हीब्रु 10 - पश्चिम तामाङ1 मोसाचे ब्रीबे पर्मेस्वर्की नीयम्मी लीक्यम् खस्येकी देमेन्की ज्यबे तम्मा अय्हीन्, तर हुजुइ ब्लकीनो य्हीन्ब। होत्तज्यीम् बर्सलनो नीयम अनुसार् पर्मेस्वर्त पीन्बे होतेबे ठामाचे पर्मेस्वर्त तेन्बरी खबे म्हीमात सीद्द स्य्हेङ्ब अखम्। 2 सेम्ज्येन्माकी ठाचे पुरा सुद्द स्य्हेङ्ब खम्बल य्हीन्सम् तले दो-दोज्यीम् ठा पीन्थोब मुबल स्यीम्? हुजु ठा पीन्बलमा सुद्द तबल य्हीन्सम् खेम पङ्लेनोइ लागीरी तीक्ख्यप्रीनो सुद्द तस्ये मुबल, ओसेम् पुरा सुद्द तबल य्हीन्सम् थेङ्यीमाकी बीबेक्री पाप तस्ये अरेबल। 3 तर हुजु ठामाचेम् म्हीमात बर्सलनो र्हङ्की पाप्मात व्हल् स्य्हेङ्न लब। 4 तलेपङ्सम् ग्लब साडेमातेङ् बोकमाकी काचे पाप् ख्रुब खम्नो अखम्। 5 होत्तज्यीम् जम्बुलीङ्री ब्योन्युबे बेलोरी ख्रीस्ट्चे पर्मेस्वर्त चोले सुङ्जेत्ज्यी, “थेङ्चे सेम्ज्येन्की ठातेङ् भेटीमा म्हइअजेत्, तर थेङ्चे ङइ लागीरी थेङ्त ठा पीन्बरी ल्हीः गीः टोप् लजेत्पल मुब।” 6 “थेङ् मेरी पीन्बे ठामातेङ् पाप्की ठामारी तङ्अजेत्। 7 हुजु लीप्चे ख्रीस्ट्चे सुङ्ज्यी, ‘स्हीःजेतो, ओ पर्मेस्वर्, धर्म छ्येःरी ङइ बारेरी ब्रीब र्हङ्ले, थेङ्चे थुः लजेत्प अनुसार् स्य्हेङ्बरी ङ खबल मुब।’” 8 ख्रीस्ट्चे ङोन्ग्यम्नो सुङ्ज्यी, “सेम्ज्येन्की ठामा वुइ भेटीमा वुइ मेरी पीन्बे भेटीमा वुइ पाप्माकी लागीरी पीन्बे ल्हो-ल्हो भेटीमा थेङ्चे म्हइअजेत्, ओसेम् थेङ् हुजुमारी तङ्अजेत्।” (थेङ्चे चोले सुङ्लेनो चुमामी मोसाचे ब्रीबे पर्मेस्वर्की नीयम् अनुसार् पीन्ब।) 9 हुजु लीप्चे थेङ्चे सुङ्ज्यी, “स्हीःजेतो, थेङ्चे थुः लजेत्प अनुसार् स्य्हेङ्बरी ङ खबल मुब।” ख्रीस्ट्चे लीक्यम्की करार्त थेन्बरी ङोन्ग्यम्की करार् खारेज् लजेत्प। 10 तलेपङ्सम् पर्मेस्वर्की थुः पुरा लजेत्परी येसु ख्रीस्ट्चे र्हङ्की ल्हीःत खेम पङ्लेनोइ लागीरी तीख्यप् ठा पीन्ज्यीम् ङ्य्हङ्मात पबीत्र स्य्हेङ्जेत्ज्यी। 11 जम्मनो लम्बुमाचे दीन् र्हङ्स्यीनो पर्मेस्वर्की ङोन्ग्यम् रप्ज्यीम् य्हक्को ख्यप् खाल् गीःकी ठा पीन्बे लक् स्य्हेङ्ब। तर चोतेबे ठामाचे खेमेएनो पाप्मा ख्रुब अखम्। 12 तर ख्रीस्ट्चेम् पाप्माकी लागीरी खेम पङ्लेनो योःनले ठा गीःकीनो न्हङ्जेत्ज्यी। ओसेम् थेङ् पर्मेस्वर्की केत् फ्या पट्टीचे स्य्हुजेत्पल मुब। 