लुका 20 - पश्चिम तामाङयेसुइ अधीकारकी बारेरी ङ्योत्पल ( मत्ती २१:२३-२७ ; मर्कुस् ११:२७-३३ ) 1 तीरेत् येसु पर्मेस्वर्त तेन्बे दीम्री म्हीमात लोप्जेत्टीबतेङ् ज्यबे सम्तर् स्येत्जेत्टीबे बेलोरी ङ्हच्छ्यङ् लम्बुमा ओसेम् धर्म लोप्पोन्मातेङ् अगुवामा बक्च्य खज्यी। 2 ओसेम्, “ङ्यीमात स्येतो, एचे खजु अधीकारचे चु लक्मा स्य्हेङ्ब? एत चु अधीकार् खल्चे पीन्ज्यी?” बी थेङ्त ङ्योत्ज्यी। 3 येसुचे थेङ्यीमात, “ङएनो एङ्यीमात तम् गीः ङ्योत्प। ङत स्येतो, 4 युहन्नाचे बप्तीस्मा पीन्बे अधीकार् पर्मेस्वर् ग्यम्से यङ्ज्यी वुइ म्ही ग्यम्से?” बी सुङ्ज्यी 5 ओसेम् थेङ्यीमा र्हङ्न्हङ्रीनो तम् पङ्ब थाल्दीज्यी, “पर्मेस्वर् ग्यम्से पङ्गे पङ्स्यीम्, ‘एङ्यीमाचे तले युहन्नात बीस्वास् अस्य्हेङ्बल?’ बी थेचे ङ्योत्स्ये तज्यी। 6 तर ङ्य्हङ्माचे म्ही ग्यम्से पङ्गे पङ्स्यीम् जम्मा म्हीमाचे ङ्य्हङ्मात युङ्बचे प्रुङ्ज्यीम् सेत्स्ये मुब। तलेपङ्सम् म्हीमाचे युहन्नात अगम्बक्त बी बीस्वास् स्य्हेङ्ब मुबल।” 7 होत्तज्यीम् थेङ्यीमाचे येसुत पङ्ज्यी, “युहन्नाचे हुजु अधीकार् खनचे यङ्ज्यी बी ङ्यीमाचे स्येःबल अरे।” 8 ओसेम् येसुचे थेङ्यीमात सुङ्ज्यी, “होलेपङ्सम् ङचे चु लक्मा खजु अधीकार् ग्यम्से स्य्हेङ्बल बी एङ्यीमात ङएनो अस्येत्।” अङ्गुर्की म्रङ् पीमा स्य्हेङ्बे म्हीमा ( मत्ती २१:३३-४६ ; मर्कुस् १२:१-१२ ) 9 हुजु लीप्चे येसुचे म्हीमात चु अर्थ सुङ्ज्यी, “म्ही गीःचे म्रङ्री अङ्गुर् सुःज्यीम् पीमारी पीन्ज्यी। ओसेम् थे य्हक्को बर्सइ लागीरी ल्हो-ल्हो य्हुल्री य्हर्ज्यी। 10 अङ्गुर् मीन्बे बेलो तब बीसेम् अङ्गुर्की न्याबोचे योक्पो गीःत थेइ बो कीन्बरी अङ्गुर्की पीमा स्य्हेङ्बलमाज पीत्ज्यी। तर पीमा स्य्हेङ्बलमाचे योक्पोत तोज्यीम् थेन्-थेन् दोःपीत्ज्यी। 11 होत्तज्यीम् न्याबोचे ल्हो-ल्हो योक्पो गीःत पीत्ज्यी। तर थेङ्यीमाचे हुजु योक्पोतएनो दोक्ज्यीम् पेत्न लज्यीम् थेन्-थेन् दोःपीत्ज्यी। 12 ओसेम् न्याबोचे ङ्य्हीकी लीक्यम् ल्हो-ल्हो योक्पो गीःत पीत्ज्यी। थेङ्यीमाचे हुजुतएनो न्हेप्पो स्य्हेङ्ज्यीम् अङ्गुर्की म्रङ् ग्यम्से तेत्लाज्यी। 13 “हुजु लीप्चे अङ्गुर्की म्रङ्की न्याबोचे र्हङ्की सेम् न्हङ् चोले म्हेन्ज्यी, ‘ङ ता लस्ये? देरेम् ङ ङइ खोबे जत पीत्प। थेङ्यीमाचे देमेन्नो थेतमी स्य्हेस स्य्हेङ्स्ये मुब।’ 14 तर पीमा स्य्हेङ्बलमाचे न्याबोइ जत म्रङ्ब बीसेम् थेमा न्हङ् गीःचे गीःत पङ्ज्यी, ‘क्युजुम् न्याबोइ ज य्हीन्ब। थेत सेत्लागे ओसेम् थेइ अङ्गुर्की म्रङ् ङ्य्हङ्माल तनलइ।’ 15 होत्तज्यीम् थेङ्यीमाचे थेत अङ्गुर्की म्रङ् ग्यम्से फीर्च्योर् बोर्ज्यीम् सेत्लाज्यी।” येसुचे, “देरेम् अङ्गुर्की म्रङ्की न्याबोचे हुजु पीमा स्य्हेङ्बलमात ता स्य्हेङ्ल? बी ङ्योत्जेत्ज्यी। 