लुका 12 - पश्चिम तामाङयेसुचे कपटीमाकी बीरुद्दरी चेतावनी न्हङ्ब ( मत्ती १०:२६-२७ ) 1 हुजु बेलोरीनो ज्याब अखम्ब सम्मइ य्हक्को म्हीमा र्हुब तज्यीम् गीःचे गीःत प्लेब म्हइज्यी। येसुचे थेङ्की डबमात ङोन्ग्यम् सुङ्ज्यी, “फरीसीमाकी कपटी बीचार् ग्यम्से होसीयार् तोउ। थेङ्यीमाकी कपटी बीचार् खमीर् र्हङ्ब य्हीन्ब। 2 गप्पलमा जम्मनो म्रङ्स्ये मुब। ओसेम् छुम्बलमा जम्मनो यङ्स्ये मुब। 3 एङ्यीमाचे म्हुन्दुङ्न्हङ् पङ्बे तम् य्हल्री थ्येःस्ये मुब। ओसेम् दीम्न्हङ् स्युप्तङ् लज्यीम् पङ्बे तम् दीम्की थोःकुम् जोसे केत् ङ्हच्छ्यङ् तेत्ज्यीम् स्येत्स्ये मुब।” खल्तेङ् लोङ्थोब ( मत्ती १०:२८-३३ ; १२:३२ ) 4 ङइ र्होमा, ङ एङ्यीमात पङ्ब, एङ्यीमात सेत्प म्हइबलमातेङ् थलोङो। तलेपङ्सम् थेङ्यीमाचे ल्हीतकीनो सेत्प तर हुजु लीप्चे ल्हो-ल्हो तएनो स्य्हेङ् अखम्। 5 तर ङ एङ्यीमात खल्तेङ् लोङ्थोब बी पङ्ब, ल्हीत सेत्ज्यीमएनो नर्करी ख्लापीत्ब खम्बे सक्ती मुबे पर्मेस्वर्तेङ् लोङो, ङ एत पङ्ब, थेतेङ् लोङो। 6 पइस ङ्य्हीरी कर् ङ्यम्ङ्य ङ्ह अग्युरो स्यीम्? तर हुजुमा न्हङ्री पर्मेस्वर्चे गीःतएनो म्लेत्अजेत्। 7 एङ्यीमालमी क्र बाएनो जम्म ज्याबल मुब। होत्तज्यीम् थलोङो! एङ्यीमा य्हक्को कर् ङ्यम्ङ्य बीमएनो य्हक्को सेइल मुब। 8 ङ एङ्यीमात पङ्ब, खल्चे ङत म्हीमाइ ङोन्ग्यम् स्वीकार लब, हुजुमात म्हीइ जचेएनो पर्मेस्वर्की स्वर्गदुत्माकी ङोन्ग्यम् स्वीकार लस्ये मुब। 9 तर खल्चे ङत म्हीमाइ ङोन्ग्यम् स्वीकार अलज्यी, हुजुत म्हीइ जचेएनो पर्मेस्वर्की स्वर्गदुत्माकी ङोन्ग्यम् स्वीकार लस्ये अरे। 10 ओसेम् म्हीइ जइ बीरुद्दरी तम् पङ्बलमी क्षमा तब खम्ब। तर पबीत्र आत्माइ बीरुद्दरी तम् पङ्बलमी क्षमा तस्ये अरे। 11 “ओसेम् म्हीमाचे एङ्यीमात चुङ्ज्यीम् यहुदीमा र्हुब् तबे दीम्री, ओसेम् सासक्मातेङ् अधीकारीमाकी ङोन्ग्यम् बोर्बतेङ् ता पङ्स्ये बी थछेरो। 12 तलेपङ्सम् हुजु बेलोरी ता पङ्थोब बी पबीत्र आत्माचेनो एङ्यीमात लोप्जेत्स्ये मुब।” मुर्ख बरु म्ही 13 य्हक्को म्हीमा न्हङ्स्ये म्ही गीःचे येसुत पङ्ज्यी, “लोप्पोन्, ङ्यीङ्य्हीकी अपचे ख्लेथेन्बे सम्पती ग्यम्से ङइ बो जुबीनो बी ङइ अज्योत सुङ्जेतो।” 14 तर येसुचे हुजु म्हीत सुङ्ज्यी, “अले, एङ्य्हीइ सम्पती जुबे अधीकार् ङत खल्चे पीन्बल मुब स्यीम्?” 