लुका 21 - पश्चिम तामाङर्हेम्बो स्यीबे अमकोलचे पीन्बे भेटी ( मर्कुस् १२:४१-४४ ) 1 येसुचे स्हीःजेत्मम् पर्मेस्वर्त तेन्बे दीम्री भेटी युबे तङ्लोरी बरु म्हीमाचे र्हङ्-र्हङ्की भेटी युटीबल म्रङ्जेत्ज्यी। 2 ओसेम् थेङ्चे र्हेम्बो स्यीबे प्रङ्न अमकोल गीःचेएनो स्हङ्मोइ पइस ङ्य्ही युटीबल म्रङ्जेत्ज्यी। 3 चु म्रङ्ज्यीम् येसुचे सुङ्ज्यी, “ङ एङ्यीमात देमेन्नो पङ्ब, चु र्हेम्बो स्यीबे प्रङ्न अमकोलचे ल्हो-ल्होचे बीमम् य्हक्को भेटी युबल मुब। 4 तलेपङ्सम् बरुमाचे र्हङ्तेङ् मुबे य्हक्को न्हङ्से युज्यी। तर र्हेम्बो स्यीबे प्रङ्न अमकोलचेम् थेत चब थुङ्बरीकीनो मुबलेएनो जम्म युज्यी।” येसुचे पर्मेस्वर्त तेन्बे दीम् फुप्स्येकी बारेरी सुङ्जेत्पल ( मत्ती २४:१-१४ ; मर्कुस् १३:१-१३ ) 5 डेत्-डेत् डबमाचे, “ज्यब-ज्यबे युङ्बमातेङ् म्हीमाचे युबे भेटीमा कोल्ज्यीम् ज्यनले छ्यबे चु पर्मेस्वर्त तेन्बे दीम् गत्ते छन्द खबल!” बी पङ्टीब मुबल। ओसेम् येसुचे सुङ्ज्यी, 6 “चोतेबे बेलो खस्ये मुब, एङ्यीमाचे म्रङ्बे चु जम्मा युङ्बमा गीःएनो अफुप्नले टीस्ये अरे, जम्मनो फुप्स्ये मुब।” 7 ओसेम् थेङ्यीमाचे येसुत, “लोप्पोन्, चोतेब खेम तस्ये मुब? चोतेब तयम्बल मुब बी ङ्यीमाचे खतेबे चीनो म्रङ्स्ये मुब?” बी ङ्योत्ज्यी। 8 येसुचे सुङ्ज्यी, “एङ्यीमा होसीयार् तज्यीम् टीउ, एङ्यीमात खल्चेएनो अलुखइ। तलेपङ्सम् य्हक्को म्हीमा ङइ मीन्री ‘ङनो ख्रीस्ट् य्हीन्ब’ ओसेम् ‘बेलो खज्यीन्बल मुब’ बी पङ्ज्यीम् खस्ये मुब। तर थेङ्यीमाकी लीप्चे थङ्यीउ। 9 य्हुल्मा छेत्पल ओसेम् य्हुल् न्हङ्रीनो छेत्पल थ्येःबे बेलोरी एङ्यीमा थलोङो। तलेपङ्सम् चोतेबमा जम्बुलीङ् नास् तब बीमम् ङोन्ग्यम् तनोथोस्ये मुब। तर हुजु बेलोरीनो जम्बुलीङ् नास् अत!” 10 येसुचे देबेएनो सुङ्ज्यी, “जाती-जातीमा छेत्स्ये मुब। ओसेम् य्हुल्माकी बीरुद्दरी य्हुल्मा रेःस्ये मुब। 11 ओसेम् ङ्हच्छ्यङ्-ङ्हच्छ्यङ् सङ्गुल्मा खस्ये मुब। ओसेम् खनबीबीनो अनीकाल्मातेङ् य्हम्मा खस्ये मुब। मुरी ङ्हच्छ्यङ्-ङ्हच्छ्यङ् लोङ्बे चीनोमा म्रङ्स्ये मुब। 