लुका 8 - पश्चिम तामाङयेसुत र्हो स्य्हेङ्पीन्बे अमकोलमा 1 हुजु लीप्चे येसु नम्समातेङ् ज्यीद सहरमा तज्यीम् पर्मेस्वर्की य्हुल्की ज्यबे सम्तर् स्येत्ज्यीम् स्येःज्यी। चुङ्ङ्यी डबमाएनो थेङ्तेङ् मुबल। 2 थेङ्तेङ् बक्च्य रोगमातेङ् म्हङ् स्यप्प ग्यम्से फेन्बे डेत्-डेत् अमकोलमाएनो मुबल। हुजुमा न्हङ्री म्हङ् ङ्यीस् स्यप्प ग्यम्से फेन्बे मरीयम मग्दलीनीएनो मुबल। 3 ओसेम् हेरोदकी दीम्री लक् स्य्हेङ्बमाकी हाकीम् चुजाकी म्रीङ् योअन्ना, ओसेम् सुसन्नातेङ् ल्होल्होएनो य्हक्को अमकोलमा मुबल। थेङ्यीमाचे येसुतेङ् थेङ्की डबमात र्हङ्की स्य्हेमा पीन्ज्यीम् र्हो स्य्हेङ्ब मुबल। ब्लु ब्लुत्पे अर्थ ( मत्ती १३:१-९ ; मर्कुस् ४:१-९ ) 4 म्हीमा नम्स-नम्स ग्यम्से खज्यीम् येसु मुबे ग्लारी र्हुप् तज्यी। ओसेम् थेङ्चे चोतेबे अर्थ सुङ्ज्यी, 5 “म्ही गीः म्रङ्री ङ्यीज्यीम् ब्लु ब्लुत्ज्यी। ब्लु ब्लुत्म-ब्लुत्मम् गदे ब्लुमाम् ग्यम्री दोःज्यीम् म्हीचे प्ले:थेन्ज्यी। ओसेम् ङ्यम्ङ्यमाचे तोक्ज्यीम् चज्यी। 6 गदे ब्लुमाम् युङ्ब मुबे सरी दोःज्यी। हुजुरी ब्लु फीबम् फीःज्यी, तर खर्ब सेप्प्र तज्यीम् य्हम्बगीरीनो खर् य्हर्ज्यी। 7 गदे ब्लुमाम् पुजुइ जीङ्न्हङ् दोःज्यी। ओसेम् पुजुतेङ् बक्च्य फीःबल तज्यीम् पुजुइ झ्याङ्चे उप्पल तज्यीम् जेप्प ताअखम्। 8 तर गदे ब्लुम् ज्यबे स नारी दोःज्यी। ओसेम् फीःज्यीम् दोङ्बो र्हङ्स्यीनो सय गुन अन्न रोःज्यी।” चु अर्थ सुङ्ब बीसेम् येसुचे बङ्ले सुङ्ज्यी, “खल्ल थ्येःबे न्हबीङ् मुब, हुजुचे थ्येःखइ।” पेतम्की अर्थ ( मत्ती १३:१०-२३ ; मर्कुस् ४:१०-२० ) 9 येसुइ डबमाचे थेङ्त चु पेतम्की अर्थ ता बी ङ्योत्ज्यी। 10 येसुचे थेङ्यीमात सुङ्ज्यी, “एङ्यीमातमी म्हीचे गोअखम्बे पर्मेस्वर्की य्हुल्की तम् गोखम्बे ज्ञान् पीन्बल मुब। तर ल्हो-ल्होमातमी चु तम्मा पेतम्मारीनो स्येत्प। ‘होत्तज्यीम् थेङ्यीमाचे च्याबम् च्याब तर अम्रङ्। ओसेम् थ्येःबम् थ्येःब तर गोअखम्।’ 11 “चु पेतम्की अर्थ चु य्हीन्ब। ब्लुम् पर्मेस्वर्की फ्रोइ य्हीन्ब। 