हीब्रु 2 - पश्चिम तामाङमुक्तीत वास्त अलबे बारेरी चेतावनी 1 होत्तज्यीम् ङ्य्हङ्माचे ता थेःबल मुब हुजु तम्त झेन् य्हक्को ज्यनले सेम् य्हङ्सेनो ङ्येन्थोःब, अय्हीन् पङ्सम् ङ्य्हङ्मा हुजु तम् ग्यम्से थारीङ् य्हर्स्ये मुब। 2 तलेपङ्सम् स्वर्गदुत्मा ग्यम्से सुङ्जेत्पे पर्मेस्वर्की फ्रोइत म्हीमाचे ङ्येन्थोःब मुबल, ओसेम् पर्मेस्वर्चे हुजु फ्रोइत ङ्येन्ज्यीम् अब्रबलमातेङ् पाप् स्य्हेङ्बलमात थेङ्यीमाचे यङ्थोबे सजाय न्हङ्जेत्ज्यी। 3 होत्तज्यीम् ङ्य्हङ्माचे चोत्ते ङ्य्हच्छ्यङ् मुक्तीत वास्त अलज्यी पङ्सम् सजाय ग्यम्से ङ्य्हङ्मा खले स्योर्म्यङ्ल स्यीम्? चु मुक्तीइ बारेरी ङोन्ग्यम् प्रभु येसुचेनो सुङ्त्जेत्पल मुबल। ओसेम् प्रभु येसुचे सुङ्जेत्पे हुजु फ्रोइ थेःबलमाचे चु तम् देमेन् य्हीन्ब बी ङ्य्हङ्मात प्रमान् पीन्ज्यी। 4 ओसेम् पर्मेस्वर्चेएनो चीन्हमा ङोन्जेत्ज्यीम्, य्हक्को थोइ अचम्मइ लक्तेङ् सक्तीसाली लक्मा स्य्हेङ्जेत्ज्यीम्, ओसेम् र्हङ्की थुः अनुसार् पबीत्र आत्माइ बर्दान्मात जुपीन्जेत्ज्यीम् चु मुक्तीत देमेन् बी साक्षी न्हङ्जेत्ज्यी। येसुचेनो मुक्तीइ ग्यम्री नोम्जेत्प 5 ङ्य्हङ्माचे तम् लटीबे हुजु लीक्यम् खस्येकी जम्बुलीङ्त पर्मेस्वर्चे स्वर्गदुत्माकी अधीन्री थेन्जेत्पल अरे। 6 तर धर्म छ्येःइ ग्ला गीःरी चोले ब्रीबल मुब, “म्ही खल य्हीन्ब, ओसेम् थेङ्चे तले थेइ व्हल् स्य्हेङ्जेत्प? म्ही खल य्हीन्ब, ओसेम् थेङ्चे तले थेइ वास्त स्य्हेङ्जेत्प?” 7 “थेङ्चे थेत तोव बेलोइ लागीरीकीनो स्वर्गदुत्मा बीम चेक्पजकी ज्यीद तनलजेत्ज्यी। थेङ्चे थेत महीमातेङ् स्य्हेसइ क्रेःकी कुःपीन्जेत्ज्यी। 8 थेङ्चे जम्मनो स्हेःमात थेइ अधीन्री थेन्पीन्जेत्ज्यी।” ङ्य्हङ्माचे चुरी, “जम्मनो स्हेमात” बी ब्रीबल म्रङ्ब, चु पङ्बलमी पर्मेस्वर्चे म्हीइ अधीन्री अतनले तएनो थेन्अजेत्। तर देरेइ बेलोरी ङ्य्हङ्माचे जम्मनो स्हेमा म्हीइ अधीन्री तबल अम्रङ्। 