युहन्ना 15 - पश्चिम तामाङयेसु अङ्गुर्की दोङ्बो 1 देमेन्की अङ्गुर्की दोङ्बो ङनो य्हीन्ब, ओसेम् ङइ अपम् दोङ्बोइ स्य्हप्तो स्य्हेङ्बे म्ही य्हीन्ब। 2 ङतेङ् मुज्यीमएनो रोरो अरोबे जम्मनो य्हर्ङमाम् थाज्यीम् ख्लाजेत्प। ओसेम् रोरो रोःबे जम्मनो य्हर्ङमात झेन् य्हक्को रोखइ बी छेप्लाब। 3 ङचे पङ्बे तम्माचे एङ्यीमा य्हर्ङमा छेप्प र्हङ्ले ङोन्नो सुद्द स्य्हेङ्ज्यीन्बल मुब। 4 एङ्यीमा ङतेङ् गी तउ, ओसेम् ङ एङ्यीमातेङ् गीः तस्ये मुब। दोङ्बोतेङ् अतबे य्हर्ङचे रोरो रोःब अखम्, होलेनो एङ्यीमा ङतेङ् गीः अतसम् एङ्यीमाचे रोरो रोःब खम्स्ये अरे। 5 “अङ्गुर्की दोङ्बो ङनो य्हीन्ब, ओसेम् एङ्यीमा ङइ य्हर्ङमा य्हीन्ब। खल ङतेङ् तब, ओसेम् ङ खल्तेङ् तब, थेचे य्हक्को रोरोमा रोःब। ङ ग्यम्से फेज्यीम् एङ्यीमाचे ताएनो स्य्हेङ्ब अखम्। 6 खल ङतेङ् अतज्यी थे थालाबे य्हर्ङ र्हङ्ले ख्लाज्यीम् खर्स्ये मुब, ओसेम् र्हुब्ज्यीम् ख्रङ्बरी मेन्हङ् ख्लास्ये मुब। 7 एङ्यीमा ङतेङ् तज्यी पङ्सम्, ओसेम् ङचे पङ्बे तम्मा एङ्यीमातेङ् तज्यी पङ्सम् एङ्यीमाचे सेम्चे म्हेन्बल र्हीतो, ओसेम् हुजु एङ्यीमाकी लागीरी स्य्हेङ्पीन्स्ये मुब। 8 एङ्यीमाचे य्हक्को रोःरो रोःज्यीम् ङइ डबमा य्हीम्ब बी ङोन्ज्यी पङ्सम् ङइ अपइ महीमा तस्ये मुब। 9 “अपचे ङत म्होइब र्हङ्ले, ङचेएनो एङ्यीमात म्होइबल मुब। एङ्यीमा ङइ म्होइबरी टीस्यीनो टीउ। 10 अपचे कुल्जेत्पे तम्मा ङचे ङ्येन्ज्यीम् अपइ म्होइबरी टीब र्हङ्लेनो, एङ्यीमाचेएनो ङचे कुल्बे अर्तीमा ङ्येन्ज्यी पङ्सम् एङ्यीमा ङइ म्होइबरी टीस्यीनो टीस्ये मुब। 11 ङचे चु तम् एङ्यीमात ङइ तङ्ब एङ्यीमातेङ् तखइ, ओसेम् एङ्यीमाकी सेम् तङ्बचे प्लीङ्खइ बी पङ्बल य्हीन्ब। 12 “ङचे कुल्बे अर्ती चुनो य्हीन्ब, खले ङचे एङ्यीमात म्होइज्यी, होलेनो एङ्यीमाचेएनो गीःचे गीःत म्होइगो। 13 र्हङ्की र्होकी लागीरी र्हङ्की जीवन् पीन्ब बीम ङ्हच्छ्यङ् म्होइब ल्हो-ल्हो तएनो अरे। 14 ओसेम् ङचे कुल्बे अर्तीमा एङ्यीमाचे ङ्येन्स्यीनो टीज्यी पङ्सम् एङ्यीमा ङइ र्होमा य्हीन्ब। 15 देरे य्हङ्से ङ एङ्यीमात योक्पोमा अपङ्, तलेपङ्सम् योक्पोमाचे थेङ्यीमाइ न्याबोचे ता स्य्हेङ्ब थेङ्यीमाचे स्येबल अत। ङमी एङ्यीमात र्होमा पङ्ब, तलेपङ्सम् ङचे ङइ अप ग्यम्से थ्येःबे जम्मनो तम्मा एङ्यीमात स्येत्पीन्बल मुब। 