मर्कुस् 14 - पश्चिम तामाङयेसुत सेत्प म्हइबल ( मत्ती २६:१-५ ; लुका २२:१-२ ; युहन्ना ११:४५-५३ ) 1 नीस्तार् पर्वतेङ् खमीर् अयुबे ग्येङ् चबे दीन् खबरी ङ्य्हीरेत् चेत्प मुबल। ङ्हच्छ्यङ् लम्बुमातेङ् धर्म लोप्पोन्माचे येसुत कुटीले चुङ्ज्यीम् सेत्परी ज्यप्टीब मुबल। 2 तर थेङ्यीमाचे र्हङ्न्हङ् चोले पङ्ज्यी, “ङ्य्हङ्माचे पर्बइ बेलोरी चोले स्य्हेङ्ब अत, स्य्हेङ्ज्यी पङ्सम् म्हीमाचे ङ्य्हङ्मात क्रीङ्ज्यीम् ङ्युङ् म्हइस्ये मुब।” अमकोलचे येसुत छ्युकु फोर्बल ( मत्ती २६:६-१३ ; युहन्ना १२:१-८ ) 3 येसु बेथानीया नम्सइ पुन् स्यप्पे सीमोनकी दीम्री स्य्हेब सोल्बरी स्य्हुबे बेलोरी अमकोल गीः ङोर्थङ् खबे य्हक्को फाबे छ्युकु पोङ्री बज्यीम् खज्यी। हुजु छ्युकु जटामसीइ दोङ्बो ग्यम्से तेत्पल मुबल। ओसेम् अमकोलचे पोङ्की खारीक्योर् थीलाज्यीम् हुजु छ्युकु येसुइ क्ररी युपीन्ज्यी। 4 चोले स्य्हेङ्बल म्रङ्ज्यीम् हुजुरी डेत्-डेत् म्हीमा बोमो रप्ज्यीम्, “चोतेबे ङोर्थङ् खबे य्हक्को फाबे छ्युकु तले खेर ख्लाबल? 5 बरु चु चुङ्सम् मन सोम् म्हुइकी टङ यङ्स्येल। ओसेम् हुजु टङ प्रङ्नमात पीन्ब खम्स्येल” पङ्ज्यीम् थेङ्यीमाचे अमकोलत बराज्यी। 6 तर येसुचे थेङ्यीमात सुङ्ज्यी, “होले थपङो! एङ्यीमाचे थेत तले बराबल? चु अमकोलचे ङइ लागीरी य्हक्को ज्यबे लक् स्य्हेङ्बल मुब। 7 प्रङ्नमाम् खेम पङ्लेएनो एङ्यीमातेङ् तब। ओसेम् एङ्यीमाचे थेङ्यीमात खेम पङ्लेएनो र्हो लब खम्ब। तर ङमी एङ्यीमातेङ् खेम पङ्लेएनो अत। 8 चु अमकोलचे त स्य्हेङ्ब खम्ज्यी, हुजु स्य्हेङ्ज्यी। थेचे ङोर्थङ् खबे य्हक्को फाबे छ्युकु फोर्ज्यीम् ङइ ल्हीत दुर्सरी थेन्बे लागीरी ङोन्ग्यम्नो तयार् स्य्हेङ्बल मुब। 9 ङ एङ्यीमात देमेन्नो पङ्ब, जम्बुलीङ्री खजु-खजु ग्लारी ज्यबे सम्तर् स्येत्प हुजु ग्लामारी चु अमकोलचे स्य्हेङ्बे लक्एनो व्हल् लस्ये मुब।” यहुदा इस्कारीयोतचे ङ्हच्छ्यङ् लम्बुतेङ् तम् डीःबल ( मत्ती २६:१४-१६ ; लुका २२:३-६ ) 10 हुजु लीप्चे येसुइ चुङ् ङ्ही डबमान्हङ्की यहुदा इस्करीयोत ङ्हच्छ्यङ् लम्बुमाज ङ्यीज्यीम् येसुत चुङ्पीन्ब पङ्ज्यीम् तम् डीःज्यी। 