गलाती 5 - पश्चिम तामाङख्रीस्ट्री स्वतन्त्र 1 ख्रीस्ट्चे ङ्य्हङ्मात मोसाचे ब्रीबे नीयम् ग्यम्से फेःपीन्जेत्पल मुब, होत्तज्यीम् ङ्य्हङ्मा स्वतन्त्र तबल मुब। होत्तज्यीम् सेम् कोङ्ज्यीम् टीउ, ओसेम् देबेएनो मोसाचे ब्रीबे पर्मेस्वर्की नीयम्की बाना थतउ। 2 ङ पावल र्हङ्चेनो पङ्बे तम्त एङ्यीमाचे ज्येन्ले ङ्येनो! पर्मेस्वर्की ङोन्री र्हङ्त ठीक् ङोन्बरी एङ्यीमाचे खतन स्य्हेङ्नोथोब बी म्हेन्ब पङ्सम् ख्रीस्ट्चे एङ्यीमाकी लागीरी स्य्हेङ्जेत्पे लक्मी एङ्यीमाकी लागीरी तइ लक्एनो तस्ये अरे। 3 ङ देबेएनो पङ्ब, खल्चे पङ्लेनो र्हङ्की खतन स्य्हेङ्पुङ्ज्यी पङ्सम् थेचे मोसाचे ब्रीबे पर्मेस्वर्की नीयम्मा जम्मनो ङ्येन्ज्यीम् ब्रनोथोब। 4 मोसाचे ब्रीबे नीयम अनुसार् ब्रज्यीम् र्हङ्त पर्मेस्वर्की ङोन्री ठीक् ङोन्ब म्हइबमा, एङ्यीमा ख्रीस्ट् ग्यम्से फेःज्यीन्बल मुब। एङ्यीमा पर्मेस्वर्की अनुग्रह ग्यम्से थारीङ् तबल मुब। 5 तर पर्मेस्वर्की आत्माचेनो ङ्य्हङ्मात बीस्वास् ग्यम्से पर्मेस्वर्की ङोन्ग्यम् ठीक् ङोन्जेत्पे आस्की ग्यम् ब्रेन्बरी र्हो लजेत्प। 6 तलेपङ्सम् ङ्य्हङ्माचे येसु ख्रीस्ट्त बीस्वास् लब बीसेम् खतन स्य्हेङ्लेनो अस्य्हेङ्लेनो तएनो अत। तर तोबे तम्मी चु य्हीन्ब, ङ्य्हङ्माकी बीस्वास्चे लज्यीम् ङ्य्हङ्माचे ल्हो-ल्होमात म्होइब। 7 एङ्यीमामी ज्यनलेनो छ्योङ्टीब मुबल। खल्चे एङ्यीमात देमेन्त ङ्येन्बरी र्होत्ज्यी? 8 चोतेबे लक्मी एङ्यीमात ङ्होत्जेत्पे पर्मेस्वर्चे स्य्हेङ्जेत्पल अय्हीन्। 9 होसीयार् तउ, हुजु लोप्पे भ्युकी तम्मी ज्योप्पे ब्रारी चेक्पजकी खमीर् युलेएनो ज्योप्पे जम्मनो ब्रात फुनलब र्हङ्ब य्हीन्ब। 10 तर एङ्यीमाचे ङइ तम् बीम ल्हो-ल्हो म्हीइ तम् ङ्येन्स्ये अरे बी ङचे प्रभुरी भर् थेन्बल मुब। एङ्यीमात थोम्नलटीबल खल य्हीन्लेएनो हुजुत पर्मेस्वर्चे सजाय न्हङ्स्ये मुब। 11 तर बीस्वासी र्होमा, ङचे म्हीमात पर्मेस्वर्की ङोन्री धर्मी तबरी खतना स्य्हेङ्नोथोब पङ्ज्यीम् प्रचार् स्य्हेङ्बल य्हीन्सम् तले ङचे दवम् सम्म चोतेबे दुख नाथोब? ङचे चु तम्मा लोप्टीबल य्हीन्सम् येसु ख्रीस्ट् क्रुस्री स्यीजेत्पे तम्की प्रचार् स्य्हेङ्बतेङ् खल्चेएनो बीरोद् अस्य्हेङ्स्येल। 12 एङ्यीमात दुख पीन्बलमाचेम् र्हङ्चे र्हङ्की खतनाकीनो स्य्हेङ्ब अय्हीन्, बरु थेङ्यीमाचेम् र्हङ्की अङ्गनो थालाब ज्यब तस्ये मुब। 13 बीस्वासी र्होमा, एङ्यीमामी स्वतन्त्र तबरी ङ्होत्जेत्पल य्हीन्ब। चु स्वतन्त्रत ल्हीकी स्वभाब अनुसार ब्रबरी थकोलो। बरु गीःचे गीःत म्होइज्यीम् ज्यब स्य्हेङो। 