हीब्रु 3 - पश्चिम तामाङमोसा बीम येसु ङ्य्हच्छ्यङ् 1 होत्तज्यीम् पर्मेस्वर्चे ङ्होत्जेत्पे पबीत्र बीस्वासी र्होमा, ङ्य्हङ्माचे प्रेरीत्तेङ् गोदोब्न्हङ्की ङ्हच्छ्यङ् लम्बु पङ्ज्यीम् स्वीकार् लबे येसुइ बारेरी एङ्यीमाचे ज्यनले म्हेनो। 2 मोसा पर्मेस्वर्की जम्मनो म्हीमाइ गुङ्री लक् स्य्हेङ्बरी बीस्वासीलो तब र्हङ्ले, येसुएनो र्हङ्त पीत्युजेत्पे पर्मेस्वर्चे न्हङ्जेत्पे लक्मा स्य्हेङ्बरी बीस्वासीलो तजेत्पल मुबल। 3 दीम् बीमएनो दीम् स्य्हेङ्बे म्ही ङ्हच्छ्यङ् स्य्हेस यङ्बरी जेःब र्हङ्ले, मोसा बीम येसु य्हक्को ङ्हच्छ्यङ् स्य्हेस यङ्बरी जेःबल मुब। 4 तलेपङ्सम् जम्मनो दीम् खल पङ्लेनो म्हीचे स्य्हेङ्बल तब, तर जम्मनो स्हेःमा स्य्हेङ्जेत्पलमी पर्मेस्वर्नो य्हीन्ब। 5 मोसा पर्मेस्वर्की म्हीमाकी गुङ्री लक् स्य्हेङ्बरी बीस्वासीलो योक्पो तज्यी। ओसेम् मोसाचे स्य्हेङ्बे लक्चेनो पर्मेस्वर्की जम्मनो म्हीमात लीक्यम् पर्मेस्वर्चे स्य्हेङ्जेत्स्येकी लक्की बारेरी गबाही पीन्ज्यी। 6 तर ख्रीस्ट्मी पर्मेस्वर्की जम्मनो म्हीमाइ गुङ्री अधीकार् यङ्बे ज र्हङ्बे बीस्वासीलो मुब। ओसेम् ङ्य्हङ्माचे ख्रीस्ट्री थेन्बे ङ्य्हङ्माकी आस्री र्हङ्की आर्तेङ् भर् थेन्स्यीनो टीज्यी पङ्सम् ङ्य्हङ्मा पर्मेस्वर्की म्हीमा य्हीन्ब। पर्मेस्वर्की म्हीमाचे यङ्स्येकी दुःब न्हब 7 होत्तज्यीम् पबीत्र आत्माचे सुङ्जेत्प, “तीङ्यी एङ्यीमाचे पर्मेस्वर्की केत् ङ्येनो, 8 एङ्यीमाकी म्हेम्हेमाचे पर्मेस्वर्की बीरोद् स्य्हेङ्बे दीन्री र्हङ्ले एङ्यीमाचे र्हङ्की सेम्त कोङ्न थलउ। हुजु बेलोरी थेङ्यीमाचे उजाड-ग्लारी पर्मेस्वर्त छोत् च्याज्यी। 9 हुजुरी एङ्यीमाकी म्हेम्हेमाचे ल्हेःगोर् सोःम् स्यी ब्लीतीङ् सम्म ङचे स्य्हेङ्बे लक्मा म्रङ्ज्यीम्एनो, ङत य्हक्को ख्यप् छोत् च्याज्यी। 10 होत्तज्यीम् थेङ्यीमात म्रङ्ज्यीम् ङत बोमो रप्ज्यी, ओसेम् चोले पङ्ज्यी, ‘थेङ्यीमाकी सेम् खेमपङ्लेनो ङ ग्यम्से थारीङ् पीत्पल मुब, ओसेम् ङचे कुल्बे अर्तीमा थेङ्यीमाचे ङ्येन्ब पीत्पल मुब।’ 11 होत्तज्यीम् ङचे र्हङ्की बोमोरी चोले सपथ चज्यी, ‘थेङ्यीमा ङचे दुःब न्हपुङ्बे ग्लारी खेमेएनो वङ्म्यङ्स्ये अरे।’” 12 बीस्वासी र्होमा, होसीयार् तउ एङ्यीमान्हङ्री खलएनो दुस्टतेङ् बीस्वास् अलबे सेम् थोःज्यीम् सोम्बो पर्मेस्वर् ग्यम्से थारीङ् अय्हर्खइ। 13 तर खेमसम्म “तीङ्यीइ दीन्” पङ्बे तम् मुब, होदे सम्मनो गीःचे गीःत आर् पीनो। होले स्य्हेङ्सम् पाप्की छल्माचे एङ्यीमाकी सेम् कोङ्स्ये अरे। 14 ङ्य्हङ्माचे सुरुरी स्य्हेङ्बे बीस्वास्री ङ्य्हङ्मा सोगदे सम्मनो कोङ्ज्यीम् टीज्यी पङ्सम्, ङ्य्हङ्मा ख्रीस्ट्तेङ् बक्च्य हक् यङ्बल तस्ये मुब। 15 धर्म छ्येःचे पङ्ब, “तीङ्यी एङ्यीमाचे पर्मेस्वर्की केत् ङ्येनो, एङ्यीमाकी म्हेम्हेमाचे पर्मेस्वर्की बीरोद् स्य्हेङ्बे दीन्री र्हङ्ले एङ्यीमाचे र्हङ्की सेम्त कोङ्न थलउ।” 16 पर्मेस्वर्की केत् थेःज्यीम्एनो थेङ्की बीरोद् स्य्हेङ्बलमा खल मुबल? ता मोसाचे मीस्र य्हुल् ग्यम्से तेत्ज्यीम् बबे म्हीमानो अय्हीन् स्यीम्? 17 खल्तेङ् थेङ् ल्हेःगोर् सोम् स्यी ब्लीतीङ् बोमो लजेत्ज्यी? पाप् स्य्हेङ्ज्यीम् उजाड-ग्लारी स्यीज्यीम् य्हर्बलमातेङ्नो अय्हीन् स्यीम्? 18 पर्मेस्वर्चे कुल्जेत्पे अर्ती अङ्येन्बलमा थेङ्की दुःब न्हबे ग्लारी खेमेएनो वङ्म्यङ्स्ये अरे बी थेङ्चे सपथ सोल्जेत्पल मुबल अय्हीन् स्यीम्? 19 होत्तज्यीम् ङ्य्हङ्माचे म्रङ्ब, बीस्वास् अस्य्हेङ्बल तज्यीम्नो थेङ्यीमाचे थेङ्की दुःब न्हबे ग्लारी वङ्अम्यङ्। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.