11 यहुदाकी तम् थ्येःज्यीम् ङ्हच्छ्यङ् लम्बुमा तङ्ज्यी। ओसेम् थेत टङ पीन्ल पङ्ज्यीम् बाचा स्य्हेङ्ज्यी। ओसेम् हुजु बेलो य्हङ्स्ये थेचे येसुत चुङ्पीन्बरी ज्यप्ज्यीम् च्याब तीप्ज्यी। येसुचे डबमातेङ् ज्युःकी डोन् सोल्बल ( मत्ती २६:१७-३० ; लुका २२:७-२३ ; युहन्ना १३:२१-३० ; १ कोरीन्थी ११:२३-२५ ) 12 खमीर् अयुबे ग्येङ् चज्यीम् म्हन्दीबे पर्बइ तीप्पे दीन्री नीस्तारकी डोन्की लागीरी ग्यु बोक ठा पीन्थोब मुबल। येसुइ डबमाचे थेङ्त, “ङ्यीमाचे ङ्यीज्यीम् थेङ्की लागीरी नीस्तार् पर्बइ डोन् खन तयार् स्य्हेङ्खइ म्हेन्ब?” बी ङ्योत्ज्यी। 13 ओसेम् येसुचे डब ङ्हीत चोले सुङ्ज्यीम् यरुसलेम्री पीत्जेत्ज्यी, “एङ्य्ही सहर्री ङ्यीउ, हुजुरी गाख्रीरी यी नाज्यीम् य्हर्टीबे म्ही गीः दोस्ये मुब। थेइ लीप्-लीप् ङ्यीउ। 14 ओसेम् हुजु म्ही खजु दीम्री वङज्यी हुजु दीम्की न्याबोत पङो, ‘ङ्यीमाइ लोप्पोन्चे ङ्योत्पल मुब, ङतेङ् ङइ डबमात नीस्तार् पर्बइ डोन् चबे लागीरी डोम्बो टीबे ग्ला खन मुब?’ 15 ओसेम् थेचे एङ्य्हीत तलजोरी ङोन्ग्यम्नो सङ्सेङ् लज्यीम् टोप्ले थेन्बे य्हङ् तबे ग्ला गीः ङोन्स्ये मुब। ओसेम् हुजुरी एङ्य्हीचे डोन् तयार् स्य्हेङो।” 16 हुजु लीप्चे डब ङ्ही सहर्री ङ्यीज्यी। ओसेम् येसुचे सुङ्ब र्हङ्लेनो जम्मनो यङ्ज्यीम् थेङ्यीमाचे नीस्तार् पर्बइ डोन् तयार् स्य्हेङ्ज्यी। 17 ङ्येस्ये तब बीसेम् येसु चुङ् ङ्ही डबमातेङ् बक्च्य ब्योन्खज्यी। 18 डोन् सोल्टीबे बेलोरी येसुचे सुङ्ज्यी, “देमेन्नो ङ एङ्यीमात पङ्ब, एङ्यीमान्हङ्री ङतेङ् बक्च्य चटीबल गीःचे ङत चुङ्नलपीन्स्ये मुब।” 19 हुजु बेलोरी थेङ्यीमा सेम्री य्हक्को छेर्ज्यीम् येसुत, “हुजु म्ही ङनो य्हीन्ब?” बी जम्मचेनो काकर्ले ङ्योत्ज्यी। 20 येसुचे सुङ्ज्यी, “एङ्यी चुङ् ङ्ही न्हङ्री गीः, खल्चे ङतेङ् बक्च्य ग्येङ् नुत्टीबल मुब। 21 धर्मइ छ्येःरी ब्रीब र्हङ्लेनो म्हीइ ज स्यीथोस्येनो मुब। तर धीक्कार खल्चे म्हीइ जत चुङ्नलपीन्ल! थे न्हनो अन्हबल य्हीन्सम् ज्यब तस्येल मुबल!” 22 थेङ्यीमा चटीबे बेलोरी येसुचे ग्येङ् कीन्ज्यीम् पर्मेस्वर्त व्होर्छ्ये न्हङ्ज्यी। ओसेम् ग्येङ् स्योइज्यीम् डबमात न्हङ्ज्यीम् सुङ्ज्यी, “न कीनो, चु ङइ ल्ही य्हीन्ब।” 