गलाती 2 - पश्चिम तामाङपावलतेङ् ल्हो-ल्हो प्रेरीत्मा 1 ल्हेगोर् गीःस्यी ङ्य्हीत्तीङ लीप्चे बारनबास्तेङ् तीतस्त बोर्ज्यीम् ङ देबेएनो यरुसलेम्री ङ्यीज्यी। 2 पर्मेस्वर्चे ङत हुजुरी ङ्यीथोब बी ङोन्जेत्पल तज्यीम् ङ हुजुरी ङ्यीज्यी। ङचे ङोन्ग्यम् लोप्पे तम्मातेङ् देरे लोप्टीबे तम्मा डीःब बी थेङ्यीमाचे स्येःखइ पङ्बे सेम् ङल मुबल, ओसेम् हुजुमा खेर अय्हर्खइ बी ङचे यहुदी अय्हीन्बे म्हीमात स्येत्पे ज्यबे सम्तर् मन्डलीइ अगुवामातकीनो खुसुक्ले खतु लज्यीम् स्येत्ज्यी। 3 थेङ्यीमाचे ङतेङ् बक्च्य मुबे तीतस्त ग्रीक य्हीन्लएनो खतना स्य्हेङ्बरी कर् अल। 4 होलेतलेनो खतनाकी तम् रेःज्यी, तलेपङ्सम् डेत् डेत् भ्युकी बीस्वासीमा खुसुक्ले वङ्ज्यीम् ङ्य्हङ्माचे येसु ख्रीस्ट्री यङ्बे स्वतन्त्रताकी जासुस लज्यीम् ङ्य्हङ्मात मोसाचे ब्रीबे नीयम् ङ्येन्बुङ्ज्यीम् हुजु नीयम्की बाना तपुङ्ब म्हइज्यी। 5 तर ज्यबे सम्तर्की देमेन् एङ्यीमातेङ् खेमपङ्लेनो तखइ पङ्ज्यीम् थेङ्यीमाकी ङोन्ग्यम् ङ्यीमाचे य्हम्बगीएनो स्य्हु अल। 6 तर यरुस्लेम्की हुजु अगुवामा गदे ङ्हच्छ्यङ् मुलेएनो थेङ्यीमाचे ङत छार् सल्ल तएनो अपीन्। थेङ्यीमा ङइ लागीरी तएनो अय्हीन्, तलेपङ्सम् पर्मेस्वर्चे म्हीइ लीः स्हीअजेत्, 7 बरु झेन् थेङ्यीमाचे म्रङ्ज्यी की पर्मेस्वर्चे यहुदीमात ज्यबे सम्तर् स्येत्परी पत्रुस्त दम्जेत्प र्हङ्ले यहुदी अय्हीन्बे म्हीमात ज्यबे सम्तर् स्येत्परी ङत देम्जेत्पल य्हीन्ब। 8 तलेपङ्सम् पत्रुस्त यहुदीमाकी गुङ्री प्रेरीत्की लक् स्य्हेङ्नलजेत्पे पर्मेस्वर्चेनो ङतएनो यहुदी अय्हीन्बे म्हीमाकी गुङ्री प्रेरीत्की लक् स्य्हेङ्नलजेत्पल य्हीन्ब। 9 याकुब, पत्रुस ओसेम् युहन्ना थेङ्यीमा सोम् यरुसलेम्री मन्डलीइ अगुवामा मुबल। पर्मेस्वर्चे ङत न्हङ्जेत्पे अनुग्रहत स्येःज्यीम् थेङ्यीमाचे बारनबास्तेङ् ङत थेङ्यीमातेङ् बक्च्य लक् स्य्हेङ्बे र्हो पङ्ज्यीम् स्वागत स्य्हेङ्ज्यी। ङ्यी ङ्य्हीमी यहुदी अय्हीन्बे ल्हो-ल्हो म्हीमात प्रचार् स्य्हेङ्बरी ओसेम् थेङ्यीमामी यहुदीमाकी गुङ्रीनो लक् स्य्हेङ्बरी ङ्यीमाकी तम् डीःज्यी। 10 ओसेम् प्रङ्नमात ङ्यीमाचे र्हो लस्यीनो टीथोब पङ्बे तम्कीनो थेङ्यीमाचेएनो पङ्ज्यी। हुजु लक् स्य्हेङ्बरी ङलएनो य्हक्को सेम् मुबल। पावल पत्रुस्तेङ् अडीःबल 11 तर पत्रुस एन्टीओखीयारी खबे बेलोरी ङचे थेत बीस्वासीमाकी ङ्होन्सङ्नो बराज्यी। तलेपङ्सम् थेचे स्य्हेङ्बे लक् ठीक् अरेबल। 