हीब्रु 13 - पश्चिम तामाङखले परमेस्वरत तङ्न लब 1 गीःचे गीः त अज्यो अले अन अङत र्हङले म्होइस्यीनो टीउ। 2 डोम्बोमात क्योङ्ब थम्लेतो। चोले डोम्बो क्योङ्बे बेलोरी कोइ कोइ म्हीमाचेम् अस्येननो स्वर्गदुत्मात क्योङ्ब मुबल। 3 जेल्री मुबलमात एङयीमाचे र्हङएनो थेङ्यीमातेङ् बक्च्य जेल्री मुबल र्हङ्ब म्हेन्ज्यीम् व्हल् लउ। दु:ख यङ्बलमात एङ्यीमाचे र्हङ्चेनो दु:ख यङ्बल र्हङ्ले म्हेन्ज्यीम् र्हो लउ। 4 जम्मचेनो भ्यात स्य्हेस स्य्हेङ्थोब, म्रीङ्तेङ् र्हेम्बोइ सम्बन्ध गी:चे गीःतेङ् बीस्वासीलो तथोब। तलेपङ्सम् बेस्या स्य्हेङ्बलतेङ् ब्यभीचार स्य्हेङ्बलमात परमेस्वरचे सजाय न्हङ्जेत्स्ये मुब। 5 टङत लोभ लब ग्यम्से थारीङ् टीउ। र्हङतेङ ता मुज्यी हुजुरीनो सन्तोक तज्यीम् टीउ। तलेपङ्सम् परमेस्वरचे, “ङ एङ्यीमात खेमेएनो पीत्स्ये अरे, ङ एङ्यीमात खेमेएनो ख्लास्ये अरे” ब्यबस्था बी सुङ्बल मुब। 6 होत्तज्यीम् ङ्य्हङ्माचे ढुक्कले पङ्ब खम्ब, “प्रभुचेनो ङत र्हो लजेत्प। ङ खेमेएनो लोङ्स्ये अरे। म्हीचे ङत तएनो लअखम्।” 7 एङ्यीमात ङोन्ग्यम् परमेस्वरकी फ्रोइ लोप्पे अगुवामात व्हल् लउ। थेङ्यीमा सोम्बो मुबे बेलोरी खतेबे जीवन सोज्यी व्हल् लउ। एङ्यीमाचेएनो थेङ्यीमाचे स्य्हेङ्ब र्हङ्बे वीस्वास स्य्हेङो। 8 येसु ख्रीस्ट्मी तील, तीङी ओसेम् खेमपङलेनो गीःनो मुब। 9 भ्य्हुकी य्हक्को थोइ तम्मचे एङ्यीमात देमेन्की तम्म ग्यम्से थारीङ् अबोर्खइ। चब थुङ्बे नीयम्चे अय्हीन्, पर्मेस्वर्की अनुग्रह ग्यम्से एङ्यीमाकी सेम्त कोङ्न लब ज्यब य्हीन्ब। चब थुङ्बे नीयम् ङ्येन्बलमात हुजुचे तएनो फाइदा अस्य्हेङ्। 10 ङ्हङ्माल बेदी गी: मुब, यहुदीमाकी नीयम् अनुसार लक् स्य्हेङ्बे लम्बुमाचेम् ङ्हङ्माकी हुजु बेदी ग्यम्से चबे अधीकार् अरे। 11 इस्राएलीमाकी गोदोब्न्हङ्की ङ्हच्छ्यङ् लम्बुचे पाप्की लागीरी ठा पीन्बे सेम्ज्येन्की काः गोदोब्न्हङ्की ङ्हच्छ्यङ् पबीत्र ग्लारी बोर्ब। तर हुजु सेम्ज्येन्की ल्ही:मी टीबे ग्ला बीमम् फीर्च्योर् ख्रङ्ब। 12 होलेनो येसुचे र्हङ्की काःचे म्हीमात पाप् ग्यम्से पबीत्र स्य्हेङ्बरी थेङ् सहर् बीमम् फीर्च्योर् दुख नाजेत्ज्यीम् स्यीजेत्ज्यी। 13 होत्तज्यीम् ङ्य्हङ्मा सहर्की फीर्च्यो येसुइज ङ्यीइ, ओसेम् थेङ्चे र्हङ्ले ङ्य्हङ्माचेनो बेइजेत् नाके। 