याकुब 5 - पश्चिम तामाङबरुमात चेतावनी 1 देरेम् एङ्यी बरु म्हीमा, ङइ तम् ङ्येनो, एङ्यीमाकी जोरी ङ्हच्छ्यङ् दुख खटीब मुब, होत्तज्यीम् एङ्यीमा क्राको ओसेम् बीलाप लउ। 2 एङ्यीमाकी सम्पतीमा क्रम्बल मुब, ओसेम् गोइलमा बुलुङ्चे चबल मुब। 3 एङ्यीमाकी म्हर् म्हुइमा चे:चे चबल मुब। हुजु चे:नो एङ्यीमाकी बीरुद्दरी साक्षी तस्ये मुब ओसेम् हुजु चेःचे मेचे र्हङ्ले एङ्यीमाइ ल्हीः क्रोस्ये मुब। एङ्यीमाचे र्हुब् लबे चु स्हेःमानो न्यायकी दीन्री एङ्यीमाकी बीरुद्दरी साक्षी तस्ये मुब। 4 एङ्यीमाकी म्रङ्री बाली दुत्पे न्हङ्बोमात एङ्यीमाचे म्हेला पीन्बल अरे। ङ्येनो एङ्यीमाइ बीरोदरी थेङ्यीमाकी क्राब। एइ बाली दुत्पे न्हङ्बोमाकी क्राब सक्तीसाली परमप्रभुचे सेन्जेत्पल मुब। 5 एङ्यीमा चु जम्बुलीङ्री सुखले मनमोज्यी लज्यीम् टीबल मुब। सेत्पे लागीरी सोबल बी सेम्ज्येन्माचे अगोज्यीम छोब र्हङ्ले एङ्यीमा पर्मेस्वर्चे न्हङ्स्येकी सजाय अगोज्यीम् मनमोज्यीले टीबल मुब। 6 एङ्यीमाचे र्हङ्त बीरोद् अलबे म्हीमात दोस् ल्हइदीज्यीम् सेत्पल मुब। धैर्य 7 ङइ बीस्वासी र्होमा, प्रभु दो:ज्यीम् अब्योन्युगते धैर्य लज्यीम् टीउ। च्याको, ब्लुत्पे म्हीचे ज्यबे अन्न यङ्बरी स्यी: सेर्कइ नम् ब्रेन्ज्यीम् टीब। 8 होलेनो एङ्यीमाएनो धैर्य लज्यीम् टीउ, ओसेम् प्रभुरी भरोसा कोङनले थेनो, तलेपङ्सम् प्रभु ब्योन्युबे दीन् ज्यदङ् खटीबल मुब। 9 ङइ बीस्वासी र्होमा, एङ्यीमा गी:चे गी:की बीरुद्दरी थम्हुरुको, होलेलसम् एङ्यीमात प्रभुचे न्याय स्य्हेङ्जेत्स्ये मुब। च्याको, न्याय स्य्हेङ्जेत्स्येकी प्रभु म्रङ्खजेत्परी टोप तबल मुब। 10 ङइ बीस्वासी र्होमा, धैर्य लबतेङ् दुख नाबे नमुनाकी लागीरी प्रभुइ छेन्री लोप्पे अगम्बक्तमात व्हल् लउ। 11 एङ्यीमाचे स्ये:ब दुख यङ्बे बेलोरी धैर्य लबलमात पर्मेस्वर्चे तङ्नलबे म्हीमा बी ङ्यीमाचे पङ्ब। अयुबचे दुख यङ्बे बेलोरी धैर्य लबल ओसेम् ज्यु:री प्रभुचे दय लजेत्पल एङ्यीमाचे थे:बल मुब। ङ्य्हङ्की प्रभु दयातेङ् क्रीपाचे प्लीङ्जेत्पल मुब। 12 ङइ बीस्वासी र्होमा, गोदोब्न्हङ् ङ्हच्छ्यङ् तम्मी बाचा स्हेङ्बतेङ न्ह स्वर्ग न्ह जम्बुलीङ् तइ मीन्रीएनो सपथ थयुगो। एङ्यीमाचे य्हीन्सम् “य्हीन्ब” पङो, अय्हीन्सम् “अय्हीन्” पङो, हुजुलीप्चे एङ्यीमा पर्मेस्वर्की न्यायरी दोस्ये अरे। प्रार्थनाकी सक्ती 13 एङ्यीमा न्हङ्री खलए दुखरी मुब? थेचे प्रार्थना स्य्हेङ्थोब। एङ्यीमा न्हङ्री खलए तङ्बरी मुब? थेचे पर्मेस्वर्त तोप्पे व्हइ कोथोब। 14 एङ्यीमा न्हङ्री खलए नबल मुब? थेचे मन्डलीकी अगुवामात ङ्होत्थोब, ओसेम् थेङ्यीमाचे प्रभुइ छेन्री नबे म्हीत छ्युकु स्य्हल्ज्यीम् पर्मेस्वर्त प्रार्थना स्य्हेङ्थोब। 15 बीस्वास् लज्यीम् स्य्हेङ्बे प्रार्थनचे नबे म्ही फेन्स्ये मुब, ओसेम् प्रभुचे फेन्न लजेत्स्ये मुब। थेचे पाप स्य्हेङ्बल मुसम् क्षमा यङ्स्ये मुब। 16 होत्तज्यीम् एङ्यीमाचे स्य्हेङ्बे पापमा गी:चे गी:त स्येतो, ओसेम् एङ्यीमा नब ग्यम्से फेन्बरी गी:चे गी:की लागीरी प्रार्थना स्य्हेङो। धर्मी म्हीचे स्य्हेङ्बे प्रार्थनारी ङ्हच्छ्यङ् सक्ती तब ओसेम् ङ्हच्छ्यङ् लक् तब। 17 एलीयाएनो ङ्य्हङ् र्हङ्बे म्ही मुबल। थेचे नम् अयुखइ पङ्ज्यीम् सेम् य्हङ्सेनो पर्मेस्वर्त प्रार्थना स्य्हेङ्ज्यी, ओसेम् सोम्तीङ्स्यी ल डु: सम्म हुजु य्हुल्री नम् अयु। 18 थेचे लीक्क्यमएनो देबेएनो प्रार्थना स्य्हेङ्ज्यी ओसेम् मुचे नम् युज्यी, सचे अन्नमा रो:ज्यी। 19 ङइ बीस्वासी र्होमा, एङ्यीमा न्हङ्री खल पङ्लेनो देमेन् ग्यम्से थारीङ् य्हर्ज्यी पङ्सम् थेत दो:ज्यीम् बउ। 20 पापी गी:त अज्यबे लक् ग्यम्से दो:ज्यीम् बबलचे स्येखइ की थेचे हुजु पापी म्हीत स्यीब ग्यम्से सोन लस्ये मुब, ओसेम् य्हक्को पापमा क्षमा तस्ये मुब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.