मर्कुस् 2 - पश्चिम तामाङयेसुचे या कङ् अचल्तीबे म्हीत फेन्न लजेत्पल ( मत्ती ९:१-८ ; लुका ५:१७-२६ ) 1 तोव दीन् लीप्चे येसु कफर्नहुम पङ्बे ज्यीत सहर्री दोःखजेत्ज्यी। ओसेम् म्हीमाचे थेङ् दीम्रीनो मुब पङ्बे तम् थ्येःज्यी। 2 हुजु लीप्चे य्हक्को म्हीमा येसु मुबे ग्लारी खज्यी। होत्तज्यीम् हुजुरी म्रप्की दोय्हङ्स्ये दीम्न्हङ् सम्मनो ग्ला गत्तेएनो अरेबल। ओसेम् थेङ्चे म्हीमात परमेवर्की फ्रोइ लोप्जेत्टीब मुबल। 3 हुजु बेलोरीनो डेत्-डेत् म्हीमा खज्यी, ओसेम् म्ही ब्लीचे या कङ् अचल्तीबे म्ही गीःत हुजुरी बज्यी। 4 य्हक्को म्हीमा मुबल तज्यीम् थेङ्यीमाचे नबे म्हीत येसु मुबे ग्ला सम्म बोर्ब अखम्। होत्तज्यीम् थेङ्यीमाचे हुजु दीम्की येसु मुबे ग्लाकी फेरङ्की छन चेक् स्याज्यीम् नबे म्हीत थेइ न्हुबे तीत्प न्हेन्बतेङ्नो बक्च्य येसुइ ङोन्ग्यम् फप्पीत्ज्यी। 5 येसुचे थेङ्यीमाकी बीस्वासत म्रङ्ज्यीम् हुजु या कङ् अचल्तीबे म्हीत, “ज, एइ पापमा क्षम तबल मुब” बी सुङ्ज्यी। 6 येसुचे चोले सुङ्बल थ्येःज्यीम् हुजुरी मुबे डेत्-डेत् धर्म लोप्पोन्माचे सेम्री चोले म्हेन्ज्यी, 7 “चु म्हीचे तले चोतेबे तम् पङ्ब? चु म्हीचेमी पर्मेस्वर्त खीसइतीब टीम्! पर्मेस्वर्चेकीनो पाप क्षम स्य्हेङ्ब खम्ब।” 8 ओसेम् येसुचे थेङ्यीमाकी सेम्की तम् थेङ्की थुःरी खेम्जेत्प साच्चेनो थेङ्यीमात चोले सुङ्ज्यी, “एङ्यीमाचे र्हङ्की सेम्री तले चोतेब म्हेन्बल? 9 चु या कङ् अचल्तीबे म्हीत ‘एइ पाप क्षम तज्यी’ पङ्बतेङ् ‘रेःज्यीम् र्हङ्की तीत्स दुत्ज्यीम् ब्रउ’ पङ्ब खजु देबल तब? 10 तर म्हीइ जत चु जम्बुलीङ्री म्हीमाकी पापमा क्षम पीन्बे अधीकार् मुब बी ङ एङ्यीमात ङोन्स्ये मुब।” ओसेम् थेङ्चे हुजु या कङ् अचल्तीबे म्हीत, 11 “ङ एत पङ्ब रेःगो! र्हङ्की तीत्स दुत्ज्यीम् दीम्री ङ्यीउ” बी सुङ्ज्यी। 12 ओसेम् हुजु म्ही फोत् रेःज्यीम् र्हङ्की तीत्स दुत्ज्यीम् य्हर्ज्यी। चु म्रङ्ज्यीम् म्हीमा जम्मनो तेङेन् तज्यीम्, “ङ्य्हङ्माचे चोतेब खेमेएनो म्रङ्बल अरेबल” बी पङ्ज्यीम् पर्मेस्वर्त तोप्ज्यी। येसुचे लेबीत ङ्होत्जेत्पल ( मत्ती ९:९-१३ ; लुका ५:२७-३२ ) 13 येसु देबेएनो ग्येइ यरी स्येःजेत्ज्यी। य्हक्को म्हीमा थेङ् मुबे ग्लारी खज्यी, ओसेम् थेङ्चे थेङ्यीमात लोप्जेत्ज्यी। 14 ओसेम् थेङ् हुजु ग्ला ग्यम्से स्येःजेत्टीमम् थेङ्चे तीरो दुत्पे म्ही गीःत तीरो दुत्पे ग्लारी टीटीबल म्रङ्जेत्ज्यी। हुजु म्ही अल्फायसकी ज लेबी मुबल। येसुचे थेत, “ङइ लीप्चे ब्रउ” बी सुङ्ज्यी। ओसेम् थे रेःज्यीम् येसुइ लीप्चे ब्रज्यी। 15 तोव लीप्चे येसुतेङ् थेङ्की डबमा लेबीइ दीम्री ङ्येसेइ स्य्हेब सोल्बरी स्येजेत्जेत्मम् हुजुरी थेङ्तेङ् बक्च्य तीरो दुत्पे य्हक्को म्हीमातेङ् ल्हो-ल्हो पापीमा चबरी टीबल मुबल। तलेपङ्सम् येसुइ लीप्चे चोतेबे म्हीमा य्हक्को ब्रब मुबल। 