12 ग्यम्री दोःबे ब्लु पङ्बलमी चु य्हीन्ब। थेङ्यीमाचे फ्रोइ् ङ्येन्बम् ङ्येन्ब तर सेम्री थेन् अखम्, तलेपङ्सम् बीस्वास् स्य्हेङ्ज्यीम् थर्ल बी सैतान खज्यीम् थेङ्यीमाकी सेम् ग्यम्चे थेङ्यीमाचे थ्येःबे फ्रोइ् बोर्ब। 13 युङ्ब मुबे सरी दोःबे ब्लु पङ्बलमी चु य्हीन्ब, थेङ्यीमाचे पर्मेस्वर्की फ्रोइ् थ्येःब बीसेम् तङ्ज्यीम् बीस्वास् स्य्हेङ्ब। तर थेइ बीस्वासकी टा अरेबल तज्यीम् य्हम्बगीकीनो बीस्वास् स्य्हेङ्ब। ओसेम् दुख खब साच्चेनो बीस्वास् स्य्हेङ्ब पीत्लाब। 14 पुजुइ जीङ्न्हङ् दोःबे ब्लु पङ्बलमी चु य्हीन्ब, थेङ्यीमाचे पर्मेस्वर्की फ्रोइ्मी ङ्येन्ब तर थेमाइ जीवन्री छेर्ब, टङतेङ् स्हेमाइ लोभ ओसेम् मोज्मजमाचे लज्यीम् बीस्वासत ङ्हच्छ्यङ् ताअबुङ। होत्तज्यीम् थेमाइ बीस्वास्री तेएनो अरो। 15 ओसेम् स नारी दोःबे ब्लु पङ्बलमी चु य्हीन्ब, थेङ्यीमाचे थ्येःबे फ्रोइ् ज्यनले ज्यबे सेम्री थेन्ब, ओसेम् फ्रोइ्त ङ्येन्ज्यीम् ब्रब। ओसेम् खतेबे दुख खलेनो ग्यप्चे अदोःनले र्हङ्की बीस्वास्री रोःरो रोःज्यीम् ङोन्ग्यम् य्हर्स्यीनो टीब। मेतङ्की अर्थ ( मर्कुस् ४:२१-२५ ) 16 “खल्चेएनो मेतङ् म्रज्यीम् पतीचे उप्ज्यीम् अथेन्। ओसेम् खाटकी दुङ्री छुम्ज्यीम् अथेन्। तर दीम्न्हङ् खबे म्हीमात य्हल् तखइ बी नोबे ग्लारी थेन्ब। 17 होलेनो, छुम्बलमा म्रङ्स्ये मुब, ओसेम् गोअखम्बे जम्मा तम्मा जम्मचे गोज्यीम् स्येस्ये मुब। 18 होत्तज्यीम् एङ्यीमाचे थ्येःबे तम्त ज्येन्ले ङ्येनो, तलेपङ्सम् खल्तेङ् मुज्यी हुजुत ल्होल्होएनो पीन्स्ये मुब। तर खल्तेङ् अरेज्यी हुजुल चेक् मुब म्हेम्बलएनो ब्येन्स्ये मुब।” येसुइ अमतेङ् अलेमा ( मत्ती १२:४६-५० ; मर्कुस् ३:३१-३५ ) 19 येसुइ अमतेङ् अलेमा थेङ्त दोबरी खज्यी। तर य्हक्को म्हीमा मुबल तज्यीम् थेङ्यीमा थेङ्की रेइरी ङ्यी अखम्। 20 म्ही गीःचे येसुत पङ्ज्यी, “थेङ्की अमतेङ् अलेमा थेङ्त दोबरी फीर्च्योर् र्प्टीबल मुब।” 21 येसुचे जम्म म्हीमात सुङ्ज्यी, “खल्चे पर्मेस्वर्की फ्रोइ ङ्येन्ज्यीम् फ्रोइ्चे पङ्ब र्हङ्ले ब्रज्यी हुजुमानो ङइ अमतेङ् अलेमा य्हीन्ब।” येसुचे लाब लुङ्त सान्त लजेत्पल ( मत्ती ८:२३-२७ ; मर्कुस् ४:३५-४१ ) 22 तीरेत् येसु डबमातेङ् दोङ्गरी क्रेत्जेत्ज्यीम् थेङ्यीमात सुङ्ज्यी, “ङ्य्हङ्मा ग्येइ क्योम्सङ् ङ्यीइ्।” होत्तज्यीम् थेङ्यीमा ग्येइ क्योम्सङ् ङ्यीबरी स्येःज्यी। 