कलस्सी 4 - पश्चिम तामाङ1 मालीक्मा, एङ्यीमाकी योक्पोमात बेख्ले अलनले ज्यब स्य्हेङो, तलेपङ्सम् एङ्यीमालएनो स्वर्गरी र्हङ्की मालीक् मुब पङ्बे तम् थम्लेतो। ल्हो-ल्हो अर्तीइ तम्मा 2 एङ्यीमा खेम पङ्लेनो चोङ् लज्यीम् प्रार्थना स्य्हेङ्स्यीनो टीज्यीम् पर्मेस्वर्त व्होर्छ्ये पीनो। 3 ओसेम् ख्रीस्ट्की छुम्ज्यीम थेन्बे ज्यबे सम्तर्की बारेरी म्हीमात स्येत्परी पर्मेस्वर्चे ङ्यीमात मौक न्हङ्जेत्खइ पङ्ज्यीम् ङ्यीमाकी लागीरीएनो प्रार्थना स्य्हेङ्पीनो, हुजुइ लागीरीनो ङ जेल्री च्युप्पल मुब। 4 ङचे खले चु तम्मा म्हीमाचे गोनले प्रचार् स्य्हेङ्थोःब होलेनो स्य्हेङ्ब खम्खइ बी ङइ लागीरी प्रार्थना स्य्हेङ्पीनो। 5 एङ्यीमा ख्रीस्ट्त बीस्वास् अस्य्हेङ्बे म्हीमातेङ् मुबे बेलोरी एङ्यीमाचे थेङ्यीमातेङ् बुद्दी मुबे म्हीचे र्हङ्ले ब्यबहार् स्य्हेङो, ओसेम् एङ्यीमाचे यङ्बे जम्मनो मौक स्योर्न थलउ। 6 एङ्यीमाचे पङ्बे तम् खेम पङ्लेनो ज्यबतेङ् ङ्येन्गे म्हेन्बल तथोब, होले एङ्यीमाचे जम्मतनो खले जोहप् पीन्थोब बी ज्यनले स्येःखइ। ज्यु:की लस्सो 7 ङ्य्हङ्की म्होइबे अले तुखीकसचे एङ्यीमात ङइ बारेरी जम्मनो तम्मा स्येत्स्ये मुब। थे ङ्यीमातेङ् बक्च्य प्रभुइ लक् स्य्हेङ्बे बीस्वासीलो अले य्हीन्ब। 8 एङ्यीमाचे ङ्यीमाकी बारेरी स्येःखइ पङ्ज्यीम् ङचे थेत एङ्यीमाज पीत्खटीब, ओसेम् थेचे एङ्यीमाकी सेम्री आर् खनलखइ पङ्ज्यीम् य्हीन्ब। 9 थेतेङ् बक्च्य ओनेसीमसएनो खटीब, थे एङ्यीमान्हङ्लनो गीः य्हीन्ब, ओसेम् थे बीस्वासीलोतेङ् ङ्य्हङ्माचे म्होइबे अले य्हीन्ब। थेङ्हीचेनो चुरी तबे जम्मनो तम्मा एङ्यीमात स्येत्स्ये मुब। 10 ङतेङ् बक्च्य जेल्री मुबे अरीस्तार्खस्चे एङ्यीमात लस्सो पीत्खबल मुब। बारनाबासकी म्हेम्य मर्कुस्चेएनो लस्सो पीत्खबल मुब। थेइ बारेरी ङचे ङोन्ग्यम्नो एङ्यीमात पङ्ज्यीन्बल मुब, थे खबतेङ् ज्यनले स्वागत स्य्हेङो। 11 युस्तस् मीन् मुबे येसुचेएनो एङ्यीमात लस्सो पीत्खबल मुब। पर्मेस्वर्की य्हुल्की लागीरी ङतेङ् बक्च्य लक् स्य्हेङ्बे यहुदी बीस्वासीमा थेङ्यी सोम्कीनो य्हीन्ब। ओसेम् थेङ्यी सोम्चे लज्यीम् ङइ सेम्री य्हक्को आर् खबल मुब। 12 येसु ख्रीस्ट्की लक् स्य्हेङ्बे एङ्यीमान्हङ्की इपाफ्रास पङ्बे अलेचेएनो लस्सो पीत्खबल मुब। थेचे एङ्यीमाकी लागीरी खेम पङ्लेनो प्रार्थना स्य्हेङ्स्यीनो टीब। पर्मेस्वर्चे थुः लजेत्पे जम्मनो तम्मा एङ्यीमाचे ज्यनले ङ्येन्ज्यीम् च्यीप्पे बीस्वासीमा तखइ पङ्बे प्रार्थना थेल मुब। 13 थेचे एङ्यीमाकी लागीरीतेङ् लाउडीकीया ओसेम् हीरापोलीस्री टीबे बीस्वासीमाकी लागीरी य्हक्को दुख लज्यीम् लक् स्य्हेङ्बल मुब पङ्बे तम्की साक्षी ङनो य्हीन्ब। 14 ङ्यीमाचे म्होइबे डाक्टर लुका ओसेम् डेमासचेएनो एङ्यीमात लस्सो पीत्खबल मुब। 15 लाउडीकीयारी मुबे बीस्वासीमात, ओसेम् नुम्फास् अनतेङ् थेइ दीम्री र्हुब तबे मन्डलीत ङइ लस्सो पङ्पीनो। 16 एङ्यीमाचे चु चीठी खेत्प बुत्प बीसेम् लाउडीकीयारी मुबे बीस्वासीमातएनो खेत्पुङो। होलेनो ङचे लाउडीकीयाकी बीस्वासीमात ब्रीबे चीठीएनो एङ्यीमाचे खेतो। 17 ओसेम् अर्खीपास्त, “प्रभुचे एत न्हङ्जेत्पे लक् पुरा स्य्हेङो” बी पङ्पीनो। 18 ङ पावलचे र्हङ्की याचेनो एङ्यीमात लस्सो पङ्ज्यीम् ब्रीबल य्हीन्ब। ओसेम् ङ जेल्रीनो मुब पङ्बे तम् थम्लेतो। पर्मेस्वर्की अनुग्रह एङ्यीमातेङ् तखइ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.