12 याकुबचे पीत्खबे डेत्डेत् म्हीमा खब बीम ङोन्ग्यम् पत्रुसचे यहुदी अय्हीन्बे बीस्वासीमातेङ् बक्च्य चब थुङ्ब स्य्हेङ्ब मुबल। तर हुजु म्हीमा खब बीसेम् थेचे यहुदी अय्हीन्बे बीस्वासीमातेङ् चब थुङ्ब स्य्हेङ्ब पीत्ज्यीम् फेःज्यीम् टीज्यी, तलेपङ्सम् जम्मनो बीस्वासीमाल खतन स्य्हेङ्थोब पङ्बे समुहतेङ् थे लोङ्बल मुबल। 13 ओसेम् ल्हो-ल्हो यहुदी बीस्वासीमाचेएनो पत्रुस्चे र्हङ्लेनो कपटी लक् स्य्हेङ्ज्यी, होत्तज्यीम् बारनबासएनो थेङ्यीमाकी कपटी लक्की लीप्चे ब्रज्यी। 14 थेङ्यीमा ज्यबे सम्तर्की देमेन् अनुसार् ब्रबल अम्रङ्ज्यीम् ङचे जम्मइ ङ्होन्हङ्सनो पत्रुसत पङ्ज्यी, “ए यहुदी तज्यीमएनो यहुदी अय्हीन्बे म्हीमा र्हङ्ले ब्रब पङ्सम्, यहुदी अय्हीन्बे म्हीमात यहुदीमा र्हङ्ले ब्रउ बी खले कर् लब?” यहुदीमातेङ् यहुदी अय्हीन्बे म्हीमा जम्मनो बीस्वास् ग्यम्से थर्बल 15 ङ्य्हङ्मामी न्हब य्हङ्सेनो यहुदी य्हीन्ब, ओसेम् मोसाचे ब्रीबे पर्मेस्वर्की नीयम् अङ्येन्बे यहुदी अय्हीन्बे म्हीमा र्हङ्बे पापीमा अय्हीन्। 16 होलेतलेनो ङ्य्हङ्माचे स्येःब, मोसाचे ब्रीबे पर्मेस्वर्की नीयम् म्हन्दीज्यीम् म्ही धर्मी अत, तर येसु ख्रीस्ट्त बीस्वास् स्य्हेङ्ज्यीम्कीनो धर्मी तब। होत्तज्यीम् मोसाचे ब्रीबे पर्मेस्वर्की नीयम् म्हन्दीज्यीम् अय्हीन् तर ख्रीस्ट्री थेन्बे बीस्वास् ग्यम्से धर्मी तबरी ङ्य्हङ्माचेएनो ङ्य्हङ्माकी बीस्वास् येसु ख्रीस्ट्री थेन्ज्यी, तलेपङ्सम् मोसाचे ब्रीबे पर्मेस्वर्की नीयम् ङ्येन्ज्यीम् खलएनो धर्मी अत। 17 ङ्यीमा ख्रीस्ट्री बीस्वास् स्य्हेङ्ज्यीम् धर्मी तब म्हइब, तर ल्हो-ल्हो म्हीमाचे ङ्यीमाएनो यहुदी अय्हीन्बे म्हीमा र्हङ्ले पापीनो यङ्ज्यी पङ्सम् त ख्रीस्ट्चेनो ङ्य्हङ्मात पाप स्य्हेङ्नलजेत्प स्यीम्? होले स्य्हेङ्अजेत्! 18 तलेपङ्सम् र्हङ्चेनो फुप्लाबे स्हेःत ङचे दोःज्यीम् स्य्हेङ्ज्यी पङ्सम्, ङचे र्हङ्चे र्हङ्तनो ङ अपराधी य्हीन्ब बी ङोन्ब। 19 तलेपङ्सम् ङ मोसाचे ब्रीबे पर्मेस्वर्की नीयम् अनुसार् सोब म्हइमम् हुजु नीयम्चे ङत दोसी ङोन्ज्यी। होत्तज्यीम् पर्मेस्वर्की लागीरी सोब खम्खइ पङ्ज्यीम् ङचे हुजु नीयम् ङ्येन्ज्यीम् ब्रब पीत्ज्यी। 20 ङ ख्रीस्ट्तेङ् बक्च्य क्रुस्री च्योबल मुब, देरे य्हङ्से सोबल ङ अय्हीन्, तर ख्रीस्ट् ङन्हङ् सोजेत्प। देरे ल्हीःरी सोबे चु जीवन् ङ पर्मेस्वर्की जत बीस्वास् स्य्हेङ्ज्यीम् सोब, थेङ्चेनो ङत म्होइजेत्ज्यी, ओसेम् ङइ लागीरी र्हङ्की जीवन् न्हङ्जेत्ज्यी। 21 ङ पर्मेस्वर्की अनुग्रहत लक् अतबल अपङ्, तलेपङ्सम् म्ही मोसाचे ब्रीबे पर्मेस्वर्की नीयम् ङ्येन्ज्यीम् धर्मी तब खम्सम् ख्रीस्ट् स्यीजेत्पल स्यीत्तीरी तब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.