23 हुजु लीप्चे थेङ्चे अङ्गुर्की नीङ्गु मुबे खोरे थोज्यीम् पर्मेस्वर्त व्होर्छ्ये न्हङ्ज्यीम् डबमात न्हङ्ज्यी। थेङ्यीमा जम्मचे थुङ्ज्यी। 24 ओसेम् येसुचे सुङ्ज्यी, “चु ङइ का पर्मेस्वर्तेङ् म्हीमाइ गुङ्री स्य्हेङ्बे करार् य्हीन्ब। चु का य्हक्को म्हीमाइ लागीरी य्हर्पुङ्स्ये मुब। 25 देमेन्नो, ङ एङ्यीमात पङ्ब, पर्मेस्वर्की य्हुल्री अङ्गुर्की छार् नीङ्गु अथुङ्गदे सम्म ङ देरे खेमेएनो अङ्गुर्की नीङ्गु थुङ्स्ये अरे।” 26 हुजु लीप्चे थेङ्माचे पर्मेस्वर्त तोप्पे व्हइ गीः कोज्यीम् जैतुन गङ्री स्येःजेत्ज्यी। पत्रुसचे येसुत अस्य्हे पङ्स्येकी तम् येसुचे सुङ्बल ( मत्ती २६:३१-३५ ; लुका २२:३१-३४ ; युहन्ना १३:३६-३८ ) 27 येसुचे डबमात सुङ्ज्यी, “एङ्यीमा जम्मनो ङत ख्लाथेन्ज्यीम् य्हर्स्ये मुब। तलेपङ्सम् धर्मइ छ्येःरी, ‘ङचे गोर्तेन्त सेत्स्ये मुब, ओसेम् ग्युमा खन दोदो छ्योङ्स्ये मुब’ बी ब्रीबल मुब। 28 “तर ङ स्यीब ग्यम्से सोब बीसेम् गालीलरी एङ्यीमा बीम ङोन्ग्यम् ङ्यीस्ये मुब।” 29 पत्रुसचे येसुत, “जम्मनो थेङ्त ख्लेथेन्ज्यीम् य्हर्लेएनो ङ थेङ्त खेमेएनो ख्लेथेन्स्ये अरे” पङ्ज्यी। 30 येसुचे थेत सुङ्ज्यी, “ङ एत पङ्ब, न्हम्स्य्हो स्य्होरी नक व्हब ङ्य्हीख्यप् ङ्य्हब बीम ङोन्ग्यम् एचे ङत सोम्ख्यप् सम्म अस्य्हे पङ्स्ये मुब।” 31 तर पत्रुसचे नासेन्लेनो, “अय्हीन्, ङ थेङ्तेङ् बक्च्य स्यीथोलेएनो स्यील, ङ थेङ्त अस्य्हे बी खेमेएनो पङ्स्ये अरे” बी पङ्ज्यी। ओसेम् ल्हो-ल्हो डबमाचेएनो होलेनो पङ्ज्यी। गेत्समनी पङ्बे ग्लारी येसुइ प्रार्थना ( मत्ती २६:३६-४६ ; लुका २२:३९-४६ ) 32 हुजु लीप्चे येसुतेङ् थेङ्की डबमा गेत्समनी पङ्बे ग्लारी स्येजेत्ज्यी। ओसेम् थेङ्चे र्हङ्की डबमात, “ङ ङ्यीज्यीम् प्रार्थना बुत्नले अस्य्हेङ्गदे एङ्यीमा चुरीनो टीउ” बी सुङ्जेत्ज्यी। 33 थेङ्चे पत्रुस, याकुबतेङ् युहन्नात बक्च्य नोम्जेत्ज्यी। ओसेम् थेङ् य्हक्को दुख म्हन्दीज्यीम् तालइ-तालइ तज्यी। 34 ओसेम् येसुचे थेङ्यीमात सुङ्ज्यी, “ङइ सेम् दुखचे पोतोक्-पोतोक् तज्यीम् तीङ्नो थील र्हङ् तटीबल मुब। एङ्यीमा चुरीनो अन्हुनले छोर्ज्यीम् टीउ।” 