16 ङ एङ्यीमात पङ्ब, थे खज्यीम् थेङ्यीमात सेत्लाज्यीम् हुजु अङ्गुर्की म्रङ् ल्हो-ल्होमात पीन्स्ये मुब।” म्हीमाचे चु थ्येःज्यीम् पङ्ज्यी, “चोतेब खेमेएनो अतखइ!” 17 ओसेम् येसुचे थेङ्यीमात स्हीःज्यीम् सुङ्ज्यी, “होलेपङ्सम् धर्मइ छ्येःरी चोले ब्रीबल ता य्हीन्ब? ‘दीम् स्य्हेङ्बे कर्मीमाचे लक् अत पङ्ज्यीम् ख्लाबे युङ्ब, स्हुर् युङ्ब तखज्यी।’ 18 “हुजु युङ्बइ जोरी तइबलमा जम्मनो छर्छुर्ले थीस्ये मुब। ओसेम् हुजु युङ्ब खलइ जोरी तइज्यी हुजु म्ही छ्यक्छ्यीक् तस्ये मुब।” तीरो फाबे बारेरी ङ्योत्पल ( मत्ती २२:१५-२२ ; मर्कुस् १२:१३-१७ ) 19 धर्म लोप्पोन्मातेङ् ङ्हच्छ्यङ् लम्बुमाचे येसुत हुजु बेलोरीनो चुङ्ब छ्यज्यी। तलेपङ्सम् थेङ्चे हुजु अर्थ थेङ्यीमाकी बीरुद्दरी सुङ्बल बी थेङ्यीमाचे स्येःबल मुबल। तर थेङ्यीमा म्हीमातेङ् लोङ्ब मुबल। 20 होत्तज्यीम् थेङ्यीमाचे येसुत चुङ्बे मौक च्याबरी र्हङ्चे र्हङ्त ज्यब ङोन्ब म्हइबे म्हीमात येसुज पीत्ज्यी। येसुचे न्होङ्बे तम् थोल्ज्यी पङ्सम् थेङ्की तम्रीनो फसइतीज्यीम् थेङ्यीमाचे रोमी सरकारकी यारी सोप्तीब म्हइब मुबल। 21 हुजु म्हीमाचे येसुत ङ्योत्ज्यी, “लोप्पोन्, ङ्यीमात था मुब, थेङ्चे तबे तम्कीनो सुङ्बतेङ् लोप्जेत्प। ओसेम् थेङ्चे म्हीमाइ ली स्हीःज्यीम् फ्रोइ असुङ्। तर थेङ्चे पर्मेस्वर्की देमेन्की ग्यम् ङोन्जेत्प। 22 देरेम् ङ्यीमात सुङ्जेतो, ङ्य्हङ्की नीयम् अनुसार रोम्की ग्यल्बो कैसरत तीरो फाब तब वुइ अत?” 23 तर येसुचे थेङ्यीमाकी कपटी सेम् खेम्ज्यीम् थेङ्यीमात सुङ्ज्यी, 24 “ङत पइस गीः ङोनो, हुजुरी खलइ लीःतेङ् मीन् ब्रीबल मुब?” थेङ्यीमाचे, “रोम्की ग्यल्बो कैसरल” बी पङ्ज्यी। 25 ओसेम् येसुचे, “होलेपङ्सम् कैसरल जती कैसरत पीनो। ओसेम् पर्मेस्वर्ल जती पर्मेस्वर्त पीनो” बी सुङ्ज्यी। 26 थेङ्यीमाचे म्हीमाइ ङ्होन्सङ् थेङ्त तेइ तम्रीएनो फसइतीज्यीम् चुङ्ब अखम्। होत्तज्यीम् थेङ्यीमा थेङ्की जोहाप्री थोम्ज्यीम् कुटीले टीज्यी। पुनरुत्थानकी बारेरी ङ्योत्पल ( मत्ती २२:२३-३३ ; मर्कुस् १२:१८-२७ ) 27 हुजु लीप्चे सदुकीमा येसुज खज्यी। थेङ्यीमाचे स्यीज्यीम् लीक्यम् पुनरुत्थान अत बी बीस्वास् स्य्हेङ्ब मुबल। 28 ओसेम् थेङ्त ङ्योत्ज्यी, “लोप्पोन्, मोसाचे ङ्य्हङ्मात ब्रीज्यीम् पीन्बे नीयम्री, ‘खल्ल पङ्लेएनो अज्योचे भ्या स्य्हेङ्ज्यीम् कोलमा अतननो स्यीज्यी पङ्सम् थेइ अलेचे अज्योइ लागीरी कोलमा तखइ बी चङ्त भ्या स्य्हेङ्थोब’ बी ब्रीबल मुब। 29 ग्ला गीःरी अज्यो-अलेमा थेत् ङ्यीस् मुबल। अज्यो ग्रेन्चे भ्या स्य्हेङ्ज्यी। तर कोलमा अतननो थे स्यीज्यी। 