लुका 17 - पश्चिम तामाङपापीत क्षमा पीन्थोब ( मत्ती १८:६-७ , २१-२२ ; मर्कुस् ९:४२ ) 1 येसुचे थेङ्की डबमात सुङ्ज्यी, “म्हीत पाप स्य्हेङ्न लबे तम्मा खब। तर पाप स्य्हेङ्न लबरी परीक्ष बबे म्हीत धीक्कार! 2 खजु म्हीचे चु ज्यीद कोलमा न्हङ्री गीःत पाप स्य्हेङ्नलब। थेइ खारीरी र्हन्द च्योज्यीम् नुप्पे गेरी ख्लापीत्प ज्यब तब। 3 होत्तज्यीम् र्हङ होसीयार्ले टीउ। “एइ अलेचे पाप स्य्हेङ्ज्यी पङ्सम् थेत बरागो। ओसेम् थेचे पस्चताप् स्य्हेङ्ज्यी पङ्सम् एचे थेत क्षमा पीनो। 4 थेचे एइ बीरुद्दरी दीन्ल ङ्यीस् ख्यप् पाप स्य्हेङ्ज्यी। ओसेम् ङ्यीस् ख्यप्नो एज खज्यीम् ‘ङ पस्चताप् स्हेङ्ब’ पङ्ज्यी पङ्सम्म्, एचे थेत क्षमा पीनो।” 5 प्रेरीतमाचे प्रभुत, “प्रभु ङ्यीमाइ बीस्वासत ङ्हच्छ्यङ् तनलजेतो” बी पङ्ज्यी। 6 प्रभुचे थेङ्यीमात, “एङ्यीमातेङ् नम्नम्की ब्लुइ फुम् गीः गदे बीस्वास् मुब पङ्सम् चु बोस्योरोइ दोङ्बोत ‘ए र्हङ्नो ओर्ज्यीम् समुन्द्ररी सुः ङ्यीउ’ पङ्ज्यी पङ्सम् थेचे ङ्येन्स्ये मुब बी सुङ्ज्यी।” योक्पोचे स्य्हेङ्थोबे लक् 7 “एङ्यीमान्हङ्री खल्ल पङ्लेनो योक्पो म्रङ् मोइज्यीम् वुइ ग्यु छब बुत्ज्यीम् ता स्य्हेङ्ज्यीम् खलेएनो योक्पोत ‘एचे ग्योने खज्यीम् चबरी टीउ’ बी पङ्ब? 8 अय्हीन्, एचे योक्पोत चोले पङ्ब, ‘ङ्यीज्यीम् ङइ लागीरी योप्त स्य्हेङो। ओसेम् ङचे चबथुङ्ब अबुत्गदे सम्म ङत क्योङो, हुजु लीप्चे एचे चउ।’ 9 ओसेम् कुल्ब र्हङ्ले स्य्हेङ्बल तज्यीम् योक्पोत थेचे होर्छ्ये पीन्ब स्यीम्? 10 होलेनो एङ्यीमाचेएनो र्हङ्त कुल्बे जम्मा लक्मा स्य्हेङ्ब बुप्प बीसेम्, पङो, ‘ङ्यीमामी अज्योबे योक्पोमा य्हीन्ब, ङ्यीमाचे स्य्हेङ्थोबे लक्कीनो स्य्हेङ्बल य्हीन्ब।’” येसुचे पुन् स्यप्पे म्ही च्यीत फेन्न लजेत्पल 11 येसु गालील् प्रदेस्तेङ् सामरीया प्रदेस्की सान् ग्यम्से तज्यीम् यरुसलेम्क्योर् स्येःटीब मुबल। 12 थेङ् नम्स गीःरी वङ्यम्बे बेलोरी पुन् स्यप्पे म्हीमा च्यी थेङ्तेङ् दोज्यी। ओसेम् थारीङ्नो रप्ज्यीम् थेङ्यीमाचे 13 क्रीङ्ज्यीम्, “प्रभु येसु, ङ्यीमात कृपा स्य्हेङ्जेतो!” 14 येसुचे थेङ्यीमात स्हीःज्यीम् सुङ्ज्यी, “य्हरो, लम्बुमाज ङ्यीज्यीम् र्हङ्त ङोनो।” ओसेम् थेङ्यीमा य्हर्टीन य्हर्टीननो फेन्ज्यी। 15 थेङ्यीमाचे र्हङ्त फेन्बल म्रङ्ज्यी। तर थेङ्यीमान्हङ्री गीःकीनो केत् ङ्हच्छ्यङ् तेत्ज्यीम् पर्मेस्वर्त तोप्ज्यीम् दोःज्यीम् खज्यी। 16 ओसेम् येसुइ स्य्हब्री पब्लु लज्यीम् थेचे ह्वोर्छ्ये पीन्ज्यी। हुजु म्ही सामरी मुबल। 17 येसुचे, “फेन्बे म्हीमा च्यी अय्हीन्? ल्हो-ल्हो कु खन मुब? बी ङ्योत्ज्यी। 