लुका 15 - पश्चिम तामाङम्हबे ग्युकी अर्थ ( मत्ती १८:१२-१४ ) 1 तीरेत् तीरो दुत्पे म्हीमातेङ् ल्हो-ल्हो पापीमा जम्मनो येसुइ फ्रोइ ङ्येन्बरी थेङ्की रेइरी र्हुप्ले खज्यी। 2 तर फरीसीमातेङ् धर्म लोप्पोन्माचे गन्गन् स्य्हेङ्ज्यीम् पङ्ब थाल्दीज्यी, “चु म्हीचे पापीमात स्वागत् स्य्हेङ्ब। ओसेम् थेङ्यीमातेङ्नो चबथुङ्ब स्य्हेङ्ब।” 3 होत्तज्यीम् येसुचे थेङ्यीमात चोतेबे अर्थ सुङ्ज्यी, 4 “एङ्यीमान्हङ्री खल्ल पङ्लेनो खल् ङ्ह ग्यु मुब। ओसेम् हुजुमा न्हङ्री गीः म्हज्यी पङ्सम् थेचे खल् ब्लीस्यी चुर्कु ग्युमात चरन्री पीत्थेन्ज्यीम् म्हबे ग्यु गीःत अय्हङ्गदे अम्हइयो स्यीम्? 5 ओसेम् थेचे यङ्ब बीसेम् य्हक्को तङ्ज्यीम् र्हङ्की ताज्यीरी कल्ब। 6 ओसेम् दीम्री बज्यीम् र्हङ्की र्होमातेङ् खीम्सेमात ङ्होत्ज्यीम् पङ्ब, ‘ङतेङ् तङो, ङचे ङइ म्हबे ग्यु यङ्बल मुब।’ 7 ङ एङ्यीमात पङ्ब, पस्चताप् स्य्हेङ् अथोबे खल् ब्लीस्यी चुर्कु धर्मीमाकी लागीरी बीमम् र्हङ्की पापत पस्चताप स्य्हेङ्बे पापी गीःकी लागीरी स्वर्गरी य्हक्को तङ्स्ये मुब।” म्हबे पइसकी अर्थ 8 “म्हेनो, अमकोल गीःतेङ् मुबे म्हुइकी पइस च्यी न्हङ्री गीः म्हज्यी पङ्सम् थेचे मेतङ् म्रज्यीम् ओसेम् सेङ् सेङ्ज्यीम् अय्हङ्गदे ज्येन्ले अम्हयो स्यीम्? 9 थेचे हुजु म्हबे पइस गीः यङ्ब बीसेम् र्हङ्की र्होमातेङ् खीम्सेमात ङ्होत्ज्यीम् पङ्ब, ‘ङतेङ् तङो तलेपङ्सम् ङचे म्हबे पइसत यङ्बल मुब।’ 10 होलेनो ङ एङ्यीमात पङ्ब, पस्चताप् स्य्हेङ्बे पापी गीःकी लागीरी पर्मेस्वर्तेङ् थेङ्की स्वर्गदुत्मा तङ्ब।” म्हबे ज 11 ओसेम् येसुचे देबेएनो सुङ्ज्यी, “म्ही गीःल ज ङ्य्ही मुबल। 12 तीरेत् ज च्यङ्बचे थेइ अपत पङ्ज्यी, ‘अप, ङचे यङ्थोबे ङइ बो देरेनो पीनो।’ होत्तज्यीम् अपचे र्हङ्की सम्पत्ती ज ङ्य्हीतनो जुपीन्ज्यी। 13 “तोव दीन् लीप्चे ज च्यङ्बचे र्हङ्की जम्मा सम्पत्ती बोर्ज्यीम् ल्हो-ल्हो य्हुल्री य्हर्ज्यी। हुजुरी थेचे र्हङ्की सम्पत्ती मनमोज्री बेलज्यी। 14 थेचे र्हङ्की जम्मा टङ बेनलज्यी। हुजु बेलोरीनो हुजु य्हुल्री ङ्हच्छ्यङ् अनीकल् तज्यी। ओसेम् थेचे चबथुङ्ब अयङ्। 15 होत्तज्यीम् थे हुजु य्हुल्की म्ही गीःज लक् र्हीत्परी ङ्यीज्यी। हुजु म्हीचे थेत तीली छबरी म्रङ्मारी पीत्ज्यी। 16 थेचे तीलीचे चबे चब चज्यीम् र्हङ्की फो म्रेन्नलब म्हेन्मेएनो थेत खल्चेएनो चबथुङ्ब अपीन्ब मुबल। 