30 होत्तज्यीम् अले मइलचे अज्यो स्यीबे चङ्त भ्या स्य्हेङ्ज्यी। तर थेलएनो कोलमा अतननो स्यीज्यी। 31 हुजु लीप्चे अले सइलतएनो होलेनो तज्यी। होलेनो थेत् ङ्यीस्चेनो भ्या स्य्हेङ्ज्यी। तर कोलमा अतननो थेत् ङ्यीस्नो स्यीज्यी। 32 ज्युःरी हुजु अमकोलएनो स्यीज्यी। 33 देरेम् ङ्यीमात सुङ्जेतो स्यीज्यीम् लीक्यम् पुनरुत्थान् तबे बेलोरी हुजु अमकोल खलइ म्रीङ् तब? तलेपङ्सम् हुजु अमकोलतेङ् थेत् ङ्यीस्चेनो भ्या स्य्हेङ्बल मुबल।” 34 येसुचे थेङ्यीमात सुङ्ज्यी, “भ्यामी चु जम्बुलीङ्की म्हीमाचेकीनो स्य्हेङ्ब ओसेम् स्य्हेङ्पीन्ब। 35 तर स्यीज्यीम् लीक्यम् पुनरुत्थान् तबरी ज्योबल तबलमाचे हुजु बेलोरी भ्या अस्य्हेङ् ओसेम् स्य्हेङ्अपीन्। 36 थेङ्यीमा खेमेएनो अस्यी। तलेपङ्सम् थेङ्यीमा स्वर्गदुत्मा र्हङ्ब तब। थेङ्यीमा स्यीज्यीम् लीक्यम् पुनरुत्थान तबल तज्यीम् पर्मेस्वर्की कोलमा तब। 37 परमप्रभुचे लुम्टीबे जीङ्न्हङ्चे मोसात, ‘ङ अब्रहामकी पर्मेस्वर्, इसहाककी पर्मेस्वर् ओसेम् याकुबकी पर्मेस्वर् य्हीन्ब’ बी सुङ्बल थ्येःज्यीम् मोसाचे ब्रीबल मुबल। स्यीज्यीम् लीक्यम् पुनरुत्थान तब बी चुजेएनो ङोन्बल मुब। 38 थेङ् स्यीबलमाकी पर्मेस्वर् अय्हीन्। तर सोम्बोमाकी पर्मेस्वर् य्हीन्ब। तलेपङ्सम् थेङ्की लागीरी जम्मनो सोम्बो मुब।” 39 डेत्-डेत् धर्म-लोप्पोन्माचे, “लोप्पोन्, र्हङ्चे तबे फ्रोइनो सुङ्ज्यी।” बी पङ्ज्यी। 40 हुजु लीप्चे खल्चेएनो येसुत तइ तमेएनो ङ्योत्प अखम्। ख्रीस्ट् खलइ ज ( मत्ती २२:४१-४६ ; मर्कुस् १२:३५-३७ ) 41 येसुचे म्हीमात ङयोत्जेत्ज्यी, “थेङ्यीमाचे मुक्ती न्हङ्बे ख्रीस्ट्त खले दाऊदकी ज य्हीन्ब बी पङ्ब? 42-43 तलेपङ्सम् दाऊदचे र्हङ्चेनो ब्रीबे भजनसंग्रहरी चोले ब्रीबल मुब; परमप्रभुचे ङइ प्रभुत सुङ्ज्यी, ‘ङचे एइ सत्तुर्मात एइ कङ् थीङ् दुङ्री अथेन्गदे सम्म ए ङइ केत् या पट्टीचे टीउ।’ 44 दाऊदचे मुक्ती न्हङ्बे ख्रीस्ट्त ‘प्रभु’ पङ्ब पङ्सम् थे खले दाऊदकी ज तब?” धर्म-लोप्पोन्माकी बीरुद्दरी चेतावनी ( मत्ती २३:१-३६ ; मर्कुस् १२:३८-४० ) 45 जम्मा म्हीमाचे ङ्येन्टीबे बेलोरी येसुचे थेङ्की डबमात सुङ्ज्यी, 46 “धर्म लोप्पोन्मा ग्यम्से होसीयार् तउ। थेङ्यीमा म्हीमाचे च्याखइ बी र्हीङ्ब र्हीङ्बे येन् येन्ज्यीम् कोर्बरी तङ्ब। ओसेम् थेङ्यीमा बजार्री ब्रबे बेलोरी स्य्हेस स्य्हेङ्ज्यीम् लस्सो पङ्खइ म्हेन्ब। ओसेम् डोन् चबे ग्लातेङ् यहुदीमा र्हुप् तबे दीम्मारी स्य्हेस यङ्बे ग्लारी टीब म्हइब। 47 थेङ्यीमाचे र्हेम्बो स्यीबे अमकोलमाइ दीम्नम् ब्येन्ब। ओसेम् र्हङ्त ज्यब ङोन्बे लागीरी प्रार्थना र्हीङ्नले स्य्हेङ्ब। थेङ्यीमाचेमी य्हक्को अज्यबे सजाय यङ्स्ये मुब।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.