हीब्रु 9 - पश्चिम तामाङजम्बुलीङ्तेङ् स्वर्गरी तेन्ब 1 ङोन्ग्यम्की करार्री पर्मेस्वर्चे इस्राएलीमात थेङ्त तेन्बे बारेरी नीयम्मा न्हङ्जेत्ज्यी। ओसेम् म्हीमाचे स्य्हेङ्बे पबीत्र ग्लाएनो जम्बुलीङ्री मुबल। 2 हुजुरी गुङ्री पर्दचे फेःज्यीम् कोठ ङ्य्ही तबे पर्मेस्वर्की ज्यीद दीम् गीः स्य्हेङ्बल मुबल, ओसेम् हुजु पर्दइ ङोन्ग्यम्की कोठन्हङ् साम्दान्तेङ् पर्मेस्वर्त पीन्बे गेङ्मा थेन्बे टेबल मुबल। हुजु कोठत पबीत्र ग्ला पङ्ब मुबल। 3 हुजु पर्दइ ग्यब्की कोठत गोदोब्न्हङ्की पबीत्र ग्ला पङ्ब मुबल। 4 गोदोब्न्हङ्की पबीत्र ग्लारी सङ्स्यु म्रबे म्हर्की बेदी गी मुबल, ओसेम् हुजु गोदोब्न्हङ्की पबीत्र ग्लारी म्हर्की जलप् युबे करार्की डोम् मुबल। हुजु डोम्न्हङ् मन्न थेन्बे म्हर्की तङ्लो, हारुन्की बुर्लो बुबे बेर्क ओसेम् आज्ञामा ब्रीबे युङ्बइ फलेक् ङ्य्ही मुबल। 5 पर्मेस्वर् हुजुरी मुब पङ्ज्यीम् ङोन्बरी हुजु डोम्की जोरी ब्यप् मुबे करुब् पङ्बे स्वर्गदुत् ङ्ही मुबल, हुजु ङ्य्हीकी ब्यप् पाप क्षमा स्य्हेङ्बे ग्लाकी जोसम्म दोःबल मुबल। तर देरेम् चु जम्मनो तम्मा गीः गीः लज्यीम् स्येत्स्ये अरे। 6 चोले जम्मनो स्य्हेमा ज्यनले डीःनलबल मुबल। ओसेम् लम्बुमा र्हङ्चे स्य्हेङ्थोःबे लक्मा स्य्हेङ्बरी दीनइलनो पर्दइ ङोन्ग्यम्की कोठरी ङ्यीब मुबल। 7 तर पर्दइ ग्यप्की गोदोब्न्हङ्की पबीत्र ग्लारीमी गोदोब्न्हङ्की ङ्हच्छ्यङ् लम्बु बर्सल तीख्यप्कीनो ङ्यीम्यङ्ब मुबल। थेचे का अबोर्नले हुजु गोदोब्न्हङ्की पबीत्र ग्लारी वङ्नोअम्यङ्ब मुबल। थेचे हुजु का र्हङ्चे स्य्हेङ्बे पाप्की लागीरी ओसेम् म्हीमाचे अस्येःन स्य्हेङ्बे पाप्की लागीरी पीन्ब मुबल। 8 पर्मेस्वर्की ज्यीद दीम् मुगदे सम्म पर्मेस्वर्की गोदोब्न्हङ्की पबीत्र ग्लारी ङ्यीबे म्रप ठोङ्जेत्पल अरे पङबे तम् पबीत्र आत्माचे चु जम्मनो तम्मा ग्यम्से ङोन्जेत्प। 9 चुमी देरेइ बेलोत ङोन्बे नमुन य्हीन्ब। पर्मेस्वर्त पीन्बे भेटीतेङ् ठाचे पर्मेस्वर्त तेन्बे म्हीइ बीबेक्त सुद्द स्य्हेङ्ब आखम् पङ्ज्यीम् चुजे ङोन्ब। 10 हुजुमामी चब थुङ्बतेङ् थोचे थोइ चोखइतीबे नीयम्माकीनो य्हीन्ब। हुजुमामी पर्मेस्वर्की छार् नीयम् अखगदेसम्मइ लागीरीकीनो स्य्हेङ्बे ल्हीःकी नीयम्माकीनो य्हीन्ब। 