गलाती 3 - पश्चिम तामाङमोसाचे ब्रीबे नीयम् वुइ ख्रीस्ट्री बीस्वास् 1 ओ मुर्ख गलातीथेन्मा! एङ्यीमात खल्चे दुस्ट मोहोनी ल्हइदीज्यी स्यीम्? ङचे एङ्यीमाकी ङोन्रीनो येसु ख्रीस्ट् क्रुस्री स्यीजेत्पे तम्की बारेरी ज्यनले स्येत्पल मुबल। 2 ङ एङ्यीमात तम् गीः ङ्योत्प, एङ्यीमाचे पर्मेस्वर्की आत्मा मोसाचे ब्रीबे पर्मेस्वर्की नीयम्चे पङ्ब र्हङ्ले स्य्हेङ्ज्यीम् यङ्ज्यी वुइ ज्यबे सम्तर् थ्येःज्यीम् बीस्वास् स्य्हेङ्ज्यीम् यङ्ज्यी? 3 एङ्यीमा तले चोतेबे मुर्ख तब? एङ्यीमाचे र्हङ्की जीवन् ख्रीस्ट्री पर्मेस्वर्की आत्मा ग्यम्से तीप्ज्यीम् देरेम् हुजुत एइ र्हङ्की ल्हीःकी बङ्रीनो बेनलब म्हेन्ब? 4 ता एङ्यीमाचे य्हक्को दुखमा ओलेन्नो नाज्यी स्यीम्? देमेन्नो ओलेनोमी अना। 5 पर्मेस्वर्चे एङ्यीमात पबीत्र आत्मा न्हङ्ज्यीम् एङ्यीमाकी गुङ्री अचम्मइ लक्मा स्य्हेङ्जेत्ज्यी। ता चु जम्मनो एङ्यीमाचे मोसाचे ब्रीबे पर्मेस्वर्की नीयम् ङ्येन्बल तज्यीम् स्य्हेङ्जेत्पल य्हीन्ब, वुइ ज्यबे सम्तर् थ्येःज्यीम् बीस्वास् स्य्हेङ्बल तज्यीम् स्य्हेङ्जेत्पल य्हीन्ब? 6 अब्राहाम्त च्यागो, “अब्रहामचे पर्मेस्वर्त बीस्वास् स्य्हेङ्ज्यी, होत्तज्यीम् पर्मेस्वर्चे थेत धर्मी म्ही पङ्ज्यीम् ग्रहन् स्य्हेङ्जेत्ज्यी।” 7 होत्तज्यीम्, पर्मेस्वर्त बीस्वास् स्य्हेङ्बलमानो देमेन्नो अब्राहामकी ज जमेमा य्हीन्ब पङ्बे तम् एङ्यीमाचे स्येःथोब। 8 पर्मेस्वर्चे यहुदी अय्हीन्बे म्हीमातएनो बीस्वास् ग्यम्से धर्मी स्य्हेङ्जेत्प पङ्बे तम् य्हक्को ङोन्ग्यम्नो धर्म छ्येःरी ब्रीबल मुबल। होत्तज्यीम् पर्मेस्वर्चे अब्राहाम्त, “ए ग्यम्सेनो जम्बुलीङ्री मुबे जम्मनो जातीमाचे पर्मेस्वर्की मोलम् यङ्स्ये मुब” बी ज्यबे सम्तर् स्येत्जेत्ज्यी। 9 अब्राहामचे बीस्वास् स्य्हेङ्ज्यीम् मोलम् यङ्ज्यी। होलेनो बीस्वास् स्य्हेङ्बे म्हीमाचे अब्राहामचे र्हङ्लेनो मोलम् यङ्स्ये मुब। 10 धर्मी तबे लागीरी मोसाचे ब्रीबे पर्मेस्वर्की नीयम् ङ्येन्ज्यीम् ब्रब म्हइबे म्हीमाचेम् केम्लङ् यङ्स्ये मुब, तलेपङ्सम् धर्म छ्येःरी चोले ब्रीबल मुब, “मोसाचे ब्रीबे पर्मेस्वर्की नीयम्की छ्येःरी ब्रीबे जम्मनो तम् टोप्ले अङ्येन्बलमा जम्मतनो केम्लङ् फोःस्ये मुब।” 