लुका 22 - पश्चिम तामाङयेसुत चुङ्पीन्बरी यहुदा ङ्येन्बल ( मत्ती २६:१-५ , १४-१६ ; मर्कुस् १४:१-२ , १०-११ ; युहन्ना ११:४५-५३ ) 1 हुजु बेलोरी खमीर् अयुबे ग्येङ् चज्यीम् म्हन्दीबे नीस्तार पर्व खयम्बल मुबल। 2 ओसेम् ङ्हच्छ्यङ् लम्बुमातेङ् धर्म लोप्पोन्माचे येसुत सेत्पे मौक च्याटीब मुबल। तर थेङ्यीमा म्हीमातेङ् लोङ्ब मुबल। 3 हुजु लीप्चे चुङ्ङ्य्ही डबमा न्हङ्की यहुदा इस्करीयोतकी सेम् न्हङ् सैतान् वङ्ज्यी। 4 ओसेम् यहुदा ङ्हच्छ्यङ् लम्बुमातेङ् पर्मेस्वर्त तेन्बे दीम् रुङ्बलमाकी हाकीम्माज ङ्यीज्यीम् येसुत चुङ्पीन्बरी तम् डीःज्यी। 5 ओसेम् थेङ्यीमा तङ्ज्यीम् थेत टङ पीन्ब पङ्ज्यी। 6 होत्तज्यीम् यहुदाचे तब पङ्ज्यी। ओसेम् थेचे येसुत य्हक्को म्हीमा अरेबे बेलोरी चुङ्नलपीन्बे मौक च्याब थाल्दीज्यी। ज्युःकी डोन् ( मत्ती २६:१७-३० ; मर्कुस् १४:१२-२६ ; युहन्ना १३:२१-३० ; १ कोरीन्थी ११:२३-२५ ) 7 खमीर् अयुबे ग्येङ् चज्यीम् म्हन्दीबे नीस्तार पर्बरी ग्यु बोक सेत्ज्यीम् ठा पीन्बे दीन् खबल मुबल। 8 होत्तज्यीम् येसुचे पत्रुसतेङ् युहन्नात, “ङ्यीज्यीम् नीस्तार् पर्ब म्हन्दीबरी ङ्य्हङ्माइ लागीरी डोन् तयार् स्य्हेङो” बी पीत्जेत्ज्यी। 9 ओसेम् थेङ्य्हीचे, “ङ्यी ङ्य्हीचे डोन् खन तयार् स्य्हेङ्स्ये?” बी ङ्योत्ज्यी। 10 थेङ्चे सुङ्ज्यी, “एङ्य्ही सहर्री दोःबतेङ् कीइ गाख्री नाबे म्ही गीः दोस्ये मुब। थे वङ्बे दीम् सम्मनो थेइ लीप्-लीप् ङ्यीउ। 11 ओसेम् दीम्की न्याबोत, ‘ङइ डबमातेङ् ङ नीस्तार् पर्बइ डोन् चबे ग्ला खन मुब?’ बी लोप्पोन्चे ङ्योत्जेत्पल मुब बी पङो। 12 थेचे एङ्य्हीत तलजोरी बोर्ज्यीम् तोःबे स्हेमा छ्येज्यीम थेन्बे ग्ला ङोन्स्ये मुब। हुजुरी डोन् तयार् स्य्हेङो।” 13 थेङ्य्ही ङ्यीज्यी। ओसेम् येसुचे सुङ्ब र्हङ्लेनो यङ्ज्यीम् डोन् तयार् स्य्हेङ्ज्यी। 14 सोल्बे बेलो तब बीसेम् येसु प्रेरीतमातेङ् डोन् सोल्बरी स्य्हुजेत्ज्यी। 15 येसुचे थेङ्यीमात सुङ्ज्यी, “ङचे दुख नाब बीमम् ङोन्ग्यम् एङ्यीमातेङ् बक्च्या नीस्तार पर्बइ डोन् चबे सेम् य्हक्को मुबल। 16 तलेपङ्सम् ङ एङ्यीमात पङ्ब, पर्मेस्वर्की य्हुल्री चु डोन्की अर्थ पुरा अतगदे ङचे चु डोन् फेरी चस्ये अरे।” 