एफीसी 1 - पश्चिम तामाङ1 पर्मेस्वर्की थुः अनुसार् येसु ख्रीस्ट्की प्रेरीत ङ पावल ग्यम्से एफीसस सहर्री टीबे ओसेम् येसु ख्रीस्ट्त बीस्वास् स्य्हेङ्बे पबीत्र म्हीमात चु चीठी ब्रीटीब मुब। 2 ङ्य्हङ्की पर्मेस्वर् अप ओसेम् प्रभु येसु ख्रीस्ट्चे एङ्यीमात अनुग्रहतेङ् सान्ती न्हङ्खइ। आत्मीक् मोलम् 3 ङ्य्हङ्की प्रभु येसु ख्रीस्ट्की अप पर्मेस्वर्त तोप्प तखइ। तलेपङ्सम् पर्मेस्वर्चे ङ्य्हङ्मात येसु ख्रीस्ट् ग्यम्से स्वर्गइ जम्मनो आत्मीक् मोलम्मा न्हङ्जेत्पल मुब। 4 थेङ्की ङोन्री पबीत्रतेङ् तइ दोस्एनो अरेबल तखइ पङ्ज्यीम् पर्मेस्वर्चे ङ्य्हङ्मात ख्रीस्ट् ग्यम्से चु जम्बुलीङ् स्य्हेङ्ब बीम ङोन्ग्यम् य्हङ्सेनो दम्जेत्पल य्हीन्ब। 5 पर्मेस्वर्चे ङ्य्हङ्मात म्होइजेत्ज्यीम् येसु ख्रीस्ट् ग्यम्से य्हक्को बेलो ङोन्नो थेङ्की ज जमेमा स्य्हेङ्जेत्पे थुः लजेत्पल मुबल। 6 पर्मेस्वर्चे र्हङ्की म्होइबे ज ग्यम्से ङ्य्हङ्मात ओलेनो न्हङ्जेत्पे महीमाचे प्लीङ्बे अनुग्रहकी लागीरी ङ्य्हङ्माचे पर्मेस्वर्त तोप्के। 7 पर्मेस्वर्की ङ्हच्छ्यङ् अनुग्रह अनुसार ख्रीस्ट्की का ग्यम्से ङ्य्हङ्माचे स्वतन्त्र यङ्बल मुब, ओसेम् ङ्य्हङ्माचे पाप्की क्षम यङ्बल मुब। 8 होले थेङ्चे ङ्य्हङ्मात य्हक्को अनुग्रह न्हङ्जेत्ज्यी, ओसेम् ङ्य्हङ्मात बुद्दी मुबे म्हीमातेङ् गोब खम्बे म्हीमा स्य्हेङ्जेत्ज्यी। 9 पर्मेस्वर्चे ख्रीस्ट्री थेन्जेत्पे उदेस्ये अनुसार् थेङ्चे र्हङ्की रहस्यइ योजनामा ङ्य्हङ्मात स्येःनलेजत्पल मुब। 10 ओसेम् पर्मेस्वर्चे र्हङ्चे तेत् लबे बेलो टोप् तबतेङ् स्वर्गतेङ् जम्बुलीङ्री मुबे जम्मनो स्हेमात ख्रीस्ट्की अधीन्री नोम्खजेत्प। 11 तलेपङ्सम् ङ्य्हङ्मा ख्रीस्ट्तेङ् गीः तबल तज्यीम् पर्मेस्वर्चे ङ्य्हङ्मात थेङ्की म्हीमा तबे लागीरी ङ्य्हङ्मात दम्जेत्पल मुब। होले स्य्हेङ्बे थुः थेङ्चे य्हक्को बेलो ङोन्ग्यम्नो लजेत्ज्यी। चुमी थेङ्चे योजना स्य्हेङ्जेत्प अनुसार् मुबल। थेङ्चे र्हङ्चे थुः लजेत्पतेङ् योजना लजेत्प अनुसार् जम्मनो तम्मा टोप् लजेत्प। 12 होलेनो ङ्यीमा ख्रीस्ट्री ङोन्ग्यम् आस् थेन्बे यहुदी म्हीमात पर्मेस्वर्चे र्हङ्की महीमात तोप्खइ बी दम्जेत्ज्यी। 13 देरेम् एङ्यी यहुदी अय्हीन्बलमाचेएनो देमेन्की मुक्ती न्हङ्बे ज्यबे सम्तर् थ्येःज्यीम् ख्रीस्ट्त बीस्वास् लज्यी। होत्तज्यीम् पर्मेस्वर्चे एङ्यीमात र्हङ्ल य्हीन्ब पङ्ज्यीम् ङोन्बरी एङ्यीमात पीन्ब पङ्ज्यीम् बाचा लजेत्पे पबीत्र आत्माइ छाप् न्हङ्जेत्ज्यी। 