याकुब 1 - पश्चिम तामाङ1 पर्मेस्वर्तेङ् प्रभु येसु ख्रीस्ट्की योक्पो ङ याकुबचे जम्बुलीङ्की ग्ला ग्लामारी छर्छुर् तज्यीम् टीबे पर्मेस्वर्की जम्मनो म्हीमात चु चीठी ब्रीटीब। एङ्यीमात लस्सो मुब। बीस्वास्तेङ् बुद्दी 2 बीस्वासी र्होमा, एङ्यीमात थोचे थोइ दुखमा खलेएनो य्हक्को तङो। 3 तलेपङ्सम् एङ्यीमाकी बीस्वास्की जाच ग्यम्से एङ्यीमाल नाब खम्बे सक्ती झेन् य्हक्को तब बी एङ्यीमाचे स्येःब। 4 एङ्यीमात अयोबतेङ् अख्युप्प अतखइ, झेन् आत्मीक्री च्यीप्ज्यीम् पुर्न म्ही तखइ पङ्ज्यीम् एङ्यीमाचे खतेबे दुखरी पङ्लेनो धैर्य स्य्हेङ्ब लोपो। 5 एङ्यीमान्हङ्री खल्त पङ्लेएनो बुद्दी तोःज्यी पङ्सम् बराअजेत्नले सेम् य्हङ्से न्हङ्जेत्पे पर्मेस्वर्त र्हीतो, ओसेम् एत हुजु न्हङ्स्ये मुब। 6 तर र्हीत्पे म्हीचे सङ्क अलनले बीस्वास् लज्यीम् र्हीत्थोःब। सङ्क लबे म्हीम् लाबचे य्होङ्बे समुन्द्रइ छाल् र्हङ्ब य्हीन्ब। 7 होतेबे म्हीचे प्रभु ग्यम्से तएनो यङ्ल बी म्हेन्अथो। 8 होतेबे म्हीचेम् सेम् ङ्य्ही थोःब ओसेम् थे जम्मनो तम्मारी स्थीर् अत। प्रङ्नतेङ् बरु 9 प्रङ्न बीस्वासीमा एङ्यीमा तङ्थोब। तलेपङ्सम् एङ्यीमात पर्मेस्वर्चे ङ्हच्छ्यङ् स्हेस न्हङ्बल मुब। 10 ओसेम् बरु बीस्वासीमा एङ्यीमा प्रङ्न तथोबतेङ्एनो तङ्थोब। तलेपङ्सम् बरु म्ही ङ्य्हुल्ज्यीम् य्हर्बे र्हीइ म्हेन्दो र्हङ्ब य्हीन्ब। 11 तलेपङ्सम् क्रोबे दीनी फ्याबतेङ् म्हेन्दोइ दोङ्बो ङ्य्हुल्ज्यीम् य्हर्ब, म्हेन्दो तइब ओसेम् थेइ ज्यबएनो नास् तब। होलेनो बरु म्हीचेएनो लक्री उन्ज्यीम् र्हङ्की जीवन् नास् तनलब। जाच्तेङ् परीक्षा 12 ओसेम् दुखमा खबे बेलोरी आर्ले नाज्यीम् टीबे म्हीमा पर्मेस्वर् ग्यम्से मोलम् यङ्बे म्हीमा य्हीन्ब। ओसेम् चोतेबे जाच्री डाबतेङ् पर्मेस्वर्चे थेङ्त म्होइबलमाकी लागीरी न्हङ्ब पङ्ज्यीम् बाचा स्य्हेङ्जेत्पे जीवन्की क्रेःकी थेङ्यीमाचे यङ्स्ये मुब। 13 ओसेम् परीक्षरी दोःबतेङ् खल्चेएनो, “ङत पर्मेस्वर्चे परीक्ष स्य्हेङ्जेत्ज्यी” बी पङ्ब अत। तलेपङ्सम् पर्मेस्वर्त दुस्ट लक्चे परीक्ष स्य्हेङ्अखम् ओसेम् थेङ्चे खेमेएनो दुस्ट लक् ग्यम्से परीक्षा स्हेङ्अजेत। 14 तर जम्मनो म्हीमा र्हङ्की अज्यबे सेम्की तम् ङ्येन्ज्यीम् परीक्षरी दोःब। 