35 ओसेम् थेङ् चेक्पजकी क्योर् स्येज्यीम् सरी पब्लु लज्यीम्, थेङ्की क्ररी खटीबे दुख थेङ् ग्यम्से स्यालाजेतो पङ्ज्यीम् प्रार्थना स्य्हेङ्जेत्ज्यी। 36 थेङ्चे चोले प्रार्थना स्य्हेङ्जेत्ज्यी, “अप, थेङ्चे स्य्हेङ्अखम्बल तेएनो अरे। तसम् चु दुख ङ ग्यम्से स्यापीन्जेतो। तर ङचे म्हेन्ब र्हङ्ले अय्हीन्, थेङ्की थुः अनुसार तखइ।” 37 हुजु लीप्चे येसु थेङ्की डब सोम्ज दोःज्यीम् ब्योन्खमम् थेङ्यीमा म्हेर्टीबल यङ्ज्यी। येसुचे पत्रुसत सुङ्ज्यी, “सीमोन, ए म्हेर्ज्यीन्बल? ए घन्ट गीःएनो ङतेङ् छ्यम् अम्हेर्नले टीअखमो स्यीम्? 38 एङ्यीमा अम्हेर्नले प्रार्थना स्य्हेङ्ज्यीम् टीउ। ओसेम् परीक्षरी दोःस्ये अरे। एङ्यीमाल आत्माम् तयार् मुब, तर ल्हीःम् कम्जोर् मुब।” 39 येसु देबेएनो स्येज्यीम् ङोन्ग्यम् र्हङ्लेनो प्रार्थना स्य्हेङ्जेत्ज्यी। 40 ओसेम् थेङ् दोःज्यीम् ब्योन्खमम् थेङ्यीमा देबेएनो म्हेर्टीबल यङ्ज्यी। थेङ्यीमा य्हक्को न्हुटबल तज्यीम् मीःनो फेःअखम्। ओसेम् थेङ्त ता पङ्थोब बी थेङ्यीमाचे अस्य्हे। 41 येसु सोम् ख्यप् हुजुरी ब्योन्खज्यीम् डबमात सुङ्ज्यी, “एङ्यीमा दवम् सम्म म्हेर्ज्यीम् दुःब न्हटीबल? देरेम् म्हेर्बे बेलो बेज्यी। म्हीइ जत पापीमाकी यारी सोप्तीबे बेलो तयम्बल मुब। 42 रेगो, ब्रे! ङत ल्हो-ल्होइ यारी सोप्तीपीन्स्येकी म्ही खज्यीन्बल मुब।” येसुत चुङ्बल ( मत्ती २६:४७-५६ ; लुका २२:४७-५३ ; युहन्ना १८:३-१२ ) 43 येसुचे चु तम् सुङ्न-सुङ्ननो चुङ् ङ्ही डबमान्हङ्की यहुदा पङ्बे डबतेङ् बक्च्य रोलेतेङ् तर्वार्मा नाबे म्हीमा हुजुरी दोखज्यी। थेङ्यीमात ङ्हच्छ्यङ् लम्बुमा, धर्म लोप्पोनमातेङ् अगुवामाचे पीत्खबल मुबल। 44 येसुत चुङ्बरी खबे म्हीमात यहुदाचे, “खजु म्हीत ङचे ग्रम्बरी च्योक्ल थेतनो चुङ्ज्यीम् अस्य्होर्नले खीःज्यीम् बोरो” बी पङ्बल मुबल। 45 ओसेम् यहुदा येसु मुबे ग्लारी सर्-सर् खज्यीम्, “लोप्पोन्” पङ्ज्यीम् थेङ्की ग्रम्बरी च्योक्ज्यी। 46 हुजु लीप्चे थेङ्यीमाचे येसुत चुङ्ज्यी। 47 तर हुजुरी रप्टीबलमा न्हङ्री येसुइ डब गीःचे तर्वार् तेत्ज्यीम् गोदोब्न्हङ्री ङ्हच्छ्यङ् लम्बुइ योक्पोइ न्हबीङ् थालाज्यी। 