युहन्ना 13 - पश्चिम तामाङयेसुचे र्हङ्की डबमाकी कङ् ख्रुजेत्पल 1 नीस्तार पर्ब खब बीम ङोन्ग्यम् येसुचे र्हङ जम्बुलीङ् ख्लेथेन्ज्यीम् अपज दोःज्यीम् ङ्यीबे बेलो खबल मुब बी खेम्जेत्ज्यी। थेङ्चे जम्बुलीङ्री मुबे र्हङ्की डबमात य्हक्को म्होइजेत्ज्यी, ओसेम् देरेम् थेङ्यीमात ज्युःसम्मनो म्होइजेत्ज्यी। 2 थेङ्मा ङ्येसेकी स्य्हेब सोल्टीबे बेलोरी सैतान्चे सीमोन्की ज यहुदा इस्करीयोतकी सेम्री थेङ्त चुङ्न लपीन्बे सेम् युपीन्ज्यीन्बल मुबल। 3 पर्मेस्वर्चे र्हङ्त जम्मनो तम्माकी हक् न्हङ्बल मुब पङ्बे तम् येसुचे खेम्जेत्पल मुबल। ओसेम् थेङ् पर्मेस्वर् ग्यम्सेनो ब्योन्युबल य्हीन्ब पङ्बतेङ् पर्मेस्वर्जनो दोःज्यीम् स्येटीब पङ्बे तम् खेम्जेत्पल मुबल। 4 होत्तज्यीम् थेङ् डोन् सोल्टीबे ग्लाचे रेःजेत्ज्यी। ओसेम् र्हङ्चे य्हुर्जेत्पे न्हम्ज प्लोक्जेत्ज्यी, ओसेम् केप्परी गम्स गीः खीःजेत्ज्यी। 5 हुजु लीप्चे थेङ्चे तङ्लो गीरी यी यु:जेत्ज्यीम् डबमाकी कङ् ख्रुजेत्ज्यी। ओसेम् केप्परी खीजेत्पे गम्स प्लोक्ज्यीम् थेङ्यीमाकी कङ् फ्यापीन्जेत्ज्यी। 6 थेङ्चे सीमोन् पत्रुसकी कङ् ख्रुब म्हइबे बेलोरी पत्रुसचे पङ्ज्यी, “प्रभु, ता थेङ्चे ङइ कङ् ख्रुब म्हइजेत्पल?” 7 ओसेम् येसुचे पत्रुसत सुङ्ज्यी, “देरे ङचे ता स्य्हेङ्टीब एचे अगो, तर एचे लीक्क्यम् गोस्ये मुब।” 8 पत्रुसचे थेङ्त पङ्ज्यी, “थेङ्चे ङइ कङ् खेमेएनो ख्रुजेत्स्ये अरे।” ओसेम् येसुचे सुङ्ज्यी, “ङचे एइ कङ् अख्रुज्यी पङ्सम् ए ङइ डब तस्ये अरे।” 9 ओसेम् सीमोन पत्रुसचे पङ्ज्यी, “प्रभु होले य्हीन्सम्, ङइ कङ्कीनो अय्हीन्, तर यातेङ् क्रएनो ख्रुपीन्जेतो।” 10 येसुचे थेत सुङ्ज्यी, “ख्रुज्यीन्बे म्हील कङ् बीम ल्हो-ल्हो तएनो ख्रुअथो, तलेपङ्सम् एङ्यीमा चोखो तज्यीन्बल मुब। एङ्यीमामी चोखो तबल मुब, तर जम्मनोम् अय्हीन्।” 11 तलेपङ्सम् येसुचे र्हङ्त चुङ्न लपीन्स्येकी म्हीत खेम्जेत्पल मुबल, होत्तज्यीम् थेङ्चे, “एङ्यीमा जम्मनो चोखो तबल अरे” बी सुङ्बल मुबल। 12 डबमाकी कङ् ख्रुजेत्प बीसेम् येसुचे य्हुर्बे न्हम्ज य्हुर्जेत्ज्यीम् स्य्हेःब सोल्बरी स्य्हुजेत्ज्यी, ओसेम् थेङ्यीमात सुङ्ज्यी, “ङचे तले एङ्यीमाकी कङ् ख्रुबल, एङ्यीमाचे गोज्यी? 