17 हुजु लीप्चे येसुचे अङ्गुर्की नीङ्गुइ खोरे थोःजेत्ज्यीम् पर्मेस्वर्त होर्छ्ये न्हङ्ज्यी। ओसेम् थेङ्चे सुङ्ज्यी, “न चु कीनो एङ्यीमान्हङ्री जुज्यीम् थुङो। 18 तलेपङ्सम् ङ एङ्यीमात पङ्ब, पर्मेस्वर्की य्हुल् अख गदे ङचे अङ्गुर्की नीङ्गु फेरी थुङ्स्ये अरे।” 19 हुजु लीप्चे थेङ्चे ग्येङ् थोःजेत्ज्यीम् पर्मेस्वर्त होर्छ्ये न्हङ्ज्यी। ओसेम् ग्येङ् स्योइज्यीम् थेङ्यीमात चोले सुङ्ज्यीम् न्हङ्ज्यी, “चु एङ्यीमाइ लागीरी पीन्बे ङइ ल्ही य्हीन्ब। चु ङइ व्हल्री स्य्हेङो।” 20 होलेनो ग्येङ् सोल्ब बीसेम् अङ्गुर्की खुकु मुबे खोरे थोज्यीम् सुङ्ज्यी, “चु अङ्गुर्की नीङ्गु ङइ कातेङ् स्य्हेङ्बे छार् बाचा य्हीन्ब। चु ङइ का एङ्यीमाइ लागीरी य्हर्पुङ्बल मुब। 21 “तर च्याको ङत चुङ्पीन्स्येकी म्ही ङतेङ् बक्च्यानो चटीब मुब। 22 म्हीइ जमी पर्मेस्वर्की थुः अनुसार स्यीथोःस्येनो मुब। तर धीक्कार, हुजु म्हीत खल्चे थेङ्त चुङ्न लपीन्ब।” 23 चु थ्येःब बीसेम् डबमाचे “चोतेबे लक् स्य्हेङ्स्येकी म्ही खल य्हीन्ब?” बी गीःचे गीःत थेमा न्हङ् ङ्योत्ज्यी। गोदोब्न्हङ् ङ्हच्छ्यङ् खल? ( मत्ती २०:२५-२८ ; १९:२८ ; मर्कुस् १०:४२-४५ ) 24 ओसेम् डबमा थेमान्हङ्री खल ङ्हच्छ्यङ् बी तम् पङ्ब थाल्दीज्यी। 25 येसुचे थेङ्यीमात सुङ्ज्यी, “चु जम्बुलीङ्की ग्यल्बोमाचे म्हीमाइ जोरी र्हङ्चे म्हेन्ब र्हङ्बे सासन् स्य्हेङ्ब। ओसेम् सासक्माचे र्हङ्चे र्हङ्त ‘ज्यब स्य्हेङ्बे म्ही’ पङ्ब। 26 तर एङ्यीमामी होतेब तब अत। एङ्यीमान्हङ्री खल ङ्हच्छ्यङ् मुब, हुजु ज्यीद तथोब। ओसेम् खल अगुवा मुब, हुजु योक्पो र्हङ्ब तथोब। 27 खल ङ्हच्छ्यङ् य्हीन्ब? चब चबरी टीबे म्ही वुइ चब क्योङ्बे योक्पो? चब चबरी टीबे म्ही अय्हीनो स्यीम्? तर ङ एङ्यीमाकी योक्पो र्हङ्ले मुब। 28 “एङ्यीमामी ङइ दुखइ बेलोरी ङतेङ्नो टीबलमा य्हीन्ब। 29 ङइ अपचे ङत सासन् स्य्हेङ्बे अधीकार् न्हङ्जेत्प र्हङ्लेनो ङचेएनो एङ्यीमात सासन् स्य्हेङ्बे अधीकार् पीन्स्ये मुब। 