लुका 4 - पश्चिम तामाङयेसुइ परीक्ष ( मत्ती ४:१-११ ; मर्कुस् १:१२ , १३ ) 1 येसु पबीत्र आत्माचे प्लीङ्ज्यीम् यर्दन गेन्दीचे दोजेत्ज्यी। पबीत्र आत्माचे येसुत उजाड-ग्लारी नोम्जेत्ज्यी। 2 हुजुरी सैतानचे येसुत दीन् खल् ङ्य्हीसम्म परीक्ष स्य्हेङ्ज्यी। हुजु दीन् खल् ङ्य्हीसम्मनो येसुचे तेएनो असोल्। हुजु लीप्चे थेङ् य्हक्कोनो ख्रेन्जेत्ज्यी। 3 हुजु बेलोरीनो सैतानचे येसुत चोले पङ्ज्यी, “ए देमेन्नो पर्मेस्वर्की ज य्हीन्ब पङ्सम् चु युङ्बत गेङ् तउ बी सुङो।” 4 येसुचे चोले जोहाप् न्हङ्जेत्ज्यी, “पर्मेस्वर्की फ्रोइ्री ब्रीबल मुब, ‘म्ही चबे स्हेचेकीनो सो अखम्।’” 5 हुजु लीप्चे सैतानचे येसुत नोबे गङ्जोरी बोर्ज्यीम् य्हम्बगीरीनो जम्बुलीङ्की य्हुल्मा ङोन्ज्यीम्, 6 सैतानचे चोले पङ्ज्यी, “एत चु जम्मनो य्हुल्माकी हक्तेङ् य्हुल्मा ग्यम्से यङ्बे स्य्हेस ङचे एत पीन्ब खम्ब। तलेपङ्सम चु जम्मनो ङइ यारी मुब। ओसेम् ङचे खल्त पीन्गे म्हेन्ज्यी हुजुतनो पीन्ब खम्ब। 7 एचे ङत ज्यल्ज्यी पङ्सम् चु जम्मनो एल तस्ये मुब।” 8 येसुचे जोहाप् न्हङ्जेत्ज्यी, “पर्मेस्वर्की फ्रोइ्री ब्रीबल मुब, ‘एचे परमप्रभु, र्हङ्की पर्मेस्वर्तकीनो ज्यलो, ओसेम् थेङ्तकीनो तेनो।’” 9 हुजु लीप्चे सैतानचे येसुत यरुसलेमरी बोर्ज्यी। ओसेम् पर्मेस्वर्त तेन्बे दीम्जोरी बोर्ज्यीम् चोले पङ्ज्यी, “ए देमेन्नो पर्मेस्वर्की ज य्हीन्ब पङ्सम् लो, चु जोचे दुङ्री छ्योङो। 10 तलेपङ्सम् पर्मेस्वर्की फ्रोइ्री चोले ब्रीबल मुब, ‘एत जोगइ्तीबरी पर्मेस्वर्चे स्वर्गदुत्मा कुल्जेत्स्ये मुब।’ 11 ओसेम् ‘एइ स्य्हब् युङ्बरी म्य्हाल पङ्ज्यीम् थेमाचे या तास्ये मुब।’” 12 ओसेम् येसुचे सुङ्ज्यी, “धर्मइ छ्येःरी ब्रीबल मुब, ‘एचे परमप्रभु र्हङ्ल पर्मेस्वर्की परीक्ष थस्य्हेङो।’” 13 सैतानचे येसुत परीक्ष स्य्हेङ्ब बुच्ज्यीम् ल्हो-ल्हो मौक अयङ्गदेसम्म ख्लेथेन्ज्यीम् य्हर्ज्यी। गालील प्रदेस्री येसुचे लक् तीप्प ( मत्ती ४:१२-१७ ; मर्कुस् १:१४-१५ ) 14 पबीत्र आत्माकी सक्ती यङ्ज्यीम् येसु गालीलरी दोखजेत्ज्यी। ओसेम् येसुइ बारेरी खनबीबीनो तम् चल्तीबोर्ज्यी। 15 थेङ्चे यहुदीमा र्हुप् तबे दीम्मारी लोप्जेत्ज्यी। ओसेम् जम्म म्हीमाचे थेङ्त तोप्ज्यी। नासरत्की म्हीमाचे पतइअतीबल ( मत्ती १३:५३-५८ ; मर्कुस् ६:१-६ ) 16 येसु र्हङ् छर्बे सहर नासरत्री दोखजेत्ज्यी। थेङ्की पेठीम् अनुसार दुःब न्हबे दीन्री यहुदीमा र्हुप् तबे दीम्री स्येज्यीम् धर्मइ छ्येः खेप्परी रप्जेत्ज्यी। 