23 थेङ्यीमा दोङ्गरी स्येःटीबे बेलोरी येसु स्हीम्ज्यीम् म्हेर्जेत्ज्यी। य्हम्बगीरीनो ग्येरी ङ्हच्छ्यङ् लाबलुङ् खज्यी, ओसेम् दोङ्ग कीचे प्लीङ्ब छ्येज्यीम् थेङ्यीमा ङ्हच्छ्यङ् समस्यारी पर्तीज्यी। 24 होत्तज्यीम् डबमा येसुज ङ्यीज्यीम् थेङ्त छ्यीङ्ज्यीम्, “लोप्पोन्, लोप्पोन्! ङ्ह्यङ्मा स्यीब छ्यज्यी!” बी पङ्ज्यी। ओसेम् येसु रेःज्यीम् लाबलुङ्तेङ् छाल्त रोक्तीउ बी कुल्जेत्ज्यी। ओसेम् लाबलुङ् रोक्तीज्यीम् ग्ये सान्त तज्यी। 25 ओसेम् येसुचे डबमात सुङ्ज्यी, “एङ्यीमाकी बीस्वास् खइ?” तर थेङ्यीमा लोङ्ज्यीम् थोम्ज्यी। ओसेम् गीःचे गीःत पङ्ज्यी, “चु खल म्ही य्हीन्ब? लाबलुङ्तेङ् छाल्चेएनो थेङ्चे कुल्बे तम् ङ्येन्बटीम्।” म्हङ् स्यप्पे म्ही फेन्बल ( मत्ती ८:२८-३४ ; मर्कुस् ५:१-२० ) 26 येसुतेङ् थेङ्की डबमा क्योम्सङ् गालील ग्येइ यरी गेरासेनस् पङ्बे प्रदेस्री दोःखज्यी। 27 येसु दोङ्गचे ग्येइ यरी फप्मम् हुजु प्रदेस्की ज्यीद सहरसे म्हङ् स्यप्पे म्ही गीः थेङ्त खदु लबरी खज्यी। थे य्हक्को बेलो ङोन्ग्यम् य्हङ्सेनो क्लीङ्दो ब्रज्यीम् दीम् पीत्ज्यीम् स्यीबे म्हीमा बुप्पे ऊमारी टीब मुबल। 28 येसुत म्रङ्ब बीसेम् थे क्राज्यीम् थेङ्की ङोन्री पब्लु लज्यीम् बङ्ले पङ्ज्यी, “ओ येसु, जम्मा न्हङ्री जोइ पर्मेस्वर्की ज! एचे ङतेङ् ता म्हइबल? ङ एत बीन्ती लब, ङत दुख थन्हङो!” 29 येसुचे म्हङ्त, “हुजु म्ही ग्यम्से डोङ्ज्यीम् य्हरो।” बी कुल्बल तज्यीम् थेचे चोले पङ्ज्यी। थेत म्हङ्चे चुङ्ज्यीम् य्हक्को ख्यप् लोङ्नले सतइतीब मुबल। हुजु म्हीइ यातेङ् कङ्री फइ्की च्यल्दमाचे खीज्यीम् म्हीमाचे रुङ्ब मुबल। तर म्हङ् स्यप्पे म्हीचे च्यल्दमा ब्रक्ब्रेक् छ्येलाज्यीम् थेत म्हङ्चे उजाड-ग्लामारी कर्लेनो बोर्ब मुबल। 30 येसुचे थेत ङ्योत्जेत्ज्यी, “एल मीन् ता?” थेचे पङ्ज्यी, “फौज” तलेपङ्सम् थेइ गोरी य्हक्को म्हङ्मा वङ्बल मुबल। 31 म्हङ्माचे थेङ्यीमात सजाय पीन्बे नुप्पे ग्लारी थपीतो बी येसुत फ्या लस्यीनो टीज्यी। 