12 “तर चुमा तब बीमम् ङोन्ग्यम् एङ्यीमात ङइ तम् ङ्येन्बल पङ्ज्यीम् म्हीमाचे चुङ्ज्यीम् दुख पीन्स्ये मुब। एङ्यीमात यहुदीमा र्हुप् तबे दीम्मारी सोप्तीज्यीम् जेल्री च्युप्स्ये मुब। ओसेम् एङ्यीमात ग्यल्बोमातेङ् सासक्माकी ङोन्ग्यम् रप्पुङ्स्ये मुब। 13 हुजु बेलोरीम् एङ्यीमाचे ङइ बारेरी स्येत्पे मौक यङ्स्ये मुब। 14 तर एङ्यीमाचे र्हङ् थर्बे लागीरी थेङ्यीमाकी ङोन्ग्यम् ता पङ्स्ये बी ङोन्नो गत्तेएनो थछेरो। 15 तलेपङ्सम् ङ एङ्यीमात चोतबे तम्की छीःतेङ् बुद्दी पीन्स्ये मुब। एङ्यीमात अखोबलमाचे एङ्यीमाइ तम् थाज्यीम् जोहाप्एनो फाब खम्स्ये अरे। 16 एङ्यीमात र्हङ्की अप-अम, अज्यो-अले, म्हेम्य-फेबेमातेङ् र्होमाचेएनो चुङ्नलपीन्स्ये मुब। ओसेम् एङ्यीमान्हङ्री डेत्डेत् म्हीमाचे सेत्नलपुङ्स्ये मुब। 17 एङ्यीमात ङइ तम् ङ्येन्बल पङ्ज्यीम् म्हीमा जम्मचे अखोस्ये मुब। 18 तर एङ्यीमाइ क्र बाकीएनो तेइस्ये अरे। 19 खतेबे दुख खलेएनो ना:ज्यीम् टीज्यी पङ्सम् एङ्यीमाचे खेमेएनो अबेबे जीवन् यङ्स्ये मुब।” येसुचे यरुसलेम् नास् तस्येकी बारेरी सुङ्जेत्पल ( मत्ती २४:१५-२१ ; मर्कुस् १३:१४-१९ ) 20 “यरुसलेम् सहरत सीपाहीमाचे घेर्तीबल म्रङ्ब बीसेम् हुजु सहरल नास् तबे बेलो खज्यीन्बल बी एङ्यीमाचे स्येःजेतो। 21 हुजु बेलोरी यहुदीय प्रदेस्री मुबलमा गङ्तोर् छ्योङ् य्हर्खइ, सहर न्हङ्री मुबलमाचे सहर ख्लेथेन्खइ ओसेम् न्हारी मुबलमा सहर्री दोःज्यीम् थखखइ। 22 तलेपङ्सम् हुजु चइ सजाय यङ्बे दीन्मा य्हीन्ब। ओसेम् धर्मइ छ्येःरी ब्रीबे जम्मा तम् पुरा तनोतस्ये मुब। 23 हुजु दीन्मा फोरी कोल मुबे अमकोलतेङ् ङ्य्हे ख्वाबे अममाकी लागीरी गत्ते लोङ्बल तस्ये मुब। तलेपङ्सम् चु य्हुल्की म्हीमात ना:नो अखम्बे दुखतेङ् पर्मेस्वर्की सजाय खस्ये मुब। 24 हुजु बेलोरी डेत्डेत् गोच्जचे तम्ज्यीम् सेत्स्ये मुब, डेत्-डेत् चुङ्ज्यीम् ल्हो-ल्हो य्हुल्माचे बोर्स्ये मुब। ओसेम् यहुदी अय्हीन्बे म्हीमाकी बेलो अबे गदे थेङ्यीमाचे यरुसलेमत च्येन्ज्यीम् टीस्ये मुब।” म्हीइ ज दोःज्यीम् ब्योन्युस्येकी बेलो ( मत्ती २४:२९-३१ ; मर्कुस् १३:२४-२७ ) 25 “लनी, दीनीतेङ् सार्मारी खेमेएनो अम्रङ्बे चीनोमा म्रङ्स्ये मुब। ओसेम् समुन्द्र ङ्य्हबतेङ् ङ्हच्छ्यङ् लोङ्बे छाल्माचे लज्यीम् जम्बुलीङ्की जम्मा म्हीमा लोङ्स्ये मुब। 