11 तर ख्रीस्ट्मी देरे चुरी मुबे जम्मनो ज्यबे तम्माकी गोदोब्न्हङ्की ङ्हच्छ्यङ् लम्बु तज्यीम् ब्योन्खज्यीन्बल मुब। थेङ् पर्मेस्वर्की झेन्नो ङ्हच्छ्यङ्तेङ् सीद्द ज्यीद दीम्री स्येःजेत्ज्यी। हुजु दीम् म्हीइ याचे स्य्हेङ्बल अय्हीन्, ओसेम् पर्मेस्वर्चे स्य्हेङ्जेत्पे चु जम्बुलीङ्की स्हेएनो अय्हीन्। 12 थेङ्चे बोकमातेङ् ग्लब् य्हरुमाइ का नोम्अजेत्, तर र्हङ्की का नोम्ज्यीम् गोदोब्न्हङ्की पबीत्र ग्लारी खेमपङ्लेनोइ लागीरी तीक्ख्यप्कीनो वङ्जेत्ज्यी, ओसेम् चोले ङ्य्हङ्मात खेम पङ्लेनोइ लागीरी टीबे मुक्ती न्हङ्जेत्ज्यी। 13 बोकमातेङ् ग्लब् साडेमाकी का ओसेम् म्हे य्हर्मोत ख्रङ्ज्यीम् डोङ्बे मेफ्र थेङ्यीमाकी पेठीम् अनुसार् असुद्द तबे म्हीमाकी जोरी साबतेङ् थेङ्यीमा ल्हीःरी सुद्द तब। 14 तर ख्रीस्ट्की कारी ङ्य्हङ्मात सुद्द तनलबे झेन् य्हक्को ङ्हच्छ्यङ् सक्ती मुब। खेमपङ्लेनो तस्यीनो टीजेत्पे पर्मेस्वर्की आत्मा ग्यम्से सीद्द ठा रुप्री ख्रीस्ट्चे र्हङ्तनो पर्मेस्वर्त सोप्तीजेत्ज्यी। होले पङ्सम् ङ्य्हङ्माचे सोम्बो पर्मेस्वर्की सेव स्य्हेङ्ब खम्खइ पङ्ज्यीम् ख्रीस्ट्की काचे लक् अतबे पेठीम् ग्यम्से ङ्य्हङ्माकी बीबेक्त झेन् य्हक्को सुद्द तनलब खम्ब। 15 होत्तज्यीम् पर्मेस्वर्चे बाचा स्य्हेङ्जेत्पे खेम पङ्लेनो तबे मोलम्मा थेङ्चे ङ्होत्जेत्पलमाचे यङ्खइ पङ्ज्यीम् ख्रीस्ट्चे चु छार् करार् नोम्खजेत्पल य्हीन्ब। ङोन्ग्यम्की करार्की बेलोरी म्हीमाचे स्य्हेङ्बे पाप्मा ग्यम्से फेःपीन्जेत्पे लागीरी ख्रीस्ट् स्यीपीन्जेत्पल मुब। 16 तलेपङ्सम् म्हीमाचे स्यीज्यीम् लीक्यम् र्हङ्की सम्पती खलत पीन्बे सेम् मुब पङ्ज्यीम् स्योस्यो ब्रीथेन्ब, हुजु स्योस्यो अनुसार तबे लागीरी स्योस्यो ब्रीबे म्ही स्यीबल तथोब। 17 र्हङ्की सम्पती खलत पीन्बे सेम् मुब पङ्ज्यीम् स्योस्यो ब्रीबे म्ही सोगदे सम्म हुजु स्योस्यो अनुसार अत। तलेपङ्सम् हुजु स्योस्यो ब्रीबे म्ही स्यीन्ज्यीन्ब बीसेम्कीनो हुजु स्योस्यो अनुसार् तब। 18 होत्तज्यीम् ङोन्ग्यम् स्य्हेङ्जेत्पे करार्एनो काचेनो पक्का स्य्हेङ्बल मुबल। 