15 ओसेम् थेङ्चे थेङ्यीमा जम्मात सुङ्ज्यी, “जम्म स्हेःमाइ लोभ स्य्हेङ्ब ग्यम्से होसीयार् तोउ। तलेपङ्सम् म्हीइ जीवन य्हक्को सम्पतीकीनो अय्हीन्।” 16 ओसेम् येसुचे थेङ्यीमात चु अर्थ सुङ्ज्यी, “बरु म्ही गीःकी म्रङ्री य्हक्को अन्न तज्यी। 17 थेचे र्हङ्की सेम् न्हङ् म्हेन्ज्यी, ‘ङतेङ् चु अन्नमा जम्मनो थेन्बे ग्ला अरे, ङ ता लब? 18 ओसेम् थेचे सेम् न्हङ् पङ्ज्यी, ङ देरेम् ङइ बर्मा स्हीलाज्यीम् ङ्हच्छ्यङ् बर् जुःब, हुजुरी ङइ जम्म अन्नमातेङ् ल्हो-ल्हो स्हेःमा थेन्स्ये मुब। 19 ओसेम् ङ र्हङ्चे र्हङ्तनो पङ्स्ये मुब, एत तोःबे ज्यबे स्हेःमा य्हक्को बर्ससम्म यो:बकी र्हुब् लबल मुब। देरे सुखले टीउ, चउ, थुङो ओसेम् मनमोज्यी लो।’” 20 “तर पर्मेस्वर्चे थेत सुङ्ज्यी, ‘मुर्ख म्ही, तीङी म्हुननो ए स्यीस्ये मुब। ओसेम् एचे र्हुब्बे जम्म स्हेःमा खल्चे चल?’” 21 ओसेम् येसुचे सुङ्ज्यी, “र्हङ्की लागीरी स्हेःमा र्हुब् लबमा तर पर्मेस्वर्की तम्री बरु अतबलमाकी गती चु र्हङ्ब तस्ये मुब।” थछेरो ( मत्ती ६:२५-३४ ) 22 ओसेम् येसुचे र्हङ्की डबमात सुङ्ज्यी, “होत्तज्यीम् ङ एङ्यीमात पङ्ब, एङ्यीमा सोबे लागीरी ता चल, ल्हीकी लागीरी ता येन्ल बी थछेरो। 23 तलेपङ्सम् चबे स्हेः बीमम् जीवन् ङ्हच्छ्यङ् ओसेम् गोइल बीमम् ल्ही ङ्हच्छ्यङ् य्हीन्ब। 24 दप्ब्रङ्मात च्याको! थेमाचे ब्लुएनो अब्लुत्, अन्नएनो अदुत्। थेमाल अन्न थेन्बे बर्एनो अरे, तर पर्मेस्वर्चेनो थेमात ख्वाजेत्प। एङ्यीमामी ङ्यम्ङ्यमा बीमम् य्हक्को सेइल य्हीन्ब। 25 “एङ्यीमान्हङ्री खल्चे छेर्ज्यीम् र्हङ्की छे चेक्ब जाकीएनो र्हीङ्न लब खम्ल? 26 एङ्यीमाचे चोतेबे ज्यीद लक्एनो स्य्हेङ्अखम्सम् ल्हो-ल्हो तम्माकी लागीरी तले छेर्ब? 27 लीली म्हेन्दोत च्याको खले थेब, थेमाचे लकेनो अस्य्हेङ्, येनेनो अरा। तर ङ एङ्यीमात पङ्ब, सोलोमन ग्यल्बो थेइ जम्म स्य्हेसमा यङ्ज्यीम् ज्यबे गोइल येन्लेनो म्हेन्दोमा न्हङ्री गीः गदे ज्यब अरेबल मुबल। 28 तीङ्यी सर्ज्यीम् न्हम्स्हो मेन्हङ् ख्लाबे म्रात पर्मेस्वर्चे स्य्हप्तो स्य्हेङ्जेत्ब पङ्सम्, एङ्यीमातमी थेङ्चे स्य्हप्तो अस्य्हेङ्जेत्ल स्यीम्? खइ एङ्यीमाकी बीस्वास्? 29 होत्तज्यीम् त चल त थुङ्ल बी थम्हयो, ओसेम् थछेरो। 30 पर्मेस्वर्त अस्येःबे म्हीमाचे चोतेबे स्हेःमाकी लागीरी छेर्ब। एङ्यीमात ता तोःब बी एङ्यीमाइ अपचे खेम्जेत्प। 