11 होत्तज्यीम् ङ्य्हङ्माचे स्येःब मोसाचे ब्रीबे पर्मेस्वर्की नीयम् ङ्येन्ज्यीम् खलएनो पर्मेस्वर्की ङोन्री धर्मी तब अखम्, तलेपङ्सम् धर्म छ्येःरी ब्रीबल मुब, “पर्मेस्वर्की ङोन्री बीस्वास् ग्यम्से धर्मी तबे म्ही सोस्ये मुब।” 12 तर मोसाचे ब्रीबे पर्मेस्वर्की नीयम्मी बीस्वास्की तम् अय्हीन्, धर्म छ्येःरी चोले ब्रीबल मुब, “मोसाचे ब्रीबे नीयम्मा ङ्येन्ज्यीम् ब्रबे म्ही हुजु ग्यम्सेनो सोस्ये मुब।” 13 मोसाचे ब्रीबे पर्मेस्वर्की नीयम् अङ्येन्बल तज्यीम् ङ्य्हङ्मात फोःथोबे केम्लङ् ख्रीस्ट्चे ङ्य्हङ्माकी लागीरी नाजेत्ज्यी, ओसेम् थेङ्चे ङ्य्हङ्मात हुजु केम्लङ् ग्यम्से फेःपीन्जेत्पल मुब। तलेपङ्सम् धर्म छ्येःरी, “दोङ्बोरी च्योलाबलमा जम्मनो केम्लङ् फोःबल तब” बी ब्रीबल मुब। 14 थेङ्चे ङ्य्हङ्मात फेपीन्जेत्ज्यी, होत्तज्यीम् येसु ख्रीस्ट् ग्यम्से अब्राहामकी मोलम् यहुदी अय्हीन्बे म्हीमाचे यङ्खइ, ओसेम् पर्मेस्वर्चे बाचा स्य्हेङ्जेत्पे पबीत्र आत्मा बीस्वास् ग्यम्से ङ्य्हङ्माचे यङ्खइ। 15 ङइ र्होमा, दीन्र्हङ्स्यीनो म्हीइ जीवन्री तबे तम् ग्यम्से उदाहारन गीः कीन्के। म्ही ङ्य्हीचे थेङ्यीमाकी गुङ्री करार् स्य्हेङ्बल मुसम् हुजुत लीक्यम् खल्चेएनो स्याब वुइ कप्पएनो अखम्। 16 पर्मेस्वर्चे अब्रहामतेङ् थेइ सन्तान्त बाचा स्य्हेङ्जेत्ज्यी। धर्म छ्येःचे, “सन्तान्मात” बी अपङ्, चुचेम् य्हक्को म्हीमात सङ्केत् लब, तर धर्म छ्येःचेम्, “सन्तान्त” बी पङ्ब, चुचेम् म्ही गीःत सङ्केत् लब, हुजुमी ख्रीस्ट् य्हीन्ब। 17 ङचे पङ्ब म्हइबे तम् चु य्हीन्ब, पर्मेस्वर्चे अब्राहामतेङ् करार् गीः स्य्हेङ्जेत्ज्यी। हुजु करार्त चार् सय तीस् बर्स लीप्चे खबे मोसाचे ब्रीबे नीयम्चे ख्लाब अखम्। 18 तलेपङ्सम् पर्मेस्वर्चे न्हङ्जेत्प बी सुङ्बे मोलम् मोसाचे ब्रीबे नीयम् ग्यम्से यङ्सम् बाचा ग्यम्से यङ्बे तम्नो अत। तर पर्मेस्वर्चे बाचा ग्यम्सेनो हुजु मोलम् अब्रहाम्त न्हङ्जेत्ज्यी। 19 होले पङ्सम् पर्मेस्वर्चे मोसाचे ब्रीबे नीयम् तले न्हङ्ज्यी स्यीम्? मोसाचे ब्रीबे नीयम म्हीमाकी पाप ङोन्बरी पीन्बल मुबल। तर पर्मेस्वर्चे अब्रहाम्त बाचा स्य्हेङ्जेत्पे सन्तान अब्योन्युगते सम्मकीनो ङ्येन्ज्यीम् ब्रबे लागीरी हुजु नीयम् न्हङ्बल मुबल। मोसाचे ब्रीबे नीयम् स्वर्गदुत्मा ग्यम्से मोसत पीन्ज्यी, ओसेम् मोसा पर्मेस्वर्तेङ् म्हीइ गुङ्री तम् स्येत्बे म्ही तज्यी। 