एफीसी 3 - पश्चिम तामाङयहुदी अय्हीन्बे म्हीमाकी लागीरी पावलकी लक् 1 होत्तज्यीम् ङ पावल, एङ्यी यहुदी अय्हीन्बे म्हीमाकी गुङ्री ज्यबे सम्तर् स्येत्पे लक् स्य्हेङ्बल तज्यीम् ङत जेल्री च्युप्पल मुब। 2 एङ्यी यहुदी अय्हीन्बे म्हीमाकी लागीरी ङचे पर्मेस्वर्की अनुग्रहकी ज्यबे सम्तर् स्येत्पे लक्की जीम्मा यङ्बल मुब पङ्बे तम् एङ्यीमाचे थ्येःबलनो मुब। 3 पर्मेस्वर्चे र्हङ्की रहस्यइ तम् ङत ङोन्जेत्ज्यी। हुजुइ बारेरी ङचे एङ्यीमात ङोन्ग्यम्नो तुन्जले ब्रीबल मुबल। 4 ओसेम् एङ्यीमाचे ङचे ब्रीबे हुजु तम्मा खेत्प बीसेम् ङचे ख्रीस्ट्की र्हस्यइ तम्की बारेरी गदे ज्यनले गोनेम् बी एङ्यीमाचे स्येःस्ये मुब। 5 हुजु तम् ङोन्ग्यम्की बेलोरी ल्हो-ल्हो म्हीमाचे स्येःनलबल अरेबल। तर देरेम् हुजु तम् पबीत्र आत्मा ग्यम्से थेङ्की पबीत्र प्रेरीत्मातेङ् अगम्बक्तमात पर्मेस्वर्चे स्येःनलजेत्पल मुब। 6 हुजु रहस्यइ तम्मी चु य्हीन्ब, यहुदी अय्हीन्बे म्हीमाचेएनो ज्यबे सम्तर् ग्यम्से यहुदीमाचे र्हङ्लेनो पर्मेस्वर्की मोलम्मा यङ्ब य्हीन्ब। यहुदी अय्हीन्बे म्हीमाएनो ल्हीः गीःकी अङ्ग य्हीन्ब, ओसेम् पर्मेस्वर्चे येसु ख्रीस्ट्री न्हङ्जेत्प बी सुङ्जेत्बे बाचा अनुसार् थेङ्यीमा जम्मचेनो यङ्ब। 7 पर्मेस्वर्चे थेङ्की सक्ती ग्यम्से ङतेङ् लक् स्य्हेङ्जेत्ज्यी ओसेम् थेङकी अनुग्रह ग्यम्से थेङ्चे ङत ल्हो-ल्हो म्हीमात ज्यबे सम्तर् स्येत्पे लक् न्हङ्जेत्ज्यी। 8 पर्मेस्वर्की म्हीमान्हङ्री ङ गोदोब्न्हङ्री लक् अतबे म्ही तलेएनो ख्रीस्ट्की दप्ज्यीम् दप्प अखम्बे सम्पत्तीइ ज्यबे सम्तर् यहुदी अय्हीन्बे म्हीमात स्येत्पे लक् पर्मेस्वर्की अनुग्रह ग्यम्से थेङ्चे ङत न्हङ्जेत्ज्यी। 9 ओसेम् जम्मनो स्हेःमा स्य्हेङ्जेत्पल पर्मेस्वर्नो य्हीन्ब। थेङ्चे चुःब य्हङ्सेनो र्हङ्की सेम् न्हङ्की रहस्यइ तम्मा छुम्ज्यीम् थेन्जेत्पल मुबल, तर देरेम् थेङ्चे हुजु तम्मा जम्मनो म्हीमात स्येत्पे लक्की जीम्मा ङत न्हङ्जेत्पल मुब। 10 पर्मेस्वर्की उदेस्येमी तीन्हम्स्योइ मन्डली ग्यम्से थेङ्की य्हक्को थोइ बुद्दी स्वर्गइ सासक्मातेङ् अधीकार् स्य्हेङ्बलमाचे स्येःखइ पङ्ब य्हीन्ब। 