31 तर थेङ्की य्हुल् म्हयो। ओसेम् थेङ्चे चु जम्मनो स्हेःमा एङ्यीमात कप्पीन्स्ये मुब। स्वर्गरी सोःबे सम्पती ( मत्ती ६:१९-२१ ) 32 “ज्यीत बगल्की ङइ डबमा, एङ्यीमा थलोङो! तलेपङ्सम् एङ्यीमाइ पर्मेस्वर् अप एङ्यीमात य्हुल् न्हङ्बरी तङ्जेत्पल मुब। 33 एङ्यीमातेङ् मुबे स्हेःमा चुङ्ज्यीम् खबे टङ प्रङ्नमात पीनो ओसेम् र्हङ्की लागीरी खेमेनो अडेःबे सुर्केनी डुब्ज्यीम् खेमेनो अन्होङ्बे टङ स्वर्गरी र्हुब लो। हुजुरी य्होएनो अख, बुलुङ्चेएनो अच। 34 तलेपङ्सम् खन एङ्यीमाकी सम्पती मुज्यी, एङ्यीमाकी सेमेएनो हुजुरी तस्ये मुब।” चोङ् लज्यीम् टीउ 35 “एङ्यीमा गोइल येन्ज्यीम् मेतङ्मा म्रज्यीम् छ्येज्यीम् टीउ। 36 भ्याइ डोन् सोल्ज्यीम् दोःखबे मालीक्त ब्रेन्टीबे योक्पो र्हङ्ले एङ्यीमा टीउ। मालीक् खज्यीम् म्रप् डोङ्-डोङ् लब साच्चेनो थेङ्यीमाचे म्रप् ठोङ्पीन्ब। 37 मालीक् दोःज्यीम् खबे बेलोरी मालीक्त ब्रेन्ज्यीम् टीटीबे योक्पोमाचे य्हक्को मोलम् यङ्स्ये मुब। ङ एङ्यीमात देमेन्नो पङ्ब, थेचे हुजु योक्पोमात टीपुङ्ज्यीम् र्हङ्चेनो चबे स्हेःमा पीन्ज्यीम् क्योङ्स्ये मुब। 38 “मालीक् म्हुन्गुङ्री वुइ स्य्होः म्हुन्चे खलेनो मालीक्त ब्रेन्ज्यीम् टीटीबे योक्पोमाचे य्हक्को मोलम् यङ्स्ये मुब। 39 “तर चु तम् गोज्यीम् टीउ। य्हो गदे बेलोरी खटीब बी दीम्की मालीक्चे स्येःबल पङ्सम् थेचे हुजु दीम्की तेएनो य्हो लअपुङ्। 40 होत्तज्यीम् एङ्यीमा खेम पङ्लेनो चोङ् लज्यीम् टीउ। तलेपङ्सम् म्हीइ ज अम्हेन्बे बेलोरी युस्ये मुब।” थो ङ्य्हीइ योक्पो ( मत्ती २४:४५-५१ ) 41 पत्रुसचे येसुत ङ्योत्ज्यी, “प्रभु, थेङ्चे चु अर्थ ङ्यीमाइ लागीरीकीनो सुङ्बल वुइ जम्मइ लागीरी सुङ्बल य्हीन्ब?” 42 प्रभुचे सुङ्ज्यी, “हुजु बीस्वासीलो ओसेम् लो मुबे योक्पो खल? मालीक्चे थेत दीम्की जीम्म पीन्स्ये मुब। ओसेम् थेचे ल्हो-ल्हो योक्पोमात ठीक् बेलोरी चबे स्हेः पीन्ब। 43 मालीक् दोःज्यीम् खबे बेलोरी होलेनो स्य्हेङ्टीबल यङ्बे योक्पोचे य्हक्को मोलम् यङ्स्ये मुब। 44 ङ एङ्यीमात देमेन्नो पङ्ब, मालीक्चे हुजु योक्पोत थेइ जम्म सम्पतीमाकी जीम्मएनो पीन्स्ये मुब। 45 तर खल योक्पोचे ‘ङइ मालीक् गेःनले खस्ये मुब’ म्हेन्ज्यीम् ल्हो-ल्हो अपकोलतेङ् अमकोल योक्पोमात दोक्ज्यीम् य्हक्को चज्यीम् थुङ्ज्यीम् ङ्य्हेज्यी। 