30 एङ्यीमा ङइ य्हुल्री ङतेङ् बक्च्या चबथुङ्ब स्य्हेङ्स्ये मुब। ओसेम् ठीमारी टीज्यीम् इस्राएलकी खलक् चुङ् ङ्य्हीइ जोरी सासन् स्य्हेङ्स्ये मुब।” पत्रुसचे येसुत अस्य्हे पङ्स्ये मुब बी थेङ्चे सुङ्जेत्पल ( मत्ती २६:३१-३५ ; मर्कुस् १४:२७-३१ ; युहन्ना १३:३६-३८ ) 31 येसुचे, “सीमोन, ङ्येनो एङ्यीमात व्ह क्रप्प र्हङ्ले क्रप्परी सैतान्चे र्हीत्पल मुब बी सुङ्ज्यी। 32 तर ङचे एइ बीस्वास् य्हङ्य्होङ् अतखइ बी प्रार्थना स्य्हेङ्बल मुब। ओसेम् ए ङइज दोःज्यीम् खबतेङ् एइ अलेमात बीस्वास्री कोङ्नलोउ।” 33 पत्रुसचे, “प्रभु, ङ र्हङ्तेङ् बक्च्या जेल्री ङ्यीबतेङ् स्यीबरीएनो तयार् मुब” बी पङ्ज्यी। 34 तर येसुचे, “पत्रुस ङ एत पङ्ब, नक भाले ङ्य्हब बीमम् ङोन्ग्यम् एचे ङत न्हम्स्य्हो स्य्होःरी सोम्ख्यप् सम्म अस्य्हे पङ्स्ये मुब” बी सुङ्ज्यी। टङ, झोला ओसेम् गोच्ज 35 ओसेम् येसुचे डबमात, “ङचे एङ्यीमात टङ ओसेम् झोलतेङ् पनेइ अबोर्नले ङ्यीउ पङ्बे बेलोरी एङ्यीमात तेइ तोज्यी?” बी ङ्योत्जेत्ज्यी। ओसेम् थेङ्यीमाचे, “तेएनो अतो” बी पङ्ज्यी। 36 येसुचे सुङ्ज्यी, “तर देरेम् टङ मुबलमाचे टङ नाको, झोला मुबलामाचे झोला नाको। ओसेम् एङ्यीमा खल्तेङ् गोच्ज अरेज्यी थेचे र्हङ्की य्हुर्पे येन् चुङ्ज्यीम् गोच्ज ग्लुउ। 37 तलेपङ्सम् ङ एङ्यीमात पङ्ब, धर्मइ छ्येःरी ‘थे अपराधीमातेङ् ज्याज्यी’ बी ब्रीबल ङ ग्यम्से पुरा तथोब। तलेपङ्सम् ङइ बारेरी ब्रीबल देमेन्नो पुरा तटीब मुब।” 38 डबमाचे, “प्रभु, स्हीगो ङ्यीमातेङ् गोच्ज ङ्य्ही मुब” बी पङ्ज्यी। ओसेम् थेङ्चे सुङ्ज्यी, “होतेचेनो यो:ब।” जैतुन् गङ्री येसुइ प्रार्थना ( मत्ती २६:३६-४६ ; मर्कुस् १४:३२-४२ ) 39 येसु सहर्से डोङ्ज्यीम् ङोन्ग्यम् र्हङ्लेनो जैतुन् पङ्बे गङ्री स्येःजेत्ज्यी। ओसेम् थेङ्की डबमाएनो थेङ्तेङ् ङ्यीज्यी। 40 हुजु गङ्री दोःजेत्प बीसेम् थेङ्चे डबमात, “एङ्यीमा परीक्षरी अदोखइ बी प्रार्थना स्य्हेङो” बी सुङ्ज्यी। 41 हुजु लीप्चे थेङ् डबमा ग्यम्से चेक्पजकी क्योर् स्येःज्यीम् पुइ जुःज्यीम् प्रार्थना स्य्हेङ्जेत्ज्यी। 42 येसुचे सुङ्ज्यी, “अप, थेङ्की थुः मुसम् चु दुख ङ ग्यम्से फेःपीन्जेतो। तर ङचे म्हेन्ब र्हङ्ब अय्हीन्, थेङ्चे म्हेन्ब र्हङ्ब तखइ।” 43 ओसेम् स्वर्गचे स्वर्गदुत् गीः युज्यीम् थेङ्त सक्ती पीन्ज्यी। 