एफीसी 2 - पश्चिम तामाङख्रीस्ट्री सोबल 1 एङ्यीमाचे पर्मेस्वर्चे कुल्जेत्पे अर्तीमा अङ्येन् ओसेम् पाप्मा स्य्हेङ्बल तज्यीम् ङोन्ग्यम् एङ्यीमाकी आत्मीक् जीवन् स्यीबल मुबल। 2 हुजु बेलोरी एङ्यीमा जम्बुलीङ्की अज्यबे पेठीम्मा ङ्येन्ज्यीम् ओसेम् म्हङ्माकी य्हुल्री राज्य स्य्हेङ्बे सैतान्की तम् ङ्येन्ज्यीम् ब्रटीब मुबल। ओसेम् पर्मेस्वर्चे कुल्जेत्पे तम्मा अङ्येन्बे म्हीमात हुजु सैतान्चे देरेएनो र्हङ्की अधीन्री थेन्बल मुब। 3 ङ्य्हङ्मा जम्मनो तीख्यप् थेङ्यीमा र्हङ्बनो मुबल ओसेम् र्हङ्की ल्हीःतेङ् सेम्चे ता स्य्हेङ्गे म्हेन्ज्यी हुजु स्य्हेङ्ज्यीम् पाप्की ग्यम्री ब्रब मुबल। ओसेम् ङ्य्हङ्माकी होतेबे स्वभाब अनुसार्मी ल्हो-ल्हो म्हीमाचे र्हङ्ले ङ्य्हङ्माचेएनो पर्मेस्वर् ग्यम्से सजाय नाथोस्ये मुबल। 4 तर कृपारी बरु पर्मेस्वर्चे ङ्य्हङ्मात य्हक्को म्होइजेत्ज्यी। 5 ङ्य्हङ्मा पाप्चे लज्यीम् आत्मीक् जीवन्री स्यीबल तलेएनो थेङ्चे ङ्य्हङ्मात ख्रीस्ट्तेङ् बक्च्य सोनलजेत्ज्यी। पर्मेस्वर्की अनुग्रहचेनो एङ्यीमा थर्बल य्हीन्ब। 6 ओसेम् थेङ्चे ङ्य्हङ्मात ख्रीस्ट्तेङ् बक्च्य सोनलजेत्ज्यी ओसेम् स्वर्गरी येसु ख्रीस्ट्तेङ् बक्च्य टीबुङ्जेत्ज्यी। 7 चुमी थेङ्चे खेम पङ्लेनोइ लागीरी थेङ्की ङ्हच्छ्यङ् अनुग्रह म्हीमात ङोन्जेत्परी स्य्हेङ्जेत्ज्यी। चु अनुग्रह थेङ्चे र्हङ्की म्होइब ग्यम्से येसु ख्रीस्ट्री ङ्य्हङ्मात ङोन्जेत्पल मुब। 8 तलेपङ्सम् पर्मेस्वर्की अनुग्रहचे लज्यीम्नो बीस्वास् ग्यम्से एङ्यीमाचे थर्ब यङ्बल य्हीन्ब, ओसेम् चु एङ्यीमाकी लक्मा ग्यम्से अय्हीन्, तर पर्मेस्वर्की बर्दान् य्हीन्ब। 9 चु एङ्यीमाचे स्य्हेङ्बे ज्यबे लक् ग्यम्से तबल अय्हीन्, होत्तज्यीम् खल्चेएनो घमन्ड स्य्हेङ्ब अखम्। 10 तलेपङ्सम् ङ्य्हङ्माचे ज्यबे लक्मा स्य्हेङ्बे लागीरी पर्मेस्वर्चे ङ्य्हङ्मात येसु ख्रीस्ट्री छार् म्ही स्य्हेङ्जेत्ज्यी। ङ्य्हङ्माचे हुजु अनुसार् ब्रखइ पङ्ज्यीम् पर्मेस्वर्चे ङोन्ग्यम्नो हुजु ज्यबे लक्मा टोप् लजेत्पल मुबल। ख्रीस्ट्री गीः तबल 11 होत्तज्यीम् एङ्यीमाचे र्हङ् यहुदी अय्हीन्ब मुबल पङ्बे तम् थम्लेदो। ङोन्ग्यम् ल्हीःरी खतना स्य्हेङ्बे यहुदीमाचे एङ्यी यहुदी अय्हीन्बे म्हीमात खतना अस्य्हेङ्बे म्हीमा पङ्ब मुबल। 