हीब्रु 8 - पश्चिम तामाङयेसु ङ्य्हङ्माकी गोदोब्न्हङ्की ङ्हच्छ्यङ् लम्बु 1 ङ्यीमाचे पङ्बे मुल् तम्एनो चुनो य्हीन्ब, ङ्य्हङ्माल चोतेबे गोदोब्न्हङ्की ङ्हच्छ्यङ् लम्बु गीः मुब, थेङ् स्वर्गरी महीमीत् पर्मेस्वर्की ठीःकी केत् पट्टीचे स्य्हुजेत्पल मुब। 2 थेङ् गोदोब्न्हङ्की ङ्हच्छ्यङ् लम्बु तजेत्ज्यीम् स्वर्गइ गोदोब्न्हङ्की पबीत्र ग्लारी सेवा स्य्हेङ्जेत्प। हुजु गोदोब्न्हङ्की पबीत्र ग्ला म्हीचे स्य्हेङ्बल अय्हीन् तर प्रभुचेनो स्य्हेङ्जेत्पल य्हीन्ब। 3 जम्मनो गोदोब्न्हङ्की ङ्हच्छ्यङ् लम्बु भेटीतेङ् ठा पीन्बरी दम्बल तब। होत्तज्यीम् ङ्य्हङ्की गोदोब्न्हङ्की ङ्हच्छ्यङ् लम्बुतेङ्एनो पर्मेस्वर्त पीन्बे स्हेः ता पङ्लेनो मुनोथोःब। 4 थेङ् चु जम्बुलीङ्रीनो मुबल य्हीन्सम्मी थेङ् लम्बु तजेत्स्ये अरेबल, तलेपङ्सम् मोसाचे ब्रीबे नीयम् अनुसार् भेटी पीन्बे लम्बुमामी मुनोमुब। 5 थेङ्यीमाचे लक्मा स्य्हेङ्बे ग्लामी स्वर्गइ देमेन्की पबीत्र ग्लाकी नक्कलतेङ् ब्लकीनो य्हीन्ब। तलेपङ्सम् मोसातएनो पर्मेस्वर्की ज्यीद दीम् स्य्हेङ्ब म्हइबे बेलोरी पर्मेस्वर्चे थेत चोले कुल्जेत्पल मुबल, “एत ङचे गङ्री ङोन्बे नमुन अनुसार् एचे जम्मनो स्य्हेङो।” 6 तर पर्मेस्वर्चे येसुत न्हङ्जेत्पे लम्बुइ लक् हुजु ल्हो-ल्हो गोदोब्न्हङ्की ङ्हच्छ्यङ् लम्बुमाकी लक् बीम् य्हक्को ङ्हच्छ्यङ् मुब। होलेनो पर्मेस्वर्तेङ् थेङ्की म्हीमाकी गुङ्री येसुचे खीःजेत्पे छार् करार्एनो ङोन्ग्यम् स्य्हेङ्जेत्पे पुरानो करार् बीम ङ्हच्छ्यङ् य्हीन्ब, तलेपङ्सम् चु करार्री झेन् ज्यबे तम्माकी बाचामा मुब। 7 तलेपङ्सम् ङोन्ग्यम्की करार् दोस् अरेबल तबल य्हीन्सम् लीक्यम्की करार् अतोस्येल। 8 तर पर्मेस्वर्चे र्हङ्की म्हीमाकी दोस् यङ्जेत्ज्यीम् सुङ्ज्यी, “परमप्रभुचे सुङ्जेत्प, हुजु दीन्मा खटीब मुब, इस्राएलकी म्हीमातेङ् यहुदाकी म्हीमातेङ् ङ छार् करार् गीः खीःस्ये मुब। 9 चु करार् थेङ्यीमाकी म्हेम्हेमातेङ् खीःबल र्हङ्ब तस्ये अरे। हुजु बेलोरी ङचे थेङ्यीमाकी या चुङ्ज्यीम् मीस्र ग्यम्से तेत्ज्यीम् बबल मुबल। थेङ्यीमाचे ङइ करार् ङ्येन्ज्यीम् अब्र, होत्तज्यीम् ङचे थेङ्यीमाकी वास्त अस्य्हेङ्। 10 परमप्रभु सुङ्जेत्प, खस्येकी बेलोरी, ङ इस्राएलकी म्हीमातेङ् चु छार् करार् खीःस्ये मुब, थेङ्यीमाकी सेम्री ङइ नीयम् थेन्पीन्स्ये मुब, ओसेम् थेङ्यीमाकी सेम्री हुजु ब्रीपीन्स्ये मुब, ओसेम् ङ थेङ्यीमाकी पर्मेस्वर् तस्ये मुब, ओसेम् थेङ्यीमा ङइ म्हीमा तस्ये मुब। 11 ‘परमप्रभुत स्येःको’ पङ्ज्यीम् देरे य्हङ्से खल म्हीचेएनो र्हङ्की खीम्सेत वुइ र्हङ्की अज्यो-अलेमात लोप्थोःस्ये अरे। तलेपङ्सम् ज्यीद य्हङ्से ग्रेनसम्म जम्मचेनो ङत स्येःस्ये मुब। 12 थेङ्यीमाकी अपराधमा ङ क्षमा स्य्हेङ्स्ये मुब, ओसेम् थेङ्यीमाकी पाप्मा देबेएनो खेमेएनो व्हल् लस्ये अरे।” 13 चु करार्त “छार्” बी सुङ्जेत्पल तज्यीम्नो ङोन्ग्यम्की करार्त पुरानो तनलजेत्ज्यी। ओसेम् हुजु ङोन्ग्यम्की करार् बोक्ट तज्यीम् तइ अधीकार्एनो अरेनले ग्योनेनो म्हज्यीम् य्हर्स्ये मुब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.