हीब्रु 7 - पश्चिम तामाङल्हम्बु मल्कीसेदेक् 1 चु मल्कीसेदेक् सालेम सहर्की ग्यल्बो ओसेम् गोदोब्न्हङ्की ङ्हच्छ्यङ् पर्मेस्वर्की लम्बु मुबल। अब्राहाम् ग्यल्बो ब्लीतेङ् छेत्ज्यीम् डाज्यीम् दोःटीबे बेलोरी मल्कीसेदेकचे खतु तज्यीम् थेत मोलम् पीन्ज्यी। 2 अब्राहाम्चे मल्कीसेदेक्त ल्हो-ल्हो ग्यल्बोमा ग्यम्से बेन्बे जम्म थोइ बो च्यीइ बो गी पीन्ज्यी। मल्कीसेदेक पङ्बे मीन्की अर्थमी “धार्मीक्ताकी ग्यल्बो” य्हीन्ब ओसेम् थे सालेम्की ग्यल्बो तबल तज्यीम् थेत “सान्तीइ ग्यल्बोएनो” पङ्ब। 3 मल्कीसेदेक्की अप, अम, ओसेम् म्हेम्हेमा खलइ बारेरीएनो तेएनो ब्रीबल अरे। थे न्हबलतेङ् स्यीबे बारेरीएनो तेएनो ब्रीबल अरे। पर्मेस्वर्की ज र्हङ्ले थे खेम पङ्लेनोइ लागीरी लम्बु य्हीन्ब। 4 मल्कीसेदेक् गदे ङ्य्हच्छ्यङ् म्ही मुबल पङ्बे तम् स्येःजेतो! ङ्य्हङ्की म्हेम्हे अब्राहाम्चे थेत लडाइ ग्यम्से डाज्यीम् बबे स्हेःमाकी बो च्यीइ बो गी पीन्ज्यी। 5 लेबीइ सन्तान्की लम्बुमाचे र्हङ्की म्हीमा इस्राएलीमाकी कमइ ग्यम्से बो च्यीइ बो गी कीन्बरी मोसाचे ब्रीबे नीयम्चे कुल्बल मुबल। थेङ्यीमा जम्मनो अब्राहामकी सन्तान्मा य्हीन्लेनो लेबी लम्बुमाचे बो च्यीइ बो गी र्हङ्की म्हीमा ग्यम्से कीन्ब मुबल। 6 तर लम्बु मल्कीसेदेक्मी लेबीइ सन्तान् अय्हीन्ब मुबल। होलेतलेनो थेचे अब्राहाम् ग्यम्से बो च्यीइ बो गी कीन्ज्यी, ओसेम् पर्मेस्वर्की बाचा यङ्बे अब्राहाम्त मोलम् पीन्ज्यी। 7 ओसेम् ज्यीद म्हीचे ङ्हच्छ्यङ् म्ही ग्यम्से मोलम् यङ्ब पङ्बे तम् जम्मचेनो स्येःब। 8 स्यीज्यीम् य्हर्बे लम्बुमाचे म्हीमा ग्यम्से बो च्यीइ बो गी कीन्ब। तर मल्कीसेदेक् थेङ्यीमा बीम ङ्य्हच्छयङ् य्हीन्ब, तलेपङ्सम् धर्म छ्येचे थे खेम पङ्लेनो सोटीब बी पङ्ब। 9 ओसेम् चोलेएनो पङ्ब खम्ब, बो च्यीइ बो गी यङ्बे लेबीचेएनो अब्राहाम ग्यम्सेनो बो च्यीइ बो गी मल्कीसेदेक्त पीन्ज्यी। 10 तलेपङ्सम् अब्राहाम्चे मल्कीसेदेक्त खतु तबे बेलोरी लेबी र्हङ्की म्हेम्हे अब्राहामकी ल्हीन्हङ् मुबल। 11 इस्राएलीमाचे मोसाचे ब्रीबे नीयम् यङ्बल मुबल, हुजु नीयम्चे लेबीइ सन्तान्माचे लम्बुइ पद् यङ्बल मुबल बी पङ्ब। लेबी खलक्की लम्बुइ लक्चे जम्मनो तम् सीद्द तब अखम्ब मुबल, होत्तज्यीम् लम्बु लेबी वुइ हारुन्की सन्तान्की देब्री मल्कीसेदेक् र्हङ्बे ल्हो-ल्हो लम्बु तोःज्यी। 12 होत्तज्यीम् लम्बुइ पद् पोबतेङ् मोसाचे ब्रीबे नीयम्एनो पोनोथोःब। 13 ङ्य्हङ्माकी प्रभुइ बारेरी चु तम्मा पङ्बल मुब। थेङ्मी ल्हो-ल्हो खलक्ल य्हीन्ब, थेङ्की खलक्री खल्चेएनो खेमेएनो लम्बु तज्यीम् लक् स्य्हेङ्बल अरेबल। 