44 थेङ् ङ्हच्छ्यङ् दुखचे प्लीङ्बल तज्यीम् थेङ्चे झेन् य्हक्को प्रार्थना स्य्हेङ्जेत्ज्यी। ओसेम् थेङ्की टुः काकी थेक्मेन् तइब र्हङ्ले सरी तइटीब मुबल। 45 प्रार्थना स्य्हेङ्ब बीसेम् येसु रेःज्यीम् डबमाज दोःखमम् थेङ्यीमा दुखचे प्ले:बल तज्यीम् म्हेर्टीबल मुबल। 46 थेङ्चे थेङ्यीमात, “एङ्यीमा तले न्हुटीबल? रेःगो ओसेम् एङ्यीमा परीक्षरी अदोखइ बी प्रार्थना स्य्हेङो” बी सुङ्ज्यी। येसुत चुङ्बल ( मत्ती २६:४७-५६ ; मर्कुस् १४:४३-५० ; युहन्ना १८:३-११ ) 47 येसुचे चु फ्रोइ सुङ्टीबे बेलोरीनो य्हक्को म्हीमा दोखज्यी। चुङ्ङ्य्ही डबमा न्हङ्की यहुदातमी हुजु य्हक्को म्हीमाकी ङोन्-ङोन् ग्यम् सीत्ज्यीम् येसुत च्योक्परी थेङ्की रेइरी खज्यी। 48 तर येसुचे थेत, “यहुदा, म्हीइ जत एचे च्योक्ज्यीम् चुङ्पीन्ब?” बी ङ्योत्जेत्ज्यी। 49 येसुतेङ् बक्च्या मुबे डबमाचे हुजुरी तब छ्यबे तम् म्रङ्ज्यीम् थेङ्त, “प्रभु, ङ्यीमाचे थेमात गोच्जचे तम्ब वुइ?” बी पङ्ज्यी। 50 ओसेम् थेङ्यीमान्हङ्री गीःचे गोदोब्न्हङ्की ङ्हच्छ्यङ् लम्बुइ योक्पोइ केत्की न्हबीङ् थालाज्यी। 51 तर येसुचे, “तज्यी, थलो!” बी सुङ्ज्यीम् हुजु म्हीइ न्हबीङ् छुजेत्ज्यीम् फेन्न लजेत्ज्यी। 52 हुजु लीप्चे येसुत चुङ्बरी खबे ङ्हच्छ्यङ् लम्बुमा ओसेम् पर्मेस्वर्त तेन्बे दीम् रुङ्बलमाकी हाकीम्मातेङ् अगुवामात थेङ्चे सुङ्ज्यी, “एङ्यीमा तले य्होत चुङ्बरी र्हङ्ले गोच्जतेङ् रोलेमा बज्यीम् खबल? 53 दीन्लनो ङ एङ्यीमातेङ् पर्मेस्वर्त तेन्बे दीम्री मुबे बेलोरी एङ्यीमाचे तले अचुङ्? तर चु म्हुन्दुङ्की सक्तीचे सासन् स्य्हेङ्बे बेलो य्हीन्ब, ओसेम् एङ्यीमालेनो लक् स्य्हेङ्बे बेलो खबल मुब।” पत्रुसचे येसुत अस्य्हे पङ्बल ( मत्ती २६:५७-५८ , ६९-७५ ; मर्कुस् १४:५३-५४ , ६६-७२ ; युहन्ना १८:१२-१८ , २५-२७ ) 54 थेङ्यीमाचे येसुत चुङ्ज्यीम् गोदोब्न्हङ्की ङ्हच्छ्यङ् लम्बुइ दीम्री बोर्ज्यी। ओसेम् पत्रुसएनो थेमाइ लीप्-लीप्चे खेत्नले खज्यी। 55 म्हीमा दो गुङ्री मे फुत्ज्यीम् दे:टीब मुबल। ओसेम् पत्रुसएनो खज्यीम् थेमातेङ् बक्च्या टीज्यी। 56 अमकोल योक्पो गीःचे पत्रुसत मे दे:टीबल म्रङ्ज्यीम् तकातक्ले पत्रुसत च्याज्यीम् पङ्ज्यी, “चु म्हीएनो येसुतेङ् बक्च्या मुबल।” 