11 पर्मेस्वर्चे चु जम्मनो जम्बुलीङ् स्य्हेङ्जेत्प बीम ङोन्ग्यम्नो स्य्हेङ्ब पङज्यीम् योजना लजेत्ज्यी, ओसेम् हुजु अनुसार् ङ्य्हङ्माकी प्रभु येसु ख्रीस्ट् ग्यम्से पुरा तनलजेत्ज्यी। 12 ओसेम् ङ्य्हङ्मा ख्रीस्ट्री तज्यीम् ओसेम् थेङ्री बीस्वास् लज्यीम्नो ङ्य्हङ्माचे पर्मेस्वर्की ङोन्री ङ्यीबे आर्तेङ् भर् यङ्बल मुब। 13 होत्तज्यीम् ङ एङ्यीमात फ्या लब, एङ्यीमाकी लागीरी ङचे नाबे दुख म्रङ्ज्यीम् एङ्यीमा थछेरो। तलेपङ्सम् चुमी एङ्यीमाकी लागीरी ज्यब तनलबे तम् य्हीन्ब। ख्रीस्ट्की म्होइब 14 होत्तज्यीम् पर्मेस्वर् अपइ ङोन्री ङ पुइ जुःज्यीम् प्रार्थना स्य्हेङ्ब, 15 थेङ् ग्यम्सेनो जम्बुलीङ्तेङ् स्वर्गरी मुबे जम्मनो म्हेम्यमात स्य्हेङ्जेत्ज्यी। 16 ङ पर्मेस्वर्त प्रार्थना स्य्हेङ्ब, थेङ्की महीमाकी सम्पती अनुसार् थेङ्की आत्मा ग्यम्से एङ्यीमात सक्ती न्हङ्जेत्स्ये मुब ओसेम् एङ्यीमाकी सेम् य्हक्को कोङ्नलब। 17 ओसेम् एङ्यीमाचे ख्रीस्ट्त बीस्वास् स्य्हेङ्बल तज्यीम्, ङ प्रार्थना स्य्हेङ्ब ख्रीस्ट् एङ्यीमाकी सेम्री स्य्हुजेत्स्यीनो टीखइ। हुजुलीप्चे एङ्यीमा पर्मेस्वर्की म्होइबरी दोङ्बोइ टा नुप्नले ङ्यीब र्हङ्ले ओसेम् कोङ्नले यु:बे जग र्हङ्ले कोङ्ज्यीम् टीखइ। होत्तज्यीम्, ङ प्रार्थना स्य्हेङ्ब की एङ्यीमातेङ् 18 पर्मेस्वर्की जम्मनो म्हीमातेङ् ख्रीस्ट्की म्होइब गत्ते र्हीङ्ब, गत्ते ब्लेक्प, गत्ते नोब ओसेम् गत्ते नुप्प मुब बी ज्यनले गोब खम्स्ये मुब। 19 म्हीइ ज्ञान्चे गोब म्हइम टोप्ले गोब अखम्बे ख्रीस्ट्की म्होइबत एङ्यीमाचे गोबखमो, ओसेम् एङ्यीमाकी जम्मनो स्वभाबमा पर्मेस्वर्ल र्हङ्ब तब खम्खइ। 20 पर्मेस्वर्चे ङ्हच्छ्यङ् सक्ती ग्यम्से ङ्य्हङ्मान्हङ् लक् स्य्हेङ्जेत्प। ङ्य्हङ्माचे र्हीत्पतेङ् म्हेन्ब बीमएनो झेन् य्हक्को हुजु ङ्हच्छ्यङ् सक्ती ग्यम्से थेङ्चे न्हङ्जेत्प खम्ब। 21 पर्मेस्वर्तनो मन्डलीतेङ् येसु ख्रीस्ट्री खेम पङ्लेनो महीमा तखइ। आमेन्। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.