एफीसी 4 - पश्चिम तामाङल्हीःरी गीः तब 1 होत्तज्यीम् प्रभुइ लक् स्य्हेङ्बल तज्यीम् झेल्री च्युप्पे म्ही, ङ एङ्यीमात फ्या लज्यीम् पङ्ब, पर्मेवर्चे र्हङ्की म्हीमा तबरी दम्जेत्पे म्हीमाचे सोब र्हङ्बे जीवन् एङ्यीमाचेएनो सोउ। 2 एङ्यीमा खेम पङ्लेनो नम्रतेङ् सोजो ओसेम् धैर्य तज्यीम् ब्रथोब, ओसेम् गीःचे गीःत नाज्यीम् म्होइथोब। 3 एङ्यीमाचे गीःचे गीःतेङ् सान्तीरी टीज्यीम् पबीत्र आत्मारी गीः तबरी बङ् लउ। 4 पर्मेस्वर्चे एङ्यीमात गीःकीनो आस्री ङ्होत्जेत्प र्हङ्ले ल्हीःएनो गीःकीनो मुब, ओसेम् पबीत्र आत्माएनो गीःकीनो मुब। 5 ङ्य्हङ्माल प्रभुएनो गीःकीनो, बीस्वास्एनो गीःकीनो ओसेम् बप्तीस्माएनो गीःकीनो मुब। 6 ओसेम् ङ्य्हङ्मा जम्मलनो पर्मेस्वर्तेङ् अप गीःकीनो य्हीन्ब। थेङ्नो जम्मलनो प्रभु य्हीन्ब। थेङ्चेनो ङ्य्हङ्मा जम्मनो ग्यम्से तज्यीम् लक् स्य्हेङ्जेत्प ओसेम् थेङ् ङ्य्हङ्मा जम्मतेङ्नो स्य्हुजेत्प। 7 तर ङ्य्हङ्मा जम्मतनो ख्रीस्ट्चे र्हङ्चे थुः लजेत्प अनुसार्की बर्दान्मा न्हङ्जेत्पल मुब। 8 होत्तज्यीम् धर्म छ्येःरी चोले पङ्बल मुब, “थेङ् तोर् स्वर्गरी स्येःजेत्पे बेलोरी झेल्री च्युप्पे य्हक्को म्हीमात थेङ्चे र्हङ्तेङ् नोम्जेत्ज्यी ओसेम् थेङ्की म्हीमात बर्दान्मा न्हङ्जेत्ज्यी।” 9 देरेम् “थेङ् नम्तीङ्तोर् स्येःजेत्ज्यी” पङ्बल ता य्हीन्ब? चु पङ्बलमी ख्रीस्ट् ङोन्ग्यम् जम्बुलीङ्री फप्युजेत्ज्यी पङ्बल य्हीन्ब। 10 जम्बुलीङ्री दुङ्री फप्युजेत्पे ख्रीस्ट्नो जम्मनो जम्बुलीङ्त र्हङ्चेनो प्लीङ्नलजेत्परी जोरी जम्मनो स्वर्गमा बीमएनो तोर् स्येःजेत्ज्यी। 11 थेङ्चेनो डेत्त र्हङ्की प्रेरीत्मा, डेत्त अगम्बक्तमा, डेत्त प्रचारक्मा, डेत्त मन्डलीइ पास्टरमा ओसेम् डेत्त लोप्पे म्हीमा तबे लागीरी दम्जेत्ज्यी। 12 ख्रीस्टचेनो पर्मेस्वर्की म्हीमा जम्मतनो थेङ्की लक् स्य्हेङ्बतेङ् ख्रीस्ट्की ल्हीः मन्डलीत बीस्वास्री कोङ्न लबे जीम्मा न्हङ्जेत्ज्यी। 13 चु लक्माचे लज्यीम् ङ्य्हङ्मा जम्मनो ङ्य्हङ्माकी बीस्वास्री ओसेम् पर्मेस्वर्की जइ ज्ञान्की बारेरी गीः तस्ये मुब, ओसेम् ङय्हङ्मा जम्मनो आत्मीक्री च्यीप्पे म्हीमा तस्ये मुब, ओसेम् ङ्य्हङ्माएनो जम्मनो तम्री ख्रीस्ट् र्हङ्बनो तस्ये मुब। 14 हुजु लीप्चे लाबतेङ् छाल्चे खन नाबोर्ज्यी होलेचेनो नाबोर्बे ज्यीद दोङ्ग र्हङ्बे ज्यीद कोलमा र्हङ्ले ङ्य्हङ्मा भ्युकी तम् लोप्पे म्हीमाकी तम्मा ङ्येन्ज्यीम् होलेचेनो य्हर्स्ये अरे। थेङ्यीमाचे लोप्पे भ्यु तम्मा ग्यम्से ल्हो-ल्होमात अज्यबे ग्यम्री बोर्ब म्हइब। 15 बरु म्होइबरी देमेन्कीनो पङ्ज्यीम्, जम्मनो तम्री ङ्य्हङ्मा ख्रीस्ट् र्हङ्ब तस्यीनो बोर्थोब। तलेपङ्सम् ख्रीस्ट् ङ्य्हङ्माकी क्र य्हीन्ब। 