एफीसी 6 - पश्चिम तामाङकोलमातेङ् अप-अममा 1 कोलमा, प्रभुरी र्हङ्की अप-अमचे कुल्बे तम्मा ङ्येनो, तलेपङ्सम् चु ठीक् य्हीन्ब। 2 “र्हङ्की अप-अमत स्हेस स्य्हेङो।” चुमी पर्मेस्वर्चे बाचा लजेत्ज्यीम् गोदोब्न्हङ् ङोन्ग्यम् न्हङ्जेत्पे अर्ती य्हीन्ब। 3 होले स्य्हेङ्ज्यी पङ्सम् एङ्यीमात ज्यब तस्ये मुब ओसेम् जम्बुलीङ्री एङ्यीमाल छे र्हीङ्स्ये मुब। 4 अपमा, र्हङ्की कोलमात बोमो खन थलउ, तर थेङ्यीमात प्रभुइ फ्रोइ अनुसार् लोप्ज्यीम् दुलो। बानतेङ् मालीक् 5 बानमा, ख्रीस्ट्की सेव स्य्हेङ्ब र्हङ्ले एङ्यीमाचे सेम् य्हङ्सेनो जम्बुलीङ्की एङ्यीमाकी मालीक्मात स्हेस लज्यीम् लोङ्ज्यीम् थेङ्यीमाचे कुल्बे तम् ङ्येनो। 6 एङ्यीमात मालीक्चे च्याटीबे बेलोरीकीनो एङ्यीमाचे थेत तङ्नलबरी थेइ ङोन्ग्यम् थेचे कुल्बे तम् ङ्येन्ब अय्हीन्, तर पर्मेस्वर्की थुः अनुसार् ख्रीस्ट्की बानचे र्हङ्ले र्हङ्की सेम् य्हङ्सेनो लक् स्य्हेङो। 7 म्हीइ लागीरी स्य्हेङ्बल र्हङ्ले अय्हीन् तर प्रभुइ लागीरी स्य्हेङ्ब र्हङ्ले सेम् य्हङ्सेनो लक् स्य्हेङ्ङो। 8 तलेपङ्सम् बान य्हीन्लेएनो अय्हीन्लेएनो खजु म्हीचे ज्यबे लक् स्य्हेङ्ब प्रभुचे थेत इनाम् न्हङ्जेत्स्ये मुब पङ्बे तम् एङ्यीमाचे स्येःबलनो मुब। 9 मालीक्मा, होलेनो एङ्यीमाचेएनो र्हङ्की बानमात ज्यब स्य्हेङो ओसेम् थेङ्यीमात धम्की पीन्ब पीतो, तलेपङ्सम् एङ्य्हीलनो गीकीनो मालीक् स्वर्गरी मुब, ओसेम् थेङ्चे खल्तएनो लीः च्याज्यीम् न्याय स्य्हेङ्अजेत्। पर्मेस्वर्चे न्हङ्जेत्पे हातहतीयार् 10 ज्युःरी, प्रभुरी ओसेम् थेङ्की ङ्य्हच्छ्यङ् सक्तीरी बङ्ज्येन् तउ 11 स्यीपइमाचे लडाइकी बेलोरी हतीयार्मा थोःब र्हङ्ले एङ्यीमाचेएनो पर्मेस्वर्चे न्हङ्जेत्पे जम्मनो हतीयारमा सैतान्की दुस्ट योजनमाकी बीरुद्दरी डाबरी थोःगो। 12 तलेपङ्सम् ङ्य्हङ्माचे म्हीमातेङ् लडाइ अस्य्हेङ्, तर आत्मीक् दुस्ट सासक्माकी बीरुद्दरी, सक्तीमाकी बीरुद्दरी, तीन्हम्स्योइ जम्बुलीङ्की म्हुन्दुङ्की सासक्माकी बीरुद्दरी ओसेम् स्वर्गरी मुबे जम्मनो दुस्ट आत्मामाकी बीरुद्दरी ङ्य्हङ्माचे लडाइ स्य्हेङ्ब य्हीन्ब। 