गलाती 1 - पश्चिम तामाङ1 ङ पावलत प्रेरीत तबरी न्ह म्हीचे पीत्पल य्हीन्ब न्ह म्हीमाइ अधीकार् ग्यम्से पीत्पल य्हीन्ब, तर येसु ख्रीस्ट्त स्यीब ग्यम्से सोनलजेत्पे पर्मेस्वर् अपतेङ् येसु ख्रीस्ट्चे ङत पीत्जेत्पल य्हीन्ब। 2 ङचे चु चीठी ब्रीज्यीम् ङतेङ् चुरी मुबे जम्मनो बीस्वासी र्होमा ग्यम्से गलातीया प्रदेस्की मन्डलीमात पीत्खटीब। 3 पर्मेस्वर् ङ्य्हङ्की अपतेङ् प्रभु येसु ख्रीस्ट्स्चे एङ्यीमात अनुग्रहतेङ् सान्ती न्हङ्खइ। 4 ङ्य्हङ्माकी पर्मेस्वर् अपइ थुः अनुसार् ङ्य्हङ्मात चु दुस्ट् जम्बुलीङ् ग्यम्से फेःपीन्बे लागीरी येसु ख्रीस्ट्चे र्हङ्तनो ङ्य्हङ्माकी पाप्माकी लागीरी स्यीबरी सोप्तीपीन्जेत्ज्यी। 5 पर्मेस्वर्तनो खेम पङ्लेनो महीमा तस्यीनो टीखइ! आमेन्। ल्हो-ल्हो ज्यबे सम्तर् अरे 6 ओसेम् एङ्यीमात ख्रीस्ट्की अनुग्रहरी सोबरी ङ्होत्जेत्पे पर्मेस्वर्त चोते ग्योनेनो पीत्ज्यीम् एङ्यीमाचे ल्हो-ल्हो सम्तर्त ज्यबे सम्तर् म्हेन्ज्यीम् हुजुइ लीप्चे ब्रबल म्रङ्ज्यीम् ङ अचम्म तज्यी। 7 देमेन्नो ल्हो-ल्हो ज्यबे सम्तर्मी तएनो अरे। तर गदे म्हीमाचेमी ख्रीस्ट्की ज्यबे सम्तर्त भ्यु तनलबे लागीरी एङ्यीमात थोम्न लटीब मुब। 8 ओसेम् ङ्यीमाचे प्रचार् स्य्हेङ्बे ज्यबे सम्तर् बीम ल्हो-ल्हो ज्यबे सम्तर् खल्चे पङ्लेनो प्रचार् स्य्हेङ्सम् हुजु ङ्यीमा वुइ स्वर्ग ग्यम्से युबे स्वर्गदुत्नो य्हीन्लेनो थेत केम्लङ् फोःखइ। 9 ङ्यीमाचे चु तम् ङोन्ग्यम्एनो पङ्बल य्हीन्ब, ओसेम् ङ देरेएनो पङ्ब, खल्चे पङ्लेनो एङ्यीमाचे बीस्वास् स्य्हेङ्बे ज्यबे सम्तर् बीम ल्हो-ल्हो ज्यबे सम्तर् एङ्यीमात प्रचार् स्य्हेङ्ज्यी पङ्सम् थेत केम्लङ् फोःखइ। 10 ङचे चोले पङ्ज्यीम् ता ङचे म्हीमात तङ्न लब म्हइटीब स्यीम्? अय्हीन्, ङमी पर्मेस्वर्त तङ्नलइ म्हेन्ब। ता म्हीमाचे ङत म्होइखइ म्हेन्टीब? ङचे होतेब म्हेन्टीब पङ्सम् ङ ख्रीस्ट्की योक्पो तस्ये अरेबल। पावल खले प्रेरीत तबल 11 ङइ बीस्वासी र्होमा, ङचे प्रचार् स्य्हेङ्बे ज्यबे सम्तर् म्हीमाचे चोम्बे सम्तर् अय्हीन् पङ्बे तम् एङ्यीमाचे ज्यनले गोखइ पङ्बे सेम् ङल मुब। 12 तलेपङ्सम् चु ज्यबे सम्तर् ङचे म्हीमा ग्यम्से यङ्बल अय्हीन्, म्हीमाचे लोप्पलएनो अय्हीन्। तर येसु ख्रीस्ट् र्हङ्चेनो ङत स्ये:नलजेत्पल य्हीन्ब। 13 यहुदी धर्म अनुसार् ब्रबे बेलोरी ङइ जीवन खतेब मुबल बी एङ्यीमाचे स्येःबलनो मुब। हुजु बेलोरी ङचे पर्मेस्वर्की मन्डलीत य्हक्को दुख पीन्ज्यी ओसेम् नास् लब म्हइज्यी। 14 ओसेम् यहुदी धर्म अनुसार् ब्रबे ङइ यहुदी दउतर्मान्हङ्री ङ जम्मइ अगुवा मुबल। ङइ म्हेम्हेमाकी पेमा ङचे य्हक्को ज्यनले ङ्येन्ज्यीम् ब्रब मुबल। 15-16 तर पर्मेस्वर्चे र्हङ्की अनुग्रह अनुसार् ङ न्हब बीम ङोन्नो ङत दम्जेत्ज्यी, ओसेम् र्हङ्की लक् स्य्हेङ्बरी ङ्होत्जेत्ज्यी। ङचे यहुदी अय्हीन्बे म्हीमात ज्यबे सम्तर् प्रचार् स्य्हेङ्ब खम्खइ बी थेङ्चे र्हङ्की ज येसु ख्रीस्ट्त ङचे स्येःन लजेत्परी थेङ् तङ्जेत्ज्यी। हुजु बेलोरी ङचे खल म्हीतेङ्एनो सल्ल कीन्बरी अङ्यी। 17 ओसेम् ङ बीम ङोन्नो प्रेरीत तबलमाज सल्ल कीन्बरीएनो ङ यरुसलेम्री अङ्यी, तर ङमी ग्योन् ग्योन्नो अरब् य्हुल्री ङ्यीज्यी। ओसेम् लीक्यम् ङ दमस्कस सहर्री दोःखज्यी। 18 ओसेम् सोम्तीङ् लीप्चेकीनो ङ पत्रुसत खतु लबरी यरुसलेम्री ङ्यीज्यी, ओसेम् थेतेङ् सत ङ्य्ही स्यी तीरेत टीज्यी। 19 ङचे हुजुरी प्रभुइ अले याकुब बीम् ल्हो-ल्हो प्रेरीतमा खल्तएनो खतु अत। 20 पर्मेस्वर्की ङोन्ग्यम् ङ एङ्यीमात पङ्ब ङचे एङ्यीमात ब्रीटीबे तम्मा भ्यु अय्हीन्। 21 हुजु लीप्चे ङ सीरीयातेङ् कीलीकीयाकी प्रदेस्मारी ङ्यीज्यी। 22 ओसेम् हुजु बेलो सम्म यहुदीयाकी मन्डलीइ म्हीमाचे ङत स्येःबल अरेबल। 23 थेङ्यीमाचे, “ङोन्ग्यम् ङ्य्हङ्मात दुख पीन्ज्यीम् ङ्य्हङ्माकी बीस्वास्त नास् स्य्हेङ्ब म्हइबे म्हीचे देरेम् हुजु बीस्वास्तनो स्येत्ज्यीम् ब्रब रो” बी पङ्बे तम्कीनो थ्येःबल मुबल। 24 ओसेम् ङ होले पोबल तज्यीम् थेङ्यीमाचे पर्मेस्वर्त तोप्ज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.