57 तर पत्रुसचे अय्हीन् “अङ, ङचे थेत स्येःबल अरे!” बी पङ्ज्यी। 58 य्हम्बकी लीप्चे म्ही गीःचे पत्रुसत म्रङ्ज्यीम्, “एनो थेमा न्हङ्ल गीः य्हीन्ब” बी पङ्ज्यी। तर पत्रुसचे, “ङ अय्हीन्!” बी पङ्ज्यी। 59 ओसेम् घन्ट गीः गदे लीप्चे ल्हो-ल्हो म्ही गीःचे, “चु म्ही देमेन्नो येसुतेङ् मुबल। तलेपङ्सम् थेएनो गालील् ग्लाल टीम्” बी पङ्ज्यी। 60 तर पत्रुसचे पङ्ज्यी, “ङचे तेएनो अस्य्हे एचे ता पङ्टीबल!” थे तम् पङ्टीन्-पङ्टीन नक भाले ङ्य्हज्यी। 61 ओसेम् प्रभुचे दोःज्यीम् पत्रुसत स्हीजेत्ज्यी। हुजु बेलोरीनो पत्रुसत “न्हम्स्यो स्य्होरी नक भाले ङ्य्हब बीमम् ङोन्ग्यम् एचे ङत सोम्ख्यप् स्येःनो अस्ये पङ्स्ये मुब” बी प्रभुचे सुङ्बल व्हल् खज्यी। 62 ओसेम् पत्रुस हुजु ग्लाचे फीर्च्योर् ङ्यीज्यीम् य्हक्को क्राज्यी। येसुत सीपाइमाचे दोक्पल ( मत्ती २६:५९-६८ ; मर्कुस् १४:५५-६५ ; युहन्ना १८:१९-२४ ) 63 ओसेम् येसुत रुङ्ज्यीम् टीबे सीपाइमाचे खीसी लज्यीम् दोक्ज्यी। 64 थेङ्की मीः गप्पीन्ज्यीम् ग्यङ्ज्यीम् ङ्योत्ज्यी, “लो अगम्बानी पङो, एत खल्चे ग्यङ्ज्यी?” 65 ओसेम् थेङ्यीमाचे य्हक्को अज्यबे तम्मा पङ्ज्यीम् थेङ्त पेत्न लज्यी। 66 स्य्हो म्हुन्सेनो येसुत अगुवामा र्हुप् तबे सभारी बोर्ज्यी। ओसेम् हुजुरी ङ्हच्छ्यङ् लम्बुमातेङ् धर्म लोप्पोन्मा मुबल। 67 ओसेम् थेङ्यीमाचे, “ङ्यीमात पङो, ए मुक्ती न्हङ्बे ख्रीस्ट् य्हीन्ब?” बी पङ्ज्यी। ओसेम् थेङ्चे सुङ्ज्यी, “ङचे एङ्यीमात पङ्लेनो एङ्यीमाचे ङत बीस्वास् स्य्हेङ्स्ये अरे। 68 ओसेम् ङचे एङ्यीमात ङ्योत्लेनो एङ्यीमाचे जोहाप् पीन्स्ये अरे। 69 तर देरे य्हङ्स्येनो म्हीइ ज सक्तीसाली पर्मेस्वर्की केत् फ्या पट्टीचे टीस्ये मुब।” 70 ओसेम् थेङ्यीमा जम्मचे ङ्योत्ज्यी, “होलेपङ्सम् ए पर्मेस्वर्की ज य्हीन्ब?” थेङ्चे थेङ्यीमात जोहाप् न्हङ्ज्यी, “एङ्यीमाचे पङ्ब र्हङ्लेनो ङ थेनो य्हीन्ब।” 71 ओसेम् थेङ्यीमाचे पङ्ज्यी, “थेइ सुङ् ग्यम्चेनो ङ्य्हङ्माचे चु तम् थ्येःब य्हङ्सेम् देरेम् ल्हो-ल्हो तइ तम् साक्षी तोःज्यी?” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.