हीब्रु 5 - पश्चिम तामाङ1 ओसेम् जम्मनो गोदोब्न्हङ्की ङ्हच्छ्यङ् लम्बु म्हीमान्हङ्सेनो दम्ब, ओसेम् थेत म्हीमाकी पाप्माकी लागीरी पर्मेस्वर्त भेटीमातेङ् ठामा पीन्ज्यीम् सेवा स्य्हेङ्बरी दम्बल य्हीन्ब। 2 थेचे पर्मेस्वर्की ग्यम् अस्येःबतेङ् न्होर्बलमात ज्यबे ब्यबहार् स्य्हेङ्ब खम्ब, तलेपङ्सम् थे र्हङएनो कम्जोर् म्ही य्हीन्ब। 3 होत्तज्यीम् थेचे ल्हो-ल्हो म्हीमाकी पाप्माकी लागीरीकीनो अय्हीन्, तर र्हङ्की पाप्माकी लागीरीएनो ठा पीन्नोथोब। 4 खल्चेएनो र्हङ्नो गोदोब्न्हङ्की ङ्हच्छ्यङ् लम्बु तबे स्य्हेस कीन्ब अखम्, तर पर्मेस्वर्चे थेत हारुन्त र्हङ्ले ङ्होत्जेत्प। 5 होलेनो ख्रीस्ट्चेएनो गोदोब्न्हङ्की ङ्हच्छ्यङ् लम्बु तबे स्य्हेस र्हङ्चेनो कीन्अजेत्। तर पर्मेस्वर्चे थेङ्त चोले सुङ्जेत्ज्यी, “ए ङइ ज य्हीन्ब, तीङ्यी ङ एइ अप तबल मुब।” 6 ओसेम् ल्हो-ल्हो ग्लारीएनो पर्मेस्वर्चे सुङ्जेत्प, “मल्कीसेदेक र्हङ्ले, ए खेम पङ्लेनोइ लागीरी लम्बु य्हीन्ब।” 7 येसु चु जम्बुलीङ्री स्य्हुजेत्पे बेलोरी र्हङ्त स्यीब ग्यम्से थर्नलजेत्प खम्बे पर्मेस्वर्तेङ् बङ्ले क्रा-क्राज्यीम् मीचे मीख्ली तइज्यीम् फ्या लज्यीम् प्रार्थना स्य्हेङ्जेत्ज्यी। ओसेम् र्हङ्चे र्हङ्तनो सेम् य्हङ्सेनो सोप्तीजेत्पल तज्यीम् थेङ्की प्रार्थनात पर्मेस्वर्चे सेन्जेत्ज्यी। 8 थेङ् पर्मेस्वर्की ज तज्यीम्एनो र्हङ्चे नाबे दुख ग्यम्से पर्मेस्वर्चे कुल्जेत्पे अर्ती ङ्येन्ब लोप्जेत्ज्यी। 9 ओसेम् सीद्द तजेत्प बीसेम् थेङ्चे सुङ्बल ङ्येन्बमा जम्मइ लागीरी थेङ् खेम पङ्लेनो लागीरी मुक्तीइ म्रुः तजेत्ज्यी। 10 ओसेम् पर्मेस्वर्चेनो येसुत मल्कीसेदेक्त र्हङ्ले गोदोब्न्हङ्की ङ्हच्छ्यङ् लम्बु तबरी दम्जेत्ज्यी। बीस्वास्त अपीत्परी चेतावनी 11 चुइ बारेरी पङ्थोस्येकी तम्मा ङ्यीमाल य्हक्को मुब, तर एङ्यीमात गोनलबरी गारो मुब, तलेपङ्सम् एङ्यीमाचे गोबरी सेम् अल। 12 तलेपङ्सम् चु बेलो सम्ममी एङ्यीमाचेमी ल्हो-ल्होमात लोप्प खम्थोबल, तर दवम् सम्म एङ्यीमात पर्मेस्वर्की फ्रोइकी बारेरी सुरु-सुरुरी लोप्पे फ्रोइमाएनो ल्हो-ल्होमाचे लोप्पीन्थोब मुब। एङ्यीमा जम्मनो ङ्य्हे थुङ्बे कोलमा र्हङ्ब तबल मुब, होत्तज्यीम् एङ्यीमात कोङ्बे चबइ देब्री ङ्य्हे तोःब। 13 ङ्य्हेकीनो थुङ्ज्यीम् सोबे म्हीम् कोलनो य्हीन्ब, ओसेम् थेचे ज्यबतेङ् अज्यबइ ज्ञान् यङ्बल अत। 14 तर कोङ्बे चबमी छर्ज्यीन्बे म्हीइ लागीरी य्हीन्ब। थेचेम् ज्यबतेङ् अज्यब फेःब खम्बे तालीम् यङ्ज्यीन्बल तब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.