46 मालीक् योक्पोचे अम्हेन्बे दीन्तेङ् बेलोरी खस्ये मुब। ओसेम् थेत दुम्बु-दुम्बुले तुप्स्ये मुब। ओसेम् थे बीस्वास् अस्य्हेङ्बलमातेङ् बक्च्य तस्ये मुब। 47 “र्हङ्की मालीक्की सेम् गोज्यीम्एनो, मालीक्चे थेचे स्य्हेङ्खइ म्हेम्ब र्हङ्ले छ्येज्यीम् लक् अस्य्हेङ्बे योक्पोत य्हक्को ङ्हच्छ्यङ् सजाय पीन्स्ये मुब। 48 “तर र्हङ्की मालीक्की सेम् अगोज्यीम् सजाय यङ्थोबे लक् स्य्हेङ्बे योक्पोचे चेक् सजाय यङ्स्ये मुब। खल्त य्हक्को पीन्बल मुब हुजु ग्यम्से य्हक्कोनो कीन्स्ये मुब। ओसेम् खल्त य्हक्को जीम्म पीन्बल मुब हुजु ग्यम्सेएनो अझ य्हक्को र्हीत्स्ये मुब।” अथुन्बल ( मत्ती १०:३४-३६ ) 49 येसुचे सुङ्ज्यी, “ङ जम्बुलीङ्री मे दीबरी युबल य्हीन्ब। ङोन्नो दीज्यीन्बल य्हीन्सम् तस्ये मुबल! 50 ङचे दुखइ बप्तीस्मा कीन्थोब मुब। हुजु अकीन्गदे ङत सान्ती अत। 51 ङ जम्बुलीङ्री थुन्न लबरी युबल बी म्हेन्बल य्हीन्ब? अय्हीन्, ङ म्हीमात अथुन्न लबरी युबल य्हीन्ब। 52 देरे य्हङ्से म्हेम्हे ङ्ह न्हङ्री अथुन्स्ये मुब। म्ही सोम् ङ्य्हीकी बीरुद्दरी, म्ही ङ्य्ही सोम्की बीरुद्दरी रेःस्ये मुब। 53 अपमा थेमाइ जइ बीरुद्दरी, ओसेम् जमा थेमाइ अपमाकी बीरुद्दरी, अममा थेमाइ जमेमाकी बीरुद्दरी, जमेमा थेमाइ अममाकी बीरुद्दरी, ओसेम् स्युमेमा थेमाइ चङ्माकी बीरुद्दरी, चङ्मा थेमाइ स्युमेमाकी बीरुद्दरी रेःस्ये मुब।” बेलो स्येःबे चीनो ( मत्ती १६:२-३ ; ५:२५-२६ ) 54 येसुचे य्हक्को म्हीमात सुङ्ज्यी, “न्हुब्चे मुक्प खबल म्रङ्ज्यी पङ्सम् एङ्यीमाचे पङ्ब ‘तीङ्यी नम् युस्येटीम्’ ओसेम् होलेनो तब। 55 लोसे लाब स्यङ्ज्यी पङ्सम् एङ्यीमाचे ‘तीङ्यी य्हक्को छब्प क्रोस्येटीम्’ पङ्ब। ओसेम् होलेनो तब। 56 एङ्यी कपटीमा! जम्बुलीङ्तेङ् मु च्याज्यीम् ता तस्येटीम् बी स्येब। तर चु बेलोरी ता तस्येटीम् बी खले अस्येब? 57 एङ्यीमाचे खजु तम् ठीक् बी तले अगोबल? 58 “खल्चे पङ्लेनो एत दोस् लगइतीज्यीम् न्यायधीस्ज बोर्ज्यी पङ्सम् दोब बीमम् ङोन्ग्यम् थेतेङ् थुनो। अय्हीन् पङ्सम् थेचे एत न्यायधीसकी यारी पीन्स्ये मुब। ओसेम् न्यायधीसचे हाकीम्की यारी पीन्स्ये मुब। ओसेम् हाकीम्चे जेल्न्हङ् च्युप्लास्ये मुब। 59 ङ एत पङ्ब, एचे जरीवान फाथोबे जम्मनो टङ अफागदे हुजु ग्लाचे डोङ् म्यङ्स्ये अरे।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.