गलाती 4 - पश्चिम तामाङ1 ङचे पङ्बे तम्की अर्थ चु य्हीन्ब, अप अमइ सम्पत्तीइ हक् यङ्बे कोल अछर्गदेसम्म थे हुजु सम्पत्तीइ मालीक् य्हीन्लाएनो बाना र्हङ्बनो तब। 2 अपचे तेत् लबे बेलो अयोगदे कोल थेत स्य्हप्तो स्य्हेङ्बे म्हीतेङ् थेइ सम्पती च्याबे म्हीइ अधीन्री टीनोथोब। 3 होलेनो ङ्य्हङ्एनो ख्रीस्ट्त स्येःब बीम ङोन्ग्यम् कोल र्हङ्ब मुबल, ओसेम् चु जम्बुलीङ्की पेठीम्माकी बाना तब मुबल। 4 तर पर्मेस्वर्चे टोप लजेत्पे बेलो खब बीसेम् थेङ्चे र्हङ्की जत पीत्युजेत्ज्यी। थेङ् अमकोल ग्यम्चे न्हजेत्ज्यी, ओसेम् मोसाचे ब्रीबे नीयम् ङ्येन्ज्यीम् ब्रजेत्ज्यी। 5 ङ्य्हङ्मात मोसाचे ब्रीबे नीयम्की अधीन् ग्यम्से फेःपीन्जेत्ज्यीम् पर्मेस्वर्की ज जमे स्य्हेङ्जेत्परी पर्मेस्वर्चे थेङ्त पीत्युजेत्ज्यी। 6 ङ्य्हङ् पर्मेस्वर्की ज जमे य्हीन्बल तज्यीम् थेङ्चे र्हङ्की जइ आत्मा ङ्य्हङ्माकी सेम्री पीत्युजेत्ज्यी। हुजु आत्माचे लज्यीम् ङ्य्हङ्की सेम्चे, “ओ अब्ब, ओ अप” पङ्ब। 7 होत्तज्यीम् एङ्यीमा देरेम् बाना अय्हीन्, तर पर्मेस्वर्की कोल य्हीन्ब। ओसेम् कोल य्हीन्सम् एङ्यीमाचेएनो पर्मेस्वर्चे न्हङ्जेत्प बी बाचा स्य्हेङ्जेत्पे जम्मनो स्हेःमा यङ्स्ये मुब। गलातीमात पावलकी वास्त 8 एङ्यीमाचे पर्मेस्वर्त स्येःब बीम ङोन्ग्यम् मुनो अरेबे ख्लमात तेन्ब मुबल। एङ्यीमा हुजु ख्लमाकी बाना मुबल। 9 तर देरेम् एङ्यीमाचे पर्मेस्वर्त स्येःबल मुब, य्हीन्बरीम् पर्मेस्वर्चेक एङ्यीमात खेम्जेत्पल मुब। होले पङ्सम् देबेएनो खले हुजु कम्जोर्तेङ् तइ लक् अतबे पेठीम्मारी दोःज्यीम् य्हर्बे सेम् लब? ओसेम् तले थेङ्यीमाकी बाना तबरी सेम् लब? 10 एङ्यीमाचे बीसेस् दीन्मा, लमा ओसेम् बर्समातेङ् पर्बमा म्हन्दीब। 11 एङ्यीमाकी लागीरी ङचे स्य्हेङ्बे लक् खेर य्हर्ज्यी बी ङ लोङ्बल मुब। 12 ङइ म्होइबे बीस्वासी र्होमा, ङ एङ्यीमात फ्या लब, एङ्यीमाएनो चु यहुदी नीयम्मा पीत्ज्यीम् ङ र्हङ्ले सोउ, तलेपङ्सम् ङएनो एङ्यी यहुदी अय्हीन्बे म्हीमा र्हङ्बनो तपीन्बल मुब। एङ्यीमाचे ङत तएनो अज्यब स्य्हेङ्बल अरे। 13 एङ्यीमात व्हल् मुब, ङ नबल मुबल, होत्तज्यीम् हुजुइ मौकरी ङचे जम्मन्हङ्री ङोन्ग्यम् एङ्यीमात ज्यबे सम्तर् स्येत्पल य्हीन्ब। 14 ङ नबे बेलोरी एङ्यीमात य्हक्को दुख तबल मुबल, होलेतलेनो एङ्यीमाचे ङत हेल अस्य्हेङ् ओसेम् ङत अखोनले अटी। तर एङ्यीमाचेम् पर्मेस्वर्की दुत्त वुइ येसु ख्रीस्ट्त स्वागत् स्य्हेङ्ब र्हङ्ले ङतएनो स्वागत् स्य्हेङ्ज्यी। 15 हुजु बेलोरी एङ्यीमा गत्ते तङबल मुबल। तसम् एङ्यीमाचे ङत र्हङ्की मीःनो तेत्ज्यीम् पीन्बरीएनो टोप् तब मुबल पङ्बे तम् ङचे स्येःबल मुबल। तर देरे एङ्यीमात ता तज्यी? 