याकुब 2 - पश्चिम तामाङबेख्ले लबे बीरुद्दरी चेतावनी 1 ङइ बीस्वासी र्होमा, एङ्यीमाचे महीमाचे प्लीङ्बे ङ्य्हङ्की प्रभु येसु ख्रीस्ट्त बीस्वास् स्य्हेङ्बल तज्यीम् एङ्यीमाचे खलतएनो बेख्ले लब अत। 2 एङ्यीमा र्हुब तबे ग्लारी यारी म्हर्की च्यप् ओसेम् ज्यब ज्यबे गोइल येन्बे बरु म्ही ओसेम् ल्हो-ल्हो अज्यबे बोक्ट येन् येन्बे प्रङ्न म्हीएनो खबतेङ्, 3 एचे हुजु बरु म्हीत स्य्हेस लज्यीम्, “ज्यबे ग्लारी जोरी स्य्हुगो” बी पङ्ब, ओसेम् हुजु प्रङ्नतमी, “ए हुजुरीनो रपो, की हुचुरी सरी टीउ” बी पङ्ब पङ्सम्, 4 एङ्यीमाचे र्हङ्न्हङ्रीनो बेख्ले ङोन्ज्यी अय्हीनो स्यीम्, ओसेम् अज्यबे तम् म्हेन्ज्यीम् न्याय स्य्हेङ्बे म्ही तज्यी अय्हीनो स्यीम्? 5 ङइ म्होइबे र्होमा, ङ्येनो, पर्मेस्वर्चे जम्बुलीङ्की प्रङ्नमात बीस्वास्री बरु तन लज्यीम् थेङ्की य्हुल्री हक् न्हङ्बरी दम्जेत्पल अय्हीनो स्यीम्? चु य्हुल् थेङ्त म्होइबलमात न्हङ्बरी पर्मेस्वर्चे बाचा स्हेङ्जेत्पल अय्हीनो स्यीम्? 6 तर एङ्यीमाचेम् प्रङ्नमात स्य्हेस अस्य्हेङ्। एङ्यीमात दुख पीन्ज्यीम् न्याय स्य्हेङ्बे म्हीमाज बरु म्हीमाचे बोर्बल अय्हीनो स्यीम्? 7 एङ्यीमाचे बीस्वास् स्य्हेङ्बे येसु ख्रीस्ट्की ज्यबे छेन्त नीन्द स्य्हेङ्बल थेङ्यीमानो अय्हीनो स्यीम्? 8 धर्म छ्ये:री यङ्बे, “र्हङ्की खीम्सेत र्हङ्त र्हङ्लेनो म्होइगो” पङ्बे पर्मेस्वर्की य्हुल्की नीयम्त एङ्यीमाचे ङ्येन्ज्यी पङ्सम् ज्यब स्य्हेङ्ब। 9 तर एङ्यीमाचे खल्त पङ्लेनो बेख्ले लज्यी पङ्सम् एङ्यीमाचे पाप स्य्हेङ्ब, ओसेम् नीयम् अङ्येन्बल तज्यीम् एङ्यीमा नीयम् ग्यम्सेनो दोसी ङोन्ब। 10 तलेपङ्सम् खल्चे पङ्लेनो पर्मेस्वर्की ल्हो-ल्हो जम्मनो नीयम्मा ङ्येन्ब तर गी अङ्येन्सम् थे जम्मनो नीयम्री दोसी तब। 11 तलेपङ्सम् “ब्यभीचार् थस्य्हेङो” बी सुङ्बलचेनो “म्ही थसेतो” बीएनो सुङ्बल य्हीन्ब। ब्यभीचार् अस्य्हेङ्लेनो म्ही सेत्ज्यी पङ्सम् जम्मनो पर्मेस्वर्की नीयम्त अङ्येन्बल तब। 12 होत्तज्यीम् एङ्यीमाचे तइ तम् पङ्लेनो ओसेम् त स्य्हेङ्लएनो ङ्य्हङ्मात पाप ग्यम्से फे:पीन्बे नीयम अनुसार न्याय यङ्बलमाल र्हङ्ब तथोब। 