32 हुजु ग्लाइ रेइकी गङ्री य्हक्को तीलीमा छटीब मुबल। होत्तज्यीम् म्हङ्माचे हुजु तीलीमा न्हङ् वङ्पुङो बी थेङ्त फ्या स्य्हु लज्यी, ओसेम् येसुचे वङ्पुङ्ज्यी। 33 म्हङ्मा हुजु म्हीइ गोचे डोङ्ज्यीम् तीलीमा न्हङ् वङ्ज्यी, ओसेम् जम्मा तीलीमा गङ्चे क्रसु-क्रसु छ्योङ्ज्यीम् ब्राचोचे ग्येरी तइज्यीम् दीम्ज्यीम् स्यीज्यी। 34 य्हक्को तीलीमा छटीबे म्हीमाचे चु म्रङ्ब बीसेम् छ्योङ् य्हर्ज्यीम् ज्यीद सहरतेङ् हुजु प्रदेस्की खन बीबीकी नम्समारी स्येत्पीन्ज्यी। 35 ओसेम् हुजुरी ता तज्यी हुजु च्याबरी म्हीमा येसुज खज्यी। थेङ्यीमाचे हुजु म्ही ग्यम्चे म्हङ्मा डोङ्य्हर्ज्यीम्, थे येन् येन्ज्यीम्, सद्दे तज्यीम् येसुइ स्य्हब्की रेइ्री टीटीबल म्रङ्ज्यी, ओसेम् थेङ्यीमा जम्मनो लोङ्ज्यी। 36 म्रङ्बलमाचे म्हङ् स्यप्पे म्ही खले फेन्ज्यी बी थेङ्यीमात स्येत्पीन्ज्यी। 37 हुजु लीप्चे गेरासेनस् प्रदेस्की जम्मा म्हीमाचे येसुत चु ग्ला ग्यम्चे थारीङ् स्येःजेतो बी फ्या स्य्हु लज्यी। तलेपङ्सम् थेङ्यीमा य्हक्को लोङ्बल मुबल। होत्तज्यीम् हुजु ग्ला पीत्थेन्बरी येसु दोङ्गरी क्रेत्जेत्ज्यी। 38 म्हङ् स्यप्प ग्यम्से फेन्बे म्ही येसुज ङ्यीज्यीम् थेत बक्च्य ङ्यीबुङो बी फ्या स्य्हु लज्यी। तर येसुचे थेत चोले सुङ्ज्यीम् दोःपीत्ज्यी, 39 “ए दीम्री दोःय्हरो, ओसेम् पर्मेस्वर्चे एइ लागीरी खतेबे लक् स्य्हेङ्ज्यी बी जम्मात स्येत्पीनो।” होत्तज्यीम् येसुचे थेइ लागीरी खतेबे लक् स्य्हेङ्जेत्ज्यी बी जम्मनो ज्यीद सहरमा तज्यीम् स्येत्ज्यीम् य्हर्ज्यी। याइरसकी जमेतेङ् नबे अमकोल ( मत्ती ९:१८-२६ ; मर्कुस् ५:२१-४३ ) 40 येसु ग्येइ क्योम्सङ् दोःमम् य्हक्को म्हीमाचे थेङ्त स्वागत स्य्हेङ्ज्यी, तलेपङ्सम् थेङ्यीमा जम्मचे थेङ्त ब्रेन्टीब मुबल। 41 य्हम्बकी लीप्चे याइरस पङ्बे म्ही गीः खज्यी, थे हुजु ग्लाइ यहुदीमा र्हुप् तबे दीम्की सासक् मुबल। थेचे येसुइ स्य्हब्री पब्लु लज्यीम् “ङइ दीम्री ब्योन्खो” बी फ्या स्य्हु लज्यी, 42 तलेपङ्सम् थेइ ल्हेगोर् यो:बोर्बे गीःकीनो मुबे जमे स्यीयम्बल मुबल। येसु ग्यम्री स्येःटीमम् य्हक्को म्हीमा खज्यीम् थेङ्की खनबीबीनो र्हुप् तज्यी। 