17 येसुत यसैया अगम्बक्तचे ब्रीबे छ्येः खेप्परी पीन्ज्यी। ओसेम् छ्ये थोज्यीम् चोले ब्रीबे तम् तेत्ज्यीम् खेत्जेत्ज्यी। 18 “प्रभुकी आत्मा ङतेङ् मुब, तलेपङ्सम् प्रङ्नमात ज्यबे सम्तर् स्येत्परी पर्मेस्वर्चे ङत दम्जेत्ज्यीम् पीत्युजेत्पल मुब। बन्दीरी मुबे म्हीमात पीत्परी, मीः अम्रङ्बमात म्रङ्न लबरी, ल्हो-ल्हो म्ही ग्यम्चे दुख यङ्बलमात पीत्परी, 19 ओसेम् मुक्ती पीन्बे बेलो खबल मुब बी स्येत्पेरी पर्मेस्वर्चे ङत पीत्युजेत्पल मुब।” 20 हुजु लीप्चे येसुचे छ्येः बन्द लज्यीम् हुजुरी सेवा स्य्हेङ्बे म्ही गीःत दोःपीन्ज्यीम् स्य्हुजेत्ज्यी। हुजुरी मुबे म्हीमा जम्मचेनो येसुतकीनो च्याटीब मुबल। 21 ओसेम् थेङ्चे थेङ्यीमात सुङ्ज्यी, “धर्मइ छ्येःकी चु तम् एङ्यीमाचे ङ्येन्न-ङ्येन्ननो तीङी पुरा तबल मुब।” 22 जम्म म्हीमाचे येसुत तोप्ज्यी। येसुचे सुङ्बे ज्यबे तम् थ्येःज्यीम् थेङ्यीमा जम्मनो थोम्ज्यी। “चु योसेफकी ज अयीनो स्यीम्?” बी थेङ्यीमाचे पङ्ज्यी। 23 येसुचे सुङ्ज्यी, “देमेन्नो एङ्यीमाचे ङत चु उखान् पङ्स्ये मुब, ‘ओ डाक्टर! ए र्हङ्तनो फेन्न लउ।’ एङयीमाचे ङत ‘कफर्नहुमरी स्य्हेङ्ब र्हङ्ले र्हङ्की नम्सरीएनो तेङेन्की लक् स्य्हेङो’ पङ्स्ये मुब।” 24 “देमेन्नो ङ एङ्यीमात पङ्ब, अगम्बक्तमा खल्तएनो र्हङ्की नम्सरी म्हीमाचे पतइअती। 25 एङ्यीमात ङ ल्होल्होएनो तम् गीः पङ्ब। अगम्बक्त एलीयाकी बेलोरी सोम्तीङ्स्यी ल डु सम्म नम् अयुज्यीम् ङ्हच्छ्यङ् अनीकल् तबल मुबल। हुजु बेलोरी इस्राएल य्हुल्री र्हेम्बो स्यीबे अमकोलमा य्हक्को मुबल। 26 एलीयतमी पर्मेस्वर्चे इस्राएलकी र्हेम्बो स्यीबे अमकोलमाज अपीत्, तर सीदोन प्रदेस्की सारपत नम्सइ र्हेम्बो स्यीबे अमकोलजकीनो पीत्जेत्ज्यी। 27 ओसेम् एलीसा अगम्बक्त मुबे बेलोरी इस्राएलरी पुन् स्यप्पे म्हीमा य्हक्को मुबल। थेमान्हङ्री खलएनो अफेन् तर सीरीया य्हुल्की नामान पङ्बे म्ही गीःकीनो फेन्ज्यी।” 28 चु तम् थ्येःज्यीम् यहुदीमा र्हुप् तबे दीम्री मुबे म्हीमा जम्मतनो य्हक्को बोमो खज्यी। 29 ओसेम् थेमा जम्मनो फत्फोत् रेज्यीम् येसुत सहरकी फीर्च्योर् मुबे ब्राचोजे ब्लीङ्लाके पङ्ज्यीम् इबोर्ज्यी। तलेपङ्सम् हुजु सहर गङ्री मुबल। 30 तर येसु म्हीमाकी गुङ्से डोङ्ज्यीम् र्हङ्की ग्यम्से स्येःज्यी। म्हङ् स्यप्पे म्ही फेम्बल ( मर्कुस् १:२१-२८ ) 31 हुजु लीप्चे येसु गालील प्रदेस्की कफर्नहुम पङ्बे सहर्री स्येजेत्ज्यी। ओसेम् दुःब न्हबे दीन्री थेङ्चे म्हीमात लोप्जेत्ज्यी। 