14 तलेपङ्सम् मोसाचे ब्रीबे जम्मनो नीयम्, “एचे र्हङ्की खीम्सेत र्हङ्त र्हङ्लेनो म्होइगो” पङ्बे अर्ती गीःरीनो पुरा तब। 15 तर एङ्यीमाचे गीःचे गीःत ख्रप्प ओसेम् ग्लोङ्ब पङ्सम् होसीयार् लउ, एङ्यीमा र्हङ्-र्हङ् ग्यम्सेनो नास् तज्यीम् य्हर्स्ये मुब। पबीत्र आत्मातेङ् पापी स्वाभाब् 16 होत्तज्यीम् ङ पङ्ब, पबीत्र आत्माचे ङोन्ब अनुसार् ब्रउ ओसेम् एङ्यीमाचे र्हङ्की पापी स्वभाबचे म्हेन्ब अनुसार् स्य्हेङ्स्ये अरे। 17 तलेपङ्सम् पापी स्वभाबचे म्हेन्ब र्हङ्ले लक् स्य्हेङ्ब म्हइब पबीत्र आत्माचे म्हेन्बे बीरुद्दरी तब, ओसेम् पबीत्र आत्माचे म्हेन्जेत्प र्हङ्ले लक् स्य्हेङ्ब म्हइब पापी स्वभाबचे म्हेन्बे बीरुद्दरी तब। चु ङ्य्हीनो गीः गीःकी बीरुद्दरी तब, होत्तज्यीम् ङ्य्हङ्माकी अज्यबे सेम्चे लज्यीम् ङ्य्हङ्माचे स्य्हेङ्गे म्हेन्बे ज्यबे लक् स्य्हेङ्ब अखम्। 18 तर एङ्यीमा पबीत्र आत्माचे ङोन्ब र्हङ्ले ब्रज्यी पङ्सम् एङ्यीमा मोसाचे ब्रीबे पर्मेस्वर्की नीयम्की अधीन्री अत। 19 पापी स्वभाबचे म्हेन्बे जम्मचेनो म्रङ्बे लक्मा चुमानो य्हीन्ब- बेस्या स्य्हेङ्ब, असुद्द तम्मा म्हेन्ब, छर तब, 20 ख्लत तेन्ब, जादु क्लङ्ब, दुस्मन स्य्हेङ्ब, बङ्ब छेत्प, स्हेःर्ब, बोमो लब, र्हङ्तकीनो ज्यब तखइ म्हेन्ब, म्हीमाकी गुङ्री थीनलब, र्हङ् र्हङ्की समुह स्य्हेङ्ब, 21 र्होकी स्हेःत म्हे न्ब, ङ्य्हेज्यीम् ब्रब, अज्यबे लक्मारी मनमोज्यी लब ओसेम् चोतेबे ल्हो-ल्हो लक्माएनो स्य्हेङ्ब। चोतेबे लक् स्य्हेङ्बलमाचे पर्मेस्वर्की य्हुल्री वङ्म्यङ्स्ये अरे बी ङचे ङोन्ग्यम्एनो चेतावनी पीन्बल मुबल ओसेम् देरेएनो पीन्टीब मुब। 22 तर पबीत्र आत्माचे स्य्हेङ्बे लक्मा चुमानो य्हीन्ब- थेचे ल्हो-ल्होत म्होइब, थे तङ्ब, थे सान्तीरी सोब, थेचे धैर्य लब, थेचे दय लब, थेचे ल्हो-ल्होत ज्यब स्य्हेङ्ब, थे बीस्वासीलो तब, 23 थे नम्र तब, ओसेम् थेचे र्हङ्चे र्हङ्की सेम्त दुल्ब। चोतेबे तम्माकी बीरुद्दरी तइ नीयम्एनो अरे। 24 खजु म्हीमा येसु ख्रीस्ट्ल य्हीन्ब, थेङ्यीमाचे पापी स्वभाबतेङ् बक्च्य पापी स्वाभाबचे स्य्हेङ्ब म्हेन्बे दुस्ट लक्मात क्रुस्री च्योलाबल तब। 25 ङ्य्हङ्मा पबीत्र आत्मा ग्यम्से सोब, होत्तज्यीम् आत्माचे ङोन्ब र्हङ्लेनो सोथोब। 26 ङ्य्हङ्माचे गीःचे गीःतेङ् घमन्ड स्य्हेङ्ब, बोमो रप्नलब ओसेम् स्हेर्बे लक् स्य्हेङ्ब अत। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.