हीब्रु 11 - पश्चिम तामाङबीस्वास् 1 देरेम् बीस्वास्मी ङ्य्हङ्माचे थेन्बे आस्की लागीरी ढुक्क तबतेङ् अम्रङ्बे तम्री पुरा भर् लब य्हीन्ब। 2 बीस्वास् ग्यम्सेनो दङ्बोइ म्हीमातेङ् पर्मेस्वर् तङ्जेत्ज्यी। 3 ओसेम् ङ्य्हङ्माचे बीस्वास् ग्यम्सेनो गोब की, पर्मेस्वर्चे जम्मनो स्हेमा र्हङ्की फ्रोइ ग्यम्से स्य्हेङ्जेत्ज्यी, ओसेम् देरे ङ्य्हङ्माकी मीःचे म्रङ्ब खम्बे स्हेमा मीःचे म्रङ्ब अखम्बे फ्रोइ ग्यम्सेनो स्य्हेङ्जेत्ज्यी। 4 बीस्वास् ग्यम्से हाबीलचे पर्मेस्वर्त कयीनचे बीम य्हक्को ज्यबे ठा पीन्ज्यी। बीस्वास् ग्यम्सेनो हाबील पर्मेस्वर्की ङोन्री धर्मी तज्यी, ओसेम् थेचे पीन्बे ठा पर्मेस्वर्त सेम्री ङ्यीज्यी। थे स्यीज्यीन्बल तलेएनो थेचे स्य्हेङ्बे बीस्वास् ग्यम्सेनो दवम् सम्मएनो ङ्य्हङ्मात लोप्टीबल मुब। 5 बीस्वास् ग्यम्सेनो हनोक अस्यीननो स्वर्गरी नोम्जेत्ज्यी, ओसेम् थे खनएनो यङ्ब अखम्, तलेपङ्सम् पर्मेस्वर्चे थेत नोम्जेत्पल मुबल। थेत नोम्जेत्प बीम ङोन्ग्यम् थेचे पर्मेस्वर्त तङ्नलबल मुबल पङ्बे तम् चु ग्यम्सेनो ङोन्बल मुब। 6 बीस्वास् अस्य्हेङ्नले खल्चेएनो पर्मेस्वर्त तङ्नलब अखम्। तलेपङ्सम् पर्मेस्वर्ज खबलमा खल्चे पङ्लेनो पर्मेस्वर् मुब ओसेम् थेङ्त म्हइबलमात थेङ्चे बक्सीस् न्हङ्जेत्प पङ्ज्यीम् बीस्वास् स्य्हेङ्नोथोःब। 7 बीस्वास् लज्यीम् नोआचे होदे बेलो सम्म अम्रङ्बे लीक्यम् तस्येकी तम्की बारेरी पर्मेस्वर् ग्यम्सेइ चेतावनीत ङ्येन्ज्यी। थेचे पर्मेस्वर्चे कुल्जेत्पे तम् ङ्येन्ज्यीम् र्हङ्की म्हेम्यमात थर्नलबरी ङ्हच्छ्यङ् दोङ्ग गीः स्य्हेङ्ज्यी। चोले थेइ बीस्वास्चे जम्बुलीङ्त दोसी ङोन्पीन्ज्यी, ओसेम् थेमी बीस्वास् ग्यम्से यङ्बे धार्मीक्ताकी हक् यङ्बे म्ही तज्यी। 8 बीस्वास् ग्यम्सेनो अब्राहाम्चे पर्मेस्वर्चे कुल्जेत्पे तम् ङ्येन्ज्यी। ओसेम् पर्मेस्वर्चे न्हङ्जेत्प बी बाचा स्य्हेङ्जेत्ज्यीम् ङ्यीउ बी कुल्जेत्पे य्हुल्री ङ्यीबरी थे डोङ्ज्यी। र्हङ् खन ङ्यीटीब बी अस्येःमेएनो थे र्हङ्की य्हुल् पीत्ज्यीम् य्हर्ज्यी। 