26 जम्बुलीङ्री खयम्टीबे दुख म्रङ्ज्यीम् म्हीमा लोङ्ज्यीम् स्यीब र्हङ्ले गुर्स्ये मुब। तलेपङ्सम् मुरी मुबे सक्तीमा य्होङ्स्ये मुब। 27 हुजु लीप्चे म्हीइ ज मुक्पन्हङ् ङ्हच्छ्यङ् सक्तीतेङ् महीमारी युटीबल म्रङ्स्ये मुब। 28 होले तबल म्रङ्बे बेलोरी एङ्यीमाचे रप्ज्यीम् अङ्ले मुक्तीङ् च्याको। तलेपङ्सम् एङ्यीमाकी उद्दार् ग्योन्नो खस्ये मुब।” नेभारा दोङ्बोइ अर्थ ( मत्ती २४:३२-३५ ; मर्कुस् १३:२८-३१ ) 29 हुजु लीप्चे येसुचे थेङ्यीमात चोतेबे अर्थ गीः सुङ्ज्यी, “नेभाराइ दोङ्बोतेङ् ल्हो-ल्हो जम्मा दोङ्बोमात च्याको, 30 दोङ्बोमारी बुर्लो बुबल म्रङ्बतेङ् एङ्यीमाचे छप्प ल खयम्नेम् बी स्येःब। 31 होलेनो चु जम्मा तम्मा तटीबल म्रङ्बतेङ् पर्मेस्वर्की य्हुल् खयम्नेम् बी एङ्यीमाचे स्येःस्ये मुब। 32 देमेन्नो ङ एङ्यीमात पङ्ब, चु जम्मा तम्मा पुरा अतगदे चु पुस्तइ म्हीमा नास् तस्ये अरे। 33 मुतेङ् जम्बुलीङ् म्हज्यीम् य्हर्स्ये मुब। तर ङचे पङ्बे तम्मा खेमेनो म्हस्ये अरे।” होसीयार् तउ 34 “होसीयार् तज्यीम् टीउ, य्हक्को चबथुङ्ब लज्यीम् ङ्य्हेज्यीम् थब्रउ। ओसेम् चु जीवनकी लागीरी थछेरो, अय्हीन् पङ्सम् एङ्यीमाइ सेम् न्होङ्स्ये मुब। ओसेम्, हुजु दीन्री एङ्यीमा तीक्कुरीनो वरी स्यप्प र्हङ्ले स्यप्स्ये मुब। 35 तलेपङ्सम् चोलेनो हुजु दीन् जम्बुलीङ्की जम्मा म्हीमाइ क्ररी खस्ये मुब। 36 खेमा पङ्लेएनो होसीयार् तज्यीम् टीउ। हुजु लोङ्न तस्येकी बेलोरी थर्ज्यीम् म्हीइ जइ ङोन्ग्यम् रप्प खम्खइ बी प्रार्थना स्य्हेङो।” 37 हुजु बेलोरी येसुचे दीन् र्हङ्स्यीनो पर्मेस्वर्त तेन्बे दीम्री लोप्जेत्टीब मुबल। ओसेम् ङ्येस्ये तब बीसेम् म्हुन र्याबे लागीरी जैतुन् पङ्बे गङ्री स्येःजेत्प मुबल। 38 स्य्होरी मीः छीरीरीले म्रङ्मनो य्हक्को म्हीमा पर्मेस्वर्त तेन्बे दीम्री थेङ्की फ्रोइ ङ्येन्बरी खब मुबल। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.