हीब्रु 6 - पश्चिम तामाङ1 होत्तज्यीम् ख्रीस्ट्की बारेरी सुरु सुरुरीनो लोप्ज्यीन्बे फ्रोइमाकीनो अलोप्नले ङ्य्हङ्मा बीस्वास्री छर्न लबे फ्रोइमा लोप्के। स्यीबरी दो:नलबे लक्मा ग्यम्से पस्चताप स्य्हेङ्बतेङ् पर्मेस्वर्री बीस्वास् स्य्हेङ्बे तम्मा दो:दोःज्यीम् लोप्टी अथो। 2 ओसेम् थोचे थोइ बप्तीस्माकी बारेरी, ल्होल्होमाकी जोरी या थेन्ज्यीम् प्रार्थना स्य्हेङ्बे बारेरी ओसेम् खेम पङ्लेनोइ लागीरी यङ्स्येकी सजायकी तम्माकी बारेरी देबेएनो लोप्टी अथो। 3 ओसेम् पर्मेस्वर्चे थुः लजेत्ज्यी पङ्सम् ङ्य्हङ्माचे बीस्वास्री छर्नलबे फ्रोइमा लोप्स्ये मुब। 4 तलेपङ्सम् तीख्यप् पर्मेस्वर्की य्हल् यङ्बलमा, स्वर्गइ बर्दान् यङ्बलमा, पबीत्र आत्मा यङ्बलमा, 5 ओसेम् पर्मेस्वर्की फ्रोइ गदे ज्यब बी स्येःबलमा, पर्मेस्वर्की खस्येकी बेलोइ सक्तीसाली लक्माएनो म्रङ्बलमा, 6 तज्यीमएनो बीस्वास् स्य्हेङ्ब पीत्ज्यीम् य्हर्ज्यी पङ्सम् थेङ्यीमात पस्चाताप् स्य्हेङ्न लज्यीम् पर्मेस्वर् पट्टी दोःज्यीम् बब अखम्। तलेपङ्सम् थेङ्यीमाचेम् पर्मेस्वर्की जत देबेएनो क्रुस्री च्योलाब ओसेम् जम्मइ ङोन्री थेङ्की बेइजत् लब। 7 खजु म्रङ्चे नम्की यी यङ्ब, हुजु म्रङ्री बाली जङ्बे म्हीमाचे ख्वज्यीम् बाली जङ्ब ओसेम् थेङ्यीमाकी लागीरी य्हक्को अन्न रोःब। हुजु म्रङ्त पर्मेस्वर्चे मोलम् न्हङ्जेत्प। 8 तर हुजु म्रङ्री पुजुतेङ् तारीएनो लक् अतबे म्रामाकीनो फीःज्यी पङ्सम् हुजु म्रङ् लक् अतबल तब। चोतेबे म्रङ्तमी पर्मेवर्चे ग्योनेनो केम्लङ् न्हङ्स्ये मुब ओसेम् मे ग्यम्से नास् तस्ये मुब। 9 म्होइबे र्होमा, ङ्यीमाचे चोले पङ्लेनो एङ्यीमाचेमी ज्यबे लक्मा स्य्हेङ्टीबल मुब पङ्बे तम्री ङ्यीमा पक्क मुब। एङ्यीमा मुक्ती यङ्बे म्हीमा य्हीन्ब बी हुजु लक्मा ग्यम्से ङोन्ब। 10 पर्मेस्वर्चे अन्याय स्य्हेङ्अजेत्, ओसेम् एङ्यीमाचे थेङ्की लागीरी स्य्हेङ्बे लक्तेङ् थेङ्की म्हीमात र्हो लज्यीम् थेङ्त ङोन्बे म्होइबत थेङ्चे म्लेत्अजेत्। ओसेम् देरेएनो एङ्यीमाचे होतेबे र्हो लबे लक् स्य्हेङ्स्यीनो टीबल मुब। 11 एङ्यीमा जम्मचेनो र्हङ्की जम्मनो आस् यङ्बे लागीरी अस्यीगदे सम्मनो होले जम्मतनो र्हो लबे जोस् ङोन्स्यीनो टीउ पङ्बे सेम् ङ्यीमाल मुब। 12 एङ्यीमा ब्लेगु थतउ, तर खेम पङ्लेनो बीस्वास् स्य्हेङ्स्यीनो टीज्यीम् पर्मेस्वर्चे न्हङ्ब बी बाचा स्य्हेङ्जेत्पे स्हेमा यङ्स्येलमा र्हङ्ब तउ पङ्बे सेम् ङ्यीमाल मुब। पर्मेस्वर्चे स्य्हेङ्जेत्पे बाचा 13 पर्मेस्वर्चे अब्राहामतेङ् बाचा स्य्हेङ्जेत्पे बेलोरी र्हङ् बीम ङ्हच्छ्यङ् ल्हो-ल्हो खलेएनो अरेबल तज्यीम् र्हङ्की छेन्रीनो चोले सपथ सोल्जेत्ज्यीम् थेङ्चे सुङ्जेत्ज्यी, 14 “ङ एत देमेन्लेनो मोलम् पीन्स्ये मुब, ओसेम् एइ ज जमेमात य्हक्को तनलस्ये मुब।” 15 होत्तज्यीम् अब्राहाम्चे धैर्य लज्यीम् ब्रेन्ज्यीम् टीज्यी, ओसेम् पर्मेस्वर्चे न्हङ्ब बी स्य्हेङ्जेत्पे बाचा थेचे यङ्ज्यी। 16 खल म्हीचे पङ्लेनो सपथ चबतेङ् र्हङ्चे पङ्बे तम् पक्क तखइ बी र्हङ् बीम ङ्हच्छ्यङ् म्हीइ मीन्री सपथ चब, ओसेम् हुजु सपथ ग्यम्सेनो तम्मा डीःनलब। 17 पर्मेस्वर्की बाचा यङ्स्येकी म्हीमात र्हङ्चे स्य्हेङ्जेत्पे बाचा खेमेएनो अपो बी ङोन्बे थुः थेङ्चे लजेत्ज्यी। होत्तज्यीम् थेङ्चे सपथ सोल्जेत्ज्यीम् हुजु बाचा पक्क स्य्हेङ्जेत्ज्यी। 18 पर्मेस्वर्चे बाचातेङ् सपथ न्हङ्जेत्ज्यी, हुजु ङ्य्हीनो खेमेएनो अपो, तलेपङ्सम् पर्मेस्वर्चे खेमेएनो भ्यु सुङ्अजेत्। होत्तज्यीम् ङ्य्हङ्मा सुरक्ष यङ्बरी थेङ्ज ङ्यीबलमाचे तइ तम् यङ्बरी आस् लज्यी हुजु आस् यङ्बरी ङ्हच्छ्यङ् आर् यङ्बल मुब। 19 चु आस् ङ्य्हङ्माकी आत्माइ लागीरी दोङ्गत ब्रअपुङ्नले चुङ्बे कोङ्बे फइकी कोक्त र्हङ्ब मुब। चु आसचे ङ्य्हङ्मात पर्द न्हङ्की पबीत्र ग्लारी दोनलब। 20 ङ्य्हङ्माकी लागीरी येसु हुजुरी ङय्हङ्मा बीम ङोन्नो स्येःज्यीम् स्य्हुजेत्टीब मुब। मल्कीसेदेक र्हङ्ले येसु खेमपङ्लेनोइ लागीरी गोदोब्न्हङ्की ङ्हच्छ्यङ् लम्बु तजेत्पल मुब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.