युहन्ना 20 - पश्चिम तामाङथेन्-थेन् दुर्स ( मत्ती २८:१-८ ; मर्कुस् १६:१-८ ; लुका २४:१-१२ ) 1 अइतबार स्य्हो म्हुन्चे मीः अम्रङ्ननो मरीयम् मग्दलीनी दुर्सरी ङ्यीमम् दुर्सइ सुङ्री थेन्बे युङ्ब दोःलाबल म्रङ्ज्यी। 2 होले म्रङ्ब बीसेम् थे छ्योङ्य्हर्ज्यीम् सीमोन् पङ्बे पत्रुसतेङ् येसुचे म्होइबे डबइज ङ्यीज्यीम्, “थेङ्यीमाचे प्रभुइ ल्ही तेत्ज्यीम् खन बोर्ज्यी, ओसेम् खन थेन्ज्यी ङ्यीमाचे स्येबल अरे” बी पङ्ज्यी। 3 ओसेम् पत्रुसतेङ् हुजु ल्हो-ल्हो डब दुर्सक्योर् ङ्यीज्यी। 4 थेङ्य्ही बक्च्या छ्योङ्य्हर्टीबल मुबल, तर गीःब डब पत्रुस बीम ङोन्ग्यम् दुर्सरी दोःज्यी। 5 थेचे कुक् लज्यीम् च्यामम् क्रीयेन्कीनो म्रङ्ज्यी, तर थे न्हङ्री अवङ्। 6 लीक्यम् दोखबे सीमोन पत्रुसमी सर्-सर् दुर्सन्हङ् वङ्ज्यी। थेचेएनो हुजुरी क्रीयेन्कीनो म्रङ्ज्यी। 7 थेङ्की क्ररी तुन्बे न्हम्जम् क्रीयेन्तेङ् बक्च्य अरेबल, हुजुम् ल्हो-ल्हो ग्लारी बाज्यीम् थेन्बल मुबल। 8 हुजु लीप्चे ङोन्ग्यम्नो दुर्सरी दोखबे गीःब डबएनो न्हङ्री वङ्ज्यी। चु म्रङ्ब बीसेम् थेचे येसु सोजेत्नेम् बी बीस्वास् लज्यी। 9 (धर्म छ्येःरी येसु स्यीब ग्यम्से सोनोथोब पङ्ज्यीम् ब्रीबे फ्रोइ थेङ्यीमाचे देरे सम्म गोबल अरेबल।) 10 हुजुलीप्चे हुजु डब ङ्य्ही दीम्री दोःज्यीम् य्हर्ज्यी। येसुतेङ् मरीयम् मग्दलीनी खतु तबल ( मत्ती २८:९-१० ; मर्कुस् १६:९-११ ) 11 ओसेम् मरीयम दुर्सइ फीर्च्योर् रप्ज्यीम् क्राटीबल मुबल। थेचे क्राक्राज्यीम् कुरीक्ले दुर्सन्हङ् च्याज्यी। 12 थेचे तर् येन् येन्बे स्वर्गदुत् ङ्य्ही म्रङ्ज्यी, गीः येसुइ क्र थेन्ब पट्टीचे ओसेम् गीः थेङ्की स्य्हब् थेन्ब पट्टीचे मुबल। 13 थेङ्य्हीचे मरीयम्त, “ए तले क्राटीबल?” बी ङ्योत्ज्यी। ओसेम् मरीयमचे पङ्ज्यी, “म्हीमाचे ङइ प्रभुत बोर्नेम्, ओसेम् थेङ्त खन थेन्ज्यी, ङचे स्येबल अरे।” 14 चोदे पङ्ब बीसेम् ग्यप् दोःज्यीम् च्यामम् मरीयमचे येसुत रप्जेत्टीबल म्रङ्ज्यी। तर थेङ् येसुनो य्हीन्ब बी थेचे अस्य्हे। 15 येसुचे थेत ङ्योत्ज्यी, “अन, ए तले क्राटीबल? एचे खल्त म्हइटीबल?” बी ङ्योत्जेत्ज्यी। ओसेम् मरीयमचे थेङ्त म्रङ्री लक् स्य्हेङ्बे म्ही य्हीन्स्यील म्हेन्ज्यीम्, “कसोल, प्रभुइ ल्हीत र्हङ्चे बोर्बल य्हीन्सम् ङत स्येतो खन थेन्बल मुब, ओसेम् ङ थेङ्त बोर्ब” बी पङ्ज्यी। 16 ओसेम् येसुचे, “ओ मरीयम्!” बी सुङ्ज्यी, येसुइ केत् थ्येःब बीसेम् मरीयमचे फ्लीक्दोःज्यीम् “रब्बोनी” बी पङ्ज्यी, चु पङ्बलमी हीब्रु ग्योत्री “लोप्पोन्” य्हीन्ब। 17 येसुचे थेत सुङ्ज्यी, “ङत थछुउ, तलेपङ्सम् दवम् ङ अपज ङ्यीबल अरे। ए ङ्यीज्यीम् ङइ डबमात स्येत्पीनो, ‘ङ ङइ अपतेङ् एङ्यीमाकी अप ओसेम् ङइ पर्मेस्वर्तेङ् एङ्यीमाकी पर्मेस्वर्ज ङ्यीटीब।’” 