14 तलेपङ्सम् जम्मचेनो स्येःबल मुब, ङ्य्हङ्की प्रभु यहुदाकी खलक्री न्हजेत्पल मुबल। यहुदाकी खलक् ग्यम्से लम्बु दम्बे बारेरी मोसाचे तएनो पङ्बल अरेबल। मल्कीसेदक र्हङ्बे ल्हो-ल्हो लम्बु गीः 15 ओसेम् मल्कीसेदेक् र्हङ्बे ल्हो-ल्हो लम्बु खज्यी पङ्सम् चु नीयम् पोबल मुब पङ्बे तम् ज्यनले गोब। 16 येसुमी लम्बु तबरी लेबीइ सन्तान् ग्यम्से तथोब पङ्बे नीयम् ग्यम्से अय्हीन्, तर खेमेएनो नास् अतबे जीवन्की सक्ती ग्यम्से लम्बु तजेत्पल मुब। 17 तलेपङ्सम् धर्म छ्येरी थेङ्की बारेरी चोले पङ्बल मुब, “मल्कीसेदेक् र्हङ्ले थेङ् खेम पङ्लेनोइ लागीरी लम्बु य्हीन्ब।” 18 तलेपङ्सम् हुजु ङोन्ग्यम्की नीयम्मी कम्जोर्तेङ् लक् अतबल तज्यीम् खारेज लबल मुब। 19 तलेपङ्सम् मोसाचे ब्रीबे नीयम्चे तेएनो सीद्द तनलब अखम्बल मुबल। तर देरेम् हुजु बीम झेन् ज्यबे आस् ङ्य्हङ्मात न्हङ्जेत्पल मुब, हुजुचे ङ्य्हङ्मात पर्मेस्वर्की ज्यदङ् बोर्ब। 20 पर्मेस्वर्चे सपथ सोल्ज्यीम् येसुत लम्बु स्य्हेङ्जेत्पल य्हीन्ब, तर लेबीइ सन्तन्मामी सपथ सोल्जेत्ज्यीम् लम्बु स्य्हेङ्जेत्पल अरेबल। 21 तर येसुमी सपथ ग्यम्सेनो लम्बु तजेत्ज्यी, ओसेम् थेङ्की बारेरी पर्मेस्वर्चे सुङ्जेत्ज्यी, “पर्मप्रभुचे सपथ सोल्जेत्पल मुब, ओसेम् थेङ्की सेम् पोजेत्स्ये अरे, ‘ए खेम पङ्लेनोइ लागीरी लम्बु य्हीन्ब।’” 22 हुजु सपथचे लज्यीम्, पुरानो करार् बीम छार् करार् ज्यब तस्ये मुब पङ्बे तम्की पक्का येसुनो य्हीन्ब। 23 ङोन्ग्यम् लम्बुमा य्हक्को मुबल, तलेपङ्सम् थेङ्यीमा स्यीज्यीम् य्हर्बल तज्यीम् थेङ्यीमाचे र्हङ्की लक् स्य्हेङ्स्यीनो टीअखम्। 24 तर येसुमी खेम पङ्लेनो सोजेत्स्यीनो टीबल तज्यीम् थेङ् खेम पङ्लेनोइ लागीरी लम्बु य्हीन्ब। 25 होत्तज्यीम् थेङ् ग्यम्से पर्मेस्वर्ज खबलमात थेङ्चे खेम पङ्लेनो थर्नलजेत्प खम्ब, तलेपङ्सम् थेङ्यीमाकी लागीरी पर्मेस्वर्तेङ् प्रार्थना स्य्हेङ्बरी थेङ् खेम पङ्लेनोइ लागीरी सोस्यीनो टीजेत्पल मुब। 26 ङ्य्हङ्मात तोःबे गोदोब्न्हङ्की ङ्हच्छ्यङ् लम्बुएनो येसुनो य्हीन्ब। थेङ् पबीत्र, दोस् अरेबल, सुद्द, पापीमा ग्यम्से फेःबल ओसेम् पर्मेस्वर्चे थेङ्त स्वर्गरी जम्मन्हङ्की ङ्हच्छ्यङ् स्य्हेसइ ग्लारी थेन्जेत्पल मुब। 27 ल्हो-ल्हो गोदोब्न्हङ्की ङ्हच्छ्यङ् लम्बुमाचे र्हङ्ले ङोन्ग्यम् र्हङ्की पाप्की लागीरी ओसेम् हुजु लीप्चे म्हीमाकी पाप्की लागीरी थेङ्चे दीनइलनो ठा पीन्जेत्टीअथो। थेङ्चे जम्मकी लागीरी खेम पङ्लेनो योःनले तीख्यप्रीनो र्हङ्नो ठा तपीन्जेत्ज्यी। 28 तलेपङ्सम् मोसाचे ब्रीबे नीयम्चे सीद्द अरेबे म्हीमात गोदोब्न्हङ्की ङ्हच्छ्यङ् लम्बु तबरी दम्ज्यी। तर मोसाचे ब्रीबे नीयम् बीम लीक्यम् पर्मेस्वर्चे सपथ सोल्जेत्ज्यीम् न्हङ्जेत्पे बाचाचे खेम पङ्लेनोइ लागीरी सीद्द स्य्हेङ्जेत्पे गोदोब्न्हङ्की ङ्हच्छ्यङ् लम्बुत दम्जेत्पल मुब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.