19 पर्मेस्वर्की नीयम्री ब्रीबे जम्मनो तम्मा मोसाचे म्हीमात स्येत्प बीसेम् यीरी ग्लब् य्हरुमातेङ् बोकमाइ का दोङ्ज्यीम् हीसप् पङ्बे दोङ्बोइ य्हर्ङमातेङ् वल पइ ब्लुम्ज्यीम् धर्मछ्येतेङ् जम्मनो म्हीमाइ जोरी फ्रोक्ज्यी। 20 ओसेम् मोसाचे चोले पङ्ज्यी, “पर्मेस्वर्चे एङ्यीमात ङ्येनो पङ्ज्यीम् कुल्जेत्पे करार्की का चुनो य्हीन्ब।” 21 चोले थेचे पर्मेस्वर्की ज्यीद दीम्री ओसेम् पर्मेस्वर्त तेन्बरी कोल्बे जम्मनो स्य्हेमारी का फ्रोक्ज्यी। 22 देमेन्नो मोसाचे ब्रीबे पर्मेस्वर्की नीयम्चे पङ्ब र्हङ्लेनो काचे य्हक्को र्हङ्ब स्य्हेमात सुद्द स्य्हेङ्ब, ओसेम् का य्हर्नअलगदे पाप्की क्षमा तबनो अखम्। ख्रीस्ट्की काचे पाप् ख्रुब 23 स्वर्गइ स्हेःमाकी नक्कल् स्हेःमात सुद्द स्य्हेङ्बरी चु सेम्ज्येन्की का तोःज्यी पङ्सम् स्वर्गइ स्हेःमात सुद्द स्य्हेङ्बरीमी झेन् य्हक्को ज्यबे ठा तोःब मुबल। 24 ख्रीस्ट्मी म्हीचे स्य्हेङ्बे पबीत्र ग्लारी वङ्अजेत्, हुजुमी स्वर्गरी मुबे देमेन्की ग्लाकी नक्कल्कीनो मुबल, तर थेङ्मी स्वर्गरीनो स्येःजेत्ज्यी, ओसेम् ङ्य्हङ्माकी लागीरी तम् थेन्बरी पर्मेस्वर्की ङोन्री स्य्हुजेत्पल मुब। 25 गोदोब्न्हङ्की ङ्हच्छ्यङ् लम्बुचेम् सेम्ज्येन्की काकी ठा बोर्ज्यीम् बर्सलनो तीख्यप् गोदोब्न्हङ्की पबीत्र ग्लारी वङ्ब। तर ख्रीस्ट्मी र्हङ्नो ठा तबरी य्हक्को ख्यप्नो स्वर्गरी स्येःअजेत्। 26 थेङ् वर्सेलेनो र्हङ्नो ठा तबरी ङ्यीथोःबल य्हीन्सम् जम्बुलीङ् स्य्हेङ्ब य्हङ्सेनो थेङ्चे य्हक्को ख्यप् दुख नाथोःस्ये मुबल। तर चु ज्युकी बेलोरी ख्रीस्ट् खेम पङ्लेनोइ लागीरी तीख्यप्कीनो ब्योन्युजेत्ज्यी, ओसेम् म्हीमाकी पाप्त ख्रुबरी र्हङ्नो ठा तपीन्जेत्ज्यी। 27 म्ही जम्मनो तीख्यप् स्यीनोथोब ओसेम् पर्मेस्वर् ग्यम्से थेइ न्याय तब। 28 होलेनो य्हक्को म्हीमाकी पाप् ख्रुबरी ख्रीस्ट्एनो तीख्यप् ठा तपीन्जेत्ज्यी। थेङ् दबेएनो म्रङ्खजेत्स्ये मुब। हुजु बेलोरीमी ख्रीस्ट् पाप् ख्रुबरी अय्हीन् तर थेङ्की ग्यम् च्याज्यीम् टीबलमात थर्नलबरी ब्योन्खजेत्स्ये मुब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.