43 हुजु य्हक्को म्हीमान्हङ्री ल्हेगोर् गीः सम्म का य्हर्स्यीनो टीबे अमकोल गीः मुबल, तर थेत खल्चेएनो फेन्न लअखम्बल मुबल। 44 हुजु अमकोल येसुइ ग्यप्री खज्यीम् थेङ्की न्हम्जइ नरी छुब साच्चेनो थेइ का य्हर्ब रोक्तीज्यी। 45 येसुचे ङ्योत्जेत्ज्यी, “ङत खल्चे छुज्यी?” जम्मचेनो अछु पङ्ज्यी, ओसेम् पत्रुसचे पङ्ज्यी, “लोप्पोन्, एत य्हक्को म्हीमाचे घेर्तीबल तज्यीम् तोर् इ मोर् इ तटीब मुब।” 46 तर येसुचे सुङ्ज्यी, “ङत खल्चे य्हीन्ज्यी छुबल मुब, तलेपङ्सम् सक्ती ङ ग्यम्चे डोङ् य्हर्बल ङचे छोर्ज्यी।” 47 हुजु अमकोलचे थे लाज्यीम् टीब अखम्स्येटीम् म्हेन्ज्यीम् दर्-दर्ज्यीम् लोङ्ज्यीम् येसुइ ङोन्री खज्यीम् पब्लु लज्यी। ओसेम् येसुत तले छुबल, छुब साच्चेनो थे खले फेन्य्हर्ज्यी बी जम्म म्हीमाइ ङोन्ग्यम् स्येत्पीन्ज्यी। 48 येसुचे थेत सुङ्ज्यी, “जमे, एइ बीस्वासचे एत फेन्न लबल मुब, पर्मेस्वर्चे एत सान्ती न्हङ्खइ।” 49 येसुचे चोले सुङ्टीबे बेलोरीनो, यहुदीमा र्हुप् तबे दीम्की सासक् याइरसकी दीम्चे खबर बबे म्ही खज्यीम्, “एइ जमे स्यीज्यी, देरेम् लोप्पोन्त दुख थन्हङो।” बी पङ्ज्यी। 50 तर येसुचे चु तम् थ्येःज्यीम् याइरसत सुङ्ज्यी, “थलोङो, बीस्वासकीनो स्य्हेङो, एइ जमे फेन्स्ये मुब।” 51 याइरसकी दीम्री फेत्ज्यीम् येसुचे ल्हो-ल्हो खल्ते दीम्न्हङ् वङ अपुङ्नले पत्रुस, याकुब, युहन्ना ओसेम् कोलइ अपतेङ् अमतकीनो थेङ्तेङ् दीम्न्हङ् वङ्पुङ्ज्यी। 52 हुजुरी मुबे जम्म म्हीमा कोलइ लागीरी दुख म्हन्दीज्यीम् क्राटीब मुबल। तर येसुचे सुङ्ज्यी, “थक्राको, कोल स्यीबल अरे तर थे म्हेर्बलकीनो य्हीन्ब।” 53 येसुइ तम् थ्येःज्यीम् पतइ् अतीज्यीम् थेङ्यीमा ङ्येत्ज्यी, तलेपङ्सम् थेङ्यीमाचे कोल स्यीबलनो बी था मुबल। 54 तर येसुचे कोलइ यारी चुङ्ज्यीम् बङ्ले सुङ्ज्यी, “ओ जमे, रेःगो!” 55 ओसेम् कोलल बुः दोःखब साच्चेनो कोल रेःज्यी, ओसेम् येसुचे कोलत चब पीनो बी थेङ्यीमात सुङ्ज्यी। 56 कोलइ अप-अम थोम्ज्यी। तर येसुचे थेङ्यीमात हुजुरी ता तज्यी खलतेएनो थस्येतो बी कुल्जेत्ज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.