गलाती 6 - पश्चिम तामाङगीःचे गीःकी दोत् नाको 1 ङइ बीस्वासी र्होमा, खल्चे पङ्लेनो अज्यबे लक् स्य्हेङ्टीसम् एङ्यी आत्मा ग्यम्से सोबलमाचे नम्र तज्यीम् थेत ज्यबे ग्यम्री ब्रन लबरी र्हो स्य्हेङ्थोब। तर एङ्यीमा र्हङएनो परीक्षारी अदोखइ पङ्ज्यीम् होसीयार् तथोब। 2 एङ्यीमाचे गीःचे गीःकी दुखरी र्हो लउ। चोले एङ्यीमाचे ख्रीस्ट्की नीयम् ङ्येन्स्ये मुब। 3 खल्चे पङ्लेनो र्हङ् तएनो अय्हीन्लेएनो र्हङ्चे र्हङ्त ङ्हच्छ्यङ् म्हेन्ज्यी पङ्सम् थेचे र्हङ्चे र्हङ्त धोक पीन्ब। 4 जम्मचेनो र्हङ्की ब्यबहार र्हङ्चेनो जाच स्य्हेङ्थोब। हुजु लीप्चेकीनो थेङ्यीमाचे र्हङ्त ल्हो-ल्होतेङ् अवनले र्हङ्की ब्यबहाररी न गङ् लब खम्ब। 5 तलेपङ्सम् जम्मचेनो र्हङ्चे यङ्बे लक्की जीम्मा र्हङ् र्हङ्चेनो टोप् लथोब। 6 पर्मेस्वर्की फ्रोइकी सीक्षा यङ्बलमा जम्मचेनो र्हङ्तेङ् मुबे ज्यबे स्हे:मा फ्रोइ लोप्पीन्बलमातेङ् जुथोःब। 7 र्हङ्चे र्हङ्त धोक थपीनो, खल्चेएनो पर्मेस्वर्त मुर्ख स्य्हेङ्ब अखम्, तलेपङ्सम् म्हीचे ता ब्लुत्ज्यी हुजुइ अन्ननो दुत्स्ये मुब। 8 खल्चे र्हङ्की ल्हीःकी पाप स्वभावकी लागीरी ब्लुत्ब, थेचे र्हङ्की पाप स्वभाब ग्यम्चेनो नास् दुत्स्ये मुब। तर खल्चे पबीत्र आत्माइ लागीरी ब्लुत्प थेचे आत्मा ग्यम्सेनो खेमेएनो अबेबे जीवन दुत्स्ये मुब। 9 ज्यबे लक् स्य्हेङ्बरी ङ्य्हङ्मा दुःब अत, तलेपङ्सम् ज्यबे लक् स्य्हेङ्स्यीनो टीज्यी पङ्सम् ठीक् बेलोरी हुजुइ रोरो यङ्स्ये मुब। 10 होत्तज्यीम् मौक यङ्ब अनुसार ङ्य्हङ्माचे जम्मा म्हीमात ज्यब स्य्हेङ्थोब, बीसेस लज्यीम् ङ्य्हङ्की बीस्वास्की म्हेम्यमाला। पावलकी ज्युःकी सल्ला 11 च्याको, देरेम् ङ र्हङ्की याचेनो ङ्हच्छ्यङ् ङ्हच्छ्यङ् छीःमारी चु तम्मा एङ्यीमात ब्रीटीब। 12 ल्हो-ल्होइ ङोन्री र्हङ्त ज्यब ङोन्ब म्हइबलमाचेनो एङ्यीमात खतना स्य्हेङ्थोःब बी कर् लब म्हइटीब। तलेपङ्सम् क्रुस्री स्यीजेत्पे ख्रीस्ट्चेकीनो थर्नलजेत्प खम्ब पङ्बे तम्त प्रचार स्य्हेङ्बतेङ् थेङ्यीमात ल्हो-ल्हो म्हीमाचे दुख अपीन्खइ पङ्ज्यीम्कीनो थेङ्यीमाचे चोले कर् लबल य्हीन्ब। 13 थेङ्यीमा खतना स्य्हेङ्बलमाचेएनो मोसाचे ब्रीबे नीयम्मा जम्मनो अङ्येन्। तर खतना स्य्हेङ्बे नीयम् एङ्यीमाचे ङ्येन्ज्यी पङ्ज्यीम् थेङ्यीमाचे घमन्ड स्य्हेङ्बरी एङ्यीमात खतना स्य्हेङो पङ्बल य्हीन्ब। 14 तर ङमी ल्हो-ल्हो तइ तम्रीएनो अय्हीन्, ङ्य्हङ्की प्रभु येसु ख्रीस्ट्की क्रुस्रीकीनो घमन्ड स्य्हेङ्ब। थेङ् क्रुस्री स्यीजेत्पल तज्यीम् जम्बुलीङ् ङइ लागीरी स्यीबल मुब ओसेम् ङ जम्बुलीङ्की स्हेःमाकी लागीरी स्यीबल मुब। 15 खतना स्य्हेङ्लएनो अस्य्हेङ्लेनो तएनो अत, तर पर्मेस्वर्चे एत छार् म्ही स्य्हेङ्जेत्पल मुब, हुजुनो ङ्हच्छ्यङ् तम् य्हीन्ब। 16 चु नीयम् ङ्येन्ज्यीम् ब्रबलमातेङ् पर्मेस्वर्की जम्मनो म्हीमाइ जोरी सान्तीतेङ् क्रीपा तखइ। 17 देरे य्हङ्से ङत चु तम्री खल्चेएनो दुख अपीन्खइ, तलेपङ्सम् ङ येसुइ बाना य्हीन्ब बी ङोन्बे म्हगइ ज्येःमा ङचे ङइ ल्हीरी नाज्यीन्बल मुब। 18 ङइ बीस्वासी र्होमा, ङ्य्हङ्की प्रभु येसु ख्रीस्ट्की अनुग्रह एङ्यीमाकी आत्मातेङ् तखइ। आमेन्। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.