9 बीस्वास् ग्यम्सेनो थे ल्हो-ल्हो य्हुल्की म्ही र्हङ्ले पर्मेस्वर्चे थेत बाचा लजेत्पे य्हुल्री पाल्मारी टीबल मुबल। होलेनो थेइ ज इसहाकतेङ् थेइ कोन् याकुब्चेएनो पाल्मारी टीबल मुबल। ओसेम् पर्मेस्वर्चे अब्राहाम्त र्हङ्बे बाचा थेङ्हीतएनो स्य्हेङ्जेत्पल मुबल। 10 तलेपङ्सम् अब्राहाम्चेम् खेम पङ्लेनो टीबे जग्री स्य्हेङ्बे सहर् गीःत ब्रेन्टीब मुबल। हुजु सहर्की योजना स्य्हेङ्जेत्पतेङ् हुजु सहर्त स्य्हेङ्जेत्पलमी पर्मेस्वर्नो य्हीन्ब। 11 बीस्वास् ग्यम्सेनो खेक्प तज्यीन्बे अब्राहाम् अप तब खम्ज्यी। साराएनो कोल तब अखम्बे ओसेम् खुयु तज्यीन्बे अमकोल मुबल। होलेतलेनो पर्मेस्वर्चे र्हङ्चे स्य्हेङ्जेत्पे बाचा टोप् लजेत्प बी अब्राहाम्चे बीस्वास् स्य्हेङ्ज्यी। 12 होत्तज्यीम् खेक्प तज्यीम् स्यीबे बेलो तबे म्ही गीः ग्यम्से मुरी मुबे सार्मातेङ् ग्येन्दीइ यरी मुबे बालुवामा गदे ज्याबनो अखम्ब सम्मइ सन्तान् तज्यी। 13 चु जम्मनो म्हीमा पर्मेस्वर्चे न्हङ्ब बी बाचा स्य्हेङ्जेत्पे स्हेमा अयङ्ननो बीस्वास्रीनो स्यीज्यी, तर पर्मेस्वर्चे न्हङ्ब बी बाचा स्य्हेङ्जेत्पे स्हेमात थारीङ् ग्यम्सेनो म्रङ्ज्यीम् थेङ्यीमाचे स्वागत स्य्हेङ्ज्यी। थेङ्यीमाचे र्हङ्त चु य्हुल्री ल्हो-ल्हो य्हुल्की म्हीमातेङ् र्होइ य्हुल्री य्हम्की लागीरी टीबे म्हीमा म्हेन्ज्यी। 14 चोतबे तम् पङ्बे म्हीमाचेमी थेङ्यीमा र्हङ्की य्हुल् गीः म्हइटीब पङ्बे तम् ङोन्ब। 15 थेङ्यीमाचे पीत्थेन्ज्यीम् खबे य्हुल्त व्हल् लस्यीनो टीबल य्हीन्सम्, थेङ्यीमा हुजु य्हुल्री दोःज्यीम् ङ्यीम्यङ्स्ये मुबल। 16 तर थेङ्यीमाचेम् चु बीमएनो ज्यबे स्वर्गइ य्हुल्त म्हइबल मुबल। होत्तज्यीम् पर्मेस्वर्चे थेङ्यीमाकी पर्मेस्वर् य्हीन्ब बी सुङ्बरी थेङ् पेत्अजेत्, तलेपङ्सम् थेङ्चे थेङ्यीमाकी लागीरी सहर् गीः टोप् लपीन्जेत्पल मुब। 17 पर्मेस्वर्चे अब्राहामकी जाच स्य्हेङ्जेत्पे बेलोरी बीस्वास् ग्यम्सेनो अब्राहामचे र्हङ्की ज इसहाक्त ठा पीन्बरी टोप् लज्यी। पर्मेस्वर् ग्यम्सेनो अब्रहामचे बाचा यङ्बल मुबल, तर अब्राहाम र्हङ्की गीःकीनो जत ठा पीन्बरी तयार् तज्यी। 18 पर्मेस्वर्चे थेत चोले सुङ्बल मुबल, “इसहाक् ग्यम्सेनो ङ एइ सन्तान् य्हक्को तन लस्ये मुब।” 