18 ओसेम् मरीयम् मग्दलीनी डबमाज ङ्यीज्यीम्, “ङचे प्रभुत म्रङ्ज्यी!” बी पङ्ज्यी। ओसेम् थेङ्चे सुङ्बे जम्मनो तम्मा थेङ्यीमात स्येत्पीन्ज्यी। डबमाकी गुङ्री येसु म्रङ्खबल ( मत्ती २८:१६-२० ; मर्कुस् १६:१४-१८ ; लुका २४:३६-४९ ) 19 हुजु अइतबारकी ङ्येस्ये डबमा यहुदी अगुवामातेङ् लोङ्ज्यीम् म्रप् दुङ्ज्यीम् टीटीबल मुबल। होदे बेलोरी तीक्कुरीनो येसु थेङ्यीमाकी गुङ्री रप्खजेत्ज्यीम्, “एङ्यीमात सान्ती तखइ” बी सुङ्ज्यी। 20 ओसेम् थेङ्चे थेङ्यीमात र्हङ्की फ्यातेङ् रइ ङोन्जेत्ज्यी। ओसेम् प्रभुत म्रङ्ज्यीम् थेङ्यीमा य्हक्को तङ्ज्यी। 21 येसुचे थेङ्यीमात देबेएनो सुङ्ज्यी, “सान्ती एङ्यीमातेङ् तखइ! अपचे ङत पीत्युजेत्प र्हङ्लेनो ङएनो एङ्यीमात पीत्टीब।” 22 हुजुलीप्चे थेङ्चे थेङ्यीमाइ जोरी सा फुत्पीन्जेत्ज्यीम् सुङ्ज्यी, “पबीत्र आत्मा कीनो। 23 खलइ पाप एङ्यीमाचे क्षमा पीन्ज्यी, हुजुइ पाप क्षमा तस्ये मुब, तर खलइ पाप एङ्यीमाचे क्षमा अपीन्ज्यी, थेङ्यीमाइ पाप क्षमा तस्ये अरे।” येसुतेङ् थोमा 24 येसु डबमाकी गुङ्री ब्योन्युबे बेलोरी चुङ् ङ्य्ही डबमान्हङ्की जउले पङ्बे थोमा हुजुरी अरेबल। 25 होत्तज्यीम् ल्हो-ल्हो डबमाचे थेत, “ङ्यीमाचे प्रभुत म्रङ्ज्यी” पङ्ज्यीम् स्येत्ज्यी। तर थोमाचे पङ्ज्यी, “ङचे थेङ्की फ्यारी खील्माकी डोप् अम्रङ्गदे, ओसेम् खील्माकी डोप्री ङइ या जुमी अजङ्गदे, ओसेम् थेङ्की रइरी बर्चचे ब्लोबे डोप्री ङइ या अजङ्गदेसम्म ङ बीस्वास् स्य्हेङ्स्ये अरे।” 26 सत गीः लीप्चे डबमा देबेएनो दीम्न्हङ् टीटीबल मुबल। थोमाएनो थेङ्यीमातेङ् बक्च्य मुबल। म्रप् दुङ्ज्यीम् टीटीबे बेलोरीनो येसु थेङ्यीमाकी गुङ्री म्रङ्खजेत्ज्यीम्, “एङ्यीमात सान्ती तखइ!” बी सुङ्ज्यी। 27 हुजु लीप्चे येसुचे थोमात सुङ्ज्यी, “एइ या जुमी ङइ याकी खील्की डोप्री जङो, ओसेम् ङइ रइकी खील्की डोप्री एइ या जङो। सङ्क थलउ, तर बीस्वास् स्य्हेङो।” 28 ओसेम् थोमाचे, “थेङ् ङइ प्रभुतेङ् ङइ पर्मेस्वर् य्हीन्ब!” पङ्ज्यी। 29 ओसेम् येसुचे थोमात सुङ्ज्यी, “एचेम् ङत म्रङ्ज्यीम् बीस्वास् स्य्हेङ्बल य्हीन्ब, तर ङत अम्रङ्मएनो बीस्वास् स्य्हेङ्बल य्हक्को मोलम् यङ्बलमा य्हीन्ब।” चु छ्येःकी उदेस्य 30 येसुचे ल्हो-ल्हो य्हक्को अचम्मइ चीनोमा डबमाकी ङ्होन्सङ् स्य्हेङ्जेत्ज्यी, हुजु चु छ्येःरी ब्रीबल अरे। 31 तर चु तम् ब्रीबल मुब, होत्तज्यीम् एङ्यीमाचे येसुत मुक्ती न्हङ्बे ख्रीस्ट् पर्मेस्वर्की ज य्हीन्ब पङ्ज्यीम् बीस्वास् स्य्हेङ्खइ, ओसेम् थेङ्त बीस्वास् स्य्हेङ्ज्यीम् खेमेनो अबेबे जीवन यङ्खइ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.