13 पर्मेस्वर्चे थेङ्की सत्तुर्मात थेङ्की स्य्हब् थीङ् दुङ्री अथेन्गदे थेङ् ब्रेन्ज्यीम् स्य्हुजेत्प। 14 तलेपङ्सम् पाप् ग्यम्से पबीत्र तनलजेत्पलमात थेङ्चे ठा गीः ग्यम्से खेम पङ्लेनोइ लागीरी सीद्द तनलजेत्पल मुब। 15 ओसेम् पबीत्र आत्माचेएनो ङ्य्हङ्मात चोले साक्षी न्हङ्ब, 16 “परमप्रभुचे चोले सुङ्जेत्प, ‘लीक्यम् खस्येकी दीन्मारी ङचे थेङ्यीमातेङ् स्य्हेङ्स्येकी छार् करार् चुनो य्हीन्ब, थेङ्यीमाकी सेम्री ङ ङइ नीयम्मा थेन्पीन्स्ये मुब, ओसेम् थेङ्यीमाकी लोरी ङ हुजुमा ब्रीपीन्स्ये मुब।’” 17 थेङ्चे देबेएनो सुङ्जेत्प, “थेङ्यीमाकी पाप्मातेङ् थेङ्यीमाकी दुस्ट लक्मा ङ देबेएनो व्हल् लस्ये अरे।” 18 होत्तज्यीम् ङ्य्हङ्माकी चु जम्मनो पाप्मा क्षमा तबल तज्यीम् देबेएनो पाप् ख्रुबे ठा पीन्टीअथो। पर्मेस्वर्की ज्यदङ् ङ्यीइ 19 होत्तज्यीम् बीस्वासी र्होमा, येसुइ काचे लज्यीम् ङ्य्हङ्माचे गोदोब्न्हङ्की पबीत्र ग्लारी आर्ले वङ्ब खम्ब। 20 येसु स्यीजेत्ज्यीम् ङ्य्हङ्माकी लागीरी छार्तेङ् जीवन् पीन्बे ग्यम् ठोङ्पीन्जेत्ज्यी होत्तज्यीम् ङ्य्हङ्मा पर्द ग्यम्से तज्यीम् गोदोब्न्हङ्की पबीत्र ग्लारी वङ्ब खम्ब। 21 ओसेम् पर्मेस्वर्की म्हीमाइ जोरी सासन् स्य्हेङ्बे गोदोब्न्हङ्की ङ्हच्छ्यङ् लम्बु गीः ङ्य्हङ्माल मुब। 22 ङ्य्हङ्माकी अज्यबे बीबेक्मात ख्रीस्ट्की का फ्रोक्ज्यीम् चोखो स्य्हेङ्बल मुब, ओसेम् ङ्य्हङ्माकी ल्हीःत सुद्द यीचे ख्रुबल मुब। होत्तज्यीम् ङ्य्हङ्मा ज्यबे सेम् थोज्यीम ओसेम् थेङ्री पुरा बीस्वास् लज्यीम् ङ्य्हङ्मा पर्मेस्वर्ज ङ्यीइ। 23 ङ्य्हङ्माचे थेन्बे आस्री य्हङ्य्होङ् अतनले कोङ्ज्यीम् टीइ, तलेपङ्सम् बाचा स्य्हेङ्जेत्पे पर्मेस्वर् बीस्वासीलो मुब। 24 ङ्य्ङ्मा गीःचे गीःत म्होइबतेङ् ज्यबे लक् स्य्हेङ्बे लागीरी खले आर् पीन्ब पङ्बे तम् म्हेन्के। 25 गदे म्हीमालमी सङ्गतीरी अङ्यीबे बानी तब, तर ङ्हय्ङ्माचेमी तीच्छङ् र्हुब् तब पीत्प अत। एङ्यीमाचेमी प्रभुइ दीन् ज्यदङ् खटीबल म्रङ्बल तज्यीम् गीःचे गीःत झेन् आर् पीनो। 26 तलेपङ्सम् ङ्य्हङ्माचे देमेन्की तम्की ज्ञान् यङ्ज्यीम्एनो स्येःस्येज्यीम् पाप् स्य्हेङ्स्यीनो टीज्यी पङ्सम् ङ्य्हङ्माचे स्य्हेङ्बे पाप्की लागीरी देरेम् ल्हो-ल्हो ठा अरे। 