32 येसुचे लोप्जेत्प थ्येःज्यीम् थेङ्यीमा थोम्ज्यी। तलेपङ्सम् थेङ्चे अधीकार् लज्यीम् लोप्जेत्ज्यी। 33 यहुदीमा र्हुप् तबे दीम्री म्हङ् स्यप्पे म्ही गीः मुबल। हुजु म्हीचे क्रीङ्ज्यीम् पङ्ज्यी, 34 “ओ नासरत्की येसु, एचे ङ्यीमात ता स्य्हेङ्ब छ्येबल? एङ्यीमात नास् स्य्हेङ्बरी दोखजेत्पल य्हीन्ब? ए पर्मेस्वर्चे पीत्युजेत्पे पबीत्र म्ही य्हीन्ब बी ङत था मुब।” 35 चु थ्येःज्यीम् येसुचे हुजु म्हङ्त बराज्यीम् सुङ्जेत्ज्यी, “कुटी टीउ! ओसेम् चु म्ही ग्यम्से डोङ्ज्यीम् य्हरो!” हुजु म्हीत जम्मइ ङोन्ग्यम् म्य्हाथेन्ज्यीम् म्हङ् डोङ्य्हर्ज्यी। होले म्य्हाथेन्लेनो थेत खनएनो म्हग अङ्य्ही। 36 ओसेम् जम्मनो थोम्ज्यीम् थेमा न्हङ् चोले पङ्ज्यी, “चु म्हीइ बोलीरी खतेबे अधीकारतेङ् सक्ती मुबटीम्। थेङ्चे हप्कइ्तीब साच्चेनो म्हङ्मा डोङ्ज्यीम् य्हर्बटीम् स्यीम्!” 37 ओसेम् येसुइ बारेरी कफर्नहुम सहर्की खनबीबीनो ग्लामारी चर्च तज्यी। येसुचे य्हक्को म्हीमात फेन्न लजेत्पल ( मत्ती ८:१४-१७ ; मर्कुस् १:२९-३४ ) 38 यहुदीमा र्हुप् तबे दीम्से डोङ्ज्यीम् येसु सीमोनकी दीम्री स्येजेत्ज्यी। हुजु बेलोरी सीमोनकी स्युमे छव खज्यीम् नबल मुबल। ओसेम् दीम्की म्हीमाचे, “थेत फेन्नलबीनो” बी येसुत पङ्ज्यी। 39 येसु नबे म्हीइ रेइ्री स्येःज्यीम् छवत हप्कइतीब साच्चेनो छव म्हज्यी। ओसेम् सीमोनकी स्युमे रेज्यीम् थेमात क्योङ्ज्यी। 40 दीनी गल्ब बीसेम् म्हीमाचे य्हक्को खाल्की नबे म्हीमात येसुज बज्यी। थेचे हुजु नबे म्हीमाइ जोरी र्हङ्की फ्या थेन्ज्यीम् जम्मत फेन्न लजेत्ज्यी। 41 य्हक्को म्हीमा ग्यम्से म्हङ्मा क्रीङ्ज्यीम् चोले पङ्ज्यीम् डोङ्ज्यी, “ए पर्मेस्वर्की ज य्हीन्ब।” तर येसुचे हुजु म्हङ्मात तेएनो पङ्अपुङ्। तलेपङ्सम् थे ख्रीस्ट् य्हीन्ब बी म्हङ्माचे स्येःब मुबल। येसुचे ज्यबे सम्तर् लोप्जेत्प ( मर्कुस् १:३५-३९ ) 42 न्हम्स्योर्हङ् स्य्होरी मीः म्रङ्ब साच्चेनो येसु सुन्सान ग्लारी स्येजेत्ज्यी। म्हीमाचे येसुत म्हइम-म्हइमम् थेङ् मुबे ग्लारी दोखज्यी। थेङ्त दोब बीसेम् थेमाचे, “ङ्यीमात ख्लेथेन्ज्यीम् थस्येको” बी पङ्ज्यीम् गु:ब म्हइज्यी। 43 तर येसुचे थेङ्यीमात सुङ्ज्यी, “ङचे पर्मेस्वर्की य्हुल्की ज्यबे सम्तर् ल्हो-ल्हो ग्लारीएनो स्येत्थोब। तलेपङ्सम् पर्मेस्वर्चे ङत चु लक् स्य्हेङ्बे लागीरी पीत्युजेत्पल य्हीन्ब।” 44 चोले येसुचे यहुदीया प्रदेस्की यहुदीमा र्हुप् तबे दीम्मारी स्येःज्यीम् प्रचार स्य्हेङ्जेत्ज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.