13 एङ्यीमाचे ङत लोप्पोन्तेङ् प्रभु पङ्ब। हुजु तम् ठीक्नो य्हीन्ब, तलेपङ्सम् एङ्यीमाकी लोप्पोन्तेङ् प्रभु ङनो य्हीन्ब। 14 ङ एङ्यीमाकी लोप्पोन्तेङ् प्रभु तज्यीमएनो एङ्यीमाकी कङ् ख्रुब पङ्सम् एङ्यीमाचेएनो र्हङ्न्हङ्री गीःचे गीःकी कङ् ख्रुथोब। 15 ङचे स्य्हेङ्ब र्हङ्लेनो एङ्यीमाचेएनो स्य्हेङो पङ्ज्यीम् ङचे एङ्यीमात नमुन ङोन्बल य्हीन्ब। 16 ङ एङ्यीमात देमेन्नो पङ्ब, न्याबो बीम योक्पो ङ्हच्छ्यङ् अत, ओसेम् सम्तर् बोर्बे म्ही सम्तर् पीत्पे म्ही बीम ङ्हच्छ्यङ् अत। 17 एङ्यीमाचे चु तम्मा गोज्यीम् चु तम्मा र्हङ्लेनो स्य्हेङ्ज्यी पङ्सम् एङ्यीमाचे मोलम् यङ्स्ये मुब। येसुत चुङ्न लपीन्बे डब ( मत्ती २६:२०-२५ ; मर्कुस् १४:१७-२१ ; लुका २२:२१-२३ ) 18 “ङचे चु एङ्यीमा जम्मइ लागीरी पङ्बल अय्हीन्, ङचे दम्बलमात ङचे स्येःब। तर धर्म छ्येःरी, ‘ङतेङ् बक्च्य चब चबे म्हीचे ङइ बीरोद् लज्यी’ बी ब्रीबे फ्रोइ टोप् तथोब। 19 “हुजु तब बीमम् ङोन्ग्यम् देरेनो ङचे एङ्यीमात पङ्टीब, हुजु तब बीसेम् एङ्यीमाचे, ‘ङ थेनो य्हीन्ब’ बी बीस्वास् स्य्हेङ्खइ। 20 ङ एङ्यीमात देमेन्नो पङ्ब, ङचे पीत्पलमात ग्रहन् स्य्हेङ्बलचे ङतएनो ग्रहन् स्य्हेङ्ब, ओसेम् ङत ग्रहन् स्य्हेङ्बलचे ङत पीत्युजेत्पलतएनो ग्रहन् स्य्हेङ्ब।” 21 येसुचे चोले सुङ्जेत्प बीसेम् थेङ्की थुःरी य्हक्कोनो दुख तजेत्ज्यी, ओसेम् थेङ्चे डबमात सुङ्ज्यी, “ङ एङ्यीमात देमेन्नो पङ्ब, एङ्यीमान्हङ्री गीःचे ङत चुङ्न लपीन्स्ये मुब।” 22 येसुचे चु फ्रोइ खलइ बारेरी सुङ्बल बी अगोज्यीम् डबमा गीःचे गीःकी लीरी च्याज्यी। 23 थेङ्की डबमा न्हङ्री थेङ्चे म्होइजेत्पे डबम् थेङ्की रेइरी य्होर्ले टीटीबल मुबल। 24 सीमोन पत्रुसचे हुजु डबत ल्हादब् लज्यीम् पङ्ज्यी, “हुजु फ्रोइ थेङ्चे खलइ बारेरी सुङ्बल ङ्योतो।” 25 होत्तज्यीम् हुजु य्होर्ले टीबे डबचे थेङ्तेङ् झेन् तुः लज्यीम्, “प्रभु, हुजु खल य्हीन्ब?” बी ङ्योत्ज्यी। 26 येसुचे सुङ्ज्यी, “खलत ङचे ग्येङ् नुत्ज्यीम् पीन्स्ये मुब, थेनो हुजु म्ही य्हीन्ब।” ओसेम् थेङ्चे ग्येङ् नुत्ज्यीम् सीमोन् स्करीयोतकी ज यहुदात न्हङ्ज्यी। 