हीब्रु 12 - पश्चिम तामाङपर्मेस्वर् ङ्य्हङ्माकी अप 1 ङ्य्हङ्माकी कोरोरो चोत्ते य्हक्को दङबोइ साक्षीमा मुब। होत्तज्यीम् ङ्य्हङ्मात खबे जम्मनो बाधमातेङ् ङ्य्हङमात सजीलोलेनो उन्नलबे पाप्मात ख्लाके, ओसेम् ङ्य्हङ्माकी ङोन्री मुबे छ्योङ्थोबे ग्यम्री धैर्य लज्यीम् छ्योङ्के। 2 ङ्य्हङ्माकी बीस्वास् तीप्जेत्पतेङ् टोप् लजेत्पे येसुत च्यास्यीनो टीइ। क्रुस्की दुखचे लज्यीम् थेङ् ग्यप्चे सार्तीअजेत्, तर हुजुइ देब्री दुख नाब बीसेम् यङ्स्येकी तङ्बइ लागीरी म्हीमाचे क्रुस्री पेत्नलबे तम्त तएनो अय्हीन् बी म्हेन्जेत्ज्यी। देरेम् थेङ् पर्मेस्वर्की ठीःइ केत् फ्या पट्टी स्य्हुजेत्पल मुब। 3 येसुचे पापीमा ग्यम्से चोत्ते य्हक्को बीरोद्मा खले नाजेत्ज्यी पङ्बे तम्त म्हेनो ओसेम् एङ्यीमा दुःज्यीम् नीरास् थतउ। 4 एङ्यीमाचे पाप्की बीरोद्दरी छेत्थोःलेनो र्हङ्की बुःनो पीन्थोःबलमी अरे। 5 पर्मेस्वर्चे धर्म छ्येरी र्हङ्की जमात र्हङ्ले चोतेबे आर् पीन्बे फ्रोइ सुङ्बल ता एङ्यीमाचे म्लेत्ज्यी? “ङइ ज, पर्मेस्वर्चे एत दुल्जेत्पतेङ् एचे हुजुत ज्यनले ङ्येनो, थेङ्चे बराजेत्पतेङ् ए नीरास् थतउ, 6 तलेपङ्सम् खल्त परमप्रभुचे म्होइजेत्प थेतनो थेङ्चे दुल्जेत्प, ओसेम् थेङ्चे र्हङ्की कोल म्हेन्जेत्पलमा जम्मतनो थेङ्चे सजाय न्हङ्जेत्प।” 7 पर्मेस्वर्चे एङ्यीमात दुल्जेत्पतेङ् तबे दुख नाको। पर्मेस्वर्चे एङ्यीमात र्हङ्की कोलमात र्हङ्ले ब्यबहार् स्य्हेङ्जेत्प। तलेपङ्सम् अपचे अदुल्बे कोलमा खलएनो अरे। 8 पर्मेस्वर्चे र्हङ्की कोलमा जम्मतनो दुल्जेत्प, ओसेम् एङ्यीमात थेङ्चे दुल्जेत्पल अरेसम् एङ्यीमा थेङ्की कोलमा अय्हीन्, तर प्रो कोलमा य्हीन्ब। 9 चोदेकीनो अय्हीन्, ङ्य्हङ्माकी ल्हीःकी अपचे ङ्य्हङ्मात दुल्ज्यी, ओसेम् ङ्य्हङ्माचे थेङ्यीमात स्य्हेस लज्यी। होलेनो ङ्य्हङ्माचे खेम पङ्लेनोइ जीवन् यङ्बरी आत्मीक् अपइ अधीन्री झेन् य्हक्को टीथोब। 10 ङ्य्हङ्माकी ल्हीःकी अपमाचे थेङ्यीमाकी सेम्चे ज्यब म्हेन्ब अनुसार् ङ्य्हङ्मात तोव बेलो दुल्जेत्ज्यी, तर पर्मेस्वर् अपचे ङ्य्हङ्मात ज्यब तबे लागीरी ओसेम् थेङ् र्हङ्ले पबीत्र तब खम्खइ बी ङ्य्हङ्मात खेम पङ्लेनो दुल्जेत्प। 11 ङ्य्हङ्मात दुल्जेत्पे बेलोरी सुख बीम य्हक्को दुख तब। तर ङ्य्हङ्मा हुजु दुल्ब यङ्बलमाचे लीक्यम् धर्मी जीवन् सोब ओसेम् सान्तीइ जीवन् सोब। 12 होत्तज्यीम् एङ्यीमाकी ज्यीः अयुबे यातेङ् बङ् अरेबे पुइमात बङ्ज्येन् तनलउ। 13 एङ्यीमा ब्रबे ग्यम् तङ्-तङ् लउ, ओसेम् खोर कङ्मा अक्युत्खइ, तर फेन्खइ। अर्तीतेङ् चेतावनीमा 14 जम्मनो म्हीमातेङ् थुन्ज्यीम् टीबरी ओसेम् पबीत्र जीवन् सोबरी बङ् लउ, तलेपङ्सम् पबीत्र अतसम् खल्चेएनो प्रभुत म्रङ्ब खम्स्ये अरे। 15 चोङ्ले टीउ, खल्चेएनो पर्मेस्वर्की अनुग्रह अयङ्बल अतखइ। दुस्ट लक् एङ्यीमाकी गुङ्री कम्बे टा फीःब र्हङ्ले अफीःखइ, अय्हीन् पङ्सम् हुजुचे य्हक्को म्हीमात थीनलबे लक्तेङ् असुद्द तनलबे लक् स्य्हेङ्ब। 