14 ङ्य्हङ्मा पर्मेस्वर् अपइ म्हीमाचे यङ्थोबे पुरा स्वतन्त्र अयङ्गदे, पर्मेस्वर्चे बाचा लजेत्पे जम्मनो तम्मा देमेन्नो न्हङ्जेत्प पङ्ज्यीम् थेङ्चे ङ्य्हङ्मात पबीत्र आत्मा बैन न्हङ्जेत्पल य्हीन्ब। ङ्य्हङ्की महीमीत् पर्मेस्वर्त तोप्के। पावलचे व्होर्छ्ये पीन्ज्यीम् स्य्हेङ्बे प्रार्थना 15 एङ्यीमाचे प्रभु येसुत स्य्हेङ्बे बीस्वास् ओसेम् एङ्यीमाचे पर्मेस्वर्की जम्मनो म्हीमात म्होइब पङ्बे तम् ङचे थ्येःबल तज्यीम्, 16 ङ एङ्यीमाकी लागीरी पर्मेस्वर्त खेम पङ्लेनो व्होर्छ्ये पीन्स्यीनो टीब। चोले ङचे एङ्यीमात ङइ प्रार्थनारी व्हल् लस्यीनो टीब। 17 ङ्य्हङ्की प्रभु येसु ख्रीस्ट्की पर्मेस्वर्, महीमाकी अपचे एङ्यीमात थेङ्की आत्मा न्हङ्जेत्खइ बी ङ प्रार्थना स्य्हेङ्ब। हुजु आत्माचे एङ्यीमात आत्मीक् बुद्दी न्हङ्स्ये मुब ओसेम् एङ्यीमात पर्मेस्वर् ङोन्जेत्स्ये मुब, होलेतज्यीम् एङ्यीमाचे थेङ्त झेन् ज्यनले स्येःस्ये मुब। 18 ओसेम् एङ्यीमाकी सेम्की मीःचे थेङ्की य्हल् म्रङ्ब खम्खइ, ओसेम् पर्मेस्वर्चे एङ्यीमात तइ आस् लजेत्ज्यीम् ङ्होत्जेत्ज्यी हुजु एङ्यीमाचे गोखइ, ओसेम् थेङ्चे र्हङ्की म्हीमात न्हङ्जेत्प बी बाचा लजेत्पे आत्मीक् मोलम्मा गत्ते य्हक्को ङ्हच्छ्यङ् मुब पङ्बे तम् एङ्यीमाचे स्येःखइ बी ङ प्रार्थना स्य्हेङ्ब। 19-20 ओसेम् ङ्य्हङ् ख्रीस्ट्त बीस्वास् स्य्हेङ्बलमाकी लागीरी पर्मेस्वर्की सक्ती गदे ङ्हच्छ्यङ् मुब पङ्बे तम् एङ्यीमाचे गोब खम्खइ बी प्रार्थना स्य्हेङ्ब। हुजु सक्ती ग्यम्से पर्मेस्वर्चे ख्रीस्ट्त स्यीब ग्यम्से सोनलजेत्ज्यी, ओसेम् स्वर्गरी र्हङ्की केत् फ्या पट्टीचे टीबुङ्जेत्ज्यी। 21 ओसेम् ख्रीस्ट्चे सासन् स्य्हेङ्बलमा, अधीकार् मुबलमा ओसेम् सक्ती मुबलमातेङ् राज्य स्य्हेङ्बलमा जम्माइ जोरी सासन् स्य्हेङ्जेत्प। ओसेम् थेङ्चे चु बेलोरीकीनो अय्हीन् तर लीक्यम् खबे बेलोरीएनो सासन् स्य्हेङ्जेत्प। 22 पर्मेस्वर्चे जम्मनो स्हेःमा ख्रीस्ट्की अधीन्री थेन्पीन्जेत्ज्यी, ओसेम् मन्डलीइ लागीरी थेङ्तनो जम्मनो स्हेःमाकी क्र स्य्हेङ्पीन्जेत्ज्यी। 23 मन्डली ख्रीस्ट्की ल्हीः य्हीन्ब, मन्डलीत थेङ्चेनो प्लीङ्नलजेत्प ओसेम् थेङ्चेनो मन्डलीत पुरा तनलजेत्प। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.