27 ग्येङ् चब साच्चेनो सैतन् यहुदान्हङ् वङ्ज्यी, ओसेम् येसुचे थेत सुङ्ज्यी, “एचे स्य्हेङ्ब म्हइबे लक् ग्योन् ग्योन्नो स्य्हेङो।” 28 येसुचे यहुदात चु फ्रोइ तले सुङ्बल बी चबरी टीबे ल्हो-ल्हो डबमा खल्चेएनो अगो। 29 यहुदातेङ् टङइ गल्द मुबल तज्यीम् पर्ब म्हन्दीबरी तोःबे स्हेःमा ग्लुउ बी येसुचे सुङ्बल य्हीन्स्यीन बी थेङ्यीमा न्हङ्री डेत्-डेत्चे म्हेन्ज्यी, ओसेम् डेत्-डेत्चेम् प्रङ्नमात टङ पीन्बरी पीत्पल य्हीन्स्यीन बी म्हेन्ज्यी। 30 ओसेम् ग्येङ् चब साच्चेनो यहुदा इस्करीयोत फीर्च्योर् य्हर्ज्यी। होदे बेलोरी म्हुन तज्यीन्बल मुबल। येसुचे छार् अर्ती गी न्हङ्जेत्पल 31 यहुदा य्हर्ब बीसेम् येसुचे र्हङ्की बारेरी सुङ्ज्यी, “देरेम् म्हीइ ज महीमीत तबल मुब, ओसेम् पर्मेस्वर् थे ग्यम्से महीमीत तस्ये मुब। 32 पर्मेस्वर् थे ग्यम्से महीमीत तजेत्प पङ्सम् पर्मेस्वर्चे र्हङ् ग्यम्सेनो थेत महीमीत स्य्हेङ्जेत्स्ये मुब, ओसेम् हुजु ग्योनेनो स्य्हेङ्जेत्स्ये मुब। 33 “ङइ कोलमा, देरेम् ङ य्हम्बगीकीनो एङ्यीमातेङ् तस्ये मुब। एङ्यीमाचे ङत म्हइस्ये मुब, तर ङचे यहुदी अगुवामात पङ्ब र्हङ्लेनो ङ एङ्यीमातएनो पङ्ब, ङ ङ्यीटीबे ग्लारी, एङ्यीमा खब अखम्। 34 देरेम् ङ एङ्यीमात छार् अर्ती गी कुल्ब, एङ्यीमा गीःचे गीःत म्होइगो। ङचे एङ्यीमात म्होइब र्हङ्लेनो, एङ्यीमाचेएनो गीःचे गीःत म्होइगो। 35 एङ्यीमाचे गीःचे गीःत म्होइज्यी पङ्सम्, चु तम् ग्यम्सेनो एङ्यीमा ङइ डबमा य्हीन्ब बी म्हीमाचे स्येस्ये मुब।” पत्रुसचे येसुत अस्ये पङ्स्ये मुब बी थेङ्चे सुङ्बल ( मत्ती २६:३१-३५ ; मर्कुस् १४:२७-३१ ; लुका २२:३१-३४ ) 36 ओसेम् सीमोन पत्रुसचे येसुत, “प्रभु, थेङ् खन स्येजेत्टीब?” बी ङ्योत्ज्यी। येसुचे जोहब् न्हङ्ज्यी, “ङ खन ङ्यीटीब, हुजुरी देरे ए ङइ लीप् लीप् खब अखम्, तर लीक्क्यम्मी ङइ लीप्चे खब खम्स्ये मुब।” 37 पत्रुसचे थेङ्त पङ्ज्यी, “प्रभु, ङ देरे थेङ्की लीप्चे तले खब अखम् स्यीम्? ङ थेङ्की लागीरी ङइ बुः पीन्ब खम्ब।” 38 येसुचे थेत जोहब् न्हङ्ज्यी, “ता ए ङइ लागीरी बु:एनो पीन्ब पङ्ब? ङ एत देमेन्नो पङ्ब, न्हम्स्य्हो स्य्होरी एचे ङत सोम्ख्यप् सम्म अस्य्हे अपङ्गदे नक व्हब ङ्य्हस्ये अरे।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.