लुका 24 - पश्चिम तामाङयेसु पुनरुत्थान् तबल ( मत्ती २८:१-१० ; मर्कुस् १६:१-११ ; युहन्ना २०:१-१० ) 1 अइतबार स्य्होरी अमकोलमा र्हङ्चे तयार् स्य्हेङ्बे य्हक्को ङोर्थङ् खबे स्हेमा बोर्ज्यीम् येसुत थेन्बे दुर्सरी ङ्यीज्यी। 2 थेङ्यीमा दुर्सरी दोःमम् दुर्सइ म्रप्री थेन्बे ङ्हच्छ्यङ् युङ्ब स्या:लाबल म्रङ्ज्यी। 3 होत्तज्यीम् थेङ्यीमान्हङ्री वङ्ज्यी। तर थेङ्यीमाचे हुजुरी प्रभु येसुइ ल्ही अम्रङ्। 4 थेङ्यीमा थोम्ज्यीम् र्प्टीब मुबल। हुजु बेलोरीनो तर्-तर्ले सर्बे येन् येन्बे म्ही ङ्य्ही थेङ्यीमाकी रेइरी रप्युज्यी। 5 अमकोलमा लोङ्ज्यीम् सरी पब्लु लज्यी। तर अमकोलमात हुजु म्ही ङ्य्हीचे पङ्ज्यी, “सोज्यीन्बे म्हीत तले एङ्यीमाचे स्यीबलमा थेन्बे दुर्सरी म्हइबल? 6 थेङ् चुरी अरे। थेङ् स्यीब ग्यम्से सोजेत्पल मुब! व्हल् स्य्हेङो, थेङ् गालील्री मुबे बेलोरी एङ्यीमात थेङ्चे ता सुङ्बल मुबल। 7 थेङ्चे सुङ्ज्यी, ‘म्हीइ ज पापीमाकी यारी सोप्तीज्यीम् क्रुस्री च्योलास्ये मुब। ओसेम् सोम्रेत् कुनो स्यीब ग्यम्से सोस्ये मुब।’” 8 ओसेम् थेङ्यीमाचे येसुचे सुङ्बे फ्रोइमा व्हल् लज्यी। 9 ओसेम् अमकोलमा दुर्स ग्यम्से दोःय्हर्ज्यीम् थेङ्यीमाचे म्रङ्बे जम्मा तम्मा चुक्ख्रीत् डबमातेङ् ल्हो-ल्हो जम्मा डबमात स्येत्ज्यी। 10 हुजु अमकोलमामी मरीयम्, मग्दलीनी ओसेम् याकुबकी अम मरीयम् ओसेम् योअन्नातेङ् ल्हो-ल्हो अमकोलमाएनो मुबल। थेङ्यीमचेनो चु तम्मा प्रेरीतमात स्येत्पल मुबल। 11 तर हुजु अमकोलमाकी तम्त थेङ्यीमाचे अतबे तम् पङ्ज्यीम् पतइअती। 12 तर पत्रुस फोत् रेःज्यीम् दुर्सरी छ्योङ्य्हर्ज्यी। ओसेम् कुक् लज्यीम् न्हङ्री च्यामम् क्रीः येन्कीनो म्रङ्ज्यी ल्हो-ल्हो तेएनो अम्रङ्। चु म्रङ्ज्यीम् थे तेङेन् तज्यीम् दीम्री दोःय्हर्ज्यी। इम्माउस नम्स ङ्यीबे ग्यम्री येसु ( मर्कुस् १६:१२-१३ ) 13 हुजु दीन्रीनो येसुइ डब ङ्य्ही यरुसलेम य्हङ्से चुख्रीत् कीलोमीटर् थारीङ् मुबे इम्माउस पङ्बे नम्सरी य्हर्टीब मुबल। 14 थेङ्य्ही यरुसलेमरी तबे जम्मा तम्माकी बारेरी तम् लज्यीम् य्हर्टीब मुबल। 15 थेङ्य्ही तम् लज्यीम् य्हर्टीबे बेलोरीनो येसु ब्योन्खज्यीम् थेङ्य्हीतेङ् बक्च्या स्येःजेत्ज्यी। 16 तर पर्मेस्वर्चे थेङ्यीमात थेङ्त म्रङ्लेनो अस्य्हेन लजेत्ज्यी। 17 येसुचे थेङ्यीमात, “एङ्यीमा तइ बारेरी तम् पङ्ज्यीम् ब्रटीब?” बी ङ्योत्जेत्मम् थेङ्य्ही छेर्बे लीः थोज्यीम् थोम्ले रप्ज्यी। 18 हुजु ङ्य्ही न्हङ्री क्लेओपास् पङ्बे म्हीचे थेङ्त, “यरुसलेम् कोर्ज्यीम् खज्यीमेएनो हुजुरी तीन्हम्स्यो तात तटीब बी खले एचेकीनो था अयङ्?” बी ङ्योत्ज्यी। 