16 एङ्यीमाचे ङत दम्बल अय्हीन्, ङचे एङ्यीमात दम्ज्यी, ओसेम् एङ्यीमाचे ङ्यीज्यीम् खेम पङ्लेनो तस्यीनो टीबे रोरो रोःन लउ पङ्ज्यीम् ङचे एङ्यीमात पीत्टीब मुब। ओसेम् एङ्यीमाचे ङइ मीन्री ता र्हीत्ज्यी हुजु अपचे न्हङ्जेत्स्ये मुब। 17 ङ एङ्यीमात कुल्ब, एङ्यीमाचे गीःचे गीःत म्होइगो। जम्बुलीङ्की अखोब 18 “जम्बुलीङ्की म्हीमाचे एङ्यीमात अखोसम्, एङ्यीमाचे स्येको की एङ्यीमात अखोब बीम ङोन्ग्यम् थेङ्यीमाचे ङत अखोबल य्हीन्ब। 19 एङ्यीमा चु जम्बुलीङ्की म्हीमा य्हीन्बल पङ्सम् जम्बुलीङ्की म्हीमाचे एङ्यीमात र्हङ्लनो म्हेन्ज्यीम् म्होइस्येल। तर एङ्यीमात ङचे चु जम्बुलीङ् ग्यम्से दम्बल य्हीन्ब, एङ्यीमा चु जम्बुलीङ्ल अय्हीन्। होत्तज्यीम् एङ्यीमात चु जम्बुलीङ्की म्हीमाचे अखो। 20 ङचे एङ्यीमात, ‘योक्पो न्याबो बीम ङ्हच्छ्यङ् अत’ बी पङ्बे तम् व्हल् लउ। म्हीमाचे ङत दुख पीन्ज्यी पङ्सम् एङ्यीमातएनो पीन्स्ये मुब। ओसेम् थेङ्यीमाचे ङइ तम्मा ङ्येन्ज्यी पङ्सम् एङ्यीमाकी तमएनो ङ्येन्स्ये मुब। 21 ओसेम् एङ्यीमा ङइ म्ही तबल तज्यीम् थेङ्यीमाचे दुख पीन्स्ये मुब, तलेपङ्सम् थेङ्यीमाचे ङत पीत्युजेत्पे अपत अस्ये। 22 “ङ युज्यीम् थेङ्यीमात अस्येत्पीन्बल य्हीन्सम् थेङ्यीमा पापकी दोसी तस्ये अरेबल, तर देरेम् थेङ्यीमाकी पाप्की लागीरी ताकी ङ्युङ्एनो अरे। 23 ङत अखोबलचे ङइ अपतएनो अखो। 24 ल्हो-ल्हो खल्चेएनो अस्य्हेङ्बे अचम्मइ लक्मा ङचे थेङ्यीमाकी गुङ्री अस्य्हेङ्बल य्हीन्सम् थेङ्यीमा पापकी दोसी तस्ये अरेबल। तर थेङ्यीमाचे ङचे स्य्हेङ्बे लक्मा म्रङ्ज्यीमएनो ङतेङ् ङइ अपत अखो। 25 तर धर्म छ्येःरी, ‘थेङ्यीमाचे ङत ओलेन्नो अखो’ बी ब्रीबे तम् टोप तखइ बी चोले तबल य्हीन्ब। 26 “एङ्यीमात र्हो लबरी ङचे पबीत्र आत्मात एङ्यीमाज पीत्युस्ये मुब। थेङ् देमेन्की आत्मा य्हीन्ब, थेङ् अप ग्यम्से ब्योन्युस्ये मुब, ओसेम् ङइ बारेरी स्येत्स्ये मुब। 27 एङ्यीमाम् ङचे लक् तीप्प य्हङ्सेनो ङतेङ् बक्च्य मुबल तज्यीम्, एङ्यीमाएनो ङइ साक्षी तस्ये मुब।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.