14 तलेपङ्सम् चु जम्बुलीङ्री ङ्य्हङ्माकी लागीरी खेम पङ्लेनोइ सहर् अरे। तर ङ्य्हङ्मामी लीप्चे यङ्स्येकी सहर् ब्रेन्ज्यीम् टीटीब। 15 होत्तज्यीम् ङ्य्हङ्माकी सुङ् ग्यम्से येसुइ छेन्री खेम पङ्लेनो पर्मेस्वर्त तोप्के। ङ्य्हङ्माचे थेङ्नो प्रभु य्हीन्ब पङ्ज्यीम् स्वीकार् लबनो ङ्य्हङ्माचे थेङ्त पीन्थोबे ठा य्हीन्ब। 16 गीःचे गीःत ज्यब स्य्हेङ्बतेङ् र्हो स्य्हेङ्ब थम्लेतो। चुमानो पर्मेस्वर् तङ्बे ठा:मा य्हीन्ब। 17 एङ्यीमाकी अगुवामाकी अर्ती ङ्येन्ज्यीम् थेङ्यीमाकी अधीन्री टीउ। तलेपङ्सम् थेङ्यीमाचे परमेस्वरत लेखा पीन्थोस्ये मुब पङ्बे तम स्येज्यीम् एङ्यीमाकी स्य्हप्तो स्य्हेङ्ब। एङ्यीमाचे थेङ्यीमाकी अर्ती ङ्येन्ज्यी पङ्सम् थेङ्यीमाचे चु लक् तङ्ज्यीम् स्य्हेङ्स्ये मुब, एङ्यीमाचे अङ्येन्ज्यी पङ्सम् दु:खी तज्यीम् स्य्हङ्स्ये मुब। एङ्यीमाचे थेङ्यीमात दुखी तन लज्यी पङ्सम् एङ्यीमात तइ फाइदाएनो अत। 18 ङ्यीमाकी लागीरी प्रार्थना स्य्हेङ्ब थपीतो। ङ्यीमात बीस्वास् मुब, ङ्यीमाकी बीबेक् चोखो मुब, तलेपङ्सम् ङ्यीमाचे खेम पङ्लेनो ज्यबे लक्कीनो स्य्हेङ्बे सेम् थोब। 19 ङ एङ्यीमात फ्या लब, परमेस्वरचे ङत ग्योन्नो एङ्यीमातेङ् देबेएनो खतु लबे मौक न्हङ्खइ बी प्रार्थना स्य्हेङ्पीनो। प्रार्थना 20 ङ्य्हङ्की प्रभु येसु ख्रीस्ट् ग्युमाकी ङ्य्हच्छ्यङ गोर्तेन्चे, र्हङ्की काः ग्यम्से खेमेएनो अबेबे करार् टोप् लजेत्ज्यी। परमेस्वरचे थेङ्त हुजु का: ग्यम्से सोन लजेत्ज्यी। देरेम् सान्ती न्हङ्बे परमेस्वरचे, 21 एङ्यीमात थेङ्की थुः टोप लब खमखइ पङ्ज्यीम् जम्मनो ज्यबे गुन्मा न्हङ्खइ। ओसेम् एङ्यीमाचे पर्मेस्वर्त सेम्री ङ्यीबे लक् स्य्हेङ्ब खम्खइ पङ्ज्यीम् येसु ख्रीस्ट्चे एङ्यीमाकी सेम्री लक् स्य्हेङ्जेत्खइ। येसु ख्रीस्ट्त महीमा खेम पङ्लेनो महीमा तटीखइ। आमेन्। 22 बीस्वासी र्होमा, ङ एङ्यीमात फ्यालब, एङ्यीमाचे ङइ अर्तीमा ज्यनले ङ्येनो तलेपङ्सम् ङचे तुन्जले ब्रीबल मुब। 23 ङ्य्हङ्की अले तीमोथी जेल्चे डोङ्बल मुब पङ्बे सम्तर् ङ एङ्यीमात स्येत्प। थे ग्योनेनो चुरी खसम् ङ एङ्यीमात खतु लबरी खबतेङ् थेतएनो बक्च्य बज्यीम् खस्ये मुब। 24 एङ्यीमाकी जम्मानो अगुवामातेङ् जम्मानो बीस्वासीमात लस्सो पङ्पीनो। इटालीयाकी बीस्वासीमाचेएनो एङ्यीमात लस्सो पीत्खबल मुब। 25 परमेस्वरकी अनुग्रह एङ्यीमा जम्मतेङ्नो तटीखइ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.