लुका 14 - पश्चिम तामाङयेसु फरीसीइ दीम्री 1 दुःब न्हबे दीन् गीःरी फरीसीमाकी अगुवा गीःकी दीम्री येसु स्य्हेःब सोल्बरी स्येःज्यी। हुजुरी र्हुप् तबे म्हीमाचे ङ्युङ् यङ्मुवा बी येसुत तकातक्ले च्याटीब मुबल। 2 हुजुरी यातेङ् कङ् टङ्बे नेत् स्यप्पे म्ही गीः येसुइ ङोन्री टीटीब मुबल। 3 येसुचे धर्म लोप्पोन्मातेङ् फरीसीमात “मोसाचे ब्रीबे पर्मेस्वर्की नीयम् अनुसार दुःब न्हबे दीन्री नबलमात फेन्न लब तब वुइ अत?” बी ङ्योत्जेत्ज्यी। 4 तर थेङ्यीमा कुटीले टीज्यी। थेङ्चे हुजु न्हेप्प म्हीत छुज्यीम् फेन्न लज्यीम् पीत्जेत्ज्यी। 5 ओसेम् येसुचे थेङ्यीमात सुङ्ज्यी, “दुःब न्हबे दीन्री एङ्यीमाल कोल वुइ ग्लब् खजु पङ्लेनो इनार्टी तइज्यी पङ्सम् एङ्यीमाचे ग्योन्-ग्योन् अतेतो स्यीम्?” 6 तर थेङ्यीमाचे तेएनो पङ्अखम्। 7 हुजुरी खबे डोम्बोमाचे स्य्हेस यङ्बे ग्ला दम्ज्यीम् टीबल म्रङ्ज्यीम् येसुचे थेङ्यीमात चु अर्थ सुङ्जेत्ज्यी, 8 “एङ्यीमात भ्याइ डोन्री ङ्होत्पतेङ् स्य्हेस यङ्बे ग्लारी थटीउ। तलेपङ्सम् एङ्यीमा बीमम्एनो मीन् चल्दीबे म्हीतएनो ङ्योत्पल मुसम्, 9 एङ्य्हीतनो ङ्होत्पे ङ्होप्त खज्यीम् ‘ए टीबे ग्लारी थेत टीपुङो’ बी पङ्ब। ओसेम् एमी पेत्ज्यीम् गोदोब्न्हङ्की ग्यप्री टीथोब। 10 तर एत ङ्होत्पतेङ् हुजुरी ङ्यीज्यीम् ग्यप्री टीउ। ओसेम् ङ्होत्पे ङ्होप्ता खज्यीम् एत पङ्स्ये मुब, ‘लौ, देनले ङोन्री स्य्हुजेतो।’ हुजु बेलोरी जम्मा म्हीमाकी गुङ्री एइ मीन् चल्दीस्ये मुब। 11 तलेपङ्सम् र्हङ्चे र्हङ्त ङ्हच्छ्यङ् म्हेन्बलमा ज्यीद तस्ये मुब। ओसेम् र्हङ्चे र्हङ्त ज्यीद म्हेन्बलमामी ङ्हच्छ्यङ् तस्ये मुब।” 12 येसुचे र्हङ्त ङ्होत्पे ङ्होप्तात सुङ्जेत्ज्यी, “एचे डोन् पीन्बतेङ् र्हङ्की म्हेम्हेमा, अज्यो-अले, र्होमा ओसेम् बरु खीम्चेमात थङ्होतो। तलेपङ्सम् थेङ्यीमाचेएनो एचे र्हङ्लेनो ङ्होत्ज्यीम् एइ खीत् फाब। 13 तर एचे डोन् पीन्बतेङ् प्रङ्नमा, स्य्हेलेन्दी, खोरामा, ओसेम् कनमात ङ्होतो। 14 ओसेम् एचे मोलम् यङ्स्ये मुब। तलेपङ्सम् एत थेङ्यीमाचे खीत् फाब अखम्। तर धर्मी म्हीमाकी पुनरुत्थान् तबतेङ् पर्मेस्वर्चे एत खीत् न्हङ्स्ये मुब।” ङ्हच्छ्यङ् डोन्की अर्थ ( मत्ती २२:१-१० ) 15 येसुतेङ् डोन् चबरी टीबलमाचे चु थ्येःज्यीम् गीःचे थेङ्त पङ्ज्यी, “पर्मेस्वर्की य्हुल्री डोन् चबलमा मोलम् यङ्बलमा य्हीन्ब।” 16 येसुचे थेत सुङ्ज्यी, “म्ही गीःचे य्हक्को डोम्बोमात ङ्होत्ज्यी। ओसेम् ङ्हच्छ्यङ् डोन् तयार् लज्यी। 17 डोन् चबे बेलो तब बीसेम् थेचे ङ्होत्थेन्बलमात ‘ब्योन्खजेतो, देरेम् जम्मनो स्हेमा तयार् तबल मुब’ बी पङ्बरी र्हङ्की योक्पोत पीत्ज्यी। 