16 ओसेम् थेङ् ग्यम्सेनो ल्हीःरी जम्मनो थोचे थोइ अङ्गमा डीःज्यीम् टीबल मुब ओसेम् जम्मनो अङ्गमा ठीक्-ठीक् ग्लामारी थुत्ज्यीम् टीबल मुब। अङ्गमा जम्मचेनो र्हङ्-र्हङ्चे स्य्हेङ्थोबे लक्मा ज्यनले स्य्हेङ्ज्यी पङ्सम् जम्मनो ल्हीः म्होइबरी जेप्प तस्यीनो बोर्ब। ख्रीस्ट्री छार् जीवन् 17 होत्तज्यीम् प्रभुचे ङत न्हङ्जेत्पे अधीकार् ग्यम्से चु तम् पङ्ब, देरेम् एङ्यीमाचे प्रभुत अस्येःबे म्हीमाचे र्हङ्ले थस्य्हेङो। तलेपङ्सम् थेङ्यीमाचेम् लक् अतबे तम्मा म्हेन्ब। 18 थेङ्यीमाचे ज्यनले गोब अखम्। थेङ्यीमा पर्मेस्वर्चे न्हङ्जेत्पे जीवन् ग्यम्से थारीङ् मुब, तलेपङ्सम् थेङ्यीमाचे पर्मेस्वर्की बारेरी तेएनो ङ्येन्बे सेम् अलबल तज्यीम् थेङ्यीमाकी सेम् कोङ्बल मुब। 19 थेङ्यीमाकी पेत्पे सेम्नो म्हबल मुब ओसेम् थेङ्यीमाचे अज्यबे सेम्चे म्हेन्बे अज्यबे तम्मा ङ्येन्ज्यीम् जम्मनो असुद्द लक्मा स्य्हेङ्स्यीनो टीबरी र्हङ्तनो सोप्तीबल मुब। 20 तर एङ्यीमाचेम् ख्रीस्ट्की बारेरी होतेबे अज्यबे तम्मा लोप्पल अरे। 21 देमेन्नो एङ्यीमाचे थेङ्की बारेरी थ्येःज्यीम् थेङ्की डब तबल तज्यीम् येसुइ देमेन्त लोप्ज्यी। 22 होत्तज्यीम् एङ्यीमाचे ङोन्ग्यम्की पाप् स्वभाब्मा अनुसार् सोबे एङ्यीमाकी पुरानो जीवन् सोब पीत्लाको। एङ्यीमाकी हुजु ङोन्ग्यम्की जीवन्मी अज्यबे सेम्चे म्हेन्बे लुबे तम्माचे न्होङ्टीब मुबल। 23 पर्मेस्वर्की आत्माचे एङ्यीमाकी सेम्त छार् स्य्हेङ्जेत्खइ। 24 ओसेम् पर्मेस्वर्चे एङ्यीमात थेङ् र्हङ्ब तबे छार् स्वरुप् न्हङ्जेत्पल मुब। होत्तज्यीम् एङ्यीमाचे र्हङ्की जीवन् देमेन्की धार्मीक्तातेङ् पबीत्रतारी सोथोःब। 25 होत्तज्यीम् भ्यु पङ्ब पीत्ज्यीम् जम्मचेनो गीःचे गीःतेङ् देमेन्की तम् पङो, तलेपङ्सम् ङ्य्हङ्मा जम्मनो ख्रीस्ट्की ल्हीःरी मुबे अङ्गमा य्हीन्ब। 26 एङ्यीमात बोमो खलेएनो पाप् थस्य्हेङो। दीनी गल्ब बीम ङोन्ग्यम्नो एङ्यीमाकी बोमो स्यीथोब। 27 ओसेम् सैतान्त लक् स्य्हेङ्बे मौक थपीनो। 28 खल्ल पङ्लेनो य्हो लबे बानी मुसम् देरेम् य्हो लब पीत्थोब। तर थेचे र्हङ्चेनो दुख लज्यीम् इमान्दार्ले लक् स्य्हेङ्थोब, ओसेम् थेचे तोःबे म्हीमात ता पङ्लेनो पीन्ब खम्थोब। 29 एङ्यीमाकी सुङ्चे र्होत न्होङ्नलबे तम्मा थथोलो, तर एङ्यीमाचे पङ्बे तम् थ्येःबलमात ज्यब तनलबतेङ् आर् खनलबे तम्माकीनो पङ्थोब। 30 ओसेम् पर्मेस्वर्की पबीत्र आत्मात दुखी तन थलउ, तलेपङ्सम् पबीत्र आत्मानो एङ्यीमात फेःपीन्बे दीन्की लागीरी यङ्बे छाप् य्हीन्ब। 31 जम्मनो अज्यबे तम्, बङ्ब छेत्प ओसेम् बोमो लब पीतो। केत्पतेङ् नीन्द लब पीतो, जम्म थोइ अज्यबे बानी ब्यहोर्मा एङ्यीमाचे पीत्लाको। 32 बरु दय मुबे म्हीमा तज्यीम् गीःचे गीःत म्होइगो। पर्मेस्वर्चे ख्रीस्ट्री एङ्यीमात क्षम न्हङ्जेत्प र्हङ्ले एङ्यीमाचेएनो गीःचे गीःत क्षम पीनो। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.