48 येसुचे थेङ्यीमात सुङ्ज्यी, “एङ्यीमाचे तले ङत य्हो चुङ्बरी र्हङ्ले रोलेमातेङ् तर्वारमा बज्यीम् खबल? 49 ङ दीन्लनो एङ्यीमातेङ् बक्च्य पर्मेस्वर्की दीम्री लोप्ज्यीम् टीबे बेलोरी एङ्यीमाचे ङत अचुङ्मु स्यीम्। तर धर्मइ छ्येःइ तम् पुरा तबे लागीरी चोले तबल य्हीन्ब।” 50 हुजु लीप्चे डबमा जम्मचेनो येसुत ख्लेथेन्ज्यीम् छ्योङ्य्हर्ज्यी। 51 हुजुरी सुतीइ येन्कीनो य्हुर्बे ठीट गीः येसुइ लीप्-लीप् ङ्यीटीब मुबल। थेत म्हीमाचे चुङ्ब म्हइज्यी। 52 तर थेचे थेइ येन्नो ख्लेथेन्ज्यीम् क्लीङ्दोनो छ्योङ्य्हर्ज्यी। येसुत सभारी बोर्बल ( मत्ती २६:५७-६८ ; लुका २२:५४-५५ , ६३-७१ ; युहन्ना १८:१३-१४ , १९-२४ ) 53 थेङ्यीमाचे येसुत गोदोब्न्हङ्की ङ्हच्छ्यङ् लम्बुइ दीम्री बोर्ज्यी। हुजुरी ङ्हच्छ्यङ् लम्बुमा, धर्म लोप्पोन्मा ओसेम् अगुवामा र्हुब तबल मुबल। 54 ओसेम् पत्रुस चेक्-चेक् खेत्नले येसुइ लीप्-लीप् ङ्यीज्यीम् गोदोब्न्हङ्की ङ्हच्छ्यङ् लम्बुइ दीम्की दो सम्म ङ्यीज्यी। ओसेम् हुजुरी स्यीपाइमातेङ् मे देःज्यीम् टीज्यी। 55 हुजु लीप्चे ङ्हच्छ्यङ् लम्बुमातेङ् सभाकी जम्मनो म्हीमाचे येसुत सेत्पे लागीरी दस्यी म्हइब तीप्ज्यी। तर थेङ्यीमाचे तइ दस्यीएनो अयङ्। 56 य्हक्को म्हीमाचे येसुइ बीरुद्दरी भ्यु पङ्ज्यी। तर हुजुरी थेङ्यीमा खलइ तम्एनो अडी। 57 हुजु लीप्चे डेत्-डेत् म्हीमा रप्ज्यीम् येसुइ बीरुद्दरी चोतेबे भ्यु तम् पङ्ज्यी, 58 “चु म्हीचे ‘म्हीचे स्य्हेङ्बे चु पर्मेस्वर्की दीम् ङचे फुप्लाज्यीम् म्हीचे अस्य्हेङ्बे पर्मेस्वर्की दीम् ङचे सोम्रेत्रीनो स्य्हेङ्स्ये मुब’ बी पङ्बल ङ्य्हङ्चे थ्येःबल मुब।” 59 तर चोले पङ्लेएनो थेङ्यीमाकी तम् अडी। 60 गोदोब्न्हङ्की ङ्हच्छ्यङ् लम्बु जम्म म्हीमाइ ङोन्ग्यम् रप्ज्यीम् येसुत, “ए तले तेएनो अपङ्ब? चु म्हीमाचे एइ बीरुद्दरी पङ्बे तम्की बारेरी एत तेएनो पङ्थोस्ये अरे?” बी ङ्योत्ज्यी। 61 तर येसु कुटीले स्य्हुज्यीम् तेएनो असुङ्। देबेएनो गोदोब्न्हङ्की ङ्हच्छ्यङ् लम्बुचे, “ए मुक्ती न्हङ्बे ख्रीस्ट्, पर्मेस्वर्की ज य्हीन्ब?” बी ङ्योत्ज्यी। 