याकुब 3 - पश्चिम तामाङलेत दुल्बल 1 ङइ बीस्वासी र्होमा, एङ्यीमा न्हङ्री लोप्पोन्मा य्हक्को थतउ। तलेपङ्सम् एङ्यीमाचे स्ये:बलनो मुब, ङ्यीमा लोप्पीन्बलमाकी न्याय झेन् य्हक्को कोङ्नले तस्ये मुब। 2 ङ्य्हङ्मा जम्मचेनो य्हक्को तम्मारी न्होर्ब। तर र्हङ्चे थोल्बे तम्री अन्होर्बे म्हीम् सीद्द म्ही य्हीन्ब, होतेबे म्हीचेम् जम्मनो लक्मारी र्हङ्चे र्हङ्त दुल्ज्यीम् थेन्ब खम्ब। 3 त क्रेत्पे म्हीचे पङ्बे तम् ङ्येन्न लबरी तइ सुङ्री फइतेङ् डीइ छोत तापीन्ब, ओसेम् खन बोर्के म्हेन्ज्यी हुजुरी बोर्ब खम्ब। 4 ओसेम् ङ्हच्छ्यङ् दोङ्ग ङ्हच्छ्यङ् लाबोचे इबोर्ज्यीम् स्यङ्टीलएनो दोङ्ग चल्तीबे म्हीचे ज्यीदकी क्यब र्हङ्ब स्यङ्ज्यीम् दोङ्गत खन बोर्के म्हेन्ज्यी हुजुरी बोर्ब खम्ब। 5 होलेनो ले म्हीइ ल्हीकी ज्यीद स्हे: तलेनो ङ्हच्छ्यङ् ङ्हच्छ्यङ् तम्मारी घमन्ड लब खम्ब। म्हेनो मे छीर्तो गी:चे ङ्हच्छ्यङ् बन म्हेरे य्हर्ब खम्ब। 6 लेएनो मे र्हङ्ब य्हीन्ब। ङ्य्हङ्की ल्हीरी मुबलमा न्हङ्री ले दुस्टइ जम्बुलीङ् य्हीन्ब। थेचे जम्मनो ल्हीत न्होङ्न लब, ओसेम् न्हब य्हङ्से स्यीबसम्मनो मे द्यबीन्ब, थे र्हङएनो नर्कइ मेरी स्य्होप्प। 7 म्हीचे जम्मनो थोइ सेम्ज्येन्मा, ङ्यम्ङ्यमा, स्य्होलोक्ज्यीम् ब्रबे जन्तुमा ओसेम् यीन्हङ् मुबे जन्तुमात दुल्ब खम्ब ओसेम् दुल्टीबल मुब। 8 तर लेत खल्चेएनो दुल्ब खम्बल अरे। हुजु ले न्होङन लबे बीख्चे प्लीङ्ज्यीम् ब्रबे पुख्री र्हङले म्हीत न्होङ्न लबरी चल्तीस्यीनो टीब। 9 ओसेम् ङ्य्हङ्चे चु ले कोल्ज्यीम् पर्मेस्वर् ङ्य्हङ्की प्रभुतेङ् अपत व्होर्छ्ये पीन्ब, ओसेम् पर्मेस्वर्की स्वरुप्री स्य्हेङ्जेत्पे म्हीत के:म्लङ् पीन्ब। 10 सुङ् गी:चे तोप्पतेङ् के:म्लङ् डोङ्ब। ङइ बीस्वासी र्होमा चोतेब तब अत! 11 यी म्रु गी:चेनो ङम्बतेङ् कम्बे यी प्योःबो स्यीम्? 12 ङइ बीस्वासी र्होमा, अन्जीर्की दोङ्बोरी जैतुन्की रोरो रो:ब खम्बो वुइ अङ्गुर्की दोङ्बोरी अन्जीर्की रोरो रो:ब खम्बो स्यीम्? चद प्राबे यी प्योःबे म्रुरी रोङ्बे यी प्योःब अखम्। पर्मेस्वर्चे न्हङ्जेत्पे बुद्दी 13 खल्चे पङ्लेनो एङ्यीमान्हङ्री र्हङ् बुद्दी मुबतेङ् गोबे म्ही म्हेन्सम्, थेचे ज्यबे जीवन् सोज्यीम् ओसेम् बुद्दीतेङ् नम्रतारी ज्यबे लक्मा स्य्हेङ्ज्यीम् ङोन्थो:ब। 14 तर एङ्यीमाकी सेम्न्हङ् य्हक्को स्हेर्बतेङ् र्हङ्तकीनो ज्यब तखइ म्हेन्बे तम् मुसम् बुद्दी मुब पङ्ज्यीम् र्हङ्चे र्हङ्त ङ्हच्छ्यङ् म्हेन्ज्यीम् देमेन्की बीरुद्दरी पाप थस्य्हेङो। 15 चोतेबे बुद्दी पर्मेस्वर् ग्यम्से यङ्बल अय्हीन्, होतेबे बुद्दी जम्बुलीङ् ग्यम्से, म्हीमाइ म्हेन्ब ग्यम्से, ओसेम् सैतान ग्यम्से खबल य्हीन्ब। 16 खन स्हेर्बतेङ् र्हङ्तकीनो ज्यब तखइ म्हेन्बे सेम् तब, हुजुरी अथुन्बतेङ् जम्मनो थोइ दुस्ट तम्मा तब। 17 तर पर्मेस्वर् ग्यम्से यङ्बे बुद्दी ङोन्नो सुद्द तब, सान्तीरी टीब, र्होकी तम्तेङ् डीःब ओसेम् थुन्ज्यीम् टीब। चोतेबे बुद्दी दयचे प्लीङ्बल तब ओसेम् ज्यबे लक्मा स्य्हेङ्ब, बेख्लेतेङ् कपटी अत 18 ओसेम् सान्ती तन लबलमाचे थुन्बे लक्मा स्य्हेङ्ज्यीम् धार्मीक्ताकी रोरो रो:ब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.