13 तलेपङ्सम् ल्हो-ल्होत कृपा अस्य्हेङ्बे म्हीमात पर्मेस्वर्चेएनो कृपा अलनले न्यय स्य्हेङ्जेत्प। तर कृपाचे न्ययत डाब। बीस्वासतेङ् लक् 14 ङइ बीस्वासी र्होमा, खल्चे पङ्लेएनो “ङतेङ् बीस्वास् मुब” पङ्ब, तर बीस्वासत लक्री अङोन्ज्यी पङ्सम् थेत ता ज्यब तब स्यीम्? थेइ बीस्वास्चे थेत थर्न लबो स्यीम्? 15 बीस्वासी अपकोल वुइ अमकोल खलइल पङ्लेनो डोनले येन्बे गोइल ओसेम् दीनइलनो योःबे चब अरेसम्, 16 ओसेम् एङ्यीमान्हङ्री खल्चे पङ्लेनो थेत, “पर्मेस्वर्चे एत मोलम् न्हङ्खइ, डोनले टीउ ओसेम् म्रेन्नले चउ” बी पङ्ब, तर थेत तोबे स्हे: तएनो अपीन्ज्यी पङ्सम् ता ज्यब तब स्यीम्? 17 चु र्हङ्लेनो बीस्वासएनो लक्री अम्रङ्ज्यी पङ्सम् हुजु बीस्वास् स्यीब। 18 तर डेत्चे पङ्ल, “एतेङ् बीस्वास् मुब, ङमी लक् स्य्हेङ्ब।” तर ङ थेत पङ्ब, “एइ लक् बीमइ बीस्वास् ङत ङोनो, ओसेम् ङमी लक् स्य्हेङ्ज्यीम् ङइ बीस्वास् ङोन्ब।” 19 एङ्यीमाचे पर्मेस्वर् गीकीनो मुब पङ्ज्यीम् बीस्वास् स्य्हेङ्ब अय्हीनो स्यीम्? हुजु एङ्यीमाकी लागीरी ज्यब य्हीन्ब। तर होतेबे बीस्वास्मी म्हङ्माचेएनो स्य्हेङ्ब, ओसेम् थेङ्यीमा लोङ्ज्यीम् दर्ब। 20 मुर्खमा, ज्यबे लक् अस्य्हेङ्बे बीस्वास् तइ लक्एनो अत बी पङ्बे तम्की प्रमान् एङ्यीमात तोबो स्यीम्? 21 ङ्य्हङ्की म्हेम्हे अब्रहामचे र्हङ्की ज इसहाकत ठाकी लागीरी बेदीरी थेन्बे लक् ग्यम्सेनो पर्मेस्वर्की ङ्होन्सङ् धर्मी तज्यी अय्हीनो स्यीम्? 22 अब्रहामकी बीस्वासतेङ् थेचे बीस्वास् अनुसार लक् स्य्हेङ्बल एङ्यीमाचे म्रङ्ब, ओसेम् थेचे स्य्हेङ्बे लक्चेनो थेइ बीस्वास् टोप तबल मुबल। 23 धर्म छ्ये:री, “अब्रहामचे पर्मेस्वर्त बीस्वास् स्य्हेङ्ज्यी, होत्तज्यीम् पर्मेस्वर्चे थेत धर्मी म्ही पङ्ज्यीम् ग्रहन् स्य्हेङ्जेत्ज्यी” बी ब्रीबे तम् टोप तज्यी, ओसेम् थेत पर्मेस्वर्की र्हो पङ्ज्यी। 24 एङ्यीमाचे म्रङ्ब की बीस्वास्चेकीनो अय्हीन्, बीस्वास् अनुसार स्य्हेङ्बे लक्चेनो म्हीत पर्मेस्वर्की ङोन्ग्यम् धर्मी ङोन्जेत्प। 25 होलेनो रहाब पङ्बे बेस्या अमकोल थेइ लक् ग्यम्से पर्मेस्वर्की ङ्होन्सङ् धर्मी तज्यी। थेचे इस्रएली जासुसीमात छुम्ज्यीम् सहर ग्यम्से भग्तीबरी ल्हो-ल्हो ग्यम्से पीत्ज्यीम् र्हो लबल मुबल। 26 ल्ही बुः ग्यम्से फे:बतेङ् स्यीब र्हङ्ले, बीस्वास् अनुसार लक् अस्य्हेङ्ज्यी पङ्सम् हुजु बीस्वास् स्यीब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.