19 पर्मेस्वर्चे म्हीमात स्यीब ग्यम्से सोनलजेत्प खम्ब पङ्बे तम्री अब्राहाम्चे बीस्वास् लज्यी, होले बीस्वास् स्य्हेङ्ज्यीम्नो, देमेन्नो थेचे इसहाकत स्यीब ग्यम्से सोबल र्हङ्ले देबेएनो यङ्ज्यी। 20 बीस्वास् ग्यम्सेनो इसहाकचे थेइ जमा याकुबतेङ् एसाबत लीक्यम् तस्येकी तम्माकी लागीरी मोलम् पीन्ज्यी। 21 बीस्वास् ग्यम्सेनो याकुबचे स्यीबे बेलोरी र्हङ्की बेर्कइ क्ररी कुःले गेज्यीम् पर्मेस्वर्त तेन्ज्यी, ओसेम् थेइ ज योसेफकी ज ङ्य्हीत मोलम् पीन्ज्यी। 22 बीस्वास् ग्यम्सेनो योसेफचे र्हङ् स्यीयम्बे बेलोरी इस्राएलीमाचे मीस्र य्हुल् पीत्स्येकी बारेरी पङ्बल मुबल। थेचे थेङ्यीमात मीस्र य्हुल् ग्यम्से डोङ्बे बेलोरी थेइ नख्रुत्तएनो बक्च्य बोरो बी कुल्बल मुबल। 23 बीस्वास् ग्यम्सेनो मोसाइ अप-अमचे मोसात न्हज्यीम् ल सोम् सम्म छुम्ज्यीम् थेन्ज्यी। र्हङ्की कोलत ज्यब म्रङ्ज्यीम् थेङ्यीमाचे ग्यल्बोइ हुकुम् अङ्येन्बरी अलोङ्। 24 छर्ब बीसेम् मोसाचे बीस्वास् ग्यम्सेनो ग्यल्बोइ जमेइ ज य्हीन्ब पङ्बरी अङ्येन्। 25 पाप्री य्हम्की सुख नाब बीमम् बरु पर्मेस्वर्की म्हीमातेङ् दुख नाब थेचे दम्ज्यी। 26 मीस्र य्हुल्की य्हक्को धन् सम्पत्ती बीमम् ख्रीस्ट्की लागीरी नीन्द नापनो ज्यब म्हेन्ज्यी, तलेपङ्सम् थेचे पर्मेस्वर्चे न्हङ्जेत्स्येकी ङ्हच्छ्यङ् बक्सीस् च्याटीब मुबल। 27 बीस्वास् ग्यम्सेनो ग्यल्बोइ बोमोतेङ् अलोङ्नले मोसाचे मीस्र य्हुल् पीत्थेन्ज्यी। तलेपङ्सम् मीःचे म्रङ्ब अखम्बे पर्मेस्वर्त थेचे म्रङ्बल र्हङ्ले थे ग्यब्चे अदोनले ङोन्जे य्हर्स्यीनो टीज्यी। 28 बीस्वास् ग्यम्सेनो मोसाचे इस्राएलकी म्हीमात नीस्तार् पर्ब म्हन्दीज्यीम् र्हङ् र्हङ्की म्रप्री काः स्यक्परी कुल्ज्यी। ज ग्रेन्मात सेत्परी खबे चवचे इस्राएलीमाकी ज ग्रेन्मात अछुखइ पङ्ज्यीम् थेचे चोले स्य्हेङ्बल मुबल। 29 बीस्वास् ग्यम्सेनो थेङ्यीमाचे खर्बे सरी र्हङ्ले ब्रज्यीम् लाल समुन्द्र तार्तीज्यी। तर म्रीस्र य्हुल्की म्हीमाएनो होलेनो समुन्द्र तार्तीब म्हइमम् थेङ्यीमा दीम्ज्यीम् स्यीज्यी। 30 बीस्वास् ग्यम्सेनो इस्राएलीमाचे ङ्यीस्रेत् सम्म यरीहोकी कऊरु कोर्मम् कऊरुनो फुप्ज्यी। 