18 तर थेङ्यीमा जम्मचेनो डोन्री अङ्यीबरी ङ्युङ् काकर् लज्यी। ङोन्ग्यम्ल गीःचे योक्पोत पङ्ज्यी, ‘ङचे बु म्रङ् गीः ग्लुबल मुब, ङ हुजु च्याबरी ङ्यीथोस्ये मुब। बोमो थरपो ओ, ङ डोन्री खअखम्।’ 19 ल्हो-ल्होचे पङ्ज्यी, ‘ङचे ग्लब् हल् ङ्ह ग्लुबल मुब। ओसेम् हुजु ग्लबमा मोइच्याथोब। बोमो थरपो ओ।’ 20 ल्हो-ल्होचे पङ्ज्यी, ‘ङचे देरेकीनो भ्या स्य्हेङ्बल मुब। होत्तज्यीम् ङ खब अखम्।’ 21 योक्पो दोःय्हर्ज्यीम् जम्मा तम्मा ङ्होप्तात स्येत्ज्यी। ओसेम् ङ्होप्तात बोमो रप्ज्यीम् योक्पोत पङ्ज्यी, ‘सहरकी ग्यम्मारी ओसेम् गल्लीमारी ग्योने ङ्यीज्यीम् प्रङ्नमा, स्य्हेलेन्दीमा, खोरामा ओसेम् कनमात ङ्होत्ज्यीम् बोउ।’ 22 “हुजु लीप्चे योक्पोचे ङ्होप्तात पङ्ज्यी, ‘एचे सुङ्ब र्हङ्ले ङचे स्य्हेङ्बल मुब। ओसेम् देरेएनो हुजुरी ग्ला मुब।’ 23 “मालीक्चे योक्पोत पङ्ज्यी, ‘ङइ दीम् प्लीङ्बरी सार् ग्यम्तेङ् थारीङ्क्योर्की ग्यम्मारी ङ्यीज्यीम् म्हीमात न्हङ्री खबरी कर् लउ। 24 ङ एङ्यीमात पङ्ब, ङोन्ग्यम् ङ्होत्पलमा न्हङ्री खल्चेएनो ङचे पीन्बे डोन् म्य्हङ्म्य्ङ्स्ये अरे’।” डबमाचे नाथोबे दुख ( मत्ती १०:३७-३८ ) 25 य्हक्को म्हीमा थेङ्तेङ् लीप्-लीप् य्हर्टीब मुबल। ओसेम् थेङ्चे दोःज्यीम् थेङ्यीमात सुङ्जेत्ज्यी, 26 “ङइ लीप्चे ब्रइ म्हेन्बलमाचे र्हङ्की अप-अम, म्रीङ्, ज-जमे, अज्यो-अले, अन-अङ ओसेम् ङत बीमएनो र्हङत म्होइज्यी पङ्सम् थे ङइ डब तब अखम्। 27 ओसेम् खजु म्हीचे र्हङ्की क्रुस् नाज्यीम् ङइ लीप्चे अब्रज्यी हुजु ङइ डब ताअखम्। 28 “एङ्यीमा खल्चे पङ्लेनो धरहरा स्य्हेङ्बे सेम् लज्यी पङ्सम् हुजु धरहरा बुत्नले स्य्हेङ्बरी खर्च गदे ङ्यीब टीम् बी एचे ङोन्ग्यम्नो हीसाब अस्य्हेङ्ङो स्यीम्? 29 अय्हीन् पङ्सम्, थेचे धरहराइ जग युज्यीम् बुत्नले स्य्हेङ् अखम्स्ये मुब। ओसेम् चु म्रङ्बलमा जम्मचेनो थेत च्याज्यीम् ङ्येत्स्ये मुब। 30 थेङ्यीमाचे पङ्स्ये मुब, ‘चु म्हीचे चुःबम् चुःज्यी तर बुत्नले स्य्हेङ् अखम्।’ 31 होलेनो हजार च्यी सेना मुबे ग्यल्बोचे ल्हो-ल्हो हजार खल् गीः सेना मुबे ग्यल्बोतेङ् छेत्परी ङ्यीब बीमम् ङोन्ग्यम्नो थेचे हुजु ल्हो-ल्हो ग्यल्बोत डाब खम्ल वुइ अखम्ल बी सल्लाह अस्य्हेङ्ङो स्यीम्? 32 थेचे अखम्स्ये तज्यी पङ्सम् हुजु ल्हो-ल्हो ग्यल्बो थारीङ् मुबे बेलोरीनो थुन्बे तम् ङ्योत्परी चवत पीत्स्ये मुब। 33 होलेनो एङ्यीमान्हङ्री खल्चे र्हङ्तेङ् मुबे जम्मा स्हेमा अख्लाज्यी थे ङइ डब तअखम्। ब्रोत् अरेबे चत ( मत्ती ५:१३ ; मर्कुस् ९:५० ) 34 “चत ज्यबे स्हे य्हीन्ब, तर चतइ ब्रोत् य्हर्ज्यी पङ्सम् हुजुत देबेएनो ब्रोत् खनलब खम्ल स्यीम? 35 हुजुमी न सेप्प्रइ लागीरी तब न दुःकी लागीरी तब। म्हीमाचे हुजुत ख्लाब। खल्ल थ्येःबे न्हबीङ् मुब, हुजुचे थ्येःखइ।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.