याकुब 4 - पश्चिम तामाङपर्मेस्वर्की अधीन्री टीउ 1 एङ्यीमाकी गुङ्री छेत्पतेङ् बङ्ब खनचे खब? एङ्यीमाकी न्हङ्रीनो छेत्टीबे दुस्ट म्हेन्बमाचे लज्यीम् अय्हीनो स्यीम्? 2 एङ्यीमाचे स्हे: यङ्बे सेम् लब तर एङ्यीमाचे अय्हङ्, होत्तज्यीम् र्होत सेत्प। र्होकी स्हे:त स्हेर्ब तर एचे हुजु यङ्ब अखम्, होत्तज्यीम् र्होतेङ् छेत्प ओसेम् बङ्ब। एचे ता यङ्बे सेम् लज्यी हुजु अय्हङ् तलेपङ्सम् एचे पर्मेस्वर्तेङ् अर्हीत्। 3 एङ्यीमाचे रहीत्लेनो अय्हङ् तलेपङ्सम् एङ्यीमाचे र्हङ् मनमोज्यी लबे लागीरी अज्यबे सेम् थोज्यीम् र्हीत्प। 4 ब्यभीचारी म्हीमा! जम्बुलीङ्की स्हेमात म्होइबमी पर्मेस्वर्तेङ् सत्तुर् स्य्हेङ्ब य्हीन्ब बी एङ्यीमाचे अस्येउ स्यीम्? जम्बुलीङ्की स्हेमात म्हइबलचे र्हङ्चे र्हङ्त पर्मेस्वर्की सत्रु स्य्हेङ्ब। 5 धर्म छ्ये:री “पर्मेस्वर्चे ङ्य्हङ्न्हङ् थेन्जेत्पे आत्माइ लागीरी थेङ् य्हक्को स्हेर्जेत्प” बी ब्रीबे तम् लक् अतबतेङ् देमेन् अय्हीन् बी थम्हेनो। 6 तर थेङ्चे झेन् य्हक्को अनुग्रह न्हङ्जेत्प। धर्म छ्ये:री चोले ब्रीबल मुब, “पर्मेस्वर्चे र्हङ्चे र्हङ्त ङ्हच्छ्यङ् म्हेन्बलमाकी बीरोद् स्य्हेङ्जेत्प, तर नम्रमाकी जोरी अनुग्रह न्हङ्जेत्प।” 7 होत्तज्यीम् पर्मेस्वर्की अधीन्री टीउ। सैतान्की बोरोध स्य्हेङो, थे एङ्यीमा ग्यम्से छ्योङ्य्हर्स्ये मुब। 8 एङ्यीमा पर्मेस्वर्की रेइरी खोउ, थेङ् एङ्यीमाकी रेइरी ब्योन्खस्ये मुब। एङ्यी पापीमा अज्यबे लक्मा स्य्हेङ्ब पीतो! ओसेम् एङ्यी सेम् ङ्ही थोःबे म्हीमा चोखो तम्कीनो म्हेनो! 9 एङ्यीमा दुखी तउ, बीलाप स्य्हेङो ओसेम् क्राको। एङ्यीमाकी ङ्येत्प क्रापरी दो:खइ ओसेम् एङ्यीमाकी तङ्ब दुखरी दोखइ। 10 प्रभुइ ङोन्ग्यम् र्हङ्त नम्र स्य्हेङो, ओसेम् थेङ्चे एङ्यीमात स्य्हेस यङ्न लजेत्स्ये मुब। ल्हो-ल्होत न्याय स्य्हेङ्बे बारेरी चेतावनी 11 ङइ बीस्वासी र्होमा, एङ्यीमाचे गी:चे गी:त अज्यबे तङ्मेन् थलउ। एङ्यीमाचे ल्हो-ल्हो बीस्वासीमाकी बारेरी अज्यबे तङ्मेन् लज्यीम् न्याय स्य्हेङ्ब पङ्सम् एङ्यीमाचे पर्मेस्वर्की नीयम्की तङ्मेन् लब, ओसेम् न्याय स्य्हेङ्ब। एङ्यीमाचे पर्मेस्वर्की नीयम्की न्याय स्य्हेङ्ज्यी पङ्सम् एङ्यीमा पर्मेस्वर्की नीयम् ङ्येन्बे म्ही अत तर न्याय स्य्हेङ्बे म्ही तब। 12 नीयम् न्हङ्बतेङ् न्याय स्हेङ्जेत्पलमी पर्मेस्वर् गीकीनो मुब। ओसेम् थर्न लबतेङ् म्हन लब थेङ्चेकीनो खम्ब। होत्तज्यीम् र्हङ्की खीम्सेत न्याय स्य्हेङ्बल एङ्यीमा खल? र्हङ्चे र्हङ्त ङ्हच्छ्यङ् म्हेन्बे बारेरी चेतावनी 13 एङ्यीमा, “की तीङ्यी की न्हम्स्य्हो ङ्यीमा सहर् गी:री ङ्यीज्यीम् हुजुरी तीत्तीङ् टील, ओसेम् छोङ् स्य्हेङ्ज्यीम् य्हक्को टङ छाला” बी पङ्बलमा ङइ तम् ङ्येनो। 14 न्हम्स्य्हो एइ जीवन् ता तब बी एङ्यीमाचे स्येबल अरे। एङ्यीमामी य्हम्बगी म्रङ्ज्यीम् म्हय्हर्बे खस र्हङ्ब य्हीन्ब। 15 बरु एङ्यीमाचेम्, “प्रभुइ थु: मुसम् ङ्य्हङ्मा सोल, ओसेम् चोले स्य्हेङ्ल वुइ होले स्य्हेङ्ल” बी पङ्थोब। 16 तर एङ्यीमाचे र्हङ्की योजनमारीनो फुर्ती ल्हइतीब। एङ्यीमाचे होले फुर्ती ल्हइतीब ज्यब अय्हीन्। 17 होत्तज्यीम् खल्चे ज्यब स्य्हेङ्थो:ब बी स्येज्यीमएनो अस्य्हेङ् थेचे पाप स्य्हेङ्ब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.