31 बीस्वास् ग्यम्सेनो बेस्या राहाब पर्मेस्वर्त अङ्येन्बे थेइ सहर्की म्हीमातेङ् बक्च्य स्यीअथो, तलेपङ्सम् थेचे जासुस् लबरी ङ्यीबे इस्राएलीमात ज्यनले स्वागत् स्य्हेङ्बल मुबल। 32 ल्हो-ल्हो य्हक्को तम् ङ ता पङ्ब? तलेपङ्सम् गीदोन, बाराक, सीम्सोन्, यीप्ताइ बारेरी, ओसेम् दाऊद, सामुएल ओसेम् अगम्बक्तमाकी बारेरी पङ्बरी ङतेङ् बेलो अरे। 33 बीस्वास् ग्यम्सेनो थेङ्यीमाचे य्हुल्मात डाज्यी ओसेम् न्याय लज्यीम् राज्य स्य्हेङ्ज्यी, पर्मेस्वर्चे बाचा स्य्हेङ्जेत्पे स्हेमा यङ्ज्यी, तमाकी सुङ्मा म्रुपीन्ज्यी, 34 मेइ ल्हम्मात सेत्ज्यी, तरवार्की स ग्यम्से स्योर्ज्यी, कम्जोर् ग्यम्से बङ्ज्येन् तज्यी, लडाइरी आर् लज्यीम् छेत्ज्यी ओसेम् ल्हो-ल्हो य्हुल्माकी सत्तुर्मातेङ् डाज्यी। 35 ओसेम् बीस्वास् ग्यम्सेनो अममाचे र्हङ्की स्यीज्यीन्बे म्हीमात सोम्बो यङ्ज्यी। तर ल्हो-ल्होमाचेम् पर्मेस्वर्त अस्वीकार लज्यीम् स्वतन्त्र तब बीमएनो स्यीज्यीम् लीक्यम् झेन् य्हक्को ज्यबे जीवन् यङ्बे आस्री दुख नाज्यीम् स्यीबरी सेम् लज्यी। 36 डेत्डेत्तमी य्हक्को पेत्नलज्यी, कोर्रचे ग्यङ्ज्यी, ओसेम् च्यल्तचे खीःज्यीम् जेल्री च्युप्ज्यी। 37 थेङ्यीमा डेत्डेत्तमी युङ्बचे प्रुङ्ज्यीम् सेत्ज्यी, करउतीचे ग्रेत्ज्यी ओसेम् तरवार्चे थाज्यी। थेङ्यीमा प्रङ्न तज्यीम् ग्युतेङ् रइ डीमा येन्ज्यी, ओसेम् म्हीमाचे पीन्बे दुखमातेङ् अज्यबे ब्यबहार्मा नाज्यीम् ब्रथोज्यी। 38 जम्बुलीङ् थेङ्यीमाकी लागीरी जेःबल अरेबल। थेङ्यीमा उजाड-ग्लामा, गङ्मा कोर्ज्यीम् ब्रथोज्यी ओसेम् उःमातेङ् जम्बुलीङ्की सइ खुङ्मारी टीथोज्यी। 39 थेङ्यीमा जम्मचेनो बीस्वास् स्य्हेङ्बल तज्यीम् पर्मेस्वर् ग्यम्से तोप्प यङ्ज्यी, तर पर्मेस्वर्चे न्हङ्जेत्स्ये बी बाचा स्य्हेङ्जेत्पे तम् थेङ्यीमा खल्चेएनो यङ्बल अरेबल। 40 तलेपङ्सम् पर्मेस्वर्चे ङ्य्हङ्माकी लागीरी झेन् य्हक्को ज्यबे तम् टोप्ले थेन्जेत्पल मुबल। ङ्य्हङ्मातेङ्कीनो बक्च्य थेङ्यीमाएनो सीद्द तखइ पङ्बे थुः थेङ्ल मुबल। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.