27 तर चोतेबे पाप स्य्हेङ्बे म्हीमामी लोङ्-लोङ्ज्यीम् पर्मेस्वर्की न्याय ब्रेन्ज्यीम् टीथोब, तलेपङ्सम् थेङ्की बीरोद् स्य्हेङ्बे म्हीमात थेङ्की य्हक्को लुम्टीबे मेचे नास् लस्ये मुब। 28 मोसाचे ब्रीबे पर्मेस्वर्की नीयम् अङ्येन्बे म्हीत ङ्य्ही वुइ सोम् साक्षीमाचे स्येत्पे तम् अनुसार् तइ दयएनो अङोन्नले सेत्प मुबल। 29 होले य्हीन्सम् एङ्यीमाचे म्हेनो, पर्मेस्वर्की जत स्य्हेस अलबलमात, पाप् ग्यम्से पबीत्र स्य्हेङ्बतेङ् पर्मेस्वर्की करार्की कात अपबीत्र म्हेन्बलत ओसेम् अनुग्रहकी आत्मात पेत्नलबलतमी झेन् गत्ते ङ्हच्छ्यङ् सजाय यङ्ल? 30 तलेप्ङसम् “नङ् फाबे लक् ङल य्हीन्ब, ङचेनो थेङ्यीमात नङ् फास्ये मुब” बी परमेस्वरचे सुङ्बलत ङ्यीमाचे स्येःब। चोलेएनो सुङ्बल मुब, “परमप्रभुचेनो र्हङ्की म्हीमाकी न्याय स्य्हेङ्जेत्स्ये मुब।” 31 सोम्बो पर्मेस्वर्की न्याय स्य्हेङ्बे फ्यारी दोःबमी य्हक्को लोङ्थोःबे तम् य्हीन्ब। 32 एङ्यीमाचे पर्मेस्वर्की य्हल् यङ्बे हुजु ङोन्ग्यम्की दीन्मात व्हल् लउ, होदे बेलोरी एङ्यीमाचे य्हक्को दुखमा नाथोलेएनो एङ्यीमा बीस्वास्री कोङ्ज्यीम् टीज्यी। 33 गदे ख्यप्मी एङ्यीमात म्हीमाचे ल्हो-ल्हो म्हीमाकी ङोन्री पेत्नलबतेङ् तोज्यी, ओसेम् गदे ख्यप्मी चोतेबे दुख यङ्बलमात एङ्यीमाचे र्हो लपीन्ज्यी। 34 जेल्री च्युप्पलमात एङ्यीमाचे र्हो लज्यी। र्हङ्तेङ् मुबे सम्पत्ती ब्येन्मेएनो एङ्यीमाचे तङ्ज्यीम् नाज्यी, तलेपङ्सम् खेम पङ्लेनो तस्यीनो टीबे झेन् य्हक्को ङ्हच्छ्यङ् सम्पत्ती र्हङ्तेङ् मुब पङ्बे तम् एङ्यीमाचे स्येःब मुबल। 35 होत्तज्यीम् आर् लज्यीम् टीब थपीतो, चु ग्यम्सेनो एङ्यीमाचे ङ्हच्छ्यङ् बक्सीस् यङ्स्ये मुब। 36 पर्मेस्वर्चे थुःलजेत्प अनुसार् स्य्हेङ्बरी ओसेम् थेङ्चे बाचा लजेत्पे तम्मा यङ्बरी एङ्यीमाचे नाज्यीम् टीथोब। 37 तलेपङ्सम् धर्म छ्येःरी पर्मेस्वर्चे चोले सुङ्बल मुब, “य्हम्बगीरीनो युस्येलमी युस्येनो मुब, ओसेम् थे गेःस्ये अरे।” 38 “ङइ धर्मी म्हीम् बीस्वास् ग्यम्से सोस्ये मुब, तर खल पङ्लेनो ङत पीत्ज्यीम् य्हर्ज्यी पङ्सम्, ङ थेतेङ् तङ्स्ये अरे।” 39 तर ङ्य्हङ्मामी थेङ्त पीत्पतेङ् नास् तबे म्हीमा र्हङ्ब अय्हीन्, ङ्य्हङ्मामी थेङ्त बीस्वास् स्य्हेङ्बे म्हीमातेङ् थर्बे म्हीमा य्हीन्ब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.