15 होत्तज्यीम् र्हङ्की अज्यबे सेम्चे लज्यीम् पाप स्य्हेङ्ब, ओसेम् थेचे पाप स्य्हेङ्स्यीनो टीबल तज्यीम् थे स्यीब। 16 ङइ म्होइबे बीस्वासी र्होमा, एङ्यीमाचे र्हङ्चे र्हङ्त धोक थपीनो। 17 जम्मनो ज्यबतेङ् सीद्द के:कमा, मुइ य्हल्मा स्य्हेङ्जेत्पे पर्मेस्वर् ग्यम्से युब। ओसेम् ब्ल पोटीब र्हङ्ले थेङ् खेमेनो पोअजेत्। 18 थेङ्चे स्य्हेङ्जेत्पे जम्मा स्हेमान्हङ्री ङ्य्हङ्मा गोदोब्न्हङ् ङोन्ग्यम् तखइ पङ्ज्यीम् थेङ्चेनो र्हङ्की थु: अनुसार देमेन्की फ्रोइ ग्यम्से ङ्य्हङ्त छार् जीवन् न्हङ्जेत्ज्यी। ङ्येन्बतेङ् स्य्हेङ्ब 19 ङइ म्होइबे बीस्वासी र्होमा, चु तम् गोउ एङ्यीमा जम्मचेनो ग्योनले ङ्येन्बे सेम् थो:थोप, सेम्री अम्हेन्नले तम् थथोलो, ओसेम् ग्योने बोमो थरपो। 20 तलेपङ्सम् म्हीइ बोमोचे पर्मेस्वर्त सेम्री ङ्यीबे धार्मीक् लक् अस्य्हेङ्। 21 होत्तज्यीम् एङ्यीमाचे स्य्हेङ्बे जम्मनो दुस्ट तम्मातेङ् एङ्यीमाचे स्य्हेङ्बे दुस्ट लक्मा ख्लाथोब, ओसेम् पर्मेस्वर्चे एङ्यीमाइ सेम्री थेन्जेत्पे फ्रोइत नम्र तज्यीम् स्वीकार स्य्हेङो, तलेपङ्सम् हुजु फ्रोइचेनो एङ्यीमा थर्ब खम्ब। 22 तर पर्मेस्वर्की फ्रोइ अनुसार ब्रउ, फ्रोइ ङ्येन्कीनो ङ्येन्ज्यीम् र्हङ्चे र्हङ्त धोक थपीनो। 23 तलेपङ्सम् फ्रोइ थ्येःज्यीमएनो फ्रोइ अनुसार अब्रबे म्हीम् दर्बन्री र्हङ्की ली च्याबे म्ही र्हङ्ब य्हीन्ब। 24 थेचे दर्बन् च्यागदे र्हङ्की ली म्रङ्ब, ओसेम् दर्बन् च्याब पीत्प साच्चेम् र्हङ्की ली खतेब मुबल बी म्लेत्प। 25 तर एङ्यीमाचेम् म्हीमात पाप ग्यम्से फे:पीन्बे सीद्द नीयम्त ज्यनले ङ्येन्ज्यीम् एङ्यीमाचे थ्येःबे हुजु नीयम्त म्लेत्प अय्हीन्, तर नीयम अनुसार ब्रसम् पर्मेस्वर्चे एङ्यीमात मोलम् न्हङ्जेत्स्ये मुब। 26 एङ्यीमान्हङ्री खल्चे पङ्लेनो र्हङ्त धर्मी म्हेन्ब तर र्हङ्की लेत अदुल्ज्यी पङ्सम् थेचे र्हङ्चे र्हङ्त धोक पीन्ब, ओसेम् थेइ धर्म लक् अत। 27 पर्मेस्वर् अपत सेम्री ङ्यीबे चोखोतेङ् पबीत्र धर्ममी दुख यङ्बे र्हेम्बो स्यीबे अमकोलमा ओसेम् दुख यङ्बे व्हङ्स्य कोलमात स्य्हप्तो स्य्हेङ्ब ओसेम् जम्बुलीङ्की अज्यबे लक्मा ग्यम्से फे:ज्यीम् टीब य्हीन्ब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.