9 तर य्हम्की लागीरी स्वर्गदुत्मा बीम ज्यीद तन लजेत्बे येसुत ङ्य्हङ्माचे म्रङब। ओसेम् पर्मेस्वर्की अनुग्रहचे लज्यीम् थेङ् जम्म म्हीमाकी लागीरी स्यीपीन्जेत्ज्यी। हुजु स्यीबे दुख नापीन्जेत्पल तज्यीम् पर्मेस्वर्चे थेङ्त महीमातेङ् स्य्हेसइ क्रेकी कुःपीन्जेत्ज्यी। 10 पर्मेस्वर्चे जम्मनो स्हेमा र्हङ्की लागीरी र्हङ् ग्यम्सेनो स्य्हेङ्जेत्पल मुबल। ओसेम् र्हङ्की य्हक्को ज जमेमात रहङ्की महीमारी नोम्खजेत्परी, थेङ्यीमात मुक्ती न्हङ्बे येसुत दुख नाबुङ्जेत्ज्यीम् सीद्द तनलबरी पर्मेस्वर्चे ज्यब म्हेन्जेत्ज्यी। 11 तलेपङ्सम् येसुतेङ् येसुचे पबीत्र तनलबलमा जम्मलनो अप गीःनो मुब। होत्तज्यीम् थेङ्यीमात अले-अङमा बी सुङ्बरी येसु पेत्अजेत्। 12 थेङ्चे पर्मेस्वर्त चोले सुङ्जेत्प, “ङ ङइ अले-अङमात थेङ्की बारेरी स्येत्स्ये मुब, थेङ्की य्हक्को म्हीमा र्हुब् तबे गुङ्री ङ थेङ्त तोप्स्ये मुब।” 13 ओसेम् थेङ्चे देबेएनो चोले सुङ्जेत्प, “ङ पर्मेस्वर्री ङइ भर् थेन्स्ये मुब।” ओसेम् थेङ्चे देबेएनो सुङ्जेत्प, “च्यागो, ङ पर्मेस्वर्चे ङत न्हङ्जेत्पे कोलमातेङ् मुब।” 14 तलेपङ्सम् कोलमाकी ल्हीः स्यतेङ् काल तबल तज्यीम् येसु र्हङएनो थेङ्यीमाल र्हङ्ले स्यतेङ् कालनो तजेत्ज्यी। स्यीबे सक्ती मुबे सैतान्त नास् स्य्हेङ्जेत्परी थेङ् र्हङ्नो स्यीजेत्ज्यी। 15 येसुचे चोले स्य्हेङ्जेत्ज्यीम् स्यीब पङ्ज्यीम् खेम पङ्लेनो लोङ्ज्यीम् हुजु लोङ्बइ बान र्हङ्ले टीबलमा जम्मत हुजु लोङ्ब ग्यम्से फेःपीन्जेत्ज्यी। 16 तलेपङ्सम् देमेन्नो थेङ् स्वर्गदुत्मात र्हो लबरी ब्योन्युजेत्पल अय्हीन्, तर अब्राहामकी सन्तान्मात र्हो लबरी ब्योन्युजेत्पल य्हीन्ब। 17 होत्तज्यीम् थेङ्एनो जम्मनो तम्री ङ्य्हङ्मा थेङ्की अले-अङमा र्हङ्बनो तपीन्थोःजेत्ज्यी, ओसेम् म्हीमाकी पाप क्षमा स्य्हेङ्बे लागीरी र्हङ्चे र्हङ्त ठाकी रुप्री सोप्तीपीन्जेत्ज्यी, ओसेम् पर्मेस्वर्की सेवारी थेङ् कृपालुतेङ् बीस्वासीलो गोदोब्न्हङ्की ङ्य्हच्छ्यङ् लम्बु तजेत्ज्यी। 18 थेङ् र्हङएनो परीक्षरी दोःजेत्ज्यीम् दुखमा नाजेत्ज्यी, होत्तज्यीम् देरेम् परीक्षरी दोःबलमात थेङ्चे र्हो लजेत्प खम्ब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.