हीब्रु 1 - पश्चिम तामाङ1 दङ्बोइ बेलोरी ङ्य्हङ्की अप म्हेम्हेमातेङ् पर्मेस्वर्चे अगम्बक्तमा ग्यम्से य्हक्को ख्यप् ओसेम् य्हक्को ग्यम्मासे फ्रोइ लजेत्ज्यी। 2 तर चु ज्युःकी दीन्मारी थेङ् र्हङ्की ज ग्यम्से ङ्य्हङ्मातेङ् फ्रोइ लजेत्पल मुब। पर्मेस्वर्चे र्हङ्की जत तीरेत् जम्म अधीकार् न्हङ्जेत्परी दम्जेत्ज्यी, ओसेम् थेङ्चे ज ग्यम्सेनो जम्बुलीङ् स्य्हेङ्जेत्ज्यी। 3 थेङ्री पर्मेस्वर्की ङ्हच्छ्यङ् महीमाकी य्हल् सर्ब ओसेम् थेङ्नो पर्मेस्वर्की देमेन्की रुप् य्हीन्ब। ओसेम् थेङ्की सक्तीसाली फ्रोइ ग्यम्सेनो थेङ्चेनो मुतेङ जम्बुलीङ्की जम्मनो स्हेमात थाम्तीजेत्प। ओसेम् म्हीमात पाप ग्यम्से फेःपीन्बे लक् बुत्प बीसेम् थेङ् महीमीत् पर्मेस्वर्की केत् फ्या पट्टीचे स्वर्गरी स्य्हुजेत्पल मुब। ख्रीस्ट् स्वर्गदुत्मा बीमएनो ङ्हच्छ्यङ् 4 पर्मेस्वर्चे र्हङ्की ज ख्रीस्ट्त स्वर्गदुत्मा बीमएनो ङ्हच्छ्यङ् स्य्हेङ्जेत्ज्यी, होलेनो पर्मेस्वर्चे थेङ्त स्वर्गदुत्मात बीमएनो य्हक्को ङ्हच्छ्यङ् छेन् न्हङ्जेत्ज्यी। 5 तलेपङ्सम् पर्मेस्वर्चे खेमेएनो स्वर्गदुत्मात चोले सुङ्अजेत, “ए ङइ ज य्हीन्ब, तीङ्यी ङ एइ अप तबल मुब।” ओसेम् थेङ्चे देबेएनो, “ङ थेइ अप तस्ये मुब, ओसेम् थे ङइ ज तस्ये मुब” बी खजु स्वर्गुदुत्तएनो खेमेएनो सुङ्अजेत्। 6 ओसेम् पर्मेस्वर्चे र्हङ्की गीकीनो जत जम्बुलीङ्री पीत्युजेत्पे बेलोरी चोले सुङ्जेत्ज्यी, “पर्मेस्वर्की जम्मनो स्वर्गदुत्माचे थेत तेन्खइ।” 7 स्वर्गदुत्माकी बारेरी पर्मेस्वर्चे चोले सुङ्जेत्प, “थेङ्चे र्हङ्की स्वर्गदुत्मात लाबो र्हङ्ब स्य्हेङ्जेत्प। ओसेम् थेङ्चे र्हङ्की स्वर्गइ योक्पोमात मेइ ल्हम् स्य्हेङ्जेत्प।” 8 तर पर्मेस्वर्चे र्हङ्की जइ बारेरी चोले सुङ्जेत्प, “ओ पर्मेस्वर्, थेङ्की य्हुल् खेम पङ्लेनो टीस्यीनो टीब, ओसेम् थेङ्चे र्हङ्की य्हुल्री न्यायइ सासन् स्य्हेङ्जेत्प। 9 थेङ्चे धार्मीक्तात म्होइजेत्पल मुब, ओसेम् अधर्मत अखोजेत्पल मुब। होत्तज्यीम्, ओ पर्मेस्वर्, थेङ्की पर्मेस्वर्चे थेङ्की जोरी तङ्बइ छ्युकु युपीन्जेतज्यीम्, थेङ्की र्होमात बीम य्हक्को ङ्हच्छ्यङ् स्य्हेस थेङ्त न्हङ्जेत्पल मुब।” 10 पर्मेस्वर्चे देबेएनो र्हङ्की जत सुङ्जेत्ज्यी, “प्रभु, गोदोब्न्हङ् ङोन्ग्यम् थेङ्चे जम्बुलीङ्की जग युजेत्ज्यी, ओसेम् र्हङ्की फ्याचेनो मुतेङ् मुरी मुबे जम्मनो स्हेमा स्य्हेङ्जेत्ज्यी। 11 हुजुमा जम्मनो नास् तज्यीम् य्हर्स्ये मुब, तर थेङ्मी खेम पङ्लेनो स्य्हुजेत्स्ये मुब। हुजुमा येन् र्हङ्ले बोक्ट तज्यीम् य्हर्स्ये मुब। 12 थेङ्चे हुजुमात म्हीचे य्हुर्पे येन्त ख्लाबरी गुइब र्हङ्ले गुइजेत्प, ओसेम् य्हुर्पे येन् पोब र्हङ्ले हुजुमा पोस्ये मुब। तर थेङ्मी खेमेएनो पोजेत्स्ये अरे। ओसेम् थेङ् खेमेएनो स्यीजेत्स्ये अरे।” 13 ओसेम् पर्मेस्वर्चे खजु स्वर्गदुत्तएनो खेमेएनो चोले सुङ्जेत्पल अरे, “ङचे एइ सत्तुर्मात एइ कङ् थीङ् दुङ्री अथेन्गदे, ए ङइ केत् या पट्टीचे टीउ।” 14 होत्तज्यीम् जम्मनो स्वर्गदुत्मा पर्मेस्वर्चे मुक्ती न्हङ्स्येलामाकी स्य्हप्तो स्य्हेङ्बरी पीत्जेत्पे आत्मामाकीनो य्हीन्ब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.