16 ओसेम् डेत्-डेत् फरीसी धर्म लोप्पोन्माचे येसु पापीमातेङ् तीरो दुत्पे म्हीमातेङ् बक्च्य सोल्टीबल म्रङ्ज्यी। ओसेम् थेङ्यीमाचे थेङ्की डबमात, “थेङ्चे तले पापीमातेङ् तीरो दुत्पे म्हीमातेङ् बक्च्य स्य्हुज्यीम् सोल्बल?” बी ङ्योत्ज्यी। 17 चु तम् थ्येःज्यीम् येसुचे थेङ्यीमात, “अनबे म्हीमात डाक्टर अतो, तर नबे म्हीमातकीनो तोब। ङ धर्मीमात ङ्होत्परी अय्हीन्, तर पापीमात ङ्होत्परी खबल य्हीन्ब” बी सुङ्ज्यी। येसुचे ङ्यीम्बु टीबे बारेरी लोप्जेत्पल ( मत्ती ९:१४-१७ ; लुका ५:३३-३९ ) 18 युहन्नाइ डबमातेङ् फरीसीमा ङ्यीम्बु टीब मुबल। तीरेत् डेत्-डेत् म्हीमा येसुज खज्यीम्, “बप्तीस्मा पीन्बे युहन्नाइ डबमातेङ् फरीसीमाकी डबमा ङ्यीम्बु टीब, तर थेङ्की डबमाम् तले ङ्यीम्बु अटीबल?” बी ङ्योत्ज्यी। 19 ओसेम् येसुचे थेङ्यीमात सुङ्ज्यी, “जन्तीमाचे दुलहा थेङ्यीमातेङ् बक्च्य मुगदेसम्म तेएनो अचनले टीब स्यीम? अय्हीन्, दुलहा थेङ्यीमातेङ् मुगदेसम्म थेङ्यीमाचे तेएनो अचनले अटी। 20 तर दुलहात थेङ्यीमा ग्यम्चे फेःज्यीम् बोर्बे बेलो खस्ये मुब। ओसेम् हुजु दीन्री थेङ्यीमा तेएनो अचनले टीस्ये मुब। 21 “खल्चेएनो बोक्ट येन्री छार् येन्खेन् अख्य, होले ख्यज्यी पङ्सम् छार् येन् बोक्ट येन् ग्यम्से डोङ्स्ये मुब ओसेम् बोक्ट येन् झेन्नो य्हक्को डेःस्ये मुब। 22 “ओसेम् खल्चेएनो छार् अङ्गुर्की नीङ्गु दुक्प डीइ गल्दरी अयु, युज्यी पङ्सम् हुजु अङ्गुर्की छार् नीङ्गुचे डीइ गल्द थीलाब, ओसेम् अङ्गुर्की नीङ्गुतेङ् डीइ गल्दएनो नास् तब। तर अङ्गुर्की छार् नीङ्गुम् छार् डीइ गल्दरीनो युब।” येसु दुःब न्हबे दीन्लएनो प्रभु ( मत्ती १२:१-८ ; लुका ६:१-५ ) 23 दुःब न्हबे दीन् गीःरी येसु व्ह म्रङ् ग्यम्चे तज्यीम् स्येटीब मुबल। ओसेम् थेङ्की डबमाचे ब्रटीन-ब्रटीननो व्ह नम्मा टङ्ब तीप्ज्यी। 24 चु म्रङ्ज्यीम् फरीसीमाचे येसुत, “स्हीगो, थेङ्की डबमाचे तले दुःब न्हबे दीन्री स्य्हेङ्ब अतबे लक् स्य्हेङ्बल?” बी ङ्योत्ज्यी। 25 ओसेम् येसुचे थेङ्यीमात सुङ्ज्यी, “दाऊदचे थे ओसेम् थेतेङ् मुबे म्हीमा फो ख्रेन्बे बेलोरी थेचे त स्य्हेङ्ज्यी? एङ्यीमाचे धर्मइ छ्येःरी खेमेएनो खेत्पल अरेउ? 26 गोदोब्न्हङ्की ङ्हच्छ्यङ् लम्बु अबीयाथार मुबे बेलोरी दाऊदचे पर्मेस्वर्की दीम्न्हङ् वङ्ज्यीम् पर्मेस्वर्त पीन्बे ग्येङ् कीन्ज्यीम् चज्यी। ओसेम् थेचे र्हङ्तेङ् मुबे म्हीमातएनो पीन्ज्यी। तर हुजु ग्येङ्मी लम्बुचे बीम ल्हो-ल्हो म्हीचे चब अतब मुबल।” 27 ओसेम् येसुचे थेङ्यीमात सुङ्ज्यी, “दुःब न्हबे दीन् म्हीइ लागीरी स्य्हेङ्बल य्हीन्ब, तर म्ही दुःब न्हबे दीन्की लागीरी स्य्हेङ्बल अय्हीन्। 28 होत्तज्यीम् म्हीइ ज दुःब न्हबे दीन्लएनो प्रभु य्हीन्ब।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.