17 “ओसेम् थेचे हुजु बेलोरी र्हङ्चे स्य्हेङ्टीबे लक्त गोज्यीम् र्हङ्चे र्हङ्तनो पङ्ज्यी, ‘ङइ अपइ नङ्बोमाचेमी फो म्रेन्बसम्म चज्यीमएनो ल्हाबसम्म तब। ङमी चुरी ख्रेन्ज्यीम् स्यीयम्टीब मुब। 18 देरेम् ङइ अपज दोःय्हर्ज्यीम् पङ्ङ्यीब, अप, ङचे पर्मेस्वर्तेङ् एइ बीरुद्दरी पाप स्य्हेङ्बल मुब, 19 ङ एइ ज पङ्बरी जेःबल अरे, ङत एइ नङ्बोमा न्हङ्री गीः र्हङ्ले थेनो।’ 20 होत्तज्यीम् थे र्हङ्की अपज दोःज्यीम् खज्यी। “अपचे थे खरीबल थारीङ्चेनो म्रङ्ज्यीम् थेइ सेम् दयचे प्लीङ्ज्यी। ओसेम् छ्योङ् य्हर्ज्यीम् जत तङ्चे बेन्ज्यीम् ग्रम्बरी च्योक्ज्यी। 21 ओसेम् जचे थेत पङ्ज्यी, ‘अप, ङचे पर्मेस्वर्तेङ् एइ बीरुद्दरी पाप स्य्हेङ्बल मुब। ङ एइज पङ्बरी जेःबल अरे।’ 22 तर अपचे थेइ योक्पोमात पङ्ज्यी, ‘ग्योन्-ग्योन् चुत जम्मा न्हङ्री ज्यबे येन् बज्यीम् येन्बीनो। ओसेम् थेइ यारी च्यप्तेङ् कङ्री पनेइ येन्बीनो। 23 ओसेम् सोइटीबे छोबे सेम्ज्येन् सेत्ज्यीम् डोन् तयार् स्य्हेङो। हुजु चज्यीम् ङ्य्हङ्मा खुसी म्हन्दीगे। 24 तलेपङ्सम् ङइ चु ज स्यीबल मुबल, तर देरेम् सोबल मुब। थे म्हबल मुबल, तर देरेम् यङ्बल मुब।’ ओसेम् थेङ्यीमाचे खुसी म्हन्दीब थाल्दीज्यी। 25 “हुजु बेलोरी थेइ ज ग्रेन्मी म्रङ्री मुबल। ओसेम् थे दीम् रेइरी दोखमम् थेचे व्हइ कोज्यीम् स्यटीब थ्येःज्यी। 26 होत्तज्यीम् थेचे योक्पो गीःत ङ्होत्ज्यीम्, ‘चुरी ता तटीब?’ बी ङ्योत्ज्यी। 27 ओसेम् योक्पोचे पङ्ज्यी, ‘एइ अले खबल मुब। थे ज्यनले दोःखबल तज्यीम् एइ अपचे सोइटीबे छोबे सेम्ज्येन् सेत्ज्यीम् खुसीयाली म्हन्दीटीबल य्हीन्ब।’ 28 होत्तज्यीम् ज ग्रेन्त य्हक्को बोमो रप्ज्यीम् थे दीम्न्हङ्एनो अवङ्। ओसेम् अप दोरी युज्यीम् थेत फ्या लज्यीम् व्हम्ज्यी। 29 “तर थेचे अपत पङ्ज्यी, ‘ङचे चोदे वर्स सम्मा एइ लागीरी बानचे र्हङ्ले लक् स्य्हेङ्ज्यी। एचे कुल्बे जम्मा अर्तीमा ङ्येन्ज्यी। ङतमी खेमेएनो र्होमातेङ् टीज्यीम् चबरी र म्होदोङ् गीःएनो अपीन्। 30 “‘तर जम्मा सम्पत्ती बेस्यामातेङ् ख्लाबे एइ चु ज खमम् एचे थेइ लागीरी सोइटीबे छोबे सेम्ज्येन् सेत्पुङ्ज्यी।’ 31 अपचे थेत पङ्ज्यी, ‘ज, एमी खेम पङ्लेनो ङतेङ्नो मुब। ङतेङ् मुबे जम्मा सम्पत्तीमा एलनो य्हीन्ब। 32 तर ङ्य्हङ्माचे तङ्ज्यीम् खुसी म्हन्दीथोबल मुबल। तलेपङ्सम् एइ अले स्यीबल मुबल, तर देरे सोबल मुब। ओसेम् थे म्हबल मुबल, देरेमी यङ्बल मुब’।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.