्ज खज्यी। ओसेम् थेङ्त म्रङ्ज्यीम् थेङ्की स्य्हब्री पब्लु लज्यी। 23 ओसेम् फ्या स्य्हु लज्यीम् पङ्ज्यी, “ङइ जमे ज्यीद स्यीयम्ब छ्येबल मुब। थेङ् ब्योन्खज्यीम् थेङ्की फ्या थेइ जोरी थेन्पीन्जेतो। ओसेम् थे फेन्ज्यीम् सोखइ” बी पङ्ज्यी। 24 होत्तज्यीम् येसु याइरसतेङ् स्येज्यी। ओसेम् य्हक्को म्हीमा थेङ्की लीप्चे खबल तज्यीम् म्हीमा तोर् इ मोर् इ तज्यी। 25 हुजुमा न्हङ्री का य्हर्स्यीनो टीबे नेत् स्यप्ज्यीम् ल्होगोर् गीः तबे अमकोल गीः मुबल। 26 थेचे र्हङ्तेङ् मुबे जम्मनो स्हेमा डक्टरमात पीन्ज्यीम् मेन् स्य्हेङ्बल मुबल। तर थे फेन्बे देब्री झेन् य्हक्को नबल मुबल। 27 थेचे येसुइ बारेरी थ्येःबल मुबल। होत्तज्यीम् थे य्हक्को म्हीमान्हङ्चे येसुइ ग्यप्री खज्यीम् थेङ्की न्हम्ज छुज्यी। 28 तलेपङ्सम्, “थेङ्की न्हम्जकीनो छुम्यङ्लेनो ङ फेन्स्ये मुबल” बी थेइ सेम्री म्हेन्ब मुबल। 29 ओसेम् येसुइ न्हम्ज छुब साच्चेनो थेइ का य्हर्बे नेत् फेन्ज्यी। ओसेम् थेचे र्हङ् फेन्बल था यङ्ज्यी। 30 ओसेम् येसुचे थेङ् ग्यम्चे सक्ती डोङ्य्हर्बल छोर्ब साच्चेनो य्हक्को म्हीमात स्हीज्यीम्, “खल्चे ङइ येन् छुबल?” बी ङयोत्जेत्ज्यी। 31 डबमाचे थेङ्त पङ्ज्यी, “य्हक्को म्हीमा तोर् इ मोर् इ तटीबल थेङ्चे स्हीन-स्हीननो ‘ङत खल्चे छुज्यी?’ बी सुङ्जेत्प।” 32 तर र्हङ्त खल्चे छुज्यी बी येसुचे कोरोरो स्हीजेत्ज्यी। 33 ओसेम् हुजु अमकोलचे र्हङ्चे स्य्हेङ्बे लक् येसुचे खेम्जेत्नेम् बी था यङ्ज्यी। ओसेम् लोङ्ज्यीम् दर्ज्यीम् येसु मुबे ग्लारी खज्यीम् थेङ्की ङोन्री पुइ जुःज्यीम् जम्म तम् स्येत्ज्यी। 34 ओसेम् येसुचे थेत, “जमे, एइ बीस्वास्चे एत फेन्न लबल मुब। ज्येन्ले ङ्यीउ, ए फेन्बल मुब” बी सुङ्ज्यी। 35 थेङ्चे चोले सुङ्टीबे बेलोरी, याइरसकी दीम्से डेत्-डेत् म्हीमा खज्यीम् चोले पङ्ज्यी, “थेङ्की जमे स्यीज्यीन्ज्यी। देरेम् लोप्पोन्त तले दुख न्हङ्जेत्प?” 36 तर येसुचे थेङ्यीमाकी तम्त थ्येःब बीसेम् याइरसत, “थलोङो, बीस्वासकीनो स्य्हेङो” बी सुङ्ज्यी। 37 ओसेम् येसुचे पत्रुस, याकुबतेङ् थेइ अले युहन्नात बीम ल्हो-ल्हो खल्तेएनो थेङ्की लीप्चे खअबुङ्। 38 येसुतेङ् थेङ्यीमा जम्मनो याइरसकी दीम्री दोखमम् म्हीमा बङ्ले क्राटीबतेङ् क्रीङ्टीबल म्रङ्जेत्ज्यी। 39 हुजु लीप्चे थेङ् दीम्न्हङ् वङ्ज्यीम् थेङ्यीमात, “एङ्यीमा तले चोले क्राटीबतेङ् क्रीङ्टीबल? कोल स्यीबल अरे, तर म्हेर्बलकीनो मुब” बी सुङ्ज्यी। 40 ओसेम् थेङ्की फ्रोइ थ्येःज्यीम् म्हीमा ङ्येत्ज्यी। तर येसुचे म्हीमा जम्मतनो दोरी पीत्जेत्ज्यीम् कोलइ अप-अम ओसेम् थेङ्तेङ् मुबे डब सोम्त बक्च्य बोर्ज्यीम् कोल मुबे ग्लारी स्येजेत्ज्यी। 41 ओसेम् कोलइ या चुङ्ज्यीम् थेङ्चे, “तालीता कुमी!” बी सुङ्ज्यी। चु पङ्बलम्, “अङ ज्यीद, ङ एत पङ्ब, रेःगो!” य्हीन्ब। 42 होले सुङ्ब साच्चेनो कोल रेःज्यीम् तोर्-मोर् ब्रब तीप्ज्यी। हुजु कोल ल्हेगोर् गीः तबल मुबल। ओसेम् जम्मनो तेङेन् तज्यी। 43 हुजु लीप्चे थेङ्चे थेङ्यीमात चु तम् खल्तेएनो थस्येतो बी कुल्जेत्ज्यी। ओसेम् कोलतम् चब पीनो बी थेङ्यीमात कुल्जेत्ज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.