20 ङ्य्हीकी गुङ्री बाचा स्य्हेङ्बरी थेङ्य्हीकी गुङ्री तम् स्येत्परी ल्हो-ल्हो गीः तथोब, तर परमेस्वर्चे अब्राहामतेङ् थेङ् गीःचेकीनो बाचा स्य्हेङ्जेत्ज्यी। मोसाचे ब्रीबे पर्मेस्वर्की नीयम्की लक् 21 होले पङ्सम् ता मोसाचे ब्रीबे नीयम् पर्मेस्वर्चे स्य्हेङ्जेत्पे बाचामाइ बीरोधी य्हीन्ब? य्हीन्नो अय्हीन्। मोसाचे ब्रीबे नीयम् म्हीचे जीवन् यङ्खइ पङ्ज्यीम् पीन्बल य्हीन्सम् मोसाचे ब्रीबे नीयम् ङ्येन्ज्यीम्नो म्हीमा पर्मेस्वर्की ङोन्ग्यम् धर्मी ङोन्स्ये मुबल। 22 तर धर्म छ्येःचे पङ्ब, जम्मनो जम्बुलीङ् पापकी सक्तीइ दुङ्री मुब। होत्तज्यीम् येसु ख्रीस्ट्री बीस्वास् स्य्हेङ्बलमात पर्मेस्वर्चे न्हङ्ब बी बाचा स्य्हेङ्जेत्पे मोलम् बीस्वास् स्य्हेङ्बलमाचेकीनो यङ्बल मुब। 23 तर पर्मेस्वर्चे ङ्य्हङ्मात ख्रीस्ट्री बीस्वास्की ग्यम् ङोन्जेत्प बीम ङोन्ग्यम् मोसाचे ब्रीबे पर्मेस्वर्की नीयम्चेनो ङ्य्हङ्मा जम्मत जेल्री च्युप्पे म्हीत स्यीपाइचे रुङब र्हङ्ले रुङ्ज्यीम् थेन्बल मुबल। 24 बीस्वास् ग्यम्से ङ्य्हङ्मा धर्मी तब खम्खइ पङ्ज्यीम् ख्रीस्ट् ब्योन्खअजेत् गदे सम्म मोसाचे ब्रीबे पर्मेस्वर्की नीयम् ङ्य्हङ्माकी लोप्पोन् तज्यी। 25 तर देरेम् येसु ख्रीस्ट्री बीस्वास् स्य्हेङ्बे बेलो खज्यीन्बल तज्यीम् ङ्य्हङ्मा मोसाचे ब्रीबे पर्मेस्वर्की नीयम्की अधीन्री टीअथो। 26 तलेपङ्सम् बीस्वास् ग्यम्से एङ्यीमा जम्मनो ख्रीस्ट्तेङ् गीः तज्यीम् पर्मेस्वर्की ज जमेमा तबल मुब। 27 ओसेम् एङ्यी ख्रीस्ट्री बप्तीस्मा कीन्बलमा जम्मनो ख्रीस्ट् र्हङ्बनो तबल मुब। 28 होत्तज्यीम् यहुदी वुइ ग्रीक् य्हीन्लेनो, बान वुइ स्वतन्त्र य्हीन्लेनो, अपकोल वुइ अमकोल य्हीन्लेनो एङ्यीमा जम्मनो येसु ख्रीस्ट्री गीःनो य्हीन्ब। 29 एङ्यीमा ख्रीस्ट्ल य्हीन्सम् एङ्यीमा अब्राहामकी सन्तान्मा य्हीन्ब, ओसेम् एङ्यीमाचे पर्मेस्वर्चे अब्रहाम्तेङ् बाचा स्य्हेङ्जेत्पे मोलम् यङ्स्ये मुब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.