एफीसी 5 - पश्चिम तामाङय्हल्री सोब 1 एङ्यीमा पर्मेस्वर्चे म्होइजेत्पे कोलमा तज्यीम् थेङ् र्हङ्बनो तब म्हइगो। 2 ख्रीस्ट्चे ङ्य्हङ्मात म्होइजेत्ज्यीम् ज्यबे थङ् खबे सङ्स्युतेङ् ठा र्हङ्ले र्हङ्तनो ङ्य्हङ्माकी लागीरी पर्मेस्वर्री सोप्तीजेत्ज्यी। होलेनो एङ्यीमाचेएनो गीःचे गीःत म्होइज्यीम् ब्रथोब। 3 पर्मेस्वर्की म्हीमा तबल तज्यीम् एङ्यीमाकी गुङ्री बेस्या स्य्हेङ्ब, जम्म थोइ असुद्द लक्मा स्य्हेङ्ब, ओसेम् लोभ स्य्हेङ्बे चोतेबे लक्मा गीःएनो तबनो अत। 4 नेइबे तम्मा, मुर्ख तम्मा ओसेम् अज्यबे ठट्ट तम्मा पङ्ब अत, होतेबे तम्मा पङ्बरी छन्द अख। तर एङ्यीमाचे पर्मेस्वर्त व्होर्छ्ये पीन्स्यीनो टीथोब। 5 एङ्यीमाचे चु तम् स्येःनोथोब, बेस्या स्य्हेङ्बे म्ही, असुद्द म्ही ओसेम् लोभ् स्य्हेङ्बे म्हीचे पर्मेस्वर्तेङ् ख्रीस्ट्की य्हुल्री वङ्म्यङ्स्ये अरे। (लोभ् स्य्हेङ्बमी ख्लत तेन्ब र्हङ्बे पाप् य्हीन्ब) 6 खल्चेएनो एङ्यीमात लक् अतबे तम्मा लज्यीम् धोक अपीन्खइ, तलेपङ्सम् चोतेबे तम्माचे लज्यीम् पर्मेस्वर्चे कुल्जेत्पे तम् अङ्येन्बलमात थेङ्चे सजाय न्हङ्जेत्प। 7 होत्तज्यीम् होतेबे म्हीमातेङ् डीःज्यीम् थब्रउ। 8 तलेपङ्सम् तीख्यप् एङ्यीमा म्हुन्दुङ्री मुबल, तर देरेम् प्रभुइ म्हीमा तबल तज्यीम् एङ्यीमा य्हल्री मुब। होत्तज्यीम् एङ्यीमा य्हल्री ब्रबे म्हीमा र्हङ्ब तज्यीम् ब्रउ। 9 तलेपङ्सम् य्हल्री ब्रबे म्हीमाचे जम्मनो ज्यबे लक् ओसेम् धार्मीक् लक्तेङ् देमेन्की लक् स्य्हेङ्ब। 10 ओसेम् प्रभुत सेम्री ङ्यीबे लक् ता य्हीन्ब हुजु स्येःब म्हइगो। 11 म्हुन्दुङ्की अतबे लक्मा स्य्हेङ्ज्यीम् ब्रबे म्हीमातेङ् एङ्यीमा डीःज्यीम् थब्रउ। तर हुजु लक्मा अज्यब य्हीन्ब बी ङोन्पीनो। 12 चु म्हीमाचे लाज्यीम् स्य्हेङ्बे लक्माकी बारेरी तम् पङ्बनो पेत्पे तम् य्हीन्ब। 13 तर तइ तम् पङ्लेनो य्हल्री बज्यीम् ङोन्ज्यी पङ्सम् जम्मचेनो ज्यनले म्रङब, 14 ओसेम् हुजु य्हल्री ङोन्बे जम्मनो तम् ज्यनले म्रङ्ब। कोइ-कोइ म्हीमाचे चोले पङ्ब, “ओ म्हेर्बे म्हीमा रेःको ओसेम् स्यीब ग्यम्से सोम्बो तउ, ओसेम् ख्रीस्ट्चे एङ्यीमात य्हल् न्हङ्जेत्स्ये मुब।” 15 होत्तज्यीम् एङ्यीमा खले ब्रब पङ्बे तम्री होसीयार् तउ, मुर्ख म्ही र्हङ्ब तज्यीम् अय्हीन्, तर बुद्दी मुबे म्ही र्हङ्ब तज्यीम् ब्रउ। 16 ओसेम् एङ्यीमाचे ज्यबे लक्मा स्य्हेङ्बरी मौक यङ्सम् स्य्हेङ्ब थपीतो। तलेपङ्सम् तीन्हम्स्य्हो म्हीमाचे दुस्ट लक्मा स्य्हेङ्ब। 17 होत्तज्यीम् मुर्ख थतउ, तर एङ्यीमाचे ता स्य्हेङ्खइ पङ्बे थुः प्रभुल मुब हुजु गोउ। 