19 थेङ्चे थेङ्य्हीत, “तइ तम्?” बी ङ्योत्जेत्ज्यी। ओसेम् थेङय्हीचे, “नासरत्की येसुइ तम्, थेङ् अगम्बक्त मुबल। थेङ्चे स्य्हेङ्जेत्पे लक्तेङ् लोप्जेत्पे फ्रोइ पर्मेस्वर्तेङ् जम्मा म्हीमाकी ङोन्री सक्तीसाली मुबल। 20 तर ङ्यीमाइ ङ्हच्छ्यङ् लम्बुमातेङ् सासक्माचे थेङ्त सेत्लागो पङ्ज्यीम् रोमी सरकारकी यारी सोप्तीज्यी, ओसेम् थेङ्त क्रुस्री च्योलाज्यी। 21 थेङ्चेनो इस्राएलीमात थर्नलजेत्प बी ङ्यीमाचे आस् लबल मुबल। तर थेङ्त क्रुस्री च्योलाबलएनो तीङ्यीम् सोम्रेत् तज्यी। 22 ङ्यीमा न्हङ्की डेत्-डेत् अमकोलमाचे ङ्यीमात थोम्न लज्यी। थेङ्यीमा दोल्स्य्हो दुर्सरी ङ्यीज्यी, 23 तर थेङ्यीमाचे थेङ्की ल्हीत अय्हङ्नेम्। ओसेम् दोःखज्यीम् थेङ्यीमाचे स्वर्गदुत्मा म्रङ्बे तम् ओसेम् स्वर्गदुत्माचे ‘येसु सोजेत्पल मुब’ पङ्ज्यी बी ङ्यीमात स्येत्खज्यी। 24 चु तम् थ्येःज्यीम् ङ्यीमाइ डेत्-डेत् र्होमाएनो दुर्सरी ङ्यीमम् अमकोलमाचे पङ्ब र्हङ्लेनो यङ्ज्यी। तर थेङ्यीमाचेएनो येसुइ ल्हीतमी अम्रङ्।” 25 ओसेम् येसुचे थेङ्यीमात सुङ्ज्यी, “एङ्यीमा गत्ते मुर्ख म्हीमा! अगम्बक्तमाचे पङ्बे जम्म तम्मात बीस्वास् स्य्हेङ्बरीएनो एङ्यीमात गत्ते गारो तबल? 26 मुक्ती न्हङ्बे ख्रीस्ट् र्हङ्की महीमारी स्येःब बीमम् ङोन्ग्यम् चु दुखमा नाअथोबल स्यीम्?” 27 ओसेम् येसुचे र्हङ्की बारेरी मोसा य्हङ्से जम्मा अगम्बक्तमाचे धर्मइ छ्येःरी ब्रीबे जम्मा तम्मा थेङ्यीमात गोनलजेत्ज्यी। 28 ओसेम् थेङ्यीमा इम्माउस नम्सइ रेइरी दोःजेत्प बीसेम् येसुचे ङोन्-ङोन् स्येःब म्हइब र्हङ् लजेत्ज्यी। 29 तर थेङ्य्हीचे थेङ्त, “म्हुन तयम्ज्यी, तीङ्यीइ म्हुन् ङ्यीङ्य्हीतेङ्नो बक्च्या स्य्हुजेतो” बी पङ्ज्यी। होत्तज्यीम् थेङ् बक्च्या स्य्हुबरी थेङ्य्हीतेङ् स्येःजेत्ज्यी। 30 येसु थेङ्य्हीतेङ् बक्च्या स्य्हेःब सोल्बरी स्य्हुजेत्ज्यी। थेङ्चे गेङ् थोज्यीम् मोलम् न्हङ्ज्यी। ओसेम् गेङ् स्योइज्यीम् थेङ्य्हीत न्हङ्ज्यी। 31 हुजु लीप्चे पर्मेस्वर्चे थेङ्य्हीत थेङ्नो येसुनो टीम् बी स्येःनलजेत्ज्यी। तर हुजु बेलोरीनो थेङ्मी थेङ्य्ही ग्यम्से म्हय्हर्जेत्ज्यी। 32 थेङ्य्हीचे गीःचे गीःत, “येसु ङ्य्हङ् ङ्य्हीतेङ् बक्च्या ग्यम्री ब्रज्यीम् धर्मइ छ्येःकी तम् गोनलजेत्पे बेलोरी ङ्य्हङ् ङ्य्हीइ सेम् अतङो स्यीम?” बी पङ्ज्यी। 33 होत्तज्यीम् हुजु बेलोरीनो थेङ्य्ही रेःज्यीम् यरुसलेम्री दोःय्हर्ज्यी। हुजुरी थेङ्य्हीचे चुख्रीत् डबमातेङ् ल्हो-ल्हो म्हीमात र्हुप्ले यङ्ज्यी। 34 ओसेम्, “प्रभु देमेन्नो स्यीब ग्यम्से सोजेत्ज्यीम् सीमोनज ब्योन्खनेम्!” बी तम् पङ्टीबल दोज्यी। 