12 हुजु बेलोरी एङ्यीमा ख्रीस्ट् ग्यम्से फेःबल मुबल, इस्राएलकी नागरीक् अय्हीन्ब मुबल, ओसेम् पर्मेस्वर्चे र्हङ्की म्हीमात न्हङ्ब बी सुङ्ज्यीम् स्य्हेङ्बे करारमारीएनो एङ्यीमाल तइ हकएनो अरेबल मुबल। होत्तज्यीम् एङ्यीमा चु जम्बुलीङ्री आस् अरेबलतेङ् पर्मेस्वर् अस्येःबे म्हीमा मुबल। 13 तर देरेम् एङ्यीमा येसु ख्रीस्ट्तेङ् गीः तबल मुब। एङ्यीमा ङोन्ग्यम् पर्मेस्वर् ग्यम्से थारीङ् मुलेएनो देरेम् ख्रीस्ट्की काचे लज्यीम् थेङ्की रेइरी बबल मुब। 14 तलेपङ्सम् थेङ् ग्यम्सेनो ङ्य्हङ्माचे सान्ती यङ्बल मुब। थेङ्चेनो यहुदीतेङ् यहुदी अय्हीन्बे म्हीमात गीः स्य्हेङ्जेत्पल मुब, ओसेम् ङ्य्हीतनो फेःज्यीम् सत्तुर् तनलबे कउरुत फुप्लाजेत्पल मुब। 15 थेङ्चे इस्राएलीमातेङ् ल्हो-ल्हो जात्की म्हीमात डीःनलबरी ओसेम् थेङ्री छार् म्हीमाइ समुह गीः स्य्हेङ्बरी थेङ् ल्हीःरी स्यीजेत्ज्यीम् मोसाचे ब्रीबे नीयम्तेङ् हुजु पेठीम्मात खारेज् तनलजेत्ज्यी। 16 ओसेम् थेङ् क्रुस्री स्यीजेत्ज्यीम् ङ्य्हीतनो पर्मेस्वर्तेङ् डीःन लज्यीम् ङ्य्हीकी गुङ्री तबे अथुन्बत नास् लजेत्ज्यी। 17 थेङ् ब्योन्खज्यीम् पर्मेस्वर्की थारीङ् मुबे एङ्यी यहुदी अय्हीन्बे म्हीमातेङ् पर्मेस्वर्की ज्यदङ् मुबे यहुदीमा जम्मतनो डीःनलबे ज्यबे सम्तर् स्येत्जेत्ज्यी। 18 ओसेम् थेङ् ग्यम्सेनो यहुदीतेङ् यहुदी अय्हीन्बे म्हीमा ङ्य्हङ् जम्मनो थो गीःइ पबीत्र आत्मारी पर्मेस्वर् अपइ ङोन्री ङ्यीम्यङ्बल मुब। 19 होत्तज्यीम् देरेम् एङ्यी यहुदी अय्हीन्बे म्हीमा बीदेसीतेङ् अस्य्हेःबे म्हीमा अय्हीन्, तर एङ्यीमामी परमेस्वर्की म्हीमातेङ् गीः तज्यीम् पर्मेस्वर्की दीम्की म्हेम्यमा तबल मुब। 20 प्रेरीत्मातेङ् अगम्बक्तमा जग् य्हीन्ब ओसेम् एङ्यीमामी हुजु जग्री स्य्हेङ्बे दीम् य्हीन्ब। ओसेम् जग्की सुर् युङ्बमी येसु ख्रीस्ट्नो य्हीन्ब। 21 थेङ्री दीम्की जम्मनो थोमा ठीक्ले थुत्प, ओसेम् प्रभुरी पबीत्र दीम् तबरी जम्मनो थोमा य्हक्को तस्यीनो बोर्ब। 22 एङ्यीमाएनो थेङ्री ल्हो-ल्होमा जम्मतेङ् बक्च्य हुजु दीम् तटीब मुब, ओसेम् हुजुरी पर्मेस्वर् थेङ्की आत्मारी स्य्हुजेत्प। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.