18 चु सामरी बीमम् दोःखज्यीम् पर्मेस्वर्त तोप्परी ल्हो-ल्हो खलेनो अख?” 19 ओसेम् येसुचे हुजु सामरीत सुङ्ज्यी, “रेःगो ओसेम् य्हरो, एइ बीस्वासचे एत फेन्न लबल मुब।” पर्मेस्वर्की य्हुल् ( मत्ती २४:२३-२८ , ३७-४१ ) 20 तीरेत् फरीसीमाचे येसुत पर्मेस्वर्की य्हुल् खेमा खब बी ङ्योत्ज्यी। येसुचे थेङ्यीमात, “पर्मेस्वर्की य्हुल् म्रङ्नले अख। 21 खल्चेएनो, ‘च्याको, चुरी मुब’, वुइ ‘क्युजुरी मुब’ पङ्स्ये अरे। तलेपङ्सम् पर्मेस्वर्की य्हुल् एङ्यीमाकी न्हङ्रीनो मुब” बी सुङ्ज्यी। 22 ओसेम् येसुचे थेङ्की डबमात सुङ्ज्यी, “चोतेबे बेलोएनो खस्ये मुब, एङ्यीमाचे म्हीइ जइ तीरेत् च्याबे सेम् लस्ये मुब। तर एङ्यीमाचे च्याम्यङ्स्ये अरे। 23 म्हीमाचे एङ्यीमात पङ्स्ये मुब, ‘च्याको, म्हीइ ज चुरी मुब’, वुइ ‘क्युजुरी मुब।’ तर थेङ्यीमाकी लीप्चे थङ्यीउ। 24 तलेपङ्सम् मुरी तीप्लीक् फ्लीक्पतेङ् गुः गीःचे गीःब गुःसम्म य्हल् तब र्हङ्ले म्हीइ ज युबे दीन्री जम्मा म्हीमाचे थेङ्त म्रङ्स्ये मुब। 25 तर ङोन्ग्यम् थेचे य्हक्को दुख ना:थोस्ये मुब। ओसेम् चु पुस्तइ म्हीमाचे अखोस्ये मुब। 26 नोआइ बेलोरी तब र्हङ्ले म्हीइ ज युबे बेलोरी तस्ये मुब। 27 नोआ दोङ्गरी वङ्बे बेलोसम्म म्हीमा चटीब, थुङ्टीब ओसेम् भ्या स्य्हेङ्टीबल मुबल। हुजु बेलोरी ङ्हच्छ्यङ् नम्तेङ् भल् युज्यीम् थेङ्यीमा जम्मात नास् स्य्हेङ्ज्यी। 28 लोतकी बेलोरीएनो होलेनो म्हीमा चटीब, थुङ्टीब, चुङ्टीब, ग्लुटीब, सुःटीब ओसेम् दीम् स्य्हेङ्टीबल मुबल। 29 तर लोतचे सदोम पीत्थेन्बे दीन्रीनो स्वर्गसे मे ल्हम् तइयुज्यीम् थेङ्यीमा जम्मात नास् लज्यी। 30 म्हीइ ज म्रङ्स्येकी दीन्रीएनो होलेनो तस्ये मुब। 31 “हुजु दीन्री दोरी मुबे म्ही स्हेमा कीन्बरी दीम्न्हङ् अङ्यीखइ, होलेनो म्रङ्री मुबे म्ही दोःज्यीम् स्हेमा कीन्बरी दीम्री अङ्यीखइ। 32 लोतकी म्रीङ्त व्हल् लो! 33 खल्चे र्हङ्की जीवन् थर्नलब म्हइज्यी थेइ खेमेनो अबेबी जीवन् म्हस्ये मुब। तर खल्चे र्हङ्की जीवन् म्हनलज्यी थेचे खेमेनो अबेबी जीवन् यङ्स्ये मुब। 34 ङ एङ्यीमात पङ्ब, हुजु म्हुनरी म्ही ङ्य्ही तीत्स गीःरी न्हुरीबल तस्ये मुब। गीःत बोर्स्ये मुब ओसेम् गीःबत ख्लेथेन्स्ये मुब। 35 अमकोल ङ्य्ही र्हन्दरी ब्रा ब्राटीबल तस्ये मुब। गीःत बोर्स्ये मुब ओसेम् गीःबतम् ख्लेथेन्स्ये मुब। 36 होलेनो म्रङ्री मुबे म्ही ङ्य्ही न्हङ्री गीःत बोर्स्ये मुब ओसेम् गीःबत ख्लेथेन्स्ये मुब।” 37 डबमाचे थेङ्त, “चु खन तस्ये प्रभु?” बी ङ्योत्ज्यी। ओसेम् येसुचे, “खन सीनु तब, हुजुरी गीद्दमा र्हुप् तब” बी सुङ्ज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.