18 ज्यी थुङ्ज्यीम् ङ्य्हेज्यीम थब्रउ, तलेपङ्सम् हुजुचेम् एङ्यीमाकी जीवन् न्होङ्नलब, तर पबीत्र आत्माचे प्लीङो। 19 गीःचे गीःतेङ् भजनमा, व्हइमा ओसेम् आत्मीक् व्हइमा कोज्यीम् ओसेम् र्हङ्की जम्मनो सेम् य्हङ्से प्रभुइ लागीरी व्हइमा कोज्यीम् थेङ्त तोपो। 20 ङ्य्हङ्की प्रभु येसु ख्रीस्ट्की छेन्री पर्मेस्वर् अपत जम्मनो तम्मारी खेम पङ्लेनो व्होर्छ्ये पीन्स्यीनो टीउ। म्रीङ् र्हेम्बोइ सम्बन्ध 21 एङ्यीमा ख्रीस्ट्त स्य्हेस लबे म्हीमा तबल तज्यीम् गीःचे गीःकी अधीन्री टीउ। 22 म्रीङ्मा, प्रभुइ अधीन्री टीब र्हङ्ले एङ्यीमा र्हङ्-र्हङ्की र्हेम्बोमाकी अधीन्री टीउ। 23 तलेपङ्सम् ख्रीस्ट् मन्डलीइ क्र य्हीन्ब, होलेनो र्हेम्बो म्रीङ्की क्र य्हीन्ब। ओसेम् र्हङ्की ल्हीः मन्डलीत मुक्ती न्हङ्बलेएनो ख्रीस्ट् र्हङ्नो य्हीन्ब। 24 होत्तज्यीम् मन्डली ख्रीस्ट्की अधीन्री टीब र्हङ्ले म्रीङ्माएनो जम्मनो तम्मारी र्हङ्-र्हङ्की र्हेम्बोमाकी अधीन्री टीखइ। 25 र्हेम्बोमा, ख्रीस्ट्चे मन्डलीत म्होइजेत्ज्यीम् र्हङ्की ल्हीःनो मन्डलीइ लागीरी न्हङ्जेत्प र्हङ्ले एङ्यीमाचेएनो र्हङ्-र्हङ्की म्रीङ्मात म्होइगो। 26 ख्रीस्ट्चे मन्डलीत पबीत्र स्य्हेङ्जेत्परी र्हङ्की फ्रोइ ग्यम्से ओसेम् सुद्द स्य्हेङ्जेत्बरी यी ग्यम्से ख्रुजेत्ज्यी। 27 ओसेम् ख्रीस्ट्चे र्हङ्की लागीरीनो मन्डलीत य्हक्को ज्यबतेङ् पबीत्र, ओसेम् दोस् अरेबल स्य्हेङ्बरी, दाग अरेबल, ङ्येर्बङ् अरेबल, ल्हो-ल्हो तइ खोट्एनो अरेबल स्य्हेङ्जेत्ज्यी। 28 होलेनो र्हेम्बोमाचेएनो र्हङ्-र्हङ्की म्रीङ्मात र्हङ्की ल्हीःत र्हङ्ले म्होइथोब। तलेपङ्सम् म्रीङ्त म्होइबलचे र्हङ्तनो म्होइब। 29 खल्चेएनो र्हङ्की ल्हीःत हेल अल, तर ल्हीःत ज्यब स्य्हेङ्बरी चब स्हेः चब ओसेम् ज्यनले स्य्हप्तो लब। होलेनो ख्रीस्ट्चे र्हङ्की मन्डलीतएनो स्य्हप्तो स्य्हेङ्जेत्प। 30 तलेपङ्सम् ङ्य्हङ्मा थेङ्की ल्हीःकी अङ्गमा य्हीन्ब। 31 धर्म छ्येःचे पङ्ब, “होत्तज्यीम् म्हीचे र्हङ्की अप-अमत पीत्ज्यीम् र्हङ्की म्रीङ्तेङ् डीःज्यीम् टीब, ओसेम् थेङ्यीमा ङ्य्हीनो ल्हीः गीः तस्ये मुब।” 32 चुमी ङ्य्हङ्माचे गोबरी गारो तबे तम् य्हीन्ब। तर चु तम्मी ङचे ख्रीस्ट्तेङ् मन्डलीइ बारेरी पङ्बल य्हीन्ब। 33 होत्तज्यीम् एङ्यीमा जम्मचेनो र्हङ्-र्हङ्की म्रीङ्त र्हङ्त र्हङ्ले म्होइथोब, ओसेम् जम्मनो म्रीङ्माचेएनो र्हङ्-र्हङ्की र्हेम्बोत स्हेस स्य्हेङ्थोब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.