62 येसुचे थेङ्यीमात सुङ्ज्यी, “अ, ङ थेनो य्हीन्ब। ओसेम् एङ्यीमाचे म्हीइ जत सक्तीसाली पर्मेस्वर्की केत्पट्टीचे टीटीबलतेङ् स्वर्ग ग्यम्से मुक्पन्हङ् युटीबल म्रङ्स्ये मुब।” 63 चु थ्येःज्यीम् गोदोब्न्हङ्की ङ्हच्छ्यङ् लम्बु बोमो रप्ज्यीम् र्हङ्की येन् डेःज्यीम् पङ्ज्यी, “देरेम् ल्हो-ल्हो तइ दस्यी तोज्यी स्यीम्? 64 चुजे पर्मेस्वर्त खीसी लबल एङ्यीमाचे थ्येःज्यीन्ज्यी। देरेम् एङ्यीमाल तइ सेम् मुब?” ओसेम् थेङ्यीमा जम्मचेनो “येसुत सेत्नोथोब” पङ्ज्यी। 65 हुजुरी मुबे म्हीमान्हङ्री डेत्-डेत् म्हीमाचे थेङ्त थो साज्यी। ओसेम् डेत्-डेत्चे थेङ्की फ्येन् उप्ज्यीम् ग्यङ्ज्यी। ओसेम्, “लो पङो एत खल्चे ग्यङ्ज्यी?” बी ङ्योत्ज्यी। ओसेम् हुजुरी मुबे स्यीपाइमाचेएनो येसुत दोक्ज्यीम् बोर्ज्यी। पत्रुसचे येसुत अस्य्हे पङ्बल ( मत्ती २६:६९-७५ ; लुका २२:५६-६२ ; युहन्ना १८:१५-१८ , २५-२७ ) 66 पत्रुस दोरी टीटीबे बेलोरी गोदोब्न्हङ्की ङ्हच्छ्यङ् लम्बुइ अमकोल योक्पो गीः पत्रुस मुबे ग्लारी खज्यी। 67 ओसेम् पत्रुस मे देटीबल म्रङ्मम् थेत तकातक्ले च्याज्यीम्, “एएनो नासरत्की येसुतेङ् बक्च्य मुबल अय्हीनो स्यीम?” बी पङ्ज्यी। 68 तर पत्रुसचे, “एचे खलइ तम् लबल ङचे तेएनो अस्य्हे” पङ्ज्यीम् दोइ म्रप्री ङ्यीज्यी। ओसेम् हुजु बेलोरीनो नक व्हब ङ्य्हज्यी। 69 पत्रुसत म्रप्री म्रङ्ज्यीम् हुजु अमकोल योक्पोचे ल्हो-ल्हो म्हीमात, “चु म्हीएनो येसुइ डबमान्हङ्री गीः य्हीन्ब” पङ्ज्यी। 70 तर पत्रुसचे देबेएनो अय्हीन् पङ्ज्यी। य्हम्बकी लीप्चे हुजुरी रप्टीबे म्हीमाचे पत्रुसत म्रङ्ज्यीम् देबेएनो पङ्ज्यी, “देमेन्नो ए येसुइ डब य्हीन्ब। तलेपङ्सम् एएनो गालीली य्हीन्ब।” 71 हुजु लीप्चे पत्रुसचे सपथ चज्यीम् पङ्ज्यी, “ङचे भ्यु पङ्बल य्हीन्सम् पर्मेस्वर्की केम्लङ् ङत फोःखइ। एङ्यीमाचे पङ्बे चु म्हीत ङचे स्येनोअस्य्हे।” 72 पत्रुसचे होलेपङ्ब साच्चेनो देबेएनो नक व्हब ङ्य्हज्यी। ओसेम् पत्रुसत, “नक व्हब ङ्य्हीख्यप् ङ्य्हब बीम ङोन्ग्यम् एचे ङत सोम्ख्यप् अस्य्हे पङ्स्ये मुब” बी येसुचे सुङ्बल व्हल् खज्यी। ओसेम् थे छीः तेत्ज्यीम् क्राज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.