16 ङचे एङ्यीमात देमेन् तम् पङ्टीबल तज्यीम् ता देरेम् ङ एङ्यीमाकी सत्तुर् तज्यी स्यीम्? 17 भ्युकी लोप्पोन्माचे एङ्यीमात थेङ्यीमापट्टी खबरी य्हक्को व्हम्टीब, तर ज्यब म्हेन्ज्यीम् अय्हीन्। एङ्यीमा ङ ग्यम्से फे:ज्यीम् थेङ्यीमा पट्टीकीनो सेम् पीन्खइ बी म्हेन्ब। 18 खल्चे पङ्लेनो ङ एङ्यीमातेङ् बक्च्य मुबे बेलोरीकीनो अय्हीन् तर ङ अरेबे बेलोरीएनो खेम पङ्लेनो एङ्यीमात ज्यब स्य्हेङ्बरी सेम् पीन्सम् ज्यब य्हीन्ब। 19 ङइ ज्यीद कोलमा, एङ्यीमा ख्रीस्ट्की स्वभाब थोःज्यीम् अब्रगदे सम्म कोल न्हबरी ल्हङ्दु खबतेङ् तब र्हङ्बे दुख ङत तस्यीनो टीब। 20 देरे ङ एङ्यीमातेङ् बक्च्य टीज्यीम् ङचे एङ्यीमातेङ् ज्यबे ग्यम्से तम् पङ्ब खम्सम् गत्ते ज्यब तस्ये मुबल, तर ङ एङ्यीमाकी बीसयरी थोम्बल मुब। हागारतेङ् सारा 21 एङ्यीमा मोसाचे ब्रीबे नीयम्की अधीन्री मुबलमात ङ ङ्योत्प, मोसाचे ब्रीबे नीयम्चे ता पङ्ब एङ्यीमाचे स्येःब? 22 हुजु नीयम्चे पङ्ब, अब्रहाम्ल ज ङ्य्ही मुबल, गीः थेइ बाना हागार पङ्बे म्रीङ्चे न्हबल, गीः सारा पङ्बे थेइ बाना अय्हीन्बे र्हङ्की म्रीङ्चे न्हबल मुबल। 23 थेइ बानाचे न्हबे ज म्हीइ सेम्चे म्हेन्ज्यीम् न्हबल मुबल, तर थेइ म्रीङ्चे न्हबे ज पर्मेस्वर्की बाचा टोप् तबरी न्हबल मुबल। 24 चु तम् ग्यम्से ङ्य्हङ्चे गोब खम्ब, की हुजु अमकोल ङ्य्ही पर्मेस्वर्चे र्हङ्की म्हीमातेङ् स्य्हेङ्बे करार् ङ्य्ही य्हीन्ब। बाना हागार्मी सीनइ पङ्बे गङ्री पर्मेस्वर्चे मोसात न्हङ्बे नीयम् य्हीन्ब। हुजु नीयम्त ङ्येन्बलमा हुजु नीयम्की बानामा य्हीन्ब। 25 बाना हागार्मी अरब् य्हुल्की सीनइ गङ् य्हीन्ब, ओसेम् हागर्त तीन्हम्स्य्होकी यरुस्लेम्तेङ्एनो व्हब खम्ब, तलेपङ्सम् यरुसलेम्की जम्मनो म्हीमा मोसाचे ब्रीबे नीयम्की बाना तबल मुब। 26 तर स्वर्गइ यरुस्लेम्मी स्वतन्त्र मुब, ओसेम् थेनो ङय्हङ्माकी अम य्हीन्ब। 27 तलेपङ्सम् धर्मछ्येःरी ब्रीबल मुब, “कोल अतबे अममा तङो, कोल न्हबे ल्हङ्दु खेमेएनो अस्येबे अममा तङ्ज्यीम् क्रीङो, तलेपङ्सम् र्हेम्बोचे ख्लेथेन्बे अमकोलल बीम र्हेम्बो अरेबे अमकोलल य्हक्को कोलमा तस्ये मुब।” 28 बीस्वासी र्होमा, एङ्यीमा इसाहक र्हङ्ले पर्मेस्वर्चे बाचा स्य्हेङ्जेत्पे ज जमे य्हीन्ब। 29 हुजु बेलोरी म्हीइ सेम्चे म्हेन्ब अनुसार् न्हबे जचे पर्मेस्वर्की आत्मा अनुसार् न्हबे जत दुख पीन्ज्यी ओसेम् देरेएनो होतेबनो मुब। 30 तर धर्म छ्येःचे ता पङ्ब? “बाना अमकोलतेङ् थेइ जत ल्हब्लाको, तलेपङ्सम् बान अय्हीन्बे अमकोल ग्यम्से न्हबे जचे यङ्बे हक् बाना अमकोलइ जचे यङ्स्ये अरे।” 31 होत्तज्यीम् बीस्वासी र्होमा, ङ्य्हङ्मा बान अमकोलइ ज जमे अय्हीन्, तर बाना अय्हीन्बे अमकोलइ ज जमे य्हीन्ब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.