13 होत्तज्यीम् पर्मेस्वर्चे न्हङ्जेत्पे जम्मनो हतीयार्मा थोःगो। होले एङ्यीमाचे हतीयार्मा थोःज्यी पङ्सम् सैतान्की स्यीपइमा एङ्यीमातेङ् छेत्परी खबे दीन्री एङ्यीमाचे छेत्प खम्स्ये मुब, ओसेम् एङ्यीमाचे खम्ब गदे जम्मनो स्य्हेङ्ज्यीम्एनो एङ्यीमा रप्स्यीनो टीस्ये मुब। 14 होत्तज्यीम् र्हङ्की केप्प देमेन्चे खीःज्यीम्, कुत्तो जोगइतीबे धार्मीक्ताकी भोटो र्हङ्बे कवच येन्ज्यीम् रेःज्यीम् टीउ। 15 ओसेम् स्यीपाइचे पनेइ येन्ज्यीम् छेत्परी टोप् तब र्हङ्ले एङ्यीमाचेएनो ङ्य्हङ्मात सान्ती पीन्बे पर्मेस्वर्की ज्यबे सम्तर्त भर् लज्यीम् टोप्ले टीउ। 16 होदेकीनो अय्हीन् बीस्वास्री कोङो हुजु एङ्यीमात जोगइतीबे ढाल् य्हीन्ब। हुजु ग्यम्से एङ्यीमाचे सैतान्की मे लुम्बे म्यमा जम्मनो सेत्प खम्स्ये मुब। 17 ओसेम् स्यीपाइमाचे फइकी टुबी कुःब र्हङ्ले मुक्तीइ टुबी कुःगो, ओसेम् पबीत्र आत्माइ तर्वल् थोःगो, हुजुमी पर्मेस्वर्की फ्रोइ य्हीन्ब। 18 खेम पङ्लेनो पबीत्र आत्मारी खजु बेलोरी पङ्लेनो जम्मनो तम्मारी प्रार्थना स्य्हेङ्स्यीनो टीउ। चु तम्मात सेम्री थेन्ज्यीम् खेम पङ्लेनो होसीयार् तज्यीम् प्रार्थना स्य्हेङ्स्यीनो टीउ, ओसेम् पर्मेस्वर्की जम्मनो म्हीमाकी लागीरीएनो खेम पङ्लेनो प्रार्थना स्य्हेङो। 19 ओसेम् ङचे तम् पङ्बतेङ् पर्मेस्वर्चेनो ङचे ता पङ्थोब हुजु फ्रोइ न्हङ्जेत्खइ, ओसेम् ङचे ज्यबे सम्तर्की गोबरी गारो तबे तम्मा अलोङ्नले ल्हो-ल्हो म्हीमात ज्यनले गोनलब खम्खइ बी ङइ लागीरीएनो प्रार्थना स्य्हेङो। 20 चु ज्यबे सम्तर् स्येत्पे चव तबल तज्यीम् ङ च्यल्दरी खीःबल मुब। होत्तज्यीम् ङचे खले तम् पङ्थोब होलेनो अलोङ्नले तम् पङ्ब खम्खइ बी प्रार्थना स्य्हेङ्पीनो। ज्युःकी लस्सो 21 ङ्य्हङ्माकी म्होइबे ओसेम् प्रभुइ लक् स्य्हेङ्बे बीस्वासीलो अले तुखीकस्चे एङ्यीमात ङ खतेब मुब ओसेम् ता स्य्हेङ्टीब पङ्बे जम्मनो तम्मा स्येत्स्ये मुब। 22 एङ्यीमाचे ङ्यीमा खतेब मुब पङ्बे तम् स्येःखइ ओसेम् एङ्यीमाकी सेम्री आर् यङ्खइ पङ्ज्यीम् ङचे थेत एङ्यीमाज पीत्खटीब। 23 जम्मनो बीस्वासी र्होमात पर्मेस्वर् अप ओसेम् प्रभु येसु ख्रीस्ट्चे सान्ती, म्होइब, ओसेम् बीस्वास् न्हङ्जेत्खइ। 24 प्रभु येसु ख्रीस्ट्त खेम पङ्लेनो म्होइबे म्हीमा जम्मतेङ्नो पर्मेस्वर्की अनुग्रह तखइ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.