35 ओसेम् हुजु डब ङ्य्हीचे ग्यम्री तबे तम्तेङ् येसुचे गेङ् स्योइज्यीम् थेङ्य्हीत न्हङ्न्बे बेलोरी थेङ्त खले स्येःज्यी बी हुजुरी मुबलमात स्येत्पीन्ज्यी। येसु डबमाज म्रङ्बल ( मत्ती २८:१६-२० ; मर्कुस् १६:१४-१८ ; युहन्ना २०:१९-२३ ; प्रेरीत् १:४-८ ) 36 थेङ्यीमा चु तम् पङ्टीन-पङ्टीननो येसु थेङ्यीमाइ गुङ्री र्प्खजेत्ज्यीम् थेङ्यीमात, “एङ्यीमात सान्ती तखइ” बी सुङ्ज्यी। 37 ओसेम् थेङ्यीमाचे म्हङ् म्रङ्टीब म्हेन्ज्यीम् य्हक्को लोङ्ज्यी। 38 तर येसुचे थेङ्यीमात, “एङ्यीमा तले लोङ्बल? एङ्यीमाचे तले सङ्क लबल?” बी ङ्योत्जेत्ज्यी। 39 “च्यागो, ओसेम् ङइ यातेङ् कङ्री छुउ, एङ्यीमाचे म्रङ्बल देमेन्नो ङ य्हीन्ब। तलेपङ्सम् म्हङ्ल स्यतेङ् नख्रुत् अत, तर ङलमी मुब!” 40 चोले सुङ्ज्यीम् थेङ्चे थेङ्यीमात र्हङ्की फ्यातेङ् स्य्हब् ङोन्जेत्ज्यी। 41 थेङ्यीमा तङ्ज्यीम् तेङेन् तलेनो थेङ्यीमाचे येसुनो बी पतइतीब अखम्। होत्तज्यीम् येसुचे थेङ्यीमात, “एङ्यीमातेङ् चबे स्हे तइ मुब?” बी ङ्योत्जेत्मम् 42 थेङ्यीमाचे ख्रङ्बे तर्ङइ स्य दुम्बु गीः पीन्ज्यी। 43 येसुचे हुजु तर्ङइ स्य थेङ्यीमाइ ङ्होन्सङ्नो सोल्ज्यी। 44 ओसेम् येसुचे थेङ्यीमात, “मोसाचे ब्रीबे पर्मेस्वर्की नीयम्री, अगम्बक्तमाचे ब्रीबे छ्येःरी ओसेम् भजनसङ्ग्रहरी ङइ बारेरी ब्रीबे जम्मा तम्मा पुरा तथोब बी ङ एङ्यीमातेङ् बक्च्या मुबे बेलोरी ङचे ङोन्ग्यम्नो स्येत्पल मुबल” बी सुङ्जेत्ज्यी। 45 हुजु लीप्चे येसुचे थेङ्यीमात धर्मइ छ्येः गोखम्बे सेम् न्हङ्ज्यी। 46 ओसेम् थेङ्यीमात सुङ्ज्यी, “चोले ब्रीबल मुब, मुक्ती न्हङ्बे ख्रीस्ट्चे दुख नाज्यीम् स्यीथोस्ये मुब। ओसेम् सोम्रेत् कुनो स्यीब ग्यम्से सोथोस्ये मुब। 47 ओसेम् पाप ग्यम्से पस्चताप स्य्हेङ्बमाचे क्षमा यङ्ब पङ्बे सम्तर् यरुसलेम् य्हङ्से तीप्ज्यीम् जम्बुलीङ्की जम्मा य्हुल्री थेइ छेन्री प्रचार् तथोब। 48 चु तबे जम्मा तम्मा एङ्यीमाचे स्येत्नोथोःब। 49 ङइ अपचे पीन्ब पङ्ज्यीम् बाचा स्य्हेङ्बे पबीत्र आत्मा ङचे एङ्यीमात पीत्युस्ये मुब। तर स्वर्ग ग्यम्से सक्ती अयङ्गदे एङ्यीमा चु सहर्रीनो टीउ।” येसु स्वर्गरी स्येःजेत्पल ( मर्कुस् १६:१९-२० ; प्रेरीत् १:९-११ ) 50 हुजु लीप्चे येसुचे र्हङ्की डबमात बेथानीया सम्मा नोम्जेत्ज्यी। हुजुरी थेङ्चे फ्या ङ्य्हीनो रेःजेत्ज्यीम् थेङ्यीमात मोलम् न्हङ्जेत्ज्यी। 51 थेङ्चे थेङ्यीमात मोलम् न्हङ्जेत्टीबे बेलोरी, थेङ् थेङ्यीमा ग्यम्से फेःज्यीम् स्वर्गतोर् नोम्जेत्ज्यी। 52 थेङ्यीमाचे थेङ्त तेन्ज्यीम् य्हक्को तङ्ज्यी, ओसेम् यरुसलेम्री दोःय्हर्ज्यी। 53 ओसेम् थेङ्यीमा पर्मेस्वर्त तोप्परी दीन् र्हङ्स्यीनो पर्मेस्वर्त तेन्बे दीम्री र्हुप् तज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.