16 खलएनो बेस्या वुइ एसाव र्हङ्ले पर्मेस्वर्त अम्हइबे म्ही अतखइ, थेचेम् छाक् गीः चबइ लागीरी ज ग्रेन्चे यङ्बे र्हङ्की हक्तनो चुङ्बल मुबल। 17 एङ्यीमाचे स्येःबलनो मुब, लीक्यम् थेचे अप ग्यम्से मोलम् यङ्ब म्हइज्यी, तर अयङ्। होलेतलेनो थेचे क्रा-क्राज्यीम् हुजु मोलम् यङ्ब म्हइज्यी होले म्हइलेनो थेचे ङोन्ग्यम् चुङ्बे हक् यङ्ब अखम्। 18 एङ्यीमा छुब खम्बे सीनइ पङ्बे गङ्री इस्राएली म्हीमा खब र्हङ्ले खबल अरे, हुजुरीमी मेइ ल्हम् लुम्टीब मुबल, य्हक्को म्हुन्दुङ् मुबल, म्लङ् मुक्पचे गप्टीब मुबल, ओसेम् लाबलुङ् खटीब मुबल। 19 थेङ्यीमाचेम् बङ्ले र्हप्पे तुरहीकी केत् ओसेम् परमेस्वरकी ङ्हच्छ्यङ् केत् गीः थेःबल मुबल। चोतेबे केत् थेःज्यीम् थेङ्यीमाचे देरेम् दोःज्यीम् ल्हो-ल्हो केत् ङ्येन्अथोखइ पङ्ज्यीम् फ्या लबल मुबल। 20 तलेपङ्सम् “सेम्ज्येन्चेएनो हुजु गङ्त छुज्यी पङ्सम्, हुजुत युङ्बचे प्रुङ्ज्यीम् सेतो” पङ्ज्यीम् कुल्जेत्पे अर्तीत थेङ्यीमाचे नाप अखम्। 21 हुजुरी म्रङ्बे ङ्हच्छ्यङ् तम्मामी च्याबरी य्हक्को लोङ्बल मुबल। होत्तज्यीम् मोसाचेएनो “ङ लोङ्ज्यीम् स्य दर्टीब मुब” बी पङ्बल मुबल। 22 तर एङ्यीमामी सीयोन् गङ्, सोम्बो पर्मेस्वर्की सहर, स्वर्गइ यरुसलेम्री खबल मुब, ओसेम् ज्याज्यीम् ज्याब अखम्बे स्वर्गदुत्मा तङ्ज्यीम् र्हुब् तबे ग्लारी खबल मुब। 23 एङ्यीमा स्वर्गरी मीन् मुबे पर्मेस्वर्की ङोन्ग्यम् न्हबे ग्रेन्मा र्हुब् तबे ग्लारी खबल मुब। एङ्यीमा जम्मनो म्हीमाकी न्याय स्य्हेङ्जेत्पे पर्मेस्वर्ज दोखबल मुब, ओसेम् एङ्यीमा सीद्द तनलज्यीम् धार्मीक् म्हीमाकी आत्मामा मुबे ग्लारी दोखबल मुब। 24 एङ्यीमातेङ् पर्मेस्वर्की गुङ्री छार् करार् स्य्हेङ्जेत्पे येसु मुबे ग्लारी दोखबल मुब। ओसेम् एङ्यीमा न्याय र्हीत्पे हाबीलकी कारी अय्हीन्, हुजु बीमएनो ज्यबे तम् पाप्की लागीरी क्षमा र्हीत्पे येसुइ कारी दोखबल मुब। 25 चोङ्ले टीउ, एङ्यीमातेङ् फ्रोइ लजेत्टीबे पर्मेस्वर्त एङ्यीमाचे इन्कार् थलउ। तलेपङ्सम् जम्बुलीङ्की म्ही मोसा ग्यम्से पीन्बे पर्मेस्वर्की चेतावनीत इन्कार् स्य्हेङ्बलमा स्योर् अम्यङ् पङ्सम् झेन् स्वर्ग ग्यम्से फ्रोइ लजेत्पलत इन्कार् स्य्हेङ्सम् ङ्य्हङ्मामी झेन् खले स्योर्म्यङ्ल? 26 सीनइ गङ्री पर्मेस्वर्चे फ्रोइ लजेत्पे बेलोरी जम्मबुलीङ्नो य्होङ्बल मुबल। तर देरेम् थेङ्चे चोले बाचा लजेत्पल मुब, “ङ देबेएनो तीख्यप् जम्बुलीङ्त य्होङ्न लस्ये मुब, चु बेलोरी जम्बलीङ्तकीनो अय्हीन् तर स्वर्गतएनो य्होङ्न लस्ये मुब।” 27 “देरे तीख्यप्” पङ्बे तम्चे चु ङोन्ब, की पर्मेस्वर्चे स्य्हेङ्जेत्पे जम्मनो स्हेःमा य्होङ्स्ये मुब ओसेम् म्हस्ये मुब। होले पङ्सम् य्होङ्ब अखम्बे स्हेःमाकीनो टीस्ये मुब। 28 होत्तज्यीम् य्होङ्ब अखम्बे य्हुल् यङ्बल तज्यीम् ङ्य्हङ्माचे पर्मेस्वर्त व्होर्छ्ये पीन्गे। ओसेम् थेङ्त तङ्नलबरी स्य्हेस लज्यीम् थेङ्तेङ् लोङ्ज्यीम् थेङ्त तेन्के। 